Pakico Batisa?
Pakico Batisa?
“Bai y haci tur e nacionnan disipel di mi, y batisa nan.” —MATEO 28:19.
1, 2. (a) Bou di ki sircunstancianan algun bautismo a tuma luga? (b) Ki preguntanan ta lanta relaciona cu bautismo?
E REI Franco Karel e Grandi a obliga e Sagonnan bou di su dominio batisa masalmente den e añanan 775 pa 777 Era Comun. Segun historiado John Lord, “el a obliga nan comberti na Cristianismo pa nomber.” Mescos tambe, despues cu e gobernante Ruso Vladimir I a casa cu un princes Griego Ortodox na 987 Era Comun, el a dicidi cu su subditonan mester a bira “Cristian.” El a decreta un bautismo masal di su pueblo—cu cuchiu na garganta si tawata necesario!
2 E bautismonan ei tawata apropiado? Nan tin berdadero nificacion? Ta tur hende mester batisa?
Con Mester Batisa?
3, 4. Pakico sprengomento of bashamento di awa riba cabes no ta bautismo Cristian?
3 Ora cu Karel e Grandi y Vladimir I a obliga hende pa batisa, e gobernantenan ei no a actua segun e Palabra di Dios. De echo, sea cu e bautismo ta door di sprengo of basha awa riba cabes of asta door di manda e persona completamente bou di awa, batisa hende cu no a siña e berdad di Bijbel no ta yuda nan cu nada.
4 Analisa loke a tuma luga ora Hesus di Nazaret a bai cerca Huan Bautista na aña 29 Era Comun. Huan tawata batisa hende den Riu Yordan. Nan a bini boluntariamente cerca dje pa batisa. El a djis laga nan para den Yordan segun cu e ta basha poco awa di riu riba nan cabes of sprengo nan cu ne? Kico a sosode ora Huan a batisa Hesus? Mateo ta informa cu despues cu Hesus a batisa el “a sali mesora for di awa.” (Mateo 3:16) E tawata den awa, y Huan a bah’e completamente bou di awa den Riu Yordan. Di mes manera, e eunuco deboto di Etiopia a batisa den ‘un luga cu tawatin hopi awa.’ E luganan di awa ei tawata necesario pasobra e bautismo di Hesus y su disipelnan a nifica bai completamente bou di awa.—Echonan 8:36.
5. Con e prome Cristiannan a batisa hende?
5 E palabranan Griego traduci como “batisa”, “bautismo”, etcetera, ta duna e idea di baha of bai bou di awa. Smith’s Bible Dictionary ta bisa: “E nificacion corecto y literal di bautismo ta bai bou di awa.” Pesei mes algun traduccion di Bijbel ta referi na Huan como “esun cu ta manda of hinca hende bou di awa.” (Mateo 3:1, Rotherham; Diaglott interliniar) E obra History of the Christian Religion and Church, During the Three First Centuries (Historia di Religion y Iglesia Cristian Durante e Tres Prome Siglonan) di Augustus Neander ta remarca: “Originalmente tawata batisa hende door di manda nan bou di awa.” E famoso obra Frances Larousse du XXe Siècle (Paris, 1928) ta comenta: “E prome Cristiannan a batisa door di bai bou di awa tur caminda cu nan por a haya awa.” Y e New Catholic Encyclopedia ta declara: “Tin tur indicacion cu den e Iglesia di prome siglo hende tawata batisa door di bai bou di awa.” (1967, Volumen II, pagina 56) Pues awe, nos bautismo como Testigo di Yehova ta un paso boluntario cu ta encera bai completamente bou di awa.
Un Otro Motibo pa Batisa
6, 7. (a) Pa ki proposito Huan a efectua bautismo? (b) Kico tawata nobo tocante e bautismo di Hesus su siguidonan?
