Sigui Sirbi Yehova cu un Curason Firme

“Mi curason ta para firme, o Dios, mi curason ta para firme.”—SALMO 57:7.

1. Dicon nos por tin e mesun conviccion cu David tawatin?

YEHOVA por pone nos para firme den e fe Cristian pa nos por pega na Cristianismo berdadero como su sirbidonan dedica. (Romanonan 14:4) Pesei, nos por tin e mesun conviccion cu e salmista David, kende a sinti su mes impulsa pa canta: “Mi curason ta para firme, o Dios.” (Salmo 108:1) Si nos curason ta para firme, nos lo ta motiva pa cumpli cu nos dedicacion na Dios. Y door di acudi na Dje pa guia y fortalesa, nos por duna prueba di ta inmovibel, firme den determinacion y conviccion como wardado di integridad, “semper abundando den e trabou di Señor.”—1 Corintionan 15:58.

2, 3. Kico ta e nificacion di e apelacion urgente cu Pablo a registra na 1 Corintionan 16:13?

² Den un apelacion urgente cu apostel Pablo a haci na e siguidonan di Hesus den e stad Corinto di pasado, pero cu sigur sigur te ainda ta aplicabel, el a bisa: “Sea alerta, para firme den fe, actua manera homber, sea fuerte.” (1 Corintionan 16:13) Na Griego cada un di e verbonan imperativo aki (den forma di mandato) ta den e tempo presente. Pues, nan ta urgi accion continuo. Kico e spiertamento aki ta nifica?

³ Nos por ta spiritualmente “alerta” door di opone Diabel y hala cerca Dios. (Santiago 4:7, 8) E echo cu nos ta depende riba Yehova ta permiti nos keda uni y ‘para firme den e fe Cristian.’ Nos, hunto cu e hopi ruman mohenan cu nos tin, ta “actua manera homber” sirbiendo Dios cu curashi como proclamadonan di Reino. (Salmo 68:11) Nos ta bira “fuerte” door di acudi continuamente na nos Tata celestial pa E duna nos forsa pa haci su boluntad.—Filipencenan 4:13.

4. Kico a hiba na nos bautismo como Cristian?

 ⁴ Nos a demostra cu nos a acepta e berdad ora nos a haci un dedicacion sin reserva na Yehova y a simbolisa esei door di somete nos na bautismo bou di awa. Pero kico a hiba na nos bautismo? Na prome luga, nos a gana conocemento exacto di e Palabra di Dios. (Huan 17:3) Door di esei nos a haya fe y nos a sinti nos impulsa pa repenti. Nos a sinti echt duele di e malo cu nos a haci den pasado. (Echonan 3:19; Hebreonan 11:6) Despues nos a comberti, pasobra nos a aleha for di e practicanan incorecto pa por sigui un bida na harmonia cu e boluntad di Dios. (Romanonan 12:2; Efesionan 4:23, 24) Despues di esaki nos a haci un dedicacion di henter curason na Yehova den oracion. (Mateo 16:24; 1 Pedro 2:21) Nos a haci peticion na Dios pa un bon consenshi y a batisa como simbolo di nos dedicacion na Dje. (1 Pedro 3:21) Ora nos ta medita riba e pasonan aki, esaki lo yuda nos keda enfoca riba e necesidad pa haci esfuerso continuo pa cumpli cu nos dedicacion y sigui sirbi Yehova cu un curason firme.

Sigui Busca Conocemento Exacto

5. Pakico nos tin cu sigui gana conocemento di Bijbel?

⁵ Pa cumpli cu nos dedicacion na Dios, nos tin cu sigui gana conocemento basa riba Bijbel. Ora cu na principio nos a conoce e berdad di Dios, tawata un berdadero deleite pa haya alimento spiritual! (Mateo 24:45-47) E “cumindanan” ei tawata delicioso, y nan a nutri nos bon spiritualmente. Awor ta esencial pa sigui tuma alimento spiritual nutritivo pa asina nos por mantene un curason firme como Yehova su sirbidonan dedica.

6. Con abo kisas a ser yuda pa desaroya gratitud di curason pa e berdad di Bijbel?

⁶ Esfuerso ta necesario pa gana mas conocemento di e Scritura. Esei ta manera busca tesoro scondi, algo cu ta rekeri esfuerso. Pero ta ki un recompensa pa haya “e conocemento di Dios”! (Proverbionan 2:1-6) Ora un publicador di Reino a studia Bijbel na prome instante cu bo, podise el a uza e buki Conocimentu cu Ta Hiba na Bida Eterno. Kisas lo el a uza basta tempo pa trata cada capitulo, tal bes den mas cu un sesion. Bo a saca hopi beneficio ora boso tawata lesa y analisa e textonan. Ora bo tawatin dificultad pa comprende un punto, el a ser splica. Esun cu a conduci e studio di Bijbel cu bo tawata prepara bon, tawata pidi Dios su spirito den oracion, y el a yuda bo desaroya un curason gradicido pa e berdad.

