Keda Lanta, Sigui Padilanti cu Curashi!

Informe di Reunionnan Special

KEN por nenga cu nos ta bibando den “temponan trabahoso”? Como Testigo di Yehova, nos no ta keda sin sinti e presionnan di biba den “e ultimo dianan.” (2 Timoteo 3:1-5) Pero nos ta reconoce cu hende tin mester di yudansa. Nan no ta comprende kico e sucesonan mundial ta nifica. Nan tin mester di consuelo y speransa. Ora di yuda nos prohimo, kico ta nos papel principal?

Dios a duna nos e tarea pa anuncia e bon noticia di su Reino estableci. (Mateo 24:14) Hende mester sa cu e Reino celestial aki ta e unico speransa pa humanidad. Pero no ta semper nan ta ricibi nos mensahe cu gusto. Den algun luga nos obra ta prohibi y nan ta persigui nos rumannan. Toch nos no ta entrega. Cu pleno confiansa den Yehova, nos ta determina pa keda lanta y sigui padilanti cu curashi, declarando e bon nobo sin stop.—Echonan 5:42.

E determinacion firme ei tawata bisto na e reunionnan special cu a tuma luga na october 2001. Diasabra, 6 di october, tawatin e reunion anual di Watch Tower Bible and Tract Society of Pennsylvania. A tene e reunion ei na e Salon di Asamblea di Testigonan di Yehova na Jersey City, New Jersey, Merca. * E siguiente dia, a tene reunionnan adicional na cuater sitio, tres na Merca y uno na Canada. *

E presidente di e reunion anual tawata Samuel F. Herd, un miembro di e Cuerpo Gobernante di Testigonan di Yehova. Den su palabranan di apertura el a referi na Salmo 92:1 y 4, anto a bisa: “Nos kier demostra cu nos ta gradicido.” Y sin duda e cinco informenan for di rond mundo cu a sigui, a duna nos motibo pa ta gradicido.

Informenan for di Tur Parti

Ruman Alfred Kwakye a informa riba e progreso di e obra di predica na Ghana, conoci anteriormente como Costa di Oro. Nos obra tawata prohibi pa varios aña den e pais ei.  Hende tawata puntra: “Dicon e obra ta prohibi? Ta kico boso a haci?” Ruman Kwakye a splica cu esaki tawata habri caminda pa duna testimonio. Na 1991 ora gobierno a kita e prohibicion, tawatin 34.421 Testigo di Yehova na Ghana. Na augustus 2001, e total tawata 68.152, un aumento di 98 porshento. Tin plannan riba mesa pa traha un Salon di Asamblea di 10.000 asiento. Ta bisto cu nos rumannan spiritual na Ghana ta haci pleno uzo di nan libertad religioso.

Apesar di intrankilidad politico, nos rumannan na Irlanda ta participa activamente den sirbishi, y hende ta respeta nan pa nan posicion neutral. Irlanda tin 115 congregacion parti den 6 sircuito, segun Peter Andrews, cordinado di e Comite di Sucursal. Ruman Andrews a conta e experencia di Liam, un mucha homber di 10 aña cu ta predica sin miedo na scol. Liam a laga Mi buki di relato biblico (publica door di Testigonan di Yehova) cu 25 mucha di su klas y tambe cu su juffrouw. Liam kier a batisa, pero un hende a puntra si e no ta mucho jong. Liam a contesta: “Loke mester dicidi esei no ta mi edad sino mi amor pa Yehova. Mi bautismo lo mustra cuanto mi stim’e.” Liam su meta ta pa bira misionero.

Na 1968 tawatin 5.400 publicador di e bon nobo na Venezuela. Pero awor tin mas cu 88.000 publicador, segun Stefan Johansson, cordinado di e Comite di Sucursal. Y tin potencial pa mas aumento pasobra mas cu 296.000 persona a asisti na Memorial na 2001. Na december 1999, awasero torencial a causa avalancha di lodo cu a mata alrededor di 50.000 hende, incluso varios Testigo. Un Salon di Reino a yena cu lodo casi te na blafon. Ora un hende a sugeri pa bandona e edificio, e rumannan a contesta: “Absolutamente cu no! Esaki ta nos Salon di Reino, y nos no kier bandon’e awor.” Nan a cuminsa traha riba dje, sacando tonelada di lodo, piedra y otro sushi. Nan a remodela e edificio, y e rumannan ta bisa cu awor e ta mas bunita cu prome cu e desaster!