6 E bautismonan cu Huan a efectua tawatin un otro proposito cu esnan cu Hesus su siguidonan a efectua. (Huan 4:1, 2) Huan a batisa hende como un simbolo publico di nan repentimento pa pica contra e Lei. * (Lucas 3:3) Pero e bautismo di e siguidonan di Hesus tawatin algo nobo. Na Pentecoste di 33 Era Comun, apostel Pedro a urgi su oyentenan: “Repenti, y laga cada un di boso wordo batisa den e nomber di Hesucristo pa pordon di boso picanan.” (Echonan 2:37-41) Aunke Pedro tawata dirigi su mes na e Hudiunan y proselitonan, e no tawata papia tocante bautismo pa simbolisa repentimento pa pica contra e Lei; ni e no tawata kiermen cu bautismo den nomber di Hesus ta nifica laba pica.—Echonan 2:10.
7 Na e ocasion ei Pedro a uza e prome ‘yabi di e reino.’ Pa ki proposito? Esei tawata pa el a duna di conoce na su oyentenan e oportunidad cu nan tawatin di drenta e Reino di shelo. (Mateo 16:19) E Hudiunan a rechasa Hesus como Mesias, y awor nan tawatin cu repenti y eherce fe den dje pa nan por a busca y haya pordon di Dios. Esei tawata un factor nobo y vital. Nan por a duna prueba publico di un fe asina door di baha bou di awa den nomber di Hesucristo. Den e manera ei nan lo a simbolisa nan dedicacion personal na Dios mediante Cristo. Tur persona cu ta desea di haya e aprobacion di Dios awe tin cu eherce un fe similar, dedica nan mes na Yehova Dios, y somete nan na e bautismo Cristian como simbolo di un dedicacion sin reserva na e Dios Haltisimo.
Conocemento Exacto Ta Esencial
8. Pakico e bautismo Cristian no ta pa tur hende?
8 Bautismo Cristian no ta pa tur hende. Hesus a manda su siguidonan: “Bai y haci tur e nacionnan disipel di mi, y batisa nan den nomber di e Tata y di e Yiu y di e spirito santo, y siña nan pa cumpli cu tur loke mi a ordena boso.” (Mateo 28:19, 20) Prome cu un persona batisa, mester ‘siñ’e cumpli cu tur loke Hesus a ordena su disipelnan.’ Pesei, no tin sentido pa forsa hende cu no tin fe basa riba conocemento di e Palabra di Dios pa batisa. Tambe e ta contrario na e tarea cu Hesus a duna su berdadero siguidonan.—Hebreonan 11:6.
9. Kico kiermen batisa “den nomber di e Tata”?
9 Kico ta nifica batisa “den nomber di e Tata”? Esei ta nifica cu e candidato pa bautismo ta reconoce e posicion y autoridad di nos Tata celestial. E ta mira Yehova Dios como nos Creador, “e Haltisimo riba henter tera”, y e Soberano Universal.—Salmo 83:18; Isaias 40:28; Echonan 4:24.
10. Kico kiermen batisa ‘den nomber di e Yiu’?
10 Batisa ‘den nomber di e Yiu’ ta nifica reconoce Hesus su posicion y autoridad como e Yiu unigenito di Dios. (1 Huan 4:9) Esnan cu ta cualifica pa bautismo ta acepta Hesus como esun mediante ken Dios a percura un “prijs di rescate pa hopi.” (Mateo 20:28; 1 Timoteo 2:5, 6) Tambe candidatonan pa bautismo mester reconoce e “puesto superior” na cua Dios a halsa su Yiu.—Filipencenan 2:8-11, NW; Revelacion 19:16.
11. Kico ta nifica batisa ‘den nomber di spirito santo’?
11 Kico ta nifica batisa ‘den nomber di spirito santo’? Esaki ta indica cu e candidato pa bautismo ta reconoce cu e spirito santo ta e forsa activo di Yehova cu E ta uza den varios manera na harmonia cu su proposito. (Genesis 1:2; 2 Samuel 23:1, 2; 2 Pedro 1:21) Esnan cu ta cualifica pa bautismo ta reconoce cu e spirito santo ta yuda nan comprende “e profundidadnan di Dios”, sigui cu e obra di predica e Reino, y manifesta e frutanan di spirito cu ta “amor, goso, pas, pasenshi, cariño, bondad, fieldad, mansedumbre, dominio propio.”—1 Corintionan 2:10; Galationan 5:22, 23; Yoel 2:28, 29.
