E Echo Cu Cristo Ta Nos Lider Ta un Realidad pa Bo?

“Tampoco sea yama ‘lider’, pasobra un so ta boso Lider, e Cristo.”—MATEO 23:10, NW.

1. Ken ta e unico Lider di Cristiannan berdadero?

TAWATA diamars, 11 di nisan. Tres dia despues nan lo a mata Hesucristo. Esaki tawata su ultimo bishita na e tempel. Riba e dia aki, Hesus a siña e multitud presente y su disipelnan algo importante. El a bisa: “No laga hende yama boso Rabi, pasobra un so ta boso maestro, mientras cu boso tur ta ruman. Ademas, no yama ningun hende boso tata riba tera, pasobra un so ta boso Tata, Esun celestial. Tampoco sea yama ‘lider’, pasobra un so ta boso Lider, e Cristo.” (Mateo 23:8-10, NW) Claramente, Hesucristo ta e Lider di Cristiannan berdadero.

2, 3. Ki efecto scucha Yehova y acepta e Lider cu El a nombra por tin riba nos bida?

² Hesus su liderato tin efecto masha probechoso riba nos bida ora nos acept’e! Profetisando e binida di e Lider aki, Yehova Dios a declara via profeta Isaias: “Bin, tur esnan cu tin sed, bin na e awanan; y boso cu no tin placa, bin cumpra y come. Bin cumpra biña y lechi sin placa y sin prijs. . . . Scucha mi bon y come loke ta bon, y laga boso alma gosa den abundancia. . . . Mira, mi a hacie un testigo pa e pueblonan, un lider y comandante pa e pueblonan.”—Isaias 55:1-4.

³ Isaias a uza likidonan comun—awa, lechi y biña—pa ilustra ki efecto scucha Yehova y sigui e Lider y Comandante cu el a duna nos, por tin riba nos bida. E resultado ta refrescante, manera ora nos bebe un glas di awa friu riba un dia cayente. E ta calma nos sed pa berdad y husticia. Mescos cu lechi ta haci baby fuerte y ta yuda nan crece, asina tambe ‘e lechi di e palabra’ ta haci nos fuerte y ta yuda nos crece spiritualmente den nos relacion cu Dios. (1 Pedro 2:1-3) Y ken por nenga cu biña ta duna goso na ocasionnan festivo? Di igual manera, adora e Dios berdadero y sigui e pasonan di Su Lider nombra ta duna nos un bida “berdaderamente yen di goso.” (Deuteronomio 16:15) Pues anto, ta vital pa nos tur—hoben y bieu, homber y mohe—mustra cu pa nos ta un realidad cu Cristo ta nos Lider. Pero con nos por demostra den nos bida diario cu e Mesias ta nos Lider?

Hobennan—Sigui “Crece den Sabiduria”

4. (a) Kico a tuma luga ora Hesus tawatin 12 aña y a bishita Yerusalem durante Pasco Hudiu? (b) Con bon informa Hesus tawata ora e tawatin apenas 12 aña?

⁴ Considera e ehempel cu nos Lider a pone pa hobennan. Aunke nos no sa masha di Hesus su infancia, nos sa di un suceso hopi revelador. Ora Hesus tawatin 12 aña, su mayornan a bai Yerusalem cu ne pa nan bishita anual di Pasco Hudiu. Na e ocasion ei Hesus tawata asina absorba den un combersacion biblico, cu su famia a bai lag’e sin cu nan a ripara. Tres dia despues su mayornan tur precupa, Hose cu Maria, a hay’e den tempel, “sinta meimei di e siñadonan, ta scucha nan y ta haci nan pregunta.” Ademas, “tur esnan cu a tend’e a keda straña di su comprendemento y su contestanan.” Imagina bo, cu apenas 12 aña, Hesus no solamente por a haci pregunta cu ta stimula pensamento  serio y basa riba cosnan spiritual, sino tambe e por a duna contesta sabi! Sin duda, ta e entrenamento di su mayornan a yud’e.—Lucas 2:41-50.

