Unda Nos Por Haya un Bon Lider?

“TUR cas ta wordo traha door di un hende, ma esun cu a traha tur cos ta Dios”, Bijbel ta bisa. (Hebreonan 3:4; Revelacion 4:11) Siendo cu e Dios berdadero, Yehova, ta nos Creador, “e sa di kico nos ta traha.” (Salmo 103:14) E sa bon-bon kico ta nos limitacionnan y necesidadnan. Y como cu e ta un Dios amoroso, e kier satisface e necesidadnan ei tambe. (Salmo 145:16; 1 Huan 4:8) Esei ta conta tambe pa nos necesidad di un bon lider.

Via profeta Isaias, Yehova a declara: “Mira, mi a hacie un testigo pa e pueblonan, un lider y comandante pa e pueblonan.” (Isaias 55:4) E solucion pa e crisis cu tin awe pa haya un bon lider ta encera identifica e Lider aki—nombra door di e Todopoderoso mes—y acepta su liderato. Pues, ken ta e Lider y Comandante profetisa aki? Kico ta su cualificacionnan como lider? Na unda lo e dirigi nos? Kico nos tin cu haci pa beneficia di su liderato?

 E Lider Priminti Ta Yega

Un 2.500 aña pasa, angel Gabriel a aparece na profeta Daniel y a bis’e: “Sabi anto y comprende cu for di e momento cu e ordo a wordo duna pa restaura y reconstrui Yerusalem te na e Mesias, e Prins, lo tin shete siman y sesentidos siman; e lo wordo traha atrobe, cu caya y roi, den tempo di angustia.”—Daniel 9:25.

Ta bisto cu e angel tawata informando Daniel di e tempo spesifico cu Yehova su Lider scohi lo a bini. “‘Mesias, e Prins’, of e Lider”, lo a presenta na fin di e 69 simannan—of despues di 483 aña—contando for di aña 455 prome cu Era Comun, ora cu a duna e ordo pa reconstrui Yerusalem. * (Nehemias 2:1-8) Kico a sosode na fin di e periodo ei? Lucas e escritor di Evangelio ta conta: “Den e di diessinco aña di e reinado di Tiberio Cesar, tempo cu Poncio Pilato tawata gobernado di Hudea, y Herodes tawata tetrarca di Galilea [aña 29 Era Comun], . . . e palabra di Dios a yega na Huan, yiu homber di Zacarias, den desierto. Y el a bin den henter e districto rond di Yordan, predicando un bautismo di repentimento pa pordon di pica.” E tempo ei “e pueblo tawata spera yen di expectativa” riba Mesias e Lider. (Lucas 3:1-3, 15) Aunke multitud di hende a bini cerca Huan, e no tawata e Lider ei.

Anto rond di october di aña 29 Era Comun, Hesus di Nazaret a bini cerca Huan pa e batisa. Y Huan a duna testimonio, bisando: “Mi a mira e spirito ta baha for di shelo manera un paloma, y el a keda riba dje. Mi no tawata conoc’e, ma Esun cu a manda mi batisa cu awa a bisa mi: ‘Esun cu bo mira e spirito baha y keda riba dje, ta esaki ta esun cu ta batisa cu spirito santo.’ Y mi a mira y a duna testimonio cu esaki ta e Yiu di Dios.” (Huan 1:32-34) Ora Hesus a batisa, el a bira e Lider ungi, e Mesias of Cristo.

Si, Hesucristo a resulta di ta esun priminti como “lider y comandante pa e pueblonan.” Y ora nos examina su cualidadnan como lider, nos ta ripara mesora cu su liderato ta supera tur e rekisitonan moderno di un lider ideal.

E Mesias—Un Lider Ideal

Un bon lider ta duna instruccion cla. Tambe e ta yuda hende cu ta bou di su cuido pa nan tin fortalesa personal y e habilidadnan necesario pa nan por soluciona problema cu exito. ‘Esaki ta un rekisito pa e lider exitoso di siglo 21’, segun e buki 21st Century Leadership: Dialogues With 100 Top Leaders (Liderato di Siglo 21: Dialogo cu e 100 Miho Lidernan). Esta bon Hesus a prepara su oyentenan pa atende situacionnan di tur dia! Djis considera su discurso di mas famoso, e Sermon Riba Sero. E palabranan registra na Mateo capitulo 5 pa 7 ta yen di conseho practico.

Tuma por ehempel Hesus su conseho tocante con pa soluciona desacuerdonan personal. El a bisa: “Pesei, si bo presenta bo ofrenda na altar, y ayanan bo corda cu bo ruman tin algo contra bo, laga bo ofrenda ayanan dilanti di altar, y bai; reconsilia cu bo ruman prome, y despues bin presenta bo ofrenda.” (Mateo 5:23, 24) E prome prioridad mester ta pa tuma iniciativa pa haci pas cu otro hende. Esei ta asta mas importante cu cumpli cu un deber religioso, manera presenta ofrenda riba altar di e tempel na Yerusalem segun loke e Lei di Moises a rekeri. Sino, bo actonan di adoracion ta inaceptabel pa Dios. Hesus su conseho ta mes practico awe cu e tawata siglonan pasa.