E Importancia di Repenti y Comberti
12. Ki relacion tin entre bautismo Cristian y repentimento?
12 Cu excepcion di e bautismo di e homber sin pica, Hesus, bautismo ta un simbolo di aprobacion di Dios despues cu un persona a repenti. Ora nos repenti, nos ta sinti un duele profundo, of remordimento, pa algo cu nos a haci of keda sin haci. E Hudiunan di prome siglo cu kier a agrada Dios tawatin cu repenti di nan picanan contra Cristo. (Echonan 3:11-19) Algun pagano cu a bira creyente na Corinto a repenti di fornicacion, idolatria, hortamento y otro pica serio. Pa motibo di nan repentimento, nan a ser “laba” den e sanger di Hesus; “santifica”, of aparta, pa sirbi Dios; y “hustifica” den nomber di Cristo y cu spirito di Dios. (1 Corintionan 6:9-11) Repentimento ta un paso vital cu hende mester dal pa haya un bon consenshi y e alivio cu Dios ta duna pa sintimento di culpa pa picanan cometi.—1 Pedro 3:21.
13. Relaciona cu bautismo, kico kiermen comberti?
13 Prome cu un persona batisa como Testigo di Yehova e tin cu comberti. Combertimento ta un acto boluntario y sin reserva di parti di un persona cu a dicidi di curason cu e kier sigui Cristo Hesus. Personanan asina ta rechasa e moda di anda robes cu nan tawatin den pasado y ta determina pa haci loke ta corecto den bista di Dios. Den e Scritura, e verbonan Hebreo y Griego relaciona cu comberti tin e sentido di bira bek. E accion aki ta nifica aleha for di un caminda robes y acudi na Dios. (1 Reinan 8:33, 34) Comberti ta nifica tambe produci “obranan cu ta cuadra cu repentimento.” (Echonan 26:20) Tambe e ta rekeri bandona adoracion falso, actua na harmonia cu e mandamentonan di Dios y duna Yehova debocion exclusivo. (Deuteronomio 30:2, 8-10; 1 Samuel 7:3) Ora nos comberti nos ta cambia nos manera di pensa, nos metanan y nos disposicion. (Ezekiel 18:31) Nos ta “bira bek” segun cu nos ta remplasa mal caracteristicanan cu e personalidad nobo.—Echonan 3:19; Efesionan 4:20-24; Colosencenan 3:5-14.
Dedicacion di Henter Curason Ta Vital
14. Kico e dedicacion di Hesus su siguidonan ta nifica?
14 Prome cu siguidonan di Hesus batisa, tambe nan tin cu dedica nan mes di henter curason na Dios. Dedica ta nifica aparta pa un proposito sagrado. E paso aki ta asina importante cu ta den oracion nos tin cu bisa Yehova di nos decision di dun’e debocion exclusivo pa semper. (Deuteronomio 5:9) Esei ta claro pasobra nos no a dedica nos na un obra of na un hende sino na Dios mes.
15. Pakico candidatonan pa bautismo ta somete nan na bautismo?
15 Ora nos dedica nos mes na Dios mediante Cristo, nos ta expresa un determinacion pa uza nos bida pa haci e boluntad dibino manera e Scritura ta manda. Como simbolo di e dedicacion ei, candidatonan pa bautismo ta somete nan na bautismo bou di awa, mescos cu Hesus a batisa den Riu Yordan pa simbolisa e echo cu e ta presenta su mes na Dios. (Mateo 3:13) Ta bon pa nota cu Hesus tawata haciendo oracion na e ocasion crucial ei.—Lucas 3:21, 22.
