Busca Dios cu Curason y Mente

Cristianismo berdadero ta manda nos uza tanto nos curason como nos mente pa cultiva un fe cu ta agrada Dios.

DE ECHO Hesucristo, e fundado di Cristianismo, a siña nos cu nos tin cu stima Dios cu ‘henter nos mente’, esta, cu nos intelecto, y cu ‘henter nos curason’ y ‘henter nos alma.’ (Mateo 22:37) Si, nos facultadnan mental tin cu hunga un papel clave den nos adoracion.

Ora Hesus tawata anima su oyentenan pa medita riba su siñansa, hopi bes el a puntra nan: “Kico [boso] ta pensa?” (Mateo 17:25; 18:12; 21:28; 22:42) Mescos tambe, apostel Pedro a skirbi su compañeronan di creencia pa nan ‘stimula nan facultadnan di pensa cla.’ (2 Pedro 3:1, NW) Apostel Pablo, e misionero di prome siglo cu mas a biaha, a suplica Cristiannan pa uza nan “facultad di rasona” [NW] y pa “comproba [pa nan mes] kico ta e bon y agradabel y perfecto boluntad di Dios.” (Romanonan 12:1, 2) Ta solamente ora Cristiannan ta analisa nan creencianan cabalmente y cuidadosamente nan por cultiva un fe cu ta agrada Dios y cu ta permiti nan enfrenta cu exito e pruebanan cu ta surgi den bida.—Hebreonan 11:1, 6.

Pa yuda otro hende cultiva un fe asina, e prome evangelisadonan Cristian “a rasona cu nan for di e Scrituranan, splicando y mustrando” nan e cosnan cu nan tawata siña nan. (Echonan 17:1-3) E metodo rasonabel ei a genera un reaccion faborabel di parti di hende di curason honrado. Por ehempel, un cantidad di hende den e stad di Berea na Macedonia “a ricibi e palabra [di Dios] cu bon boluntad [of, mayor anhelo mental, NW] y tawata scudriña e Scrituranan tur dia, pa mira si e  cosnan aki [cu Pablo y su compañeronan a splica nan] tawata asina.” (Echonan 17:11) Ta bon pa nota dos cos den e texto aki. Di prome, e Bereanonan a anhela pa scucha e Palabra di Dios; di dos, nan no a asumi ciegamente cu loke nan a tende tawata corecto, pero nan a verifica esei den e Scritura. E misionero Cristian Lucas humildemente a elogia e Bereanonan pa esaki, yamando nan hende di ‘mentalidad noble.’ Abo ta refleha un mentalidad noble asina den e manera cu bo ta mira cosnan spiritual?

Mente y Curason Ta Traha Hunto

Manera a ser menciona anteriormente, adoracion berdadero ta encera tanto mente como curason. (Marco 12:30) Pensa atrobe riba e ilustracion den e articulo anterior di e ferfdo contrata cu a uza e colonan robes pa ferf un cas. Si el a scucha atentamente na e instruccionnan di su doño di trabou, lo e por a pone su curason y mente den su trabou y lo e tawatin e confiansa cu e doño di e cas lo a gusta su trabou. Mescos ta conta pa nos adoracion.

Hesus a bisa: “E adoradonan berdadero lo adora e Tata den spirito y berdad.” (Huan 4:23) Pesei apostel Pablo a skirbi: “Pa e motibo aki tambe . . . nos no a stop di haci oracion pa boso y di pidi pa boso por wordo yena cu e conocemento di su boluntad den tur sabiduria spiritual y comprendemento. Y nos ta pidi pa boso cana na un manera digno di Señor, pa agrad’e den tur sentido.” (Colosencenan 1:9, 10) Tal “conocemento” ta permiti personanan sincero hinca nan alma y curason den nan adoracion, haciendo esei cu pleno confiansa pasobra nan “ta adora loke [nan] conoce.”—Huan 4:22.

Pa e motibonan aki, Testigonan di Yehova no ta batisa baby ni personanan resien interesa cu no a studia e Scritura cuidadosamente. Hesus a manda su siguidonan: “Haci tur e nacionnan disipel di mi, . . . siña nan pa cumpli cu tur loke mi a ordena boso.” (Mateo 28:19, 20) Ta despues cu studiantenan sincero di Bijbel a haya un conocemento exacto di Dios su boluntad nan lo por tuma un decision bon funda tocante e asunto di adoracion. Abo ta haci esfuerso pa gana tal conocemento exacto?