Ruman Denton Hopkinson, cordinado di e Comite di Sucursal na Filipinas, a conta cu einan tin 87 idioma y dialecto. Durante e aña di sirbishi cu a pasa, nan a publica e Traduccion di Mundo Nobo di e Santo Scritura den e tres idiomanan principal di e pais: Cebuano, Iloko y Tagalog. Ruman Hopkinson a conta e experencia  di un mucha homber di nuebe aña cu a lesa e buki Good News—To Make You Happy (Bon Nobo Cu Lo Haci Bo Felis), publica door di Testigonan di Yehova. El a obtene otro publicacionnan for di sucursal, y a lesa nan tambe, pero su famia a bai contra dje. Añanan despues ora e tawata studia pa docter, el a tuma contacto cu sucursal y a pidi un studio di Bijbel. El a batisa na 1996 y djis despues a drenta den sirbishi di tempo completo. Awor e cu su casa ta sirbi na e oficina di sucursal.

‘Puerto Rico ta den e negoshi di “exporta Testigo”’, segun Ronald Parkin, cordinado di e Comite di Sucursal. Tin mas o menos 25.000 publicador riba e isla, y e cantidad a keda mescos pa añanan. Con bini? Wel, segun calculo Puerto Rico ta “exporta” rond di 1.000 publicador pa aña pa Merca, caminda hopi di nan ta bai biba pa motibonan economico. Ruman Parkin a conta di un decision di corte cu a marca pauta. E caso a envolve Luis, un Testigo di 17 aña cu tawatin leukemia. Como cu Luis a nenga sanger, nan a hiba su caso dilanti. E hues kier a papia personalmente cu ne, y a bishit’e na hospital. Luis a puntra e hues: “Si ta un crimen serio mi a comete, señora lo a husga mi como un adulto, pero awor cu mi kier obedece Dios, señora ta trata mi como un menor di edad. Dicon?” E hues a keda combenci cu e tawata un menor maduro y cu e por a dicidi pa su mes.

Despues di e informenan di paisnan leu, Harold Corkern, di e Comite di Sucursal di Merca, a entrevista cuater sirbido di Yehova di hopi tempo. Arthur Bonno tin 51 aña den sirbishi di tempo completo y awor e ta sirbi den e Comite di Sucursal di Ecuador. Angelo Catanzaro tin 59 aña den sirbishi di tempo completo, di cua gran parti como superintendente biahero. Richard Abrahamson a gradua di Scol di Galad na 1953, y tawatin e privilegio di supervisa e obra na Dinamarca pa 26 aña prome cu el a regresa Betel di Brooklyn. Por ultimo, tur hende a keda encanta di scucha Carey W. Barber di 96 aña. Ruman Barber a batisa na 1921 y tin 78 aña den e ministerio di tempo completo y ta un miembro di e Cuerpo Gobernante for di 1978.

Discursonan Stimulante

E reunion anual tawatin un serie di discurso cu a stimula pensamento. Ruman Robert W. Wallen a papia riba e tema “Un Pueblo pa Su Nomber.” Nos ta e pueblo cu ta carga Dios su nomber, y nos t’ei den mas cu 230 pais. Yehova a duna nos “un futuro y un speransa.” (Yeremias 29:11) Nos tin cu sigui proclama e Reino di Dios, compartiendo e maravioso mensahe di consuelo y alivio. (Isaias 61:1) Ruman Wallen a conclui bisando: “Laga nos sigui biba dia tras dia di acuerdo cu nos nomber, Testigonan di Yehova.”—Isaias 43:10.

E ultimo parti di e programa tawata un simposio na encargo di tres miembro di Cuerpo Gobernante. E tawata titula “Awor Ta Tempo pa Keda Lanta, Para Firme y Bira Fuerte.”—1 Corintionan 16:13.