16. Con nos por mustra nos goso na un manera apropiado ora nos ta mira hende batisa?
16 E bautismo di Hesus tawata un ocasion serio pero gososo. E bautismo Cristian di actualidad ta mescos. Ora nos ta mira hende simbolisa nan dedicacion na Dios, nos por expresa nos goso cu un aplauso respetuoso y animacion caloroso. Pero nos lo evita di grita, fluit y cosnan por estilo, pasobra e expresion di fe aki ta algo sagrado. Nos ta expresa nos goso na un manera digno.
17, 18. Kico ta yuda determina si un persona ta cumpli cu e rekisitonan pa batisa?
17 Contrario na esnan cu ta sprengo awa riba baby of obliga grupo grandi di hende cu no tin conocemento di Bijbel pa batisa, Testigonan di Yehova nunca ta forsa ningun hende batisa. De echo, nan no ta batisa esnan cu no ta cumpli cu e rekisitonan biblico. Prome cu un persona por bira asta un predicado no batisa di e bon nobo, ancianonan Cristian ta haci sigur cu e ta comprende e siñansanan basico di Bijbel, cu e ta biba na harmonia cu nan, y cu e ta responde afirmativamente riba e pregunta aki: “Di berdad bo kier ta un Testigo di Yehova?”
18 Ora e personanan aki ta participa bon den e obra di predica e Reino y ta expresa nan deseo di batisa—cu masha poco excepcion—ancianonan Cristian ta combersa cu nan pa haci sigur cu nan ta creyente cu a haci un dedicacion na Yehova y cu ta cumpli cu e rekisitonan di Dios pa bautismo. (Echonan 4:4; 18:8) E manera cu nan ta contesta mas cu 100 pregunta riba siñansa di Bijbel ta yuda e ancianonan determina si nan ta cumpli cu e rekisitonan biblico pa batisa. Algun no ta cumpli cu tur y pesei no por acepta nan pa bautismo Cristian.
Tin Algo Cu Ta Tene Bo Atras?
19. En bista di loke Huan 6:44 ta bisa, ken lo ta coheredero hunto cu Hesus?
19 Podise hopi di e hendenan cu a ser obliga pa batisa masalmente a ser bisa cu ora nan muri nan ta bai shelo. Pero Hesus a bisa di esnan cu ta sigui su pasonan: “Ni un hende no por bin cerca mi, si no ta e Tata cu a manda mi a hal’e.” (Huan 6:44) Yehova a hala of atrae 144.000 persona na Cristo cu lo ta coheredero cu Hesus den e Reino celestial. Bautismo forsa nunca a santifica ningun hende pa e posicion glorioso ei den e areglo di Dios.—Romanonan 8:14-17; 2 Tesalonicencenan 2:13; Revelacion 14:1.
20. Kico lo por yuda algun persona cu ainda no a batisa?
20 Desde rond di 1935 en particular, multitud di hende cu ta spera di sobrevivi “e gran tribulacion” y biba riba tera pa semper a join e filanan di Hesus su “otro carnenan.” (Revelacion 7:9, 14; Huan 10:16) Nan ta cualifica pa bautismo pasobra nan a harmonisa nan bida cu e Palabra di Dios y ta stim’e ‘cu henter nan curason, alma, forsa y mente.’ (Lucas 10:25-28) Aunke algun hende ta realisa cu Testigonan di Yehova ta ‘adora Dios den spirito y berdad’, ainda nan no a sigui e ehempel di Hesus y duna evidencia publico di amor genuino y debocion exclusivo na Yehova door di batisa. (Huan 4:23, 24; Deuteronomio 4:24; Marco 1:9-11) Oracion sincero y spesifico relaciona cu e paso vital aki por duna nan net e insentivo y curashi cu nan mester pa cumpli completamente cu e Palabra di Dios, pa haci un dedicacion sin reserva na Yehova Dios y pa batisa.
21, 22. Pa ki motibonan algun hende ta wanta cu dedicacion y bautismo?