5. Con hobennan por evalua nan actitud pa cu e studio di Bijbel di famia?

⁵ Kisas abo ta un hoben. Si bo mayornan ta fiel sirbido di Dios, boso probablemente tin un programa regular di studio di Bijbel como famia. Ki actitud bo tin pa cu e studio di famia? Ta bon pa bo pensa seriamente riba e siguiente preguntanan: ‘Mi ta apoya cu entusiasmo e areglo di studio di Bijbel den mi famia? Mi ta copera cu ne, y no ta haci nada pa stroba e rutina?’ (Filipencenan 3:16, NW) ‘Mi ta participa activamente den e studio? Ora ta apropiado, mi ta haci pregunta relaciona cu e informacion di e studio y ta comenta riba con e ta aplica? Segun cu mi ta haci progreso spiritual, mi ta cultiva un smak pa “cuminda solido [cu] ta pa hende madura”?’—Hebreonan 5:13, 14.

6, 7. Di ki balor un programa di lesa Bijbel tur dia por ta pa hobennan?

⁶ Tambe ta bon pa bo tin un programa pa lesa Bijbel tur dia. E salmista a canta: “Bendiciona ta e hende cu no ta cana den e conseho di malbadonan, . . . ma su delicia ta den e lei di SEÑOR, y den Su lei e ta medita di dia y anochi.” (Salmo 1:1, 2) Hosue, e sucesor di Moises, ‘a medita den e buki di lei, di dia y anochi.’ Esaki a yud’e actua sabi y a pone cu e tawatin exito den cumpli cu e asignacion cu Dios a dun’e. (Hosue 1:8) Nos Lider Hesucristo a bisa: “Ta para skirbi: ‘Hende lo no biba di pan so, ma di tur palabra cu ta sali for di boca di Dios.’” (Mateo 4:4) Si nos tin mester di cuminda fisico tur dia, anto nos tin hopi mas mester di cuminda spiritual riba un base regular!

⁷ Realisando cu e tin un necesidad spiritual, Nicole di 13 aña a cuminsa lesa Bijbel tur dia. * Awor, na edad di 16 aña, el a lesa henter e Bijbel un biaha y e falta mita pa e les’e completo pa di dos biaha. Su metodo ta simpel. E ta bisa: “Mi ta haci sigur di lesa por lo menos un capitulo pa dia.” Con su lesamento di Bijbel tur dia a yud’e? E ta contesta: “Awe tin masha hopi mal influencia. Tur dia mi ta haya mi cu presion na scol y otro caminda; presionnan cu ta bai contra mi fe. Door cu mi ta lesa Bijbel tur dia, esei ta yuda mi corda lihe riba principio- y mandamentonan biblico cu ta anima mi pa resisti e presionnan aki. Como resultado, mi ta sinti mi mas pega cu Yehova y Hesus.”

8. Ki custumber Hesus tawatin relaciona cu sinagoga, y con hobennan por imit’e?

 ⁸ Hesus tawatin e custumber di scucha y participa den lesamento di e Scritura na sinagoga. (Lucas 4:16; Echonan 15:21) Ta bon pa hobennan sigui e ehempel ei door di asisti regularmente na reunionnan Cristian, caminda nos ta lesa y studia Bijbel! Richard di 14 aña a expresa aprecio pa e reunionnan ei, bisando: “E reunionnan tin hopi balor pa mi. Einan mi ta ser recorda constantemente di loke ta bon y malo, loke ta moral y inmoral, kico ta cuadra cu e personalidad di Cristo y kico no. Mi no tin nodi haya sa e cosnan ei door di experencia amargo.” Si, “e testimonio di SEÑOR ta fiel, e ta haci hende simpel bira sabi.” (Salmo 19:7) Nicole tambe ta haci esfuerso pa asisti na tur cinco reunion di congregacion tur siman. Tambe e ta dedica dos pa tres ora preparando pa reunion.—Efesionan 5:15, 16.

