E Waldensenan—Di Herehia pa Protestantismo

Tawata aña 1545 den e bunita region di Provence, Lubéron, den suit di Francia. Instiga door di intolerancia religioso, un ehersito a reuni pa bai cumpli cu un mision horibel. E resultado tawata un siman di dramamento di sanger.

NAN a destrui pueblonan, y encarsela of mata e habitantenan. Den un masacre cu a pone Europa tembla, soldanan salbahe a comete hopi crueldad. Nan a mata rond di 2.700 homber y a manda 600 bai traha como catibo riba barco di rema, pa no papia mes di e sufrimento cu hende mohe y mucha a experencia. Rei di Francia y papa a elogia e comandante militar cu a cumpli cu e campaña sangriente aki.

Despues cu e Reformacion a dividi Alemania, e Rei Catolico di Francia, Francisco I, a laga investiga e “herehia” cu tawatin den su teritorio. El a haci esaki pasobra e manera cu Protestantismo a plama tawata precup’e. Loke autoridadnan na Provence a descubri no tawata algun caso isola di herehia, sino pueblonan completo di disidentenan religioso. Nan a pasa un decreto pa caba cu herehia y despues di tempo a ehecuta esaki cu e masacre di 1545.

Ken tawata e herehenan aki? Y dicon nan tawata obheto di intolerancia religioso violento?

Di Rikesa pa Pobresa

Esnan cu a ser asesina den e masacre tawata forma parti di un grupo religioso di siglo 12 cu tawata plama den un parti grandi di Europa. E manera cu el a plama y sobrevivi pa varios siglo a pone cu el a gana un luga importante den historia di disidentenan religioso. Mayoria historiado ta di acuerdo cu e movemento aki a cuminsa rond di aña 1170. Den e stad Lyons na Francia tawatin un comerciante rico cu yama Vaudès y cu tawata masha interesa pa sa con pa agrada Dios. Ta parce cu e conseho cu Hesucristo a duna un cierto homber rico pa bende su pertenencianan y duna na hende pober, a impresion’e masha. Pesei, despues cu Vaudès a percura pa su famia ta bon para financieramente, el a leumai su rikesa pa e predica e  Evangelio. (Mateo 19:16-22) No a dura masha cu e tawatin su siguidonan cu despues a bira conoci como Waldense. *

Vaudès su interes principal tawata hende pober, e obra di predica y Bijbel. Protesta contra e luho cu cleronan tawata biba aden no tawata algo nobo. Pa algun tempo caba, un cantidad di pastor disidente a denuncia e abuso- y practicanan corupto cu iglesia tawata comete. Pero Vaudès tawata un laico mescos cu mayoria di su siguidonan. Esaki sin duda ta splica dicon el a haya cu tawata necesario pa nan tin un Bijbel den e idioma di pueblo. Door cu ta pastor so por a haya iglesia su version Latin di Bijbel mira, Vaudès a duna encargo pa traduci e Evangelionan y otro bukinan di Bijbel na e dialecto Franco-Provensial, e idioma cu e pueblo comun tawata comprende na e partinan oost y central di Francia. * Como reaccion riba e mandato di Hesus pa predica, e Pobernan di Lyons a subi caya cu nan mensahe. (Mateo 28:19, 20) Historiado Gabriel Audisio ta splica cu ta nan insistencia pa predica publicamente a bira e cuestion crucial cu a influencia iglesia su actitud pa cu e Waldensenan.

Di Catolico pa Herehe

Den e tempo ei, pastornan a prohibi e trabou di predica, y iglesia a asumi cu ta nan tawatin e derecho pa duna hende autoridad pa predica. E pastornan a considera e Waldensenan como hende ignorante y sin educacion. Pero na aña 1179, Vaudès a busca autorisacion oficial pa su trabou di predica cerca Papa Alehandro III. El a haya permit pa predica, basta cu e pastornan local tawata di acuerdo. Historiado Malcolm Lambert ta remarca cu esaki “tawata practicamente un rechaso total.” De facto, Arsobispo Jean Bellesmains di Lyons a prohibi oficialmente pa laico predica. Vaudès a reacciona door di cita Echonan 5:29: “Nos mester obedece Dios mas cu hende.” Door cu Vaudès no a cumpli cu e prohibicion, nan a expuls’e for di iglesia na 1184.

