“Bini Cerca Mi, . . . Y Lo Mi Refresca Boso”

Reunionnan Cu Ta Stimula Hende pa Stima y Haci Bon Obra

DI Toronto te Tokio, di Moscu te Montevideo, varios bes pa siman, miyones di Testigo di Yehova y nan amigonan ta basha bai nan luga di adoracion. Entre e personanan aki, tin tata di famia cu ta cansa despues di un dia pisa di trabou, esposanan diligente y mamanan cu yiu chikito, hobennan energico cu a pasa henter un dia na scol, biehitonan delicado cu ta cana pocopoco di dolo, biuda y huerfanonan balente y tambe esnan deprimi cu tin mester di consuelo.

E Testigonan aki di Yehova ta uza varios medio di transporte: di treinnan super rapido te burico, di metro patapata di hende te truck. Algun di nan mester crusa riu yen di crocodil, mientras cu otronan tin cu soporta e trafico di stadnan grandi cu ta traha riba hende su nervio. Dicon tur e hendenan aki ta haci tanto esfuerso asina?

Na prome luga, pasobra asisti y participa na reunionnan Cristian ta un manera importante pa rindi adoracion na Yehova Dios. (Hebreonan 13:15) Apostel Pablo a referi na un motibo mas ora el a skirbi: “Laga nos considera con pa stimula otro pa stima y haci bon obra, y no laga di asisti na nos mes reunionnan, . . . ma curasha otro; y mucho mas ainda, ora boso ta mira cu e dia ta yegando cerca.” (Hebreonan 10:24, 25) Akinan Pablo a expresa e mesun sintimentonan cu e salmista David cu a canta: “Mi tawata contento ora nan a bisa mi: ‘Laga nos bai na e cas di SEÑOR.’”—Salmo 122:1.

Dicon Cristiannan ta contento pa ta presente na nan reunionnan? Pasobra esnan cu ta asisti no ta bini djis pa sinta tende. Al contrario, e reunionnan ta duna nan e oportunidad pa siña conoce otro. Riba tur cos, e reunionnan aki ta habri caminda pa duna—y no ricibi so—y stimula otro pa mustra amor y haci bon obra. Esaki ta yuda haci e reunionnan ocasionnan edificante. Ademas, e reunionnan Cristian ta un di e medionan cu Hesus ta uza pa cumpli cu su promesa: “Bini cerca mi, . . . y lo mi refresca boso.”—Mateo 11:28, NW.

 Un Oasis di Consuelo y Comprension

Testigonan di Yehova tin bon motibo pa mira nan reunionnan como un fuente di refrescamento. Pa di prome, ta na e reunionnan “e esclabo fiel y prudente” ta sirbi cuminda spiritual na e debido tempo. (Mateo 24:45) Tambe reunionnan ta hunga un papel importante den haci Yehova su sirbidonan maestronan habil y celoso di e Palabra di Dios. Ademas, na Salon di Reino un persona ta topa un grupo di amigo amoroso, comprensivo y bondadoso cu ta cla pa yuda y consola esnan cu ta sufri.—2 Corintionan 7:5-7.

Phillis, un biuda cu a perde su casa ora su yiunan tawatin cinco y ocho aña, a experencia esaki. El a describi e efecto refrescante cu e reunionnan Cristian tawatin riba dje y su yiunan: “Na Salon di Reino bo ta sinti echt un consuelo pasobra semper rumannan tawata mustra nan amor y interes cu un brasa, un pensamento biblico of door di duna bo un man fuerte. Ei ta e luga cu mi kier ta pa semper.”—1 Tesalonicencenan 5:14.

Despues cu Marie a haci un operacion grandi, su docter a bis’e cu lo tum’e por lo menos seis siman pa e recupera. Durante e prome simannan di su recuperacion, Marie no por a bai reunion. Su docter a ripara cu e no tawata mes contento cu prome. Ora el a haya sa cu Marie no tawata asisti na su reunionnan, el a anim’e pa e bai. Marie a contesta cu su esposo, cu no ta di e mesun religion, lo no ta dispuesto pa lag’e bai e reunionnan door cu e ta precupa pa Marie su salu. Pesei, e docter a skirbi un recept oficial cu a “manda” Marie bai su reunionnan na Salon di Reino pa e haya animacion y asociacion edificante. Marie a finalisa bisando: “Despues cu mi a asisti na un solo reunion, mi a sinti mi hopi mas miho. Mi a cuminsa come, drumi henter anochi, bebe menos calmante pa dolo y mi tawata hari atrobe!”—Proverbionan 16:24.

Otro hende tambe ta ripara cu un ambiente di amor ta reina na e reunionnan Cristian. Un studiante di universidad a scohe pa studia e bida y comportacion di Testigonan di Yehova pa asina e skirbi un scriptie pa su les di antropologia. Den su scriptie el a skirbi lo siguiente tocante e atmosfer na e reunionnan: ‘Mi a haya un bon bini caloroso y esei a impresiona mi masha. E cualidad cu a sobresali cerca e Testigonan ta nan amabilidad. Y segun mi, esei ta e parti mas importante di e ambiente.’—1 Corintionan 14:25.

Den e mundo yen di problema aki, e congregacion Cristian ta manera un oasis spiritual. Un refugio di pas y amor. Door di asisti na e reunionnan bo por experencia personalmente e berdad di e palabranan di e salmista: “Mira, ki bon y ki dushi ta pa rumannan biba hunto den harmonia!”—Salmo 133:1.

[Cuadro/Plachi na pagina 25]

SATISFACIENDO UN NECESIDAD SPECIAL

Con hende sordo por beneficia di reunionnan Cristian? Rond mundo Testigonan di Yehova ta formando congregacionnan na idioma di seña. Durante e ultimo 13 añanan, nan a forma 27 congregacion y 43 grupo na idioma di seña na Merca. Actualmente tin 140 congregacion na idioma di seña na por lo menos 40 otro pais. A prepara 13 publicacion riba video na idioma di seña.

E congregacion Cristian ta duna hende sordo e oportunidad pa alaba Yehova. Odile, kende tawata un Catolico na Francia cu a sufri di atakenan di depresion severo y kier a comete suicidio, ta masha gradicido pa e educacion di Bijbel cu el a ricibi na e reunionnan Cristian. E ta bisa: “Mi a recobra mi salu y goso den bida. Pero mas importante ainda, mi a haya e berdad. Awor si mi bida tin proposito.”