Storia di Bida

Sirbi cu un Spirito di Sacrificio Propio

SEGUN E RELATO DI DON RENDELL

Mi mama a muri na 1927, tempo cu mi tawatin solamente cinco aña. Toch, su fe tawatin hopi influencia riba mi bida. Con esei tawata posibel?

MI MAMA tawata un miembro fiel di Iglesia di Inglatera ora el a casa cu mi tata, un solda profesional. Esei tawata prome cu Prome Guera Mundial. E guera aki a cuminsa na 1914, y Mama a cuestiona e echo cu su vicario tawata uza preekstoel di misa pa recluta solda pa forma parti di ehersito. Kico e pastor a contesta? “Bai cas, y no precupa bo cabes cu e tipo di preguntanan ei!” Mama no a keda satisfecho cu esei.

Na 1917 ora e guera tawata den tur su furia, Mama a bai wak e “Foto-Drama di Creacion.” Combenci cu el a haya e berdad, mesora el a bandona su iglesia y a bai asocia cu e Studiantenan di Bijbel, manera Testigonan di Yehova tawata conoci e tempo ei. El a asisti na e reunionnan na un congregacion na Yeovil, e stad mas cerca di nos pueblo di West Coker, den e provincia Ingles di Somercet.

No a dura masha cu Mama a comparti su fe nobo cu tres di su ruman mohenan. Rumannan mas grandi den congregacion Yeovil a conta mi con mi mama y su ruman mohe Millie cu celo a core bais rond nos teritorio grandi di cunucu pa reparti e publicacion pa studia Bijbel, Studio di e Scritura. Pero lamentablemente, Mama a pasa e ultimo 18 lunanan di su bida na cama cu tuberculosis. E tempo ei no tawatin cura pa e malesa aki.

Sacrificio Propio den Practica

Tanta Millie, kende tawata biba hunto cu nos e tempo ei, a cuida Mama ora el a bira  malo y a percura pa ami y mi ruman mohe di shete aña, Joan. Ora Mama a muri, mesora Tanta Millie a ofrece su mes pa percura pa nos cu tawata mucha. Tata tawata contento pa haya alivio di e responsabilidad aki, y mesora el a bai di acuerdo pa Tanta Millie keda biba cerca nos.

Nos a haya mas amor pa nos tanta y nos tawata contento cu el a keda cerca nos. Pero dicon el a tuma e decision ei? Hopi aña despues, Tanta Millie a conta nos cu el a sinti cu e tawatin e obligacion di edifica riba e fundeshi cu Mama a pone, esta, di siña ami cu Joan e berdad di Bijbel. Pasobra el a realisa cu nos tata lo no haci esei nunca, ya cu e no tawata interesa den religion.

Siguientemente, nos a haya sa tambe cu Tanta Millie a tuma un otro decision masha personal. Pa e por a cuida nos bon, el a dicidi di no casa nunca. Esei si ta sacrificio propio! Ami cu Joan tin tur motibo pa ta masha gradicido na dje. Nos a keda corda tur loke Tanta Millie a siña nos y tambe su excelente ehempel.

Tempo pa Tuma Decision

Ami cu Joan tawata asisti na e scol di bario di Iglesia di Inglatera. Tanta Millie a mustra e cabes di scol nos posicion firme relaciona cu nos educacion religioso. Ora cu e otro muchanan ta marcha bai misa, nos tawata bai cas, y ora e vicario tawata bin duna les di religion, nan tawata pone nos sinta apart y duna nos texto di Bijbel pa siña for di cabes. Esaki a resulta util pa mi, ya cu e pasashinan aki a keda permanentemente fiha den mi mente.

Cu 14 aña mi a kita for di scol y a traha cuater aña como aprendis den un fabrica local di keshi. Tambe mi a siña toca piano, y musica y baile di sala a bira mi hobi. Maske e berdad di Bijbel a saca raiz den mi curason, ainda e no tawata motiva mi. Anto un dia den maart 1940, un Testigo di edad a invita mi pa bai un asamblea cu ne na Swindon, rond di 110 kilometer mas leu. Ruman Albert D. Schroeder, e sirbido cu tawata guia e obra di Testigonan di Yehova na Gran Bretania, a duna e discurso publico. E asamblea ei tawata un punto crucial den mi bida.