Aunke nan a saca e Waldensenan for di e obispado di Lyons y a core cu nan for di e stad na un manera bruto, ta parce cu autoridadnan no a yega mas leu cu e condena inicial. Hopi hende comun y coriente a admira e sinseridad y estilo di bida di e Waldensenan, asta e obisponan a sigui papia di nan.

Segun historiado Euan Cameron, ta parce cu e predicadonan Waldense no tawata “contra Iglesia Romano djis pa ta contra dje.” Simplemente nan “tawata kier a predica y siña hende.” Historiadonan ta bisa cu practicamente e movemento a ser obliga pa bira disidente door di un serie di decreto cu pocopoco pero sigur a reduci nan poder y influencia. E denuncianan di iglesia a culmina den e prohibicion cu e di Cuater Consilio Laterano a emiti contra e Waldensenan na aña 1215. Con esaki a afecta nan predicacion?

 Nan Ta Bai Predica den Scondi

Na aña 1217 Vaudès a muri, y persecucion a plama su siguidonan den Vayenan Alpino di Francia, Alemania, nort di Italia y den e parti Oost y Central di Europa. Persecucion a pone tambe cu e Waldensenan mester a bai biba den cunucu, y esaki a limita nan actividad di predica den hopi area.

Na 1229 Iglesia Catolico a completa su Crusada contra e Catarnan of Albigensenan den e parti suit di Francia. * E siguiente victima di e atakenan serio ei tawata e Waldensenan. Pronto e Inkisicion a bira un atake cruel contra tur oponente di iglesia. Miedo a pone e Waldensenan bai haci nan trabou na scondi. Pa 1230, nan no tawata predica publicamente mas. Audisio ta splica: “En bes di bai busca carne nobo . . . , nan a dedica nan mes na cuida esnan comberti, yudando nan pa mantene nan fe apesar di presion y persecucion di pafo.” E ta agrega cu “e trabou di predica a keda esencial, pero den practica el a cambia completamente.”

Nan Creencia- y Practicanan

Rond di siglo 14, en bes di laga tur hende predica, e Waldensenan a cuminsa haci un distincion entre predicado y creyente. E tempo ei ta hombernan bon entrena so tawata haci e trabou di pastoreo. E predicadonan biahero aki a bira conoci como barb (omo).

E barbnan cu tawata bishita e Waldensenan na cas, a traha pa mantene e movemento na bida, y no pa plam’e. Tur e barbnan por a lesa y skirbi, y nan entrenamento di seis aña tawata basa riba Bijbel. E echo cu nan tawata uza un traduccion na idioma local a permiti nan splica Bijbel na nan tou. Asta e oponentenan a admiti cu Waldensenan, incluso nan yiunan, tawatin bon conocemento di Bijbel y cu nan por a cita hopi parti di e Scritura.

Algun di e cosnan cu e prome Waldensenan a rechasa tawata gañamento, e siñansa di purgatorio, sacrificio di misa pa morto, absolucion y indulgencia papal, y adoracion di Maria y di “santo.” Tambe tur aña nan tawata celebra e Cena di Señor of e Ultimo Cena. Segun Lambert, nan forma di adoracion “tawata en realidad, e religion di e laico comun y coriente.”