Prome, Ruman Stephen Lett a papia riba e tema “Keda Lanta na e Ora Laat Aki.” Ruman Lett a splica cu soño fisico ta un regalo, un don. E ta refresca nos y fortalece nos. Sinembargo, soño spiritual nunca ta probechoso. (1 Tesalonicencenan 5:6) Pues anto, con nos por keda spiritualmente lanta? Ruman Lett a describi tres “pildora” spiritual: (1) Tene hopi di haci den e trabou di Señor. (1 Corintionan 15:58) (2) Ser conciente di bo necesidad spiritual. (Mateo 5:3, NW) (3) Sea habri pa conseho basa riba Bijbel pa bo por actua den un manera sabi.—Proverbionan 13:20.

Ruman Theodore Jaracz a presenta un discurso stimulante titula “Para Firme bou di Prueba.” Referiendo na Revelacion 3:10, Ruman Jaracz a puntra: “Kico ta ‘e ora di prueba’?” E prueba ei ta bini den “e dia di Señor”, e tempo den cua nos ta biba awor. (Revelacion 1:10) E prueba ta drei rond di un cuestion clave: nos ta na banda di Dios su Reino estableci of na banda di Satanas su sistema di cosnan malbado? Tanten cu e ora di prueba  no termina, nos lo confronta dificultad. Nos lo keda leal na Yehova y su organisacion? ‘Individualmente nos lo tin cu desplega e lealtad ei’, Ruman Jaracz a remarca.

Por ultimo, Ruman John E. Barr a papia riba e tema “Bira Fuerte Como un Persona Spiritual.” Referiendo na Lucas 13:23-25, el a remarca cu nos tin cu “haci tur esfuerso pa drenta door di e porta smal.” Hopi hende ta fracasa pasobra nan no ta suficiente diligente pa bira fuerte. Pa nos por bira Cristiannan plenamente desaroya, nos tin cu siña aplica principionan biblico den tur aspecto di nos bida. Ruman Barr a urgi: “Mi tin sigur cu boso ta di acuerdo cu awor ta tempo pa (1) tene Yehova na prome luga, (2) bira fuerte y (3) haci esfuerso pa nos cumpli cu Yehova su boluntad. Asin’aki nos lo por logra pasa door di e porta smal cu ta hiba na bida eterno maravioso.”

Na clausura di e reunion anual a keda un pregunta cu no a haya contesta: Kico ta e texto di aña pa e aña di sirbishi 2002? E siguiente dia e pregunta ei a haya contesta.

Reunion Adicional

Diadomingo mainta tawatin gran expectativa na comienso di e programa di e reunion adicional. E programa a cuminsa cu un resumen di e les di Toren di Vigilancia di e siman ei, sigui pa un presentacion breve di algun punto sobresaliente di e reunion anual. Siguientemente, tur hende a keda encanta cu e discurso tocante e texto pa aña 2002: “Bini cerca mi, . . . y lo mi refresca boso.” (Mateo 11:28, NW) E discurso tawata basa riba articulonan di studio cu despues a sali den E Toren di Vigilancia di 15 di december 2001.

Despues di esei, algun ruman cu na augustus 2001 a bai e congresonan special “Siñadonan dje Palabra di Dios” na Francia y Italia, a conta nan experencia. * Finalmente, como e punto sobresaliente di e programa di e dia ei, oradonan bishitante di Betel di Brooklyn a presenta e dos ultimo discursonan.

E prome discurso tawata titula “Confia cu Curashi den Yehova Durante e Tempo Trabahoso Aki.” E orado a desaroya e siguiente puntonan principal: (1) Semper tawata vital pa Dios su pueblo confia cu curashi den Yehova. Bijbel ta contene hopi ehempel di esnan cu a mustra curashi y fe apesar di oposicion. (Hebreonan 11:1–12:3) (2) Yehova ta percura un base solido pa nos confia den Dje completamente. Su obranan y su Palabra ta duna e garantia cu E ta interesa den su sirbidonan y nunca lo E no lubida nan. (Hebreonan 6:10) (3) Specialmente awendia nos tin mester di curashi y confiansa. Hende ta odia nos, manera Hesus a profetisa. (Mateo 24:9) Pa nos por persevera, nos tin cu depende riba e Palabra di Dios y confia cu su spirito ta cu nos, y tambe nos mester di curashi pa sigui declara e bon nobo. (4) Ehempelnan cu ta mustra cu aworaki mes nos ta confronta oposicion. Tur presente a keda profundamente conmovi ora cu e orado a conta loke nos rumannan a soporta na Armenia, Francia, Georgia, Kazakhstan, Rusia y Turkmenistan. En berdad, awor ta tempo pa demostra curashi y confia den Yehova!