Con pa Comprende e Oracion di Nos Tata

Pa mira e diferencia entre kico kiermen un conocemento exacto di Bijbel y sa mas o menos kico e ta bisa, laga nos considera loke nos conoce como e Oracion di Nos Tata, cu ta para skirbi na Mateo 6:9-13.

Cu regularidad miyones di hende ta haci e oracion aki cu Hesus a siña nos ora nan bai misa. Pero cuanto di nan a siña su nificacion, specialmente e prome parti di e oracion cu ta trata cu e nomber y Reino di Dios? E asuntonan aki ta asina importante cu Hesus a pone nan na prome luga den e oracion.

E ta cuminsa: “Nos Tata cu ta den shelo, bo nomber sea santifica.” Santifica ta nifica haci santo. Tuma nota cu Hesus a bisa pa resa pa e nomber di Dios ser santifica. Pa hopi hende, esei ta lanta por lo menos dos pregunta. Di prome, kico ta e nomber di Dios? Di dos, pakico mester santific’e?

Nos por haya e contesta riba e prome pregunta den mas cu 7.000 luga den e idiomanan original di Bijbel. Un di nan ta na Salmo 83:18 (NW): “Pa hende por sa cu Abo, kende su nomber ta Yehova, Abo so ta e Haltisimo riba henter tera.” Relaciona cu e nomber dibino, Yehova, Exodo 3:15 ta bisa: “Esaki ta mi nomber pa semper, y esaki ta mi nomber conmemorativo di generacion pa generacion.” * Pero  pakico mester santifica e nomber di Dios, cu riba su mes ta e esencia di puresa y santidad? Esei ta pasobra for di cuminsamento di historia humano e nomber a ser difama y calumnia.

Den Eden, Dios a bisa Adam cu Eva cu nan lo a muri si nan a come e fruta prohibi. (Genesis 2:17) Satanas tawatin e curashi di contradeci Dios door di bisa Eva: “Siguramente boso lo no muri.” Cu otro palabra, Satanas a acusa Dios di ta gaña. Pero e no a keda te ei. El a sigui difama e nomber di Dios door di bisa Eva cu Dios inhustamente a keda sin dun’e conocemento cu lo por tawata bon p’e. E di: “Pasobra Dios sa cu e dia cu boso come di [e palo di conocemento di bon y malo], boso wowo lo habri y boso lo ta manera Dios, conociendo bon y malo.” Esta un calumnia!—Genesis 3:4, 5.

Door di come di e fruta prohibi, Adam cu Eva a tuma parti pa Satanas. For di e tempo ei, mayoria hende, sea conciente of inconciente, a sigui calumnia Dios door di rechasa su normanan husto. (1 Huan 5:19) Ainda hende ta maldiciona Dios door di culp’e pa nan sufrimento—maske tin biaha ta nan mes falta cu nan ta sufri. Proverbionan 19:3 ta bisa: “Locura di un hende ta ruina su caminda, y den su curason e ta bira raso contra SEÑOR.” Bo por mira pakico Hesus—kende di berdad a stima su Tata—a pidi pa Su nomber ser santifica?

“Cu Bo Reino Bin”

Despues cu Hesus a pidi pa e nomber di Dios ser santifica, el a bisa: “Cu bo reino bin. Cu bo boluntad sosode na tera mescos cu den shelo.” (Mateo 6:10) Relaciona cu e pasashi ei, nos por puntra: ‘Kico ta e Reino di Dios? Y kico binimento di e Reino ei tin di aber cu e boluntad di Dios riba tera?’

Den Bijbel, basicamente e palabra “reino” ta nifica “gobernacion di un rei.” Logicamente anto, e Reino di Dios ta referi na un gobernacion di Dios, cu un rei cu e ta scohe. E Rei aki ta nada menos cu Hesucristo resucita—e “Rei di reinan y Señor di señornan.” (Revelacion 19:16; Daniel 7:13, 14) Relaciona cu Dios su Reino Mesianico den man di Hesucristo, profeta Daniel a skirbi: “Den e dianan di e reinan ei [gobiernonan humano cu ta na mando awor] e Dios di shelo lo lanta un reino cu nunca lo no wordo destrui, y e reino ei lo no pasa pa ningun otro pueblo; e lo garna y pone un fin na tur e reinonan aki, ma e mes lo dura pa semper.”—Daniel 2:44.

Si, e Reino di Dios lo tuma mando completo di tera, y elimina tur malbado y gobierno humano for di riba dje “pa semper.” Den e sentido aki, e Reino di Dios ta e medio cu Yehova ta uza pa santifica su nomber, y limpi’e di tur calumnia di parti di Satanas y hende malbado.—Ezekiel 36:23.

