Nunca Mucho Bieu pa Siña

KSENIYA a nace na aña 1897. E tawatin 3 yiu mohe, un yiu homber, 15 nieto y 25 bisanieto. Henter su bida el a haci loke su mayornan a siñ’e haci. El a bini Moscu como refugiado for di e Republica Abkhaz, ubica entre Lama Preto y e seronan di Caucasus. Toch e tawata hopi satisfecho cu su bida, specialmente cu loke el a yama su religion hereda.

Na 1993, Kseniya su yiu mohe Meri a bira Testigo di Yehova. Meri a cuminsa papia cu Kseniya tocante Yehova Dios y Bijbel, pero e no kier a tende. Kseniya tawata blo bisa su yiu mohe: “Mi ta mucho bieu pa mi siña algo nobo.”

Toch su yiu mohe Meri, y tambe Londa (casa di su nieto) y Nana cu Zaza (su bisanietonan), kendenan tur a bira Testigo di Yehova, a sigui papia cu ne tocante Bijbel. Un anochi na 1999, nan a lesa un texto di Bijbel pa Kseniya cu a toca su curason. E texto tawatin e palabranan conmovedor cu Hesus a bisa su fiel apostelnan ora el a institui e Cena di Señor. (Lucas 22:19, 20) E anochi ei, na edad di 102 aña, Kseniya a dicidi di cuminsa studia Bijbel.

Kseniya a bisa: “Despues di a biba 102 aña, por fin mi a comprende e nificacion di bida. Awor mi ta realisa cu no tin nada miho cu sirbi Yehova, nos Dios maravioso y amoroso. Ainda mi ta salu y na mi tino. Mi por lesa sin bril y ta asocia activamente cu mi famia.”

Dia 5 di november 2000, Kseniya a batisa. E ta bisa: “Awor mi ta duna mi bida na Yehova pa sirbie cu amor. Mi ta laga revista y tratado sinta na e bushalte banda di mi cas. Hopi bes famianan ta bin bishita mi, y felismente mi ta comparti e berdad tocante Yehova cu nan.”

Cu anhelo Kseniya ta spera riba e dia cu ‘su carni lo bira mas suave cu esun di mucha, y cu lo e bolbe na e dianan di vigor di su hubentud.’ (Job 33:25) Si un señora di shen aña no ta haya cu e ta mucho bieu pa siña for di Bijbel kico ta e nificacion di bida, kico di abo?