Cristo Ta Dirigi Su Congregacion

“Mira, mi ta cu boso semper, te na fin di mundo.”—MATEO 28:20.

1, 2. (a) Ora Hesus resucita a duna e mandamento pa haci disipel, kico el a priminti su siguidonan? (b) Con Hesus a dirigi e prome congregacion Cristian activamente?

PROME cu nos Lider resucita, Hesucristo, a subi na shelo, el a aparece na su disipelnan y a bisa: “Tur autoridad a wordo duna na mi den shelo y riba tera. Pesei, bai y haci tur e nacionnan disipel di mi, y batisa nan den nomber di e Tata y di e Yiu y di e spirito santo, y siña nan pa cumpli cu tur loke mi a ordena boso; y mira, mi ta cu boso semper, te na fin di mundo.”—Mateo 23:10, NW; 28:18-20.

² Hesus no solamente a asigna su disipelnan pa haci un trabou cu lo a salba bida, esta, di haci mas disipel, sino tambe a priminti cu lo e ta cu nan. E historia di e comienso di Cristianismo, manera e ta para skirbi den e buki biblico di Echonan, ta mustra fuera di tur duda cu Cristo a uza e autoridad cu el a ricibi pa dirigi e congregacion resien forma. El a manda e “consolado” priminti—e spirito santo—pa fortalece su siguidonan y pa guia nan esfuerso. (Huan 16:7; Echonan 2:4, 33; 13:2-4; 16:6-10) Hesus resucita a uza angel cu e tawatin bou di su mando pa apoya su disipelnan. (Echonan 5:19; 8:26; 10:3-8, 22; 12:7-11; 27:23, 24; 1 Pedro 3:22) Ademas, nos Lider a percura guia pa e congregacion door di haci areglo pa hombernan capacita sirbi como un cuerpo gobernante.—Echonan 1:20, 24-26; 6:1-6; 8:5, 14-17.

3. Ki preguntanan lo ser trata den e articulo aki?

³ Pero, kico di nos tempo, “e fin di mundo”, esta, e conclusion di e sistema di cosnan aki? Con Hesucristo ta dirigi e congregacion Cristian awe? Y con nos por mustra cu nos ta acept’e como nos Lider?

E Shon Tin un Esclabo Fiel

4. (a) Ken ta forma “e esclabo fiel y prudente”? (b) Kico e Shon a encarga e esclabo cu ne?

⁴ Ora Hesus tawata duna e profecia tocante e señal di su presencia, el a bisa: “Ken anto  ta e esclabo fiel y prudente cu su shon a laga encarga cu su cas pa duna nan nan cuminda na su debido tempo? Bendiciona ta e esclabo ei, cu su shon ta haya ta haci asina ora cu e bin. Di berdad mi ta bisa boso cu e lo lag’e keda na encargo di tur su propiedadnan.” (Mateo 24:45-47) E “shon” ta nos Lider, Hesucristo, y el a nombra “e esclabo fiel y prudente”—e cuerpo di Cristiannan ungi riba tera—pa atende tur su asuntonan relaciona cu e tera.

5, 6. (a) Kico “e shete candelarianan di oro” y “e shete streyanan” cu apostel Huan a mira den vision, ta representa? (b) E echo cu “e shete streyanan” ta den Hesus su man drechi ta indica kico?

⁵ E buki biblico di Revelacion ta mustra cu e esclabo fiel y prudente ta cai directamente bou di Hesucristo su control. Den un vision di “e dia di Señor”, apostel Huan a mira “shete candelaria di oro, y meimei di e candelarianan un [persona] manera e yiu di hende” cu ‘den su man drechi tawatin shete streya.’ Splicando Huan e vision, Hesus a bisa: “Pa loke ta e misterio di e shete streyanan cu bo a mira den mi man drechi, y e shete candelarianan di oro: e shete streyanan ta e angelnan di e shete iglesianan, y e shete candelarianan ta e shete iglesianan.”—Revelacion 1:1, 10-20.

