Pregunta di Lector
Pregunta di Lector
E echo cu e birgen Maria tawata imperfecto a afecta e concepcion di Hesus?
Relaciona cu ‘e nacemento di Hesus’, e registro inspira ta bisa: “Tempo cu su mama Maria tawata comprometi pa casa cu Hose, prome cu nan a bai biba hunto, a sosode cu Maria tawata na estado di spirito santo.” (Mateo 1:18) Si, Dios su spirito santo a hunga un papel importante den Maria su embaraso.
Pero kico di Maria? No ta su eicel, of ovulo, a yuda pone cu el a sali na estado? Teniendo cuenta cu e promesanan cu Yehova a haci na Abraham, Isaac, Yacob, Huda y Rei David—antepasadonan di Maria—e yiu cu a nace mester tawata un berdadero desendiente di nan. (Genesis 22:18; 26:24; 28:10-14; 49:10; 2 Samuel 7:16) Di otro forma, con e yiu cu Maria a haya por tawata un heredero legal di e promesanan aki di Dios? E mester tawata Maria su yiu autentico.—Lucas 3:23-34.
Un angel di Yehova a aparece na e birgen Maria y a bis’e: “No tene miedo, Maria, pasobra bo a haya gracia cerca Dios. Y mira, lo bo concibi den bo matris y duna lus na un yiu homber, y lo bo yam’e Hesus.” (Lucas 1:30, 31) Pa por tin concepcion, un webo mester ser fertilisa. Parce cu ta Yehova Dios a fertilisa un eicel den matris di Maria door di transferi e bida di su Yiu unigenito for di e region spiritual pa tera.—Galationan 4:4.
Un mucha concibi di e manera aki door di un mohe imperfecto, por sali cu un curpa perfecto y sin pica? Con leinan di herencia ta funciona ora perfeccion y imperfeccion uni cu otro? Corda cu Dios a uza su spirito santo pa transferi e forsa di bida perfecto di su Yiu y causa e concepcion. E proceso aki a neutralisa e imperfeccion cu a existi den e eicel di Maria, produciendo for di principio di e eicel fertilisa un patronchi genetico perfecto.
En todo caso, nos por ta sigur cu e manera cu Dios su spirito santo a obra e tempo ei, a sigura cu Yehova su proposito tawatin exito. Angel Gabriel a splica Maria: “Spirito santo lo bin riba bo, y e poder di e Haltisimo lo sombra bo; y pa e motibo ei esun santo cu tin cu nace lo wordo yama e Yiu di Dios.” (Lucas 1:35) Si, ta como si fuera Dios su spirito santo a forma un muraya di proteccion rond di e embryo cu tawata desaroyando for di e momento di concepcion, pa ningun influencia dañino ni imperfeccion afect’e.
Ta bisto anto cu Hesus a debe su bida humano perfecto na su Tata celestial, y no na ningun hende. Yehova ‘a prepara un curpa’ p’e, y—desde su concepcion padilanti—Hesus en berdad tawata “sin mancha, separa for di pecadornan.”—Hebreonan 7:26; 10:5.
[Plachi na pagina 19]
“Lo bo concibi den bo matris y duna lus na un yiu homber”