E ultimo orado a desaroya e tema “Sigui Padilanti Unidamente Hunto cu Yehova Su Organisacion.” E discurso a trata varios punto oportuno. (1) Tur caminda hende ta mira e adelanto di e pueblo di Yehova. Nos trabou di predica y nos congresonan ta hala atencion  publico. (2) Yehova a establece un organisacion cu ta uni. Na aña 29 Era Comun, Dios a ungi Hesus cu spirito santo cu e proposito cu lo e reuni “tur cos”—esnan cu un perspectiva celestial y tambe esnan cu un speransa terenal—den Dios su famia uni. (Efesionan 1:8-10) (3) Congresonan ta un demostracion sobresaliente di unidad internacional. Esaki tawata bisto na e congresonan special cu a tene na Francia y Italia na augustus aña pasa. (4) Na Francia y Italia nan a adopta un resolucion stimulante. E orado a comparti algun porcion for di e resolucion ei. Akibou tin e texto completo di e resolucion.

Na conclusion di e ultimo discurso, e orado bishitante a lesa un anuncio conmovedor cu e Cuerpo Gobernante a prepara. E anuncio a bisa en parte: “Awor ta tempo pa keda lanta y vigila, y tuma nota con sucesonan riba e esena mundial ta desaroya. . . . Nos kier laga boso sa cu e Cuerpo Gobernante stima boso, y e resto di e pueblo di Dios, y e ta interesa den boso tur. Yehova bendiciona boso ricamente segun boso ta haci su boluntad di henter alma.” Yehova su pueblo mundial ta determina pa keda lanta den e tempo trabahoso aki y sigui padilanti cu curashi hunto cu Yehova su organisacion uni.

[Nota]

[Cuadro/Plachi na paginanan 29-31]

Resolucion

Na augustus 2001, tawatin congresonan special “Siñadonan dje Palabra di Dios” na Francia y Italia. Un resolucion stimulante a keda presenta na e congresonan ei. Aki ta sigui e texto di e resolucion.

“COMO TESTIGO DI YEHOVA, nos tur reuni na e congreso aki ‘Siñadonan dje Palabra di Dios’ a ser instrui door di siñansa masha probechoso. A identifica precis ken ta e fuente di e siñansa aki. E siñansa no ta bini di hende. E ta bini di Esun cu e antiguo profeta Isaias a describi como nos ‘Magnifico Instructor.’ (Isaias 30:20, NW) Tuma nota di Yehova su recordatorio cu ta para skirbi na Isaias 48:17: ‘Ami ta [Yehova, NW] bo Dios, kende ta siña bo, pa bo prospera, kende ta guia bo den e caminda cu bo mester cana.’ Con E ta logra esaki? E manera principal ta via e buki mas traduci y plama na mundo: Bijbel. Y e buki ei ta bisa nos bon cla: ‘Tur Scritura ta inspira pa Dios y ta util.’—2 Timoteo 3:16.

