Bo Por Vence Soledad

KEN por bisa cu nunca nan a sinti e sufrimento cu soledad ta causa? Tin hopi factor cu por pone nos sinti nos so. Pero specialmente hende mohe cu no a casa nunca of cu ta biuda of diborcia, por sinti un soledad hopi intenso.

Por ehempel, un señora Cristian jong cu yama Frances ta conta: “Rond di e tempo cu mi tawatin 23 aña, a parce cu tur mi amiganan a casa, y mi a keda mi so.” * E sintimento di soledad por bira mas fuerte segun cu añanan ta pasa y e chensnan pa haya un casa ta bira menos. Sandra cu tin 40 y pico aña ta admiti: “Nunca tawata mi intencion di keda soltera, y ainda si e oportunidad presenta, lo mi casa.” Angela, kende tin 50 y pico aña ta declara: “Mi no a dicidi concientemente di keda soltera, pero esei ta e realidad. Den e area caminda mi a ser asigna como pionero special tawatin masha tiki ruman homber soltero.”

Ta di elogia cu hopi ruman mohe Cristian ta scohe pa keda sin casa pasobra nan kier cumpli lealmente cu e conseho di Yehova pa casa “basta ta den Señor.” (1 Corintionan 7:39) Algun di nan ta adapta nan mes bon na solteria, pero otronan ta sinti cu, segun añanan ta pasa, e deseo pa casa y haya yiu ta bira mas fuerte. Sandra ta confesa: “Constantemente mi ta sinti mi bashi emocionalmente door cu mi no tin un casa.”

Otro factornan, manera e tarea di cuida mayornan di edad, kisas ta haci e sintimento di soledad mas fuerte. Sandra ta bisa: “Door cu mi no ta casa, mi famia ta stens riba mi pa cuida nos mayornan di edad. Pa 20 aña largo mi a carga mayor parti di e responsabilidad aki maske nos ta seis ruman. Bida lo tawata hopi mas facil si mi tawatin un casa cu lo a apoya mi.”

Frances ta menciona un otro factor cu ta aumenta su soledad. E ta conta: “Tin hende ta puntra mi flaat: ‘Dicon bo no a casa?’ E remarcanan ei ta laga mi sinti cu di un manera of otro, ta mi falta cu mi ta soltera. Na casi tur casamento cu mi bai, un hende ta haci mi e pregunta cu mi tin masha miedo di dje: ‘Anto, ki dia abo ta casa?’ Y ami ta cuminsa pensa: ‘Si ruman hombernan spiritualmente fuerte no ta interesa den mi, kisas ta pasobra mi no tin e cualidadnan Cristian necesario of hewon nan no ta haya mi atractivo.’”

Con bo por vence sintimentonan di soledad? Si tin manera pa yuda, con otronan por haci esei?

Depende Riba Yehova

E salmista a canta: “Tira bo carga riba SEÑOR, y e lo sostene bo; nunca lo e no permiti  pa e husto wordo movi.” (Salmo 55:22) E palabra pa “carga” den e texto Hebreo ta nifica literalmente “porcion”, y e ta referi na sintimentonan di insiguridad y ansiedad cu nos por tin debi na nos sircunstancia di bida. Yehova, mas cu ningun otro persona, ta conciente di e carganan aki y e por duna nos e forsa necesario pa trata cu nan. Door di depende riba Yehova Dios, Angela por a trata cu sintimentonan di soledad. Pa loke ta su ministerio di tempo completo, e ta corda: “Ora mi a cuminsa traha pionero, ami cu mi partner tawata biba hopi leu for di e congregacion mas cerca. Nos a siña depende completamente riba Yehova, y e dependencia aki a yuda mi henter mi bida. Ora mi cuminsa bira pesimista, mi ta papia cu Yehova y E ta yuda mi. Salmo 23 semper a consola mi hopi, cada bes mi ta les’e.”

Apostel Pablo tawatin cu soporta un carga remarcabel. Na por lo menos tres ocasion el ‘a roga Señor pa esaki por a kita for di dje.’ Dios no a yuda Pablo milagrosamente, pero si Dios a primintie cu Su bondad inmereci lo a sosten’e. (2 Corintionan 12:7-9) Tambe Pablo a descubri e secreto pa keda contento. Despues el a skirbi: “Den tur sircunstancia mi a siña e secreto di ta bariga yen y di pasa hamber, tanto di tin abundancia como di pasa necesidad. Tur cos mi por den [esun, NW], kende ta duna mi fortalesa.”—Filipencenan 4:12, 13.

Con un persona por haya e forsa di Dios ora e ta sintie desanima of so? Pablo a skirbi: “No precupa pa nada; ma den tur cos, pa medio di oracion y suplica cu gradicimento, laga boso peticionnan ta conoci dilanti di Dios. Y e pas di Dios, cu ta surpasa tur comprendemento, lo warda boso curason y boso mente den Cristo Hesus.” (Filipencenan 4:6, 7) Sandra ta pone e conseho aki na practica. E ta splica: “Door cu mi ta soltera, mi ta pasa hopi tempo mi so. Esaki ta duna mi oportunidad amplio pa haci oracion na Yehova. Mi ta sinti cu mi tin un relacion pega cu ne y mi por papia libremente cu ne tocante mi problema y gosonan.” Y Frances ta bisa: “Mi tin un lucha constant cu sintimentonan negativo. Pero loke ta yuda mi masha hopi mes ta di comparti mi sintimentonan francamente cu Yehova. Mi ta combenci cu Yehova ta interesa den tur loke cu por afecta mi bienestar spiritual y emocional.”—1 Timoteo 5:5.