“Un Bida Dobel”

E comunidadnan Waldense tawata hopi uni. Door cu nan tawata casa cu hende den e movemento so, esei a crea atrabes di siglonan famnan tipicamente di hende Waldense. Sinembargo, den nan lucha pa sobrevivencia, nan a purba sconde nan opinionnan. E secrecia cu nan a mantene rondo di nan creencia- y practicanan a yuda nan oponentenan lansa acusacionnan extremo contra nan, manera por ehempel, cu nan ta adora Diabel. *

Un manera cu e Waldensenan a contraresta e acusacionnan ei tawata door di acepta y practica loke historiado Cameron ta yama “minimo conformidad” cu adoracion Catolico. Hopi Waldense a confesa cerca pastor Catolico, bai misa, uza awa bendita y asta a haci biahenan di peregrinacion. Lambert ta remarca: “Nan tawata haci hopi cos manera nan biciñanan Catolico.” Audisio a declara abiertamente cu den transcurso di tempo e Waldensenan “a hiba un bida dobel.” E ta agrega: “Di un banda, nan a aparenta di ta Catolico pa mantene nan trankilidad relativo; di otro banda, nan a cumpli cu cierto rito- y custumbernan entre nan mes pa haci sigur cu e comunidad Waldense ta sigui existi.”

Di Herehia pa Protestantismo

E era di Reformacion a cambia e esena religioso na Europa durante siglo 16 radicalmente. Victimanan di intolerancia por a busca reconocemento legal den nan propio pais of bai busca condicionnan mas faborabel otro  caminda. E idea di herehia tambe a bira menos importante, ya cu tawatin hopi hende cu a cuminsa cuestiona e doctrinanan ortodox estableci.

Desde 1523, e conocido reformado Martin Luther a menciona e Waldensenan. Na 1526, un barb Waldense a hiba noticia na e Seronan Alpino en cuanto e desaroyonan religioso na Europa. Despues di esaki a sigui un periodo di intercambio durante cua e comunidadnan Protestant a comparti ideanan cu e Waldensenan. E Protestantnan a anima e Waldensenan pa duna nan respaldo financiero na e prome traduccion di Bijbel for di e idiomanan original pa Frances. A imprimi e Bijbel na 1535, y despues el a bira conoci como Bijbel Olivétan. Sinembargo, e ironia ta cu mayoria Waldense no por a comprende Frances.

Door cu e Catoliconan a sigui persigui nan, un gran cantidad di Waldense—mescos cu e Protestantnan cu a bini di otro caminda—a bai biba na Provence, un region mas safe den suit di Francia. No a dura masha cu autoridadnan a haya sa di e imigracion aki. Apesar di tur e informenan positivo tocante e moral y estilo di bida di e Waldensenan, toch algun hende a cuestiona nan lealtad y a acusa nan di ta un menasa pa ordo publico. E decreto di Mérindol cu nan a saca, a resulta den e horibel dramamento di sanger cu e articulo aki a menciona na principio.

E relacion entre e Catoliconan y e Waldensenan a sigui daña. Pa e Waldensenan defende nan mes contra e atakenan di e Catoliconan, nan a asta uza forsanan arma. E conflicto aki a hinca nan den e mesun situacion cu e Protestantnan. Asina e Waldensenan a bira aliado di Protestantismo convencional.

Den transcurso di siglonan, iglesianan Waldense a establece nan mes na paisnan leu for di Francia, manera Uruguay y Merca. Sinembargo, mayoria historiado ta di acuerdo cu Audisio, kende a bisa cu “Waldesianismo a yega na un fin durante Reformacion”, ora el a keda “absorba” door di Protestantismo. De echo, e movemento Waldense a perde hopi di e celo cu e tawatin siglonan mas prome. Esei a sosode ora cu miedo a pone su miembronan bandona e predicacion y siñamento di hende cu Bijbel ta manda.

[Nota]

[Mapa/Plachi na pagina 23]

(Pa fomato completo di texto, wak publicacion)

Areanan cu a sinti efecto di e Waldensenan

FRANCIA

Lyons

PROVENCE

Lubéron

Strasburgo

Milan

Roma

Berlin

Praga

Vienna

[Plachi]

Waldensenan a duna nan respaldo financiero na e traduccion di e Bijbel Olivétan di aña 1535

[Reconocemento]

Bijbel: © Cliché Bibliothèque nationale de France, Paris

[Plachi na pagina 20, 21]

VAUDÈS

Kimamento di dos mohe bieu Waldense

[Reconocemento]

Pagina 20 y 21: © Landesbildstelle Baden, Karlsruhe