Fe Mester Ta Basa Riba Logica?

“Tin mucho hende ‘religioso’ cu a bira religioso hustamente pa evita cu nan tin cu pensa”, segun e director di un seminario teologico na Merca. E ta bisa mas aleu: “Pa nan, ta ‘fe’ bo mester tin den tur cos, y no tin nodi busca prueba.”

LOKE e director aki kiermen ta cu mayoria hende cu ta bisa cu nan tin fe den doctrinanan di un religion, no ta para keto na pakico nan ta kere loke nan ta kere ni si nan fe tin suficiente base. Nada straño anto cu religion a bira un topico cu hopi hende no kier papia mes ariba.

Lamentablemente, e custumber di uza imagen religioso y di ripiti oracion for di cabes tampoco no ta yuda hende pensa logico. E custumbernan aki, combina cu e arkitectura impresionante di misanan, dibuhonan elabora riba nan bentananan di colo y musica cu ta conmove hende, ta mas o menos e concepto cu miyones di hende tin di nan religion. Aunke algun religion ta pretende cu nan fe ta basa riba Bijbel, nan mensahe di ‘kere den Hesus y lo bo ta salba’ no ta anima hende pa studia Bijbel seriamente. Otro religionnan ta dedica nan mes na predica un evangelio social of politico. Den kico tur esaki a resulta?

Relaciona cu e situacion na Nort America, un escritor di temanan di religion a bisa: “Cristianismo . . . tin tendencia di ta superficial, [y] su siguidonan no ta mucho bon educa den e fe.” Asta un encuestado a bai asina leu di describi Merca como “un nacion di analfabeto biblico.” Pa ta franco, e observacionnan aki ta conta tambe pa otro paisnan caminda e asina yama Cristianismo ta reina. Hopi religion no Cristian tampoco no ta anima hende pa sigui logica. Mas bien, nan ta duna hopi atencion na cantica di alabansa, oracion ritual y varios forma di meditacion cu ta encera cosnan mistico, en bes di pensamento logico y constructivo.

Pero e mesun hendenan cu no ta worry si nan creencianan religioso ta exacto of basa riba berdad, hopi bes, den nan bida di tur dia, si ta analisa otro cosnan masha bon mes. Bo no ta haya ta straño cu e mesun persona cu si ta analisa un auto bon prome cu e cumpr’e—un auto cu un dia lo putri caba na nada—ta bisa tocante su religion: ‘Si e tawata bon pa mi mayornan, lo e ta bon pa mi tambe’?

Si di berdad nos ta interesa na agrada Dios, nos lo no mester investiga seriamente si tur loke nos ta kere aden tocante Dje ta exacto? Apostel Pablo a papia di cierto hende religioso di su tempo cu tawatin “un celo pa Dios, ma no segun conocemento.” (Romanonan 10:2) Por compara hende asina cu un ferfdo contrata cu ta traha duro pa ferf un cas, pero ta uza e  colonan robes debi cu e no a scucha e instruccionnan di e doño. E ferfdo por ta masha contento cu su trabou, pero e doño ta pensa mescos?

Kico Dios ta acepta como adoracion berdadero? Bijbel ta contesta: “Esaki ta bon y aceptabel den bista di Dios nos Salbador, kende ta desea pa tur hende wordo salba y yega na conocemento di e berdad.” (1 Timoteo 2:3, 4) Algun hende por pensa cu ta imposibel pa haya e conocemento ei den e hopi religionnan cu tin awe. Pero pensa riba esaki: Si ta Dios su boluntad pa hende yega na un conocemento exacto di e berdad, lo E ta asina inhusto pa scond’e for di nan? No segun Bijbel, cu ta bisa: “Si bo busca [Dios], E lo laga bo hay’e.”—1 Cronicanan 28:9.

Con Dios ta laga esnan cu ta busc’e sinceramente siña conoc’e? E siguiente articulo lo contesta esei.