Segundo Guera Mundial tawata andando. Kico mi tawata haci pa bida? Mi a dicidi di cuminsa bai e Salon di Reino di Yeovil bek. Durante e prome reunion na cua mi a asisti, nan a introduci e trabou di predica riba caya. Maske mi no tawatin masha conocemento, mi a ofrece mi mes pa participa den e actividad aki. Mi supuesto amigonan a keda sorprendi y nan a tenta mi ora nan a pasa mira mi!

Na juni 1940 mi a batisa den e stad di Bristol. Menos cu un luna despues mi a cuminsa traha como pionero regular, un predicado di tempo completo. Mi a keda masha contento ora, djis despues, mi ruman mohe tambe a simbolisa su dedicacion mediante bautismo den awa!

Traha Pionero den Tempo di Guera

Un aña despues cu guera a cuminsa, nan a manda yama mi pa drenta ehersito. Door cu mi a registra mi mes na Yeovil como un persona cu ta contra di guera pa motibo di consenshi, mi mester a aparece den un corte na Bristol. Mi a join John Wynn den e trabou di pionero na Cinderford, Gloucestershire, y  despues na Haverfordwest y Carmarthen, Wales. * Despues den e sesion di corte na Carmarthen, mi a ser condena na tres luna di prizon na Swansea y mester a paga un but di mas o menos 65 florin, un suma di placa considerabel pa e tempo ei. Despues, door cu mi no a paga e but, mi a ricibi un di dos termino di tres luna di prizon.

Na e di tres sesion den corte, nan a puntra mi: “Bo no sa cu Bijbel ta bisa, ‘duna Cesar loke ta di Cesar’?” Mi a contesta: “Si, mi sa esei, pero permiti mi finalisa e versiculo. E ta bisa: ‘y Dios loke ta di Dios.’ Y esei ta loke mi ta haciendo.” (Mateo 22:21) Despues di un par di siman, mi a ricibi un carta cu a informa mi cu mi a keda absolve di tur obligacion pa servicio militar.

Na principio di 1945, mi a haya invitacion pa join e famia di Betel na Londen. E siguiente winter, Nathan H. Knorr, kende tawata hiba delantera den e trabou mundial di predica, y su secretario Milton G. Henschel a bishita Londen. Mi tawata entre e ocho ruman hombernan hoben di Gran Bretania cu tawata inscribi pa e di ocho klas di e Scol Biblico di Galad di Watchtower.

Asignacionnan di Misionero

Dia 23 di mei 1946, nos a sali riba un barco di carga for di e haf chikito di Cornwall, Fowey. E capitan di haf, Capitan Collins, tawata un Testigo di Yehova, y ora nos tawata sali for di haf, el a laga e sirena zona. Claro cu nos tur tawatin sintimentonan mixto ora nos tawata mira costa di Inglatera perde den horizonte. E biahe pa crusa lama Atlantico tawata hopi turbulento, pero despues di 13 dia nos a yega Merca sano y salvo.

E asamblea internacional Asamblea Teocratico Nacionnan Alegre na Cleveland, Ohio, tawata un experencia inolvidabel pa nos. El a dura ocho dia, di 4 te cu 11 di augustus 1946. Tawatin ocho mil delegado presente, incluso 302 persona di 32 otro pais. Na e congreso ei, Spierta! * a haci su entrada. Tambe a presenta e buki pa studia Bijbel, “Laga Dios Sea Haya Berdadero” na e multitud entusiasma.

Na 1947 nos a gradua na Galad, y ami cu Bill Copson a haya asignacion pa bai Egipto. Pero prome cu nos a bai, Richard Abrahamson a entrena mi bon den algun trabou di oficina na Betel na Brooklyn. Nos a desembarca na Alehandria, y mi a ahusta mi mes lihe na e estilo di bida di Medio Oriente. Sinembargo, siña Arabir si tawata un reto, y mi mester a uza carchi di duna testimonio den cuater idioma.