9. Con hobennan por sigui “crece den sabiduria”?

⁹ Ora bo ta jong, ta un bon tempo pa siña ‘conoce e unico Dios berdadero, y Hesucristo, kende el a manda.’ (Huan 17:3) Podise bo sa di hobennan cu ta dedica hopi tempo na lesa ‘comics’, wak television, hunga weganan di video of surf riba Internet. Pakico lo bo imita nan si bo por sigui e ehempel perfecto di nos Lider? Na mucha, el a gusta siña mas tocante Yehova. Y cu ki resultado? Debi na su amor pa cosnan spiritual, “Hesus tawata crece den sabiduria.” (Lucas 2:52) Bo tambe por.

“Sea Sumiso na Otro”

10. Kico lo yuda bida di famia ser un fuente di pas y felicidad?

¹⁰ Nos cas por ta un refugio di pas y contentamento of un campo di bataya caminda tin conflicto y pleito. (Proverbionan 21:19; 26:21) Acepta Cristo como nos Lider ta yuda aumenta pas y felicidad den famia. De echo, Hesus su ehempel ta e modelo pa relacionnan den famia. E Scritura ta bisa: “Sea sumiso na otro den e temor di Cristo. Esposanan, sea sumiso na boso mes esposo, manera na Señor. Pasobra e esposo ta cabes di e esposa, mescos cu Cristo tambe ta cabes di e iglesia, e mes siendo salvador di e curpa. . . . Esposonan, stima boso esposa, mescos cu Cristo tambe a stima e iglesia y a entrega su mes p’e.” (Efesionan 5:21-25) Pablo a skirbi e congregacion na Colosas: “Yiunan, sea obedecido na boso mayornan den tur cos, pasobra esaki ta agradabel na Señor.”—Colosencenan 3:18-20.

11. Con un esposo por mustra cu realmente e ta mira Cristo como su Lider?

¹¹ Si e famia sigui e conseho aki, esei kiermen cu e esposo ta hiba delantera den famia, su esposa ta yud’e fielmente, y e yiunan ta obedece nan mayornan. Sinembargo, e homber su papel como cabes ta resulta den felicidad solamente ora e cumpli cu ne apropiadamente. Un esposo sabi tin cu siña actua como cabes door di imita su propio Cabes y Lider, Cristo Hesus. (1 Corintionan 11:3) Maske despues Hesus a bira “cabes riba tur cos na e iglesia”, ora el a bini na tera e “no a bin pa wordo sirbi, ma pa sirbi.” (Efesionan 1:22; Mateo 20:28) Den un manera  similar, un esposo Cristian ta actua como cabes, no pa probecho egoista, sino pa atende e interesnan di su casa y yiunan—si, di henter e famia. (1 Corintionan 13:4, 5) E ta trata na imita e cualidadnan cu su cabes, Hesucristo, a desplega; cualidadnan cu ta agrada Dios. Mescos cu Hesus, e esposo ta manso y di curason humilde. (Mateo 11:28-30) Ora e ta robes, no ta dificil pa e bisa palabranan manera “despensa mi” of “bo tin rason.” Su ehempel excelente ta haci cu ta mas facil pa su esposa ta un ‘yudado cu ta pas cu ne’, y un “compañera” p’e, cu ta siña for di dje y ta traha lado a lado cu ne.—Genesis 2:20; Malakias 2:14.

12. Kico lo yuda un esposa acepta e areglo cu homber ta cabes?

¹² E esposa, di su parti, mester ta sumiso na su esposo. Sinembargo, si e actitud di mundo a afecta e esposa, esei por cuminsa cambia su opinion di e areglo cu homber ta cabes, y e esposa lo no gusta e idea di ta sumiso na un homber. E Scritura no ta sugeri cu homber mester ta dominante, pero si e ta rekeri pa esposa ta sumiso na nan esposo. (Efesionan 5:24) Tambe Bijbel ta tene e esposo of tata responsabel pa e famia, y ora nan aplica Bijbel su conseho, esaki ta contribui na pas y ordo den e famia.—Filipencenan 2:5.