Mescos cu tur gobierno, e Reino di Dios tin subdito. Ken esakinan ta? Bijbel ta contesta: “Ma e humildenan lo hereda e tera, y lo deleita nan mes den pas abundante.” (Salmo 37:11) Mescos tambe, Hesus a bisa: “Bendiciona ta esnan humilde, pasobra nan lo hereda e tera.” Claro cu e humildenan aki tin conocemento exacto di Dios. Esei ta un rekisito pa gana bida.—Mateo 5:5; Huan 17:3.

Bo por imagina bo e tera completo yen di hende humilde, sakseno, cu di berdad ta stima Dios y nan prohimo? (1 Huan 4:7, 8) Esei ta loke Hesus a resa pidi p’e ora el a bisa: “Cu bo reino bin. Cu bo boluntad sosode na tera mescos cu den shelo.” Abo ta comprende pakico Hesus a siña su siguidonan resa asina? Mas importante ainda, bo ta mira ki influencia e cumplimento di e oracion ei por tin riba bo personalmente?

Awe Miyones di Hende Ta Rasona Riba e Scritura

Hesus a profetisa di un campaña mundial di educacion spiritual cu lo a anuncia e benidero Reino di Dios. El a bisa: “E evangelio aki  di e reino lo wordo predica den henter mundo como un testimonio na tur nacion, y e ora ei e fin [di e mundo aki] lo yega.”—Mateo 24:14.

Rond mundo mas o menos seis miyon Testigo di Yehova ta compartiendo e bon noticia ei cu nan prohimo. Nan ta invita bo pa siña mas tocante Dios y su Reino door di “scudriña e Scritura”, uzando bo facultad di rasona. Si bo haci esei lo bo fortifica bo fe y bo wowonan lo briya cu e speransa di biba den un paradijs riba tera, cu lo ta “yen di e conocemento di SEÑOR, manera awa ta tapa lama.”—Isaias 11:6-9.

[Nota]

 [Cuadro/Plachi na pagina 8]

IMITA E GRAN MAESTRO

Hopi bes Hesus a siña hende door di enfoca riba topiconan spesifico di Bijbel. Por ehempel, e morto di Hesus a laga dos disipel di dje tur turdi. Despues di su resureccion el a splica nan ki papel lo el a hunga den e proposito di Dios. Lucas 24:27 ta bisa: “Cuminsando cu Moises y cu tur e profetanan el a splica nan e cosnan tocante di su mes den tur e Scrituranan.”

Ripara cu Hesus a scohe un tema spesifico—“tocante di su mes”, e Mesias—y cu den su splicacion, el a cita for di “tur e Scrituranan.” Na moda di papia, Hesus a pone e textonan relevante di Bijbel hunto manera pida pida di un puzzel, y esaki a permiti su disipelnan haya un bista cla di e berdadnan spiritual. (2 Timoteo 1:13) Esei no a djis ilumina nan, sino tambe a conmove nan profundamente. E relato ta bisa nos: “Nan a bisa otro: ‘Nos curason no tawata kima den nos mientras cu e tawata papia cu nos na caminda, mientras cu e tawata splica nos e Scrituranan?’”—Lucas 24:32.

Testigonan di Yehova ta purba imita e metodonan di Hesus den nan trabou di predica. Nan medionan principal di studio ta e foyeto Kico Dios Ta Rekerí di Nos? y e buki Conocimentu cu Ta Hiba na Bida Eterno. Esakinan ta trata decenas di topico interesante di Bijbel, manera: “Ken Dios Ta?”, “Pakico Dios Ta Permiti Sufrimento?”, “Con Bo Por Haya e Religion Berdadero?”, “Esakinan Ta e Ultimo Dianan!” y “Edificando un Famia Cu Ta Honra Dios.” Den cada les tin varios texto di Bijbel.

Nos ta anima bo pa tuma contacto cu Testigonan di Yehova den bo comunidad of skirbi na e adres na pagina 2 di e revista aki si bo ta desea un studio di Bijbel gratis di e temanan aki y hopi otro mas.

[Plachi]

Yega na curason di bo studiante door di enfoca riba un topico spesifico di Bijbel

[Plachinan na pagina 7]

Abo ta capta e nificacion di Hesus su oracion modelo?

“Nos Tata cu ta den shelo, bo nomber sea santifica . . .”

“Cu bo reino [Mesianico] bin . . .”

“Cu bo boluntad sosode na tera mescos cu den shelo”