Bill Copson a keda shete aña, pero ami si mester a bandona e pais despues di un aña pasobra nan no kier a renoba mi visa. Mi ta recorda e aña ei di sirbishi di misionero como esun di mas productivo di mi bida. Mi tawatin e privilegio di conduci mas cu 20 studio di Bijbel tur siman, y algun di esnan cu a siña e berdad e tempo ei, ainda ta alaba Yehova  activamente. Di Egipto mi a ser asigna na Chipre.

Chipre y Israel

Mi a cuminsa siña un idioma nobo, Griego, y mi a familiarisa mi mes cu e dialecto local. Un poco tempo despues, nan a pidi Anthony Sideris pa e muda bai Grecia, y ami a ser encarga cu direccion di e trabou na Chipre. E tempo ei, e oficina di sucursal na Chipre tawata percura pa Israel tambe. Y de bes en cuando mi tawatin e privilegio, hunto cu otro rumannan, di bishita e poco rumannan cu tawatin einan.

Durante mi prome biahe na Israel, nos a tene un asamblea chikito den un restaurant na Haifa y tawatin un asistencia di 50 pa 60 hende. Door di a separa e gruponan nacional, nos a presenta e programa di asamblea den seis idioma! Na un otro ocasion na Jerusalem mi tawatin oportunidad di pasa un pelicula produci door di Testigonan di Yehova y duna un discurso publico. Y un corant na Ingles a duna un informe positivo tocante e discurso aki.

E tempo ei tawatin rond di 100 Testigo na Chipre, y nan mester a lucha duro pa nan fe. Multitudnan desordena dirigi door di pastornan di Iglesia Griego Ortodox a stroba nos asambleanan. Ora nos tawata predica den areanan di cunucu, nan tawata tira nos cu piedra, y esei tawata un experencia nobo pa mi. Mi mester a siña con pa hala kita lihe! Meimei di e oposicion violento ei, e echo cu mas misionero a ser asigna na e isla a fortalece nos fe. Dennis y Mavis Matthews hunto cu Joan Hulley y Beryl Heywood a join mi na Famagusta, mientras cu Tom cu Mary Goulden y Nina Constanti, un habitante di Chipre cu a nace na Londen, a bai Limassol. Na mesun tempo nan a manda Bill Copson tambe pa Chipre, y Bert cu Beryl Vaisey a join e despues.

Adaptando na Cambio di Sircunstancianan

Na fin di 1957, mi a bira malo y mi no por a sigui den mi asignacion di misionero. Cu tristesa na mi curason mi a dicidi cu pa mi bira bon mi mester a regresa Inglatera. Einan mi a sigui traha pionero te cu 1960. Mi ruman mohe y su casa tawatin e bondad di tuma mi den nan cas, pero sircunstancianan a cambia. Cosnan tawata birando mas y mas dificil pa Joan. Fuera di cu e mester a percura pa su casa y yiu mohe, durante e 17 añanan di mi ausencia, cu hopi amor el a cuida nos tata y Tanta Millie, kendenan e tempo ei tawata grandi caba y no tawata sinti masha bon. Mi a sinti e necesidad di sigui mi tanta su ehempel di sacrificio propio, pues mi a keda cerca mi ruman mohe te ora tanto mi tanta como mi tata a fayece.

Lo tawata facil pa establece mi mes na Inglatera, pero despues di un sosiego cortico mi a sinti cu mi tin cu regresa na mi asignacion. Apesar di tur cos, e organisacion di Yehova no a gasta hopi placa pa entrena mi? Pues, na 1972 mi a regresa Chipre riba mi mes gastonan pa bai traha como pionero atrobe.

Nathan H. Knorr a bini pa haci areglo pa tene un congreso e siguiente aña. Ora el a haya sa cu mi a regresa, el a recomenda pa nan nombra mi como superintendente di sircuito pa henter e isla. Mi tawatin e privilegio ei pa cuater aña. Sinembargo, esei no tawata un  asignacion facil pasobra mayoria bes mi mester a papia Griego.