⁶ “E shete candelarianan di oro” ta representa tur e berdadero congregacionnan Cristian cu ta existi den “e dia di Señor”, cu a cuminsa na aña 1914. Kico di “e shete streyanan”? Na prome instante, nan a simbolisa tur superintendente ungi y engendra pa spirito cu tawata cuida e congregacionnan di prome siglo. * E superintendentenan tawata den Hesus su man drechi, pues bou di su control y guia. Si, Cristo Hesus a dirigi e grupo esclabo. Sinembargo, awe tin masha tiki superintendente ungi. Con Cristo su liderato ta extende na e mas di 93.000 congregacionnan di Testigonan di Yehova rond mundo?

7. (a) Con Hesus ta uza e Cuerpo Gobernante pa percura liderato na e congregacionnan rond mundo? (b) Dicon nos por bisa cu ta spirito santo ta nombra superintendentenan Cristian?

⁷ Mescos cu den prome siglo, awe un grupo chikito di homber capacita for di entre e superintendentenan ungi ta sirbi como Cuerpo Gobernante, y ta representa e grupo di e esclabo fiel y prudente. Nos Lider ta uza e Cuerpo Gobernante aki pa nombra hombernan capacita—sea ungi of no—como anciano den e congregacionnan local. E spirito santo cu Hesus ta uza cu autoridad di Yehova ta hunga un papel hopi importante den e proceso aki. (Echonan 2:32, 33) Prome cu tur cos, e superintendentenan aki mester ta cumpli cu e rekisitonan describi den e Palabra di Dios, cu spirito santo a inspira. (1 Timoteo 3:1-7; Tito 1:5-9; 2 Pedro 1:20, 21) Recomendacion y nombramento di anciano ta tuma luga despues di haci oracion, y bou di guia di spirito santo. Ademas, e personanan nombra ta duna evidencia di ta produci fruta di e spirito ei. (Galationan 5:22, 23) Pesei Pablo su conseho ta aplica mescos pa tur anciano, sea ungi of no: “Percura pa boso mes y pa henter e tou, meimei di cual spirito santo a pone boso como wardado.” (Echonan 20:28) E hombernan nombra aki ta ricibi instruccion for di e Cuerpo Gobernante y boluntariamente ta pastorea e congregacion. Den e manera aki, Cristo ta hunto cu nos awor y ta dirigi e congregacion activamente.

8. Con Cristo ta uza angel pa dirigi su siguidonan?

⁸ Tambe Hesus ta uza e angelnan mes pa dirigi su siguidonan awe. Segun e comparacion di e trigo y yerba shimaron, tempo di cosecha lo a yega na “e fin di mundo”, esta, na conclusion di e sistema aki. Ken e Shon lo a uza pa haci e trabou di cosecha? “E cosechadonan  ta angelnan”, Cristo a bisa. El a agrega: “E Yiu di hende lo manda su angelnan, y nan lo recohe for di su reino tur piedra di trompica, y esnan cu ta haci inikidad.” (Mateo 13:37-41) Y mescos cu un angel a dirigi Felipe na e eunuco di Etiopia, asina tambe tin hopi evidencia awe cu Cristo ta uza su angelnan pa dirigi e trabou cu Cristiannan berdadero ta haci pa localisa hende di curason sinsero.—Echonan 8:26, 27; Revelacion 14:6.

9. (a) Ki medionan Cristo ta uza pa dirigi e congregacion Cristian awe? (b) Ki pregunta nos tin cu considera si nos kier beneficia di Cristo su liderato?

⁹ Ta masha alentador pa sa cu Hesucristo ta percura liderato pa su disipelnan awe via e Cuerpo Gobernante, e spirito santo y e angelnan! Asta si algun adorado di Yehova keda isola temporalmente for di e Cuerpo Gobernante debi na persecucion of cosnan similar, toch Cristo lo sigui dirigi nan via e spirito santo y e sosten di e angelnan. Sinembargo, nos ta beneficia di su liderato solamente ora nos ta acept’e. Con nos por mustra cu nos ta acepta Cristo como nos Lider?