“Cada un Carga Peso di Otro”

Den e hermandad Cristian, un ruman no tin nodi carga su peso su so. Apostel Pablo a urgi: “Cada un carga peso di otro, y asina cumpli cu e lei di Cristo.” (Galationan 6:2) Via nos asociacion cu compañeronan Cristian, nos por haya “un bon palabra” di animacion cu por alivia e carga di soledad.—Proverbionan 12:25.

Considera tambe loke e Scritura ta bisa tocante e yiu mohe di e hues di Israel, Yefte. Prome cu Yefte a vence e forsanan enemigo di Amon, el a priminti cu lo e duna Yehova e prome persona di su cas cu sali bin felicit’e. E persona aki a resulta di ta su yiu mohe. (Huesnan 11:30, 31, 34-36) Aunke esaki a nifica cu e yiu mohe di Yefte lo mester a keda soltera y sacrifica su deseo natural di tin un famia, el a somete su mes di buena gana na e voto di su tata y a sirbi den e santuario na Silo pa e resto di su bida. Hende a pasa por halto di su sacrificio? Al contrario: “Tur aña e yiu mohenan di Israel tawata bai pa recorda yiu mohe di Yefte e galadita pa cuater dia.” (Huesnan 11:40) Si, palabranan di aprecio y reconocemento por anima esnan cu ta ricibie. Pesei, laga nos no keda sin elogia esnan cu merece esei.

Tambe nos ta haci bon di considera e ehempel di Hesus. Maske no tawata un custumber Hudiu pa hende homber combersa cu hende mohe, Hesus a dedica tempo na Maria cu Marta. Probablemente nan tawata sea biuda of soltera. Hesus tawata kier pa nan tur dos beneficia spiritualmente di su amistad. (Lucas 10:38-42) Nos por imita  Hesus su ehempel door di inclui nos ruman mohenan spiritual cu ta soltera den actividadnan social y door di haci areglo pa traha hunto cu nan den e trabou di predica. (Romanonan 12:13) Nan ta aprecia e atencion ei? Un ruman mohe a bisa: “Mi sa cu e rumannan ta stima mi y aprecia mi, pero mi ta keda mas contento ainda ora nan ta mustra interes personal den mi.”

Sandra ta splica: “Door cu nos no tin un famia di nos mes, nos tin mas necesidad pa hende stima nos, di sinti cu nos ta parti di e famia di rumannan spiritual.” Ta obvio cu Yehova ta interesa den rumannan soltera, y nos ta copera cu ne ora nos ta laga nan sinti cu nos ta aprecia nan y stima nan. (1 Pedro 5:6, 7) Yehova lo no keda sin tuma nota di e interes cu nos ta mustra den e rumannan aki, pasobra “esun cu tene misericordia di un hende pober ta fia SEÑOR, y E [Yehova Dios] lo pag’e bek pa su bon obra.”—Proverbionan 19:17.

“Cada un Lo Carga Su Mes Carga”

Maske otronan por yuda, y nan apoyo ta masha animante, “cada un lo carga su mes carga.” (Galationan 6:5) Sinembargo, ora di carga e carga di soledad, nos tin cu tene cuidou cu cierto peligernan. Por ehempel, soledad lo por vence nos si nos cera emocionalmente. Di otro banda, nos por vence soledad cu amor. (1 Corintionan 13:7, 8) Sin importa nos sircunstancianan, e miho manera pa haya felicidad ta door di duna y comparti. (Echonan 20:35) Un ruman mohe pionero cu ta traha duro ta bisa: “Mi no tin masha tempo pa para pensa cu mi ta mi so. Ora mi ta sinti cu mi ta util y ocupa, mi no ta sinti soledad.”

Tambe nos tin cu tene cuidou pa soledad no pone nos cuminsa un relacion imprudente. Por ehempel, ta masha tristo si nos laga e deseo pa casa, stroba nos di mira e hopi problemanan cu casa cu un persona cu no ta creyente ta trece cu ne y specialmente di mira e sabiduria di e conseho biblico pa evita un yugo asina! (2 Corintionan 6:14) Un señora Cristian diborcia a bisa: “Tin un cos cu ta hopi mas piyo cu ser soltera. Esei ta casa cu e persona robes.”

Si un problema no tin solucion, anto kisas nos tin cu soport’e, a lo menos tanten. Cu yudansa di Dios nos por soporta e sintimento di soledad. Segun cu nos ta sigui sirbi Yehova, laga nos tene confiansa cu lo yega un dia cu lo e satisface tur nos necesidadnan den e miho manera posibel.—Salmo 145:16.

[Nota]

[Plachi na pagina 28]

Por vence soledad door di duna y comparti