13. Ki ehempel di sumision Hesus a pone pa yiunan?

¹³ Yiunan mester ta obedecido na nan mayornan. Hesus a pone un excelente ehempel relaciona cu esaki. Despues di loke a pasa na e tempel ora Hesus tawatin 12 aña y el a keda atras tres dia, “el a bai cu [su mayornan] y a yega Nazaret; y el a keda someti na nan.” (Lucas 2:51) Ora yiu ta sumiso na nan mayornan esei ta yuda aumenta pas y harmonia den e famia. Ora tur hende den cas ta acepta Cristo como e Lider, e resultado ta un famia felis.

14, 15. Kico lo yuda nos tin exito ora nos ta confronta situacionnan dificil na cas? Duna un ehempel.

¹⁴ Asta ora situacionnan dificil surgi den cas, e clave pa exito ta: imita Hesus y acepta su guia. Por ehempel, ora Jerry di 35 aña a casa cu Lana, mama di un yiu mohe teenager, esei a crea un problema cu ningun di nan dos no a imagina. Jerry ta splica: “Mi tawata sa cu pa mi ta un bon cabes di cas, mi tawatin cu aplica e mesun principionan biblico cu ta duna exito den otro famia. Pero pronto mi a descubri cu mi tawatin cu aplica nan cu mas sabiduria y comprendemento.” Su yiu mohe di criansa a consider’e como e persona cu a aleha su mama for di dje y no tawatin lei cu ne. Jerry tawatin mester di comprendemento penetrante pa mira cu e actitud aki a afecta loke e mucha tawata bisa y haci. Con el a atende e situacion? Jerry ta contesta: “Ami cu Lana a palabra cu por lo menos pa aworaki, Lana lo a percura pa loke ta e aspecto di duna disiplina mientras cu ami a concentra riba desaroya un bon relacion cu mi yiu mohe di criansa. Cu tempo, esaki a duna bon resultado.”

¹⁵ Ora nos ta confronta situacionnan dificil na cas, nos mester di comprendemento penetrante pa saca afo dicon miembronan di famia ta papia y actua na un cierto manera. Tambe nos mester di sabiduria pa aplica Dios su principionan debidamente. Por ehempel, Hesus a distingui bon cla e motibo pakico e mohe cu tawata sufri di un derame di sanger a mishi cu ne, y pesei el a trat’e cu compasion y na un manera sabi. (Levitico 15:25-27; Marco 5:30-34) Sabiduria y comprendemento penetrante ta caracteristicanan di nos Lider. (Proverbionan 8:12) Nos lo ta felis si nos actua manera e lo a actua.

Sigui “Busca Prome e Reino”

16. Kico mester ocupa e luga central den nos bida, y con Hesus su ehempel a mustra esaki?

¹⁶ Hesus a mustra bon cla kico mester ocupa e luga central den bida di esnan cu acept’e como Lider. El a bisa: “Ma busca prome e reino di Dios y Su husticia, y tur e cosnan aki lo  wordo añadi na boso.” (Mateo 6:33) Y cu su ehempel, el a mustra nos con pa haci esaki. Despues cu Hesus a batisa, el a pasa 40 dia na yuna, meditando y haciendo oracion. Na fin di e periodo ei, el a hay’e cu un tentacion. Satanas e Diabel a ofrec’e gobernacion riba “tur e reinonan di mundo.” Imagina bo e bida cu Hesus por tawatin si el a acepta Diabel su oferta! Sinembargo, Cristo tawata concentra riba haci e boluntad di su Tata. Tambe el a realisa cu un bida asina den e mundo di Satanas lo no a dura masha. Mesora el a rechasa Diabel su oferta, bisando: “Ta para skirbi: ‘Adora SEÑOR bo Dios, y sirbi E so.’” Djis despues, Hesus “a cuminsa predica y bisa: ‘Repenti, pasobra e reino di shelo ta cerca.’” (Mateo 4:2, 8-10, 17) Pa e resto di su bida riba tera, Cristo tawata un proclamado di tempo completo di e Reino di Dios.