“Sea Obediente . . . Sea Sumiso”

10. Con nos por mustra respet pa e ancianonan nombra den congregacion?

¹⁰ Nos Lider a duna e congregacionnan “donnan den hende”—“algun como evangelisado, algun como wardado y maestro.” (Efesionan 4:8, 11, 12, NW) Nos actitud y accion pa cu nan ta revela bon cla si nos ta acepta Cristo su liderato. Ta na su luga pa nos ta “gradicido” pa e hombernan spiritualmente capacita cu Cristo a duna. (Colosencenan 3:15) Tambe nan merece nos respet. “Laga e ancianonan cu ta goberna bon wordo considera digno di dobel honor”, apostel Pablo a skirbi. (1 Timoteo 5:17) Con nos por desplega nos gratitud y respet pa e ancianonan—of superintendentenan—den congregacion? Pablo ta contesta: “Sea obediente na esnan cu ta hiba delantera den boso y sea sumiso.” (Hebreonan 13:17, NW) Si, nos tin cu obedece nan y somete nos mes na nan.

11. Dicon nos mester respeta e areglo di anciano si nos kier actua di acuerdo cu nos bautismo?

¹¹ Nos Lider ta perfecto. E hombernan cu el a duna como don, no ta perfecto. Pesei tin biaha nan por faya. Sinembargo, ta vital pa nos keda fiel na e areglo di Cristo. De echo, nos ta actua di acuerdo cu nos dedicacion y bautismo ora nos ta reconoce cu e autoridad nombra pa spirito cu tin den congregacion ta legitimo, y ta somete nos mes na dje di buena gana. Nos bautismo ‘den nomber di e spirito santo’ ta un declaracion publico cu nos sa kico e spirito santo ta y cu nos ta reconoce e papel cu e ta hunga den Yehova su proposito. (Mateo 28:19) Nos bautismo ta indica cu nos ta copera cu e spirito y ta evita cualkier cos cu por strob’e di funciona entre e siguidonan di Cristo. Siendo cu e spirito santo ta hunga un papel vital den recomenda y nombra anciano, con nos por ta fiel na nos dedicacion si nos no ta copera cu e areglo di anciano den congregacion?

12. Ki ehempelnan di falta di respet pa autoridad Hudas ta cita, y kico nan ta siña nos?

 ¹² E Scritura tin ehempelnan cu ta siña nos e balor di obediencia y sumision. Referiendo na esnan cu a papia malo di hombernan nombra den congregacion, disipel Hudas a señala tres ehempel di advertencia, bisando: “Ai di nan! Pasobra nan a sigui e caminda di Cain, y pa ganashi nan a core bai den e eror di Balam, y a perece den e rebelion di Core.” (Hudas 11) Cain a ignora Yehova su conseho amoroso y deliberadamente a sigui un proceder di odio asesino. (Genesis 4:4-8) Apesar cu Balam a ricibi varios advertencia dibino, el a purba maldiciona e pueblo di Dios a cambio di ganashi financiero. (Numbernan 22:5-28, 32-34; Deuteronomio 23:5) Core tawatin su propio puesto di honor den Dios su pueblo Israel, pero esei no tawata basta p’e. El a instiga rebelion contra Dios su sirbido Moises, e homber mas humilde riba tera. (Numbernan 12:3; 16:1-3, 32, 33) Calamidad a bini riba Cain, Balam y Core. Den un manera bibo, e ehempelnan aki ta siña nos scucha conseho di esnan cu Yehova ta uza den puesto di responsabilidad y respeta nan!