Awe, humanidad desesperadamente tin mester di tal siñansa util. Dicon nos por bisa asina? Kico hende pensado ta reconoce ora nan ta wak e situacion di e mundo aki, un situacion confuso y instabil? Simplemente esaki: Aunke mundo su sistemanan di enseñansa a educa miyones di hende, tin un falta deplorabel di berdadero norma y balor y hende no por distingui entre loke ta bon y loke ta malo. (Isaias 5:20, 21) Hopi hende no conoce Bijbel ni su contenido. Aunke tecnologia ta habri caminda na un exceso di informacion via di computer, e no ta duna contesta riba preguntanan vital. Preguntanan manera: Kico ta e proposito di bida? Con nos tin cu comprende e sucesonan di nos tempo? Tin un speransa solido pa futuro? Pas y siguridad lo bira realidad un dia? Ademas, den bibliotecanan bo ta haya cantidad di obra di referencia cu ta trata casi tur topico di actividad humano. Pero toch, humanidad ta ripiti e erornan di pasado. Criminalidad ta aumenta drasticamente. Malesanan cu un tempo hende a kere cu nan a elimina, ta bolbe surgi, mientras cu otro malesa, por ehempel AIDS,  ta plama alarmantemente. Bida di famia ta desintegra na un velosidad cu ta tolondra hende. Contaminacion ta daña e medio ambiente. Terorismo y armanan di destruccion masal ta menasa pas y siguridad. Problemanan sin solucion ta sigui acumula. Kico ta e debido papel cu nos ta hunga den yuda nos prohimo den e tempo trabahoso aki? Tin siñansa cu ta splica e causa di humanidad su situacion penoso? Siñansa cu ta mustra e manera pa nos por tin un miho bida awor, y cu tambe ta ofrece un speransa prometedor y sigur pa futuro?

Nos tarea biblico ta pa ‘bai y haci disipel di hende di tur nacion, y siña nan cumpli cu tur loke Cristo a ordena.’ (Mateo 28:19, 20) Hesucristo a duna e tarea aki despues di su morto y resureccion, ora cu el a ricibi tur autoridad den shelo y riba tera. E encargo aki ta surpasa tur actividad cu hende ta promove. Desde Dios su punto di bista, nos tarea tin prome prioridad, pasobra e ta enfoca riba e necesidad spiritual di hende cu tin hamber pa husticia. Nos tin motibonan biblico solido pa tuma e tarea ei na serio.

Pa por haci esaki nos tin cu mantene e actividad ei na prome luga den nos bida. Cu Dios su bendicion y yudansa, e obra aki lo ser realisa, apesar di un cantidad di distraicion, obstaculo y oposicion di gruponan religioso y politico, cu kier stroba e progreso di e programa mundial di enseñansa aki. Nos ta sigur y tin fe cu e obra aki lo sigui prospera te ora cu e ta cla. Dicon nos por ta asina sigur? Pasobra Señor Hesucristo a priminti cu lo e ta cu nos den nos ministerio cu Dios a duna nos, te na fin di e sistema di cosnan aki.

Humanidad angustia ta acercando su fin. Nos tin cu cumpli cu nos tarea actual prome cu e fin yega. Pesei nos, como Testigo di Yehova, ta declara lo siguiente:

Prome: Como sirbidonan dedica, nos ta determina pa sigui pone interesnan di Reino na prome luga den nos bida y sigui crece spiritualmente. Pa logra esei, nos oracion ta di acuerdo cu e palabranan di Salmo 143:10: ‘Siña mi haci bo boluntad, pasobra Abo ta mi Dios.’ Esaki ta rekeri pa nos ta studiantenan diligente, cu ta haci esfuerso pa lesa Bijbel tur dia, y ta haci studio personal y investigacion. Pa nos progreso por ta bisto pa tur hende, nos lo haci tur esfuerso rasonabel pa prepara pa—y beneficia plenamente di—e educacion teocratico cu tin disponibel na reunionnan di congregacion, asambleanan di sircuito, y na congresonan di districto, nacional y internacional.—1 Timoteo 4:15; Hebreonan 10:23-25.

Di Dos: Pa Dios por siña nos, nos lo come exclusivamente na su mesa y nos lo percura di haci caso di e spiertamento biblico tocante doctrinanan engañoso di demoño. (1 Corintionan 10:21; 1 Timoteo 4:1) Nos lo tuma extra precaucion pa evita factornan perhudicial, manera falsedad religioso, rasonamento inutil, pasionnan sexual bergonsoso, e plaga di pornografia, dibirticion degrada, y tur cos cu no ta ‘di acuerdo cu palabranan sano.’ (Romanonan 1:26, 27; 1 Corintionan 3:20; 1 Timoteo 6:3; 2 Timoteo 1:13) Aprecio pa e ‘donnan den hende’, cu ta cualifica pa siña loke ta sano, lo motiva nos pa respeta nan esfuerso y copera cu nan di henter alma pa mantene na halto e normanan limpi y husto di moralidad y spiritualidad cu tin den e Palabra di Dios.—Efesionan 4:7, 8, 11, 12; 1 Tesalonicencenan 5:12, 13; Tito 1:9.