Tambe Hesus a yuda su oyentenan evita e trampa di inmoralidad. El a spierta nan: “Boso a tende cu a wordo bisa: ‘No comete adulterio’; ma ami ta bisa boso cu ken cu wak un mohe pa dese’e, ya caba el a comete adulterio cu ne den su curason.” (Mateo 5:27, 28) Ki un advertencia apropiado! Pakico  cuminsa bai den direccion di comete adulterio door di pensa riba dje? Hesus a bisa cu fornicacion y adulterio ta sali for di curason. (Mateo 15:18, 19) Pesei ta sabi pa nos proteha nos curason.—Proverbionan 4:23.

E Sermon Riba Sero tin tambe excelente conseho tocante stima bo enemigo, demostra generosidad, tene e punto di bista corecto di cosnan material y spiritual, etcetera. (Mateo 5:43-47; 6:1-4, 19-21, 24-34) Hesus a asta mustra su auditorio con pa busca Dios su yudansa door di siña nan con pa haci oracion. (Mateo 6:9-13) Mesias e Lider ta fortifica y prepara su siguidonan pa trata cu problemanan comun di humanidad.

Seis biaha den e Sermon Riba Sero, Hesus a introduci su declaracionnan cu e expresion “boso a tende cu a wordo bisa” of “tambe a wordo bisa”, anto caba e ta presenta un otro idea, bisando “ma ami ta bisa boso.” (Mateo 5:21, 22, 27, 28, 31-34, 38, 39, 43, 44) Esei ta indica cu su oyentenan tawatin custumber di actua den un cierto manera, segun e tradicionnan oral di e Farizeonan. Pero awor Hesus tawata mustrando nan un otro manera, un manera cu a refleha e berdadero idea tras di e Lei di Moises. Asina Hesus a introduci cambio, y el a haci esaki di tal manera cu tawata facil pa su siguidonan acepta. Si, Hesus a motiva hende pa haci cambionan drastico den nan bida, tanto riba tereno spiritual como moral. Esei ta un caracteristica di un berdadero lider.

Un buki tocante maneho ta indica cu ta masha dificil pa logra un cambio asina. E ta bisa: “E persona cu ta motiva e cambio [e lider] mester por sinti pa hende manera un trahado social, comprende mente di hende manera un psicologo, tin e resistencia di un coredo di maraton, e persistencia di un bulldog, ser independiente manera un ermitaño, y cu e pasenshi di un santo. Y asina mes teniendo tur e cualidadnan ei, no tin ningun garantia di exito.”

“Lidernan mester comporta nan mes manera nan kier pa nan siguidonan comporta nan”, segun un articulo titula “Liderato: E Caracteristicanan Ta Importante?” Si, un bon lider ta practica loke e ta predica. Y den caso di Hesucristo, asina tawata! El a siña su disipelnan pa nan ta humilde, pero tambe el a duna nan un ehempel practico door di laba nan pia. (Huan 13:5-15) E no a djis manda e disipelnan bai predica e bon nobo di e Reino di Dios; mas bien e tambe a participa vigorosamente den e trabou ei. (Mateo 4:18-25; Lucas 8:1-3; 9:1-6; 10:1-24; Huan 10:40-42) Y pa loke ta e manera corecto pa reacciona riba liderato, Hesus a pone un bon ehempel. El a bisa tocante su mes: “E Yiu no por haci nada di su mes, si no ta algo cu e ta mira e Tata haci.”—Huan 5:19.

Hesus su palabra- y echonan cu nos a considera aki, ta mustra bon cla cu e ta e Lider ideal. De echo, e ta surpasa tur norma humano pa ta un bon lider. Hesus ta perfecto. Como cu despues di su morto y resureccion el a ricibi inmortalidad, e ta biba pa semper. (1 Pedro 3:18; Revelacion 1:13-18) Cua lider humano por iguala e cualificacionnan aki?

Kico Nos Tin Cu Haci?

Como e Rei reinante di e Reino di Dios, Mesias e Lider lo basha hopi bendicion riba humanidad obediente. E Scritura ta priminti relaciona cu esaki: “Tera lo ta yen di e conocemento di SEÑOR, manera awa ta tapa lama.” (Isaias 11:9) “E humildenan lo hereda e tera, y lo deleita nan mes den pas abundante.” (Salmo 37:11) “Cada un di nan lo sinta bou di su palo di wendruif y bou di su palo di figo, y ningun hende lo no spanta nan.” (Mikeas 4:4) “Dios mes lo ta meimei di nan, y E lo seca tur lagrima kita for di nan wowo; y lo no tin morto mas; lo no tin lamento mas, ni yoramento, ni dolo; e prome cosnan a pasa.”—Revelacion 21:3, 4.

 Awe mundo ta den un crisis pa haya bon lider. Sinembargo, Hesucristo ta dirigiendo hende manso na un mundo nobo pacifico, caminda humanidad obediente lo ta uni den adora Yehova Dios y lo sigui rumbo pa perfeccion. Pesei ta masha vital pa nos tuma tempo pa gana conocemento di e Dios berdadero y di su Lider nombra, y actua na harmonia cu e conocemento ei!—Huan 17:3.

E miho compliment cu nos por duna un persona ta di imit’e. Nos lo no mester purba imita anto e Lider di mas grandi den historia humano—Hesucristo? Con nos por haci esei? Ki impacto su liderato lo tin riba nos bida si nos acept’e? Den e siguiente dos articulonan nos lo trata entre otro e preguntanan aki.

[Nota]

[Plachi na pagina 4]

Daniel a profetisa e binida di Dios su Lider scohi

[Plachi na pagina 7]

Hesus su siñansanan a prepara hende pa trata cu problema di bida

[Plachi na pagina 7]

Hesus lo dirigi humanidad obediente na un mundo nobo pacifico