13. Ki beneficionan Isaias a profetisa pa esnan cu somete nan mes na e areglo di anciano?

¹³ Ken lo no kier beneficia di e magnifico areglo di supervision cu nos Lider a institui den e congregacion Cristian? Isaias a profetisa di e beneficionan di e areglo aki, bisando: “Mira, un rei lo reina cu husticia, y prinsnan lo goberna cu huicio. Cada un lo ta manera un refugio contra biento, y un proteccion contra tempestad, manera coridanan di awa den un tera seco, manera sombra di un baranca masha grandi mes den un tera cu tin sed di awa.” (Isaias 32:1, 2) Cada anciano mester ta “un refugio” di proteccion y siguridad. Asta si ta dificil pa nos somete nos  mes na autoridad, laga nos haci nos best hunto cu oracion pa nos ta obediente y sumiso na e autoridad cu Dios a nombra den congregacion.

Con Ancianonan Ta Somete Nan Mes na Cristo Su Liderato

14, 15. Con esnan cu ta hiba delantera den congregacion ta mustra cu nan ta somete nan mes na Cristo su liderato?

¹⁴ Tur Cristian, y ancianonan mas cu tur, tin cu sigui Cristo su liderato. E superintendentenan, of ancianonan, tin un cierto grado di autoridad den e congregacion. Pero nan no ta busca pa ‘tin dominio riba fe di nan compañeronan di creencia’ door di controla nan bida. (2 Corintionan 1:24) E ancianonan ta tuma na pecho e palabranan aki di Hesus: “Boso sa cu e gobernantenan di e paganonan tin dominio riba nan, y nan shon grandinan ta eherce autoridad riba nan. Entre boso no ta asina.” (Mateo 20:25-27) Segun cu ancianonan ta cumpli cu nan responsabilidad, nan ta purba sinceramente di sirbi otro hende.

¹⁵ Bijbel ta urgi Cristiannan: “Corda riba esnan cu a guia boso, . . . y considerando e resultado di nan conducta, imita nan fe.” (Hebreonan 13:7) Nos tin cu imita e ancianonan, pero no pasobra nan ta lider. Hesus a bisa: “Un so ta boso Lider, e Cristo.” (Mateo 23:10, NW) Loke nos tin cu imita ta e fe di e ancianonan, pasobra nan ta imita nos berdadero Lider, Cristo. (1 Corintionan 11:1) Considera algun manera cu ancianonan ta haci esfuerso pa ta manera Cristo den nan relacion cu otro hende den congregacion.

16. Apesar di e autoridad cu Hesus tawatin, con el a trata su siguidonan?

¹⁶ Den tur cos Cristo tawata superior cu hende imperfecto, y e tawatin autoridad sin igual cu su Tata a dun’e. Pero toch e tawata modesto den su trato cu su disipelnan. E no a hoga nan cu un despliegue impresionante di conocemento. Hesus a mustra sintimento y compasion pa su siguidonan, y a tene cuenta cu nan necesidadnan. (Mateo 15:32; 26:40, 41; Marco 6:31) Nunca el a exigi di su disipelnan mas di loke nan por a duna, ni nunca el a pone mas carga riba nan di loke nan por a wanta. (Huan 16:12) Hesus tawata “manso y humilde di curason.” Pesei no ta un sorpresa cu hopi hende a hay’e un persona refrescante.—Mateo 11:28-30.

17. Con ancianonan mester demostra modestia den nan relacion cu otro hende den congregacion?

¹⁷ Si Cristo e Lider mes a demostra modestia, anto esnan cu ta hiba delantera den e congregacion mester haci esei mas ainda! Si, nan ta tene cuidou pa nan no haci mal uzo di e autoridad confia na nan. Y nan no ta “bini cu palabra grandi”, pa purba impresiona otro hende. (1 Corintionan 2:1, 2, Beibel na papiamentu koriente) Mas bien, nan ta haci esfuerso pa papia e berdad biblico cu simplesa y sinseridad. Ademas, ancianonan ta purba pa ta rasonabel den loke nan ta spera di otro hende y tene consideracion cu nan necesidadnan. (Filipencenan 4:5, NW) Como cu ancianonan ta conciente cu tur hende tin limitacion, nan ta tene cuenta cu e limitacionnan aki den nan trato cu e rumannan. (1 Pedro 4:8) Y ancianonan cu ta humilde y manso no ta realmente refrescante? Claro cu si.