Di Tres: Como mayornan Cristian, nos lo haci tur nos esfuerso pa instrui nos yiunan cu palabra y tambe cu nos ehempel. Nos precupacion principal ta pa yuda nan for di nan infancia pa ‘conoce e scrituranan santo, pa nan por haya e sabiduria cu ta hiba na salbacion.’ (2 Timoteo 3:15) Nos lo tene bon na mente cu si nos lanta nan den e disiplina y instruccion di Yehova, nan lo tin miho chens di experencia Dios su promesa cu ‘lo bai nan bon y nan lo por tin  bida largo riba tera.’—Efesionan 6:1-4.

Di Cuater: Prome cos cu nos lo haci ora nos haya nos confronta cu ansiedad of cu problema serio, ta di ‘laga nos peticionnan ta conoci dilanti di Dios’, cu e garantia cu ‘e pas di Dios, cu ta surpasa tur comprendemento humano’ lo proteha nos. (Filipencenan 4:6, 7) Door cu nos ta bou di e yugo di Cristo, nos lo haya refrescamento. Y como cu nos sa cu Dios ta percura pa nos, nos lo no basila pa tira nos ansiedadnan riba Dje.—Mateo 11:28-30; 1 Pedro 5:6, 7.

Di Cinco: Como muestra di nos gratitud na Yehova pa e privilegio di ta siñadonan di su Palabra, nos lo renoba nos esfuerso pa ‘parti e palabra di su berdad na un manera corecto’ y ‘cumpli cu nos ministerio’ plenamente. (2 Timoteo 2:15; 4:5) Como cu nos ta bon conciente di loke esei ta encera, nos deseo sincero ta pa busca esnan merecedor y cultiva e simiña sembra. Ademas, nos lo mehora nos dunamento di siñansa door di conduci mas studio di Bijbel eficasmente. Esaki lo trece nos mas na harmonia cu e boluntad di Dios pa ‘tur clase di hende wordo salba y yega na conocemento exacto di e berdad.’—1 Timoteo 2:3, 4.

Di Seis: Durante henter e siglo pasa y te den e siglo aki, Testigonan di Yehova den hopi pais a confronta varios forma di oposicion y persecucion. Pero Yehova a resulta di ta cu nos. (Romanonan 8:31) Su Palabra infalibel ta sigura nos cu ‘ningun arma cu wordo forma contra nos’ pa stroba, tarda of para nos trabou di predica y siña hende tocante e Reino, lo no tin exito. (Isaias 54:17) Sea tempo ta bon of e ta dificil, nos no por stop di papia di e berdad. Nos ta determina pa cumpli urgentemente cu nos tarea di predica y siña hende. (2 Timoteo 4:1, 2) Nos meta ta pa comparti e bon noticia di e Reino di Dios mas tanto posibel cu hende di tur nacion. Asina nan lo sigui haya chens di siña tocante e areglo pa gana bida eterno den un husto mundo nobo. Como un multitud uni di siñadonan di e Palabra di Dios, nos determinacion ta pa sigui imita e ehempel di e Gran Maestro, Hesucristo, y refleha su cualidadnan cu ta agrada Dios. Tur esaki nos lo haci na honor y alabansa di nos Magnifico Instructor y Dunador di Bida, Yehova Dios.

Tur presente na e congreso aki cu ta apoya e resolucion aki, por fabor, bisa SI!”

Ora e orado a haci e peticion final ei di e resolucion na e 160.000 personanan na e tres congresonan na Francia y na e 289.000 personanan na e nuebe sitionan na Italia, e presentenan a grita un “Si” potente cu a zona den e hopi idiomanan di e delegadonan.