Un Tempo di Problema

Ami cu Paul Andreou, un Testigo di Chipre di abla Griego, tawata biba den e mesun cas den e pueblo di Karakoumi, djis oost di Kirenia, na costa nort. E oficina di sucursal di Chipre tawata situa na Nicosia, sur di Seronan di Kirenia. Na principio di juli 1974, mi tawata na Nicosia ora tawatin un golpi di estado pa tumba Presidente Makarios, y mi a mira con candela a destrui su palacio. Ora tawata safe pa biaha atrobe, mi a core bai Kirenia bek, caminda nos a haci preparacion pa un asamblea di sircuito. Dos dia despues mi a tende e prome bom cai den haf, y shelo tawata yen di helicopter cu tawata trece trupanan invasor for di Turkia.

Door cu mi ta un ciudadano Britanico, e soldanan Turco a hiba mi den un zona pafo di Nicosia caminda personal di Nacionnan Uni a interoga mi, despues cu nan a tuma contacto cu e oficina di sucursal. Despues mi tawatin e tarea spantoso di pasa door di un boshi di kabel di telefon y coriente bruha den otro cu ta hiba na casnan bandona na otro banda di e tereno cu no tawata ocupa. Mi ta masha contento si cu nan no por a interumpi mi comunicacion cu Yehova Dios! Mi oracionnan a yuda mi pasa door di un di e experencianan di mas spantoso den mi bida.

Maske mi a perde tur mi pertenencianan, mi tawata contento cu mi por a haya refugio na oficina di sucursal. Sinembargo, e situacion aki no a dura masha. Denter di un par di dia, forsanan invasor a tuma control di un tercera parti di e seccion nort di e isla. Nos mester a bandona Betel y bai Limassol. Mi ta contento cu einan mi por a traha hunto cu un comite cu nan a forma pa percura pa 300 ruman afecta door di e turbulencia. Hopi di nan a perde nan cas.

Mas Cambio di Asignacion

Na januari 1981, e Cuerpo Gobernante a pidi mi pa bai Grecia pa join e famia di Betel na Atenas, pero pa fin di e aña ei, mi tawata na Chipre bek y mi a ser nombra como cordinado di e Comite di Sucursal. Andreas Kontoyiorgis y su casa, Maro, habitantenan di Chipre cu a ser manda for di Londen, a ‘curasha’ mi masha.—Colosencenan 4:11.

Na final di un bishita di zona cu Theodore Jaracz a haci na 1984, mi a ricibi un carta di Cuerpo Gobernante cu a bisa simplemente: “Ora cu ruman Jaracz caba, nos kier pa bo compañ’e bai Grecia.” Mi no a haya ningun splicacion pakico, pero ora nos a yega Grecia, nan a lesa un otro carta di e Cuerpo Gobernante pa e Comite di Sucursal. E carta a bisa cu mi a ser nombra como cordinado di e Comite di Sucursal di e pais ei.

E tempo ei, tawatin un ola di apostasia na Grecia. Tambe nan tawata acusa nos hopi di ta comberti hende ilegalmente. Tur dia nan tawata aresta hende di e pueblo di Yehova y  hiba nan corte. Mi tawatin e privilegio di topa rumannan cu a wanta y mantene nan integridad bou di prueba! Despues Corte pa Derechonan Humano di Europa a atende algun di e casonan ei cu tremendo resultado, y esaki tawatin un bon efecto riba nos trabou di predica na Grecia. *

Tempo mi tawata sirbi na Grecia, mi tawatin oportunidad di asisti na congresonan memorabel na Atenas, Tesalonica y e islanan Rodas y Creta. Esakinan tawata cuater aña felis y fructifero, pero tawatin un otro cambio na caminda: regreso na Chipre na 1988.