18. Kico ancianonan por siña di e manera cu Hesus a trata mucha?

¹⁸ Hesus tawata un persona acercabel, asta  pa esnan di mas chikito. Wak con el a reacciona ora su disipelnan a scual e hendenan pasobra “nan tawata trece mucha chikito cerca dje.” Hesus a bisa: “Laga e muchanan bin cerca mi; no stroba nan.” Anto “el a tuma nan den su brasa y a bendiciona nan, poniendo su mannan riba nan.” (Marco 10:13-16) Hesus tawata cariñoso y bondadoso, y hende a sinti nan atrai na dje. Hende no tawatin miedo di Hesus. Asta mucha a sinti nan comodo den su presencia. Ancianonan tambe ta acercabel, y segun cu nan ta mustra cariño y bondad, otro hende—asta mucha—ta sinti nan comodo cerca nan.

19. Kico ta nifica cu nos “tin e mente di Cristo”, y ki esfuerso esaki ta exigi?

¹⁹ Te con leu ancianonan por imita Cristo Hesus, ta depende di con bon nan conoc’e. Pablo a puntra: “Ken a conoce e mente di SEÑOR, cu e por instruye?” Anto el a agrega: “Ma nos tin e mente di Cristo.” (1 Corintionan 2:16) Ora nos tin e mente di Cristo esei ta nifica entre otro, cu nos conoce su manera di pensa y tur aspecto di su personalidad di manera cu nos sa kico lo el a haci den un cierto situacion. Imagina bo, asina bon bo por conoce nos Lider! Si, pa logra esaki nos mester presta sumo atencion na e relatonan di Evangelio y yena nos mente regularmente cu un comprendemento di Hesus su bida y ehempel. Ora ancianonan ta haci un esfuerso pa sigui Cristo su liderato te na e grado ei, esnan den congregacion ta keda mas inclina na imita nan fe. Y e ancianonan lo tin e satisfaccion di mira otro hende sigui e pasonan di e Lider gososamente.

Sigui bou di Cristo Su Liderato

20, 21. Segun cu nos ta wak padilanti na e mundo nobo, kico mester ta nos determinacion?

²⁰ Ta vital pa nos tur sigui somete nos mes na Cristo su liderato. Segun cu nos ta acerca e fin di e sistema di cosnan aki, nos ta casi den e mesun posicion cu e Israelitanan ora nan tawata na e Yanura di Moab na aña 1473 prome cu Era Comun. Nan tawata na drempel di e Tera Priminti, y via profeta Moises, Dios a declara: “Abo [Hosue] mester bai cu e pueblo aki den e tera cu SEÑOR a hura na nan tatanan di duna nan.” (Deuteronomio 31:7, 8) Hosue tawata e lider nombra. Pa drenta den e Tera Priminti, e Israelitanan tawatin cu somete nan mes na e liderato di Hosue.

²¹ Bijbel ta bisa nos: “Un so ta boso Lider, e Cristo.” Ta Cristo so lo dirigi nos pa drenta den e mundo nobo priminti den cua husticia lo biba. (2 Pedro 3:13) Pesei, laga nos ta determina pa somete nos mes na su liderato den tur aspecto di nos bida.

[Nota]

Bo Ta Corda?

• Con Cristo a dirigi e congregacion di prome siglo?

• Con Cristo ta dirigi su congregacion awe?

• Dicon nos mester ta sumiso na esnan cu ta hiba delantera den congregacion?

• Con ancianonan por mustra cu Cristo ta nan Lider?

[Preguntanan di Estudio]

[Plachi na pagina 15]

Cristo ta dirigi su congregacion y ta tene superintendentenan den su man drechi

[Plachi na pagina 16]

“Sea obediente na esnan cu ta hiba delantera den boso y sea sumiso”

[Plachi na pagina 18]

Hesus tawata cariñoso y acercabel. Ancianonan Cristian ta haci esfuerso pa ta mescos cu ne