21 Algun persona ta asina absorba den cosnan di mundo of coremento tras di placer cu nan no ta sobra masha tempo pa cosnan spiritual. Door di esei nan ta wanta cu dedicacion y bautismo. (Mateo 13:22; 1 Huan 2:15-17) Nan lo por ta felis si nan cambia nan punto di bista- y metanan! Ora hende ta hala cerca Yehova, esei lo enrikece nan spiritualmente, lo yuda alivia nan di ansiedad y lo duna nan e pas y e satisfaccion cu hacimento di e boluntad di Dios ta trece cu ne.—Salmo 16:11; 40:8; Proverbionan 10:22; Filipencenan 4:6, 7.
22 Otronan ta bisa cu nan ta stima Yehova pero nan no ta haci un dedicacion y batisa pasobra nan ta pensa cu asina nan ta evita di tin cu rindi cuenta na Dios. Pero cada un di nos tin cu rindi cuenta na Dios. For di ora nos a tende e palabra di Yehova, nos a haya un responsabilidad. (Ezekiel 33:7-9; Romanonan 14:12) Como un ‘pueblo scohi’, e Israelitanan di pasado a nace den un nacion dedica na Yehova, y pesei nan tawatin e obligacion di sirbie fielmente segun su instruccionnan. (Deuteronomio 7:6, 11) Awe, no tin ningun hende cu ta nace den un nacion asina, pero si nos a ricibi instruccion exacto di e Scritura, nos tin cu sigui nan cu fe.
23, 24. Ki temornan no mester pone hende wanta cu bautismo?
23 Algun tin miedo cu nan no tin suficiente conocemento y pesei nan ta wanta cu bautismo. Pero, ta nos tur tin hopi di siña pasobra ‘hamas hende lo haya sa e trabou cu Dios a haci for di principio te na fin.’ (Eclesiastes 3:11) Tuma por ehempel e eunuco di Etiopia. Como proselito, e tawatin un poco conocemento di e Scritura, pero e no por a contesta tur pregunta tocante e proposito di Dios. Pero despues cu el a haya sa di e areglo di Yehova pa salbacion mediante e sacrificio di rescate di Hesus, mesora el a somete su mes na bautismo bou di awa.—Echonan 8:26-38.
24 Algun persona ta duda pa haci un dedicacion na Dios pasobra nan tin miedo di faya. Monique di 17 aña ta bisa: “Mi a wanta cu bautismo door cu mi tawatin miedo cu lo mi no por cumpli cu mi dedicacion.” Pero si nos ta confia den Yehova cu henter nos curason, ‘lo E dirigi nos bereanan.’ Lo E yuda nos “cana den e berdad” como su fiel sirbidonan dedica.—Proverbionan 3:5, 6; 3 Huan 4.
25. Ki pregunta ta merece nos consideracion awor?
25 Confiansa absoluto den Yehova y amor sincero p’e ta impulsa tur aña miles di hende pa dedica nan na Dje y batisa. Y siguramente tur sirbido dedica di Dios kier ta fiel na dje. Sinembargo, nos ta biba den temponan trabahoso, y nos ta enfrenta varios prueba di fe. (2 Timoteo 3:1-5) Kico nos por haci pa cumpli cu nos dedicacion na Yehova? Nos lo considera esaki den e siguiente articulo.
[Nota]
^ par. 6 Hesus no tawatin pica, pesei su bautismo no tawata un simbolo di repentimento. Su bautismo tawata un simbolo cu el a presenta su mes na Dios pa haci e boluntad di su Tata.—Hebreonan 7:26; 10:5-10.
Bo Ta Corda?
• Con e bautismo Cristian ta ser efectua?
• Ki conocemento un persona tin mester pa e batisa?
• Ki pasonan ta hiba na e bautismo di Cristiannan berdadero?
• Pakico algun persona ta wanta cu bautismo, pero kico por yuda nan?
[Preguntanan di Estudio]
[Plachinan na pagina 14]
Bo sa kico ta nifica batisa ‘den nomber di e Tata, di e Yiu y di spirito santo’?