17. Con nos por mustra cu asuntonan relaciona cu e Reino ta na prome luga den nos bida?

¹⁷ Nos ta haci bon di imita nos Lider y no permiti e mundo di Satanas tenta nos pa haci un carera y empleo cu ta paga bon, nos meta principal den bida. (Marco 1:17-21) Si nos bira asina envolvi den e trampa di actividadnan mundano te cu asuntonan relaciona cu e Reino ta bai na di dos luga, esei lo ta un bobedad. Hesus a confia nos cu e trabou di predica e Reino y haci disipel. (Mateo 24:14; 28:19, 20) Si, kisas nos tin un famia of otro responsabilidadnan cu nos tin cu atende, pero nos no ta contento di por uza oranan djanochi y weekend pa cumpli cu nos responsabilidad Cristian di predica y siña hende? Y ta ki un animacion cu durante e aña di sirbishi 2001, un 780.000 ruman por a sirbi como minister di tempo completo, of pionero!

18. Kico ta yuda nos haya goso den sirbishi?

¹⁸ E relatonan di Evangelio ta describi Hesus como un homber di accion y tambe como un persona cu tawatin sintimento tierno. Ora el a mira e necesidad spiritual di e hendenan rond di dje, el a sinti compasion pa nan y ansiosamente el a ofrece nan yudansa. (Marco 6:31-34) Nos sirbishi ta bira gososo ora nos motivacion pa participa den dje ta amor pa otro hende y un deseo sinsero pa yuda nan. Pero con nos por desaroya e deseo ei? Un yoncuman cu yama Jayson ta bisa: “Tempo mi tawata teenager, mi no tawata gusta sirbishi masha.” Kico a yud’e cultiva amor pa e trabou aki? Jayson ta contesta:  “Den mi famia, tur diasabra mainta tawata pa sali den sirbishi di veld. Esaki tawata bon pa mi, pasobra mas mi a sali den sirbishi, mas mi a mira e bon cu esei a logra y mas mi a disfruta di dje.” Nos tambe mester participa regularmente y diligentemente den sirbishi.

19. Kico mester ta nos determinacion relaciona cu Cristo su liderato?

¹⁹ En berdad ta refrescante y recompensador pa acepta Cristo como nos Lider. Ora nos haci esei, nos hubentud ta bira un tempo pa crece den conocemento y sabiduria. Bida di famia ta bira un fuente di pas y felicidad, y sirbishi ta bira un actividad cu ta duna goso y satisfaccion. Pues anto, laga nos ta determina pa mustra den nos bida diario y na e decisionnan cu nos ta tuma, cu pa nos ta un realidad cu Cristo ta nos Lider. (Colosencenan 3:23, 24) Sinembargo, Hesucristo ta nos Lider via e congregacion Cristian tambe. E siguiente articulo lo mustra con nos por beneficia di e areglo aki.

[Nota]

Bo Ta Corda?

• Con nos ta beneficia si nos sigui nos Lider cu Dios a nombra?

• Con hobennan por mustra cu nan kier sigui Hesus como nan Lider?

• Ki efecto Cristo su liderato tin riba bida di famia di esnan cu somete na dje?

• Con nos sirbishi por mustra cu en realidad nos ta mira Cristo como nos Lider?

[Preguntanan di Estudio]

[Plachi na pagina 9]

Ora bo ta jong, ta un bon tempo pa siña conoce Dios y nos Lider nombra

[Plachi na pagina 10]

Sumision na Cristo como nos Lider ta promove felicidad den famia

[Plachi na pagina 12]

Hesus a busca e Reino prome. Abo tambe?