Na Chipre y Bek na Grecia

Durante mi ausencia na Chipre, e rumannan a adkiri un edificio nobo pa sucursal na Nissou, un par di kilometer leu for di Nicosia. Ruman Carey Barber di sede mundial di Testigonan di Yehova na Brooklyn a duna e discurso di dedicacion. Awor cosnan tawata mas trankil riba e isla, y mi tawata contento di a bolbe bek. Pero e situacion lo a cambia pronto.

E Cuerpo Gobernante a aproba e plannan pa construi un cas di Betel nobo na Grecia, algun kilometer nort di Atenas. Door cu mi por a papia tanto Ingles como Griego, na 1990 mi a haya invitacion pa bolbe y bin traha na e sitio caminda e edificio nobo ta ser construi. Mi a sirbi como traductor pa e famia di sirbidonan internacional cu tawata traha einan. Ainda mi ta corda e goso cu mi tawata sinti ora mi tawata para seis or di mainta na e sitio durante zomer pa yama e cientos di rumannan homber y mohe Griego bon bini. Nan a ofrece nan mes boluntario pa traha hunto cu e famia di construccion! Semper lo mi keda corda nan felicidad y celo.

Pastornan Griego Ortodox y nan simpatisantenan a purba subi e tereno di construccion y para nos trabou, pero Yehova a scucha nos oracionnan, y nos a ser proteha. Mi a keda na e sitio di construccion te dia cu a dedica e Betel nobo riba 13 di april 1991.

Apoyando Mi Ruman Mohe Stima

E siguiente aña mi a regresa Inglatera pa facansi y mi a keda cerca mi ruman mohe y su casa. Lamentablemente durante mi estadia, mi sua a haya dos atake di curason y a muri. Joan a apoya mi generosamente durante mi sirbishi di misionero. Casi tur siman e tawata skirbi mi un carta di animacion. Un contacto asina ta un bendicion pa tur misionero! Awor e ta un biuda cu problema di salu y e tin mester di apoyo. Kico mi mester haci?

Joan su yiu mohe, Thelma, y su casa ya caba tawata cuida un otro biuda fiel den nan congregacion y tambe un prima di nos cu tawatin un enfermedad terminal. Pesei despues di hopi oracion mi a dicidi cu mi mester keda pa mi yuda cuida Joan. No tawata facil pa mi ahusta mi mes, pero mi tin e privilegio di sirbi como anciano na Pen Mill, un di e dos congregacionnan na Yeovil.

E rumannan cu a sirbi den exterior hunto cu mi ta sigui mantene contacto regularmente cu mi via telefon of carta. Y mi ta masha gradicido pesei. Mi sa cu si un dia mi bisa cu mi kier regresa Grecia of Chipre, e rumannan ta cla pa manda mi pasashi. Pero awor mi tin 80 aña y mi bista ni mi salu no ta manera e tawata. Ta frustrante cu mi no por ta activo mas manera antes, pero mi añanan na Betel a yuda mi desaroya hopi custumber cu awe ta masha util pa mi. Por ehempel, semper mi ta lesa mi texto di dia prome cu desayuno. Tambe mi a siña anda cu hende y stima nan. Esei ta e clave pa un sirbishi di misionero exitoso.

Ora mi wak bek riba e rond di 60 añanan maravioso di sirbishi dedica na alaba Yehova, mi sa cu e ministerio di tempo completo ta e proteccion di mas grandi y e ta percura pa e miho educacion. Di henter mi curason mi por expresa e palabranan cu David a bisa Yehova: “Bo tawata mi defensa, y un refugio den e dia di mi angustia.”—Salmo 59:16.

[Nota]

[Mapanan na pagina 24]

(Pa texto den formato completo, wak publicacion)

GRECIA

Atenas

CHIPRE

Nicosia

Kirenia

Famagusta

Limassol

[Plachi na pagina 21]

Mama na 1915

[Plachi na pagina 22]

Riba dak di Betel na Brooklyn na 1946, ami (di cuater for di man robes) y otro rumannan di e di ocho klas di Galad

[Plachi na pagina 23]

Hunto cu Tanta Millie despues cu mi a regresa Inglatera pa prome bes