Informe di Proclamadonan di Reino

“Mi Kier A Sirbi Dios”

“SALI for di dje, mi pueblo.” Esei tawata un yamada cu apostel Huan a tende un angel haci den prome siglo Era Comun. Den nos tempo miyones di hende di curason honrado a responde na e yamada y a hui di “e gran Babilonia”, e imperio mundial di religion falso. (Revelacion 18:1-4) Wilner di Haiti ta un di nan, y e ta conta su experencia.

“Mi a nace na 1956 den un famia Catolico deboto den e pueblo chikito di St. Marc, Haiti. Imagina bo con contento mi famia a keda ora mi a ser selecta, hunto cu dos otro persona di nos pueblo, pa drenta un seminario na St. Michel de l’Atalaye, Haiti. Despues na 1980, nan a manda nos Stavelot, Belgica, pa mas entrenamento. Ei nos a bai un universidad Catolico tambe.

Na principio mi tawata entusiasma cu e idea di bira pastor. Pero un dia den comedor, e pastor na encargo di nos grupo a pidi mi keda un ratico mas pasobra tawatin algo cu e kier a bisa mi. Imagina bo e shock cu mi a haya ora el a bisa mi flat asina cu e ta sinti su mes sexualmente atrai na mi! Mi a rechasa su avancenan pero mi a keda totalmente desilusiona. Mi a skirbi mi famia tocante e incidente y a bandona e seminario un par di luna despues, maske mi famia a keda malcontento cu mi. Mi a haya luga di keda den e stad y a sigui studia un otro profesion.

Ora mi a regresa St. Marc, mi no tawatin ningun tiki confiansa mas den Iglesia Catolico. No obstante, mi kier a sirbi Dios, pero mi no tawata sa kico pa haci. Mi a bai misa Adventista, Ebenezer y Mormon. Mi tawata spiritualmente perdi.

Despues mi a bin corda cu tempo mi tawata den seminario na Belgica, mi tawata lesa e version di Bijbel di Crampon. Den dje mi a haya sa cu Dios tin un nomber. Pues, uzando Dios su nomber mi a haci oracion ferviente na Dje pa e yuda mi haya e religion berdadero.

Djis despues, dos Testigo di Yehova a bin biba banda di mi. Nan tawata hende keto, respetuoso y cu bon manera. Nan forma di biba a impresiona mi. Riba un dia, un di nan a invita mi na e Conmemoracion anual di e morto di Cristo. Mi a gusta e reunion masha tanto y a acepta un studio di Bijbel regular cu e Testigonan. Den mas o menos seis luna, mi a keda combenci cu mi a haya e manera corecto pa sirbi Dios. Mi a dedica mi bida na Yehova y a batisa dia 20 di november 1988.”

Cu tempo, Wilner a cuminsa e sirbishi di tempo completo. Awe, e ta sirbi como anciano di congregacion. E cu su casa, hunto cu nan dos yiunan, ta sirbi felismente den e congregacion.

[Plachi na pagina 9]

Lesando Bijbel, Wilner a bin haya sa cu e nomber di Dios ta Yehova