7. Con un persona ta bira capas pa e siña otro hende e berdad di Dios?

⁷ E esfuerso aki tawata apropiado, pasobra Pablo a skirbi: “Laga esun cu ta wordo siña den e palabra comparti tur cos bon cu esun cu ta siñ’e.” (Galationan 6:6) Aki e texto Griego ta indica cu e siñansanan di e Palabra di Dios a ser inculca den mente y curason di esun cu ta “wordo siña.” E echo cu bo a ser siña asina ta capacita bo como maestro pa abo siña otro hende. (Echonan 18:25) Pa bo ta fiel na bo dedicacion, bo tin cu mantene bo salu  spiritual y firmesa door di sigui studia e Palabra di Dios.—1 Timoteo 4:13; Tito 1:13; 2:2.

Corda Con Bo A Repenti y Comberti

8. Di ki manera ta posibel pa mantene un conducta di acuerdo cu e normanan di Dios?

⁸ Bo ta corda e alivio cu bo a haya ora bo a siña e berdad, a repenti y despues a sinti cu basa riba fe den Hesus su sacrificio di rescate, Dios a pordona bo picanan? (Salmo 32:1-5; Romanonan 5:8; 1 Pedro 3:18) Sigur lo bo no kier bolbe na un bida di pica. (2 Pedro 2:20-22) Entre otro cosnan, oracion regular na Yehova lo yuda bo mantene un conducta di acuerdo cu e normanan di Dios, cumpli cu bo dedicacion y sigui sirbi Yehova fielmente.—2 Pedro 3:11, 12.

9. Una bes cu nos a aleha for di practicanan pecaminoso, ki rumbo nos tin cu sigui?

⁹ Una bes cu bo a comberti door di aleha for di practicanan pecaminoso, sigui busca e yudansa di Dios door di mantene bo curason firme. Na moda di papia, bo tawata bayendo riba e caretera robes pero a consulta un mapa confiabel y a cuminsa biaha riba e caminda corecto. Awor, wak pa bo no bruha. Sigui confia den e guia di Dios y sea determina pa keda riba e caminda cu ta hiba na bida.—Isaias 30:20, 21; Mateo 7:13, 14.

Nunca Lubida Bo Dedicacion y Bautismo

10. Ki puntonan nos mester tene na mente relaciona cu nos dedicacion na Dios?

¹⁰ Corda cu bo a haci un dedicacion na Yehova den oracion, cu e meta di sirbie fielmente pa eternidad. (Hudas 20, 21) Dedica ta nifica aparta of separa pa un proposito sagrado. (Levitico 15:31; 22:2) Bo dedicacion no tawata un acuerdo temporal ni un compromiso cu hende. E tawata un dedicacion permanente na e Soberano Universal, y pa cumpli cu ne nos mester ta leal na Dios pa bida largo. Si, ‘sea cu nos biba of muri, ta di Yehova nos ta.’ (Romanonan 14:7, 8) Ta si nos ta sumiso na su boluntad y ta sigui sirbie cu un curason firme, nos por ta felis.

11. Pakico bo tin cu corda bo bautismo y loke e ta nifica?

¹¹ Semper corda bo bautismo como simbolo di bo dedicacion di henter curason na Dios. Esei no tawata un bautismo forsa, pasobra ta bo mes a tuma e decision ei. Bo ta determina awor pa eherce bo boluntad na harmonia cu e boluntad di Dios pa e resto di bo bida? Bo a haci un peticion na Dios pa un bon consenshi y a batisa como simbolo di bo dedicacion na Dje. Conserva e bon consenshi ei door di cumpli cu bo dedicacion, y e bendicion rico di Yehova lo descansa riba bo.—Proverbionan 10:22.

Bo Boluntad Ta Hunga un Rol

12, 13. Ki relacion tin entre nos boluntad propio cu dedicacion y bautismo?

¹² En berdad dedicacion y bautismo a trece gran bendicion pa miyones di hende rond mundo. Ora nos simbolisa nos dedicacion na Dios door di somete nos na bautismo bou di awa, nos ta muri pa loke ta nos curso di bida den pasado. Pero esei no kiermen cu nos no tin nos propio boluntad mas. Como creyentenan cu a wordo siña apropiadamente, en realidad ta di nos propio boluntad nos a haci un dedicacion na Dios den oracion y a batisa. Pa nos haci un dedicacion y despues batisa, nos tin cu determina kico ta e boluntad di  Dios anto scohe deliberadamente p’e. (Efesionan 5:17) Asina nos ta imita Hesus, kende di su propio boluntad a pone su hermentnan di carpinte un banda, a batisa y dedica su mes completamente pa haci e boluntad di su Tata celestial.—Salmo 40:7, 8; Huan 6:38-40.

¹³ Tawata e proposito di Yehova Dios pa su Yiu ser ‘perfecciona pa medio di sufrimento.’ Pesei Hesus tawatin cu eherce su boluntad pa wanta tal sufrimento fielmente. Cu esei na mente, el a ofrece “suplica cu gran sclamacion y lagrima . . . y el a wordo tende pa motibo di su piedad.” (Hebreonan 2:10, 18; 5:7, 8) Si nos manifesta mesun temor respetuoso pa Dios, nos tambe sigur lo wordo “tende”, y nos por tin confiansa cu Yehova lo haci nos firme como su Testigonan dedica.—Isaias 43:10.

Bo Por Mantene un Curason Firme

14. Pakico nos tin cu lesa Bijbel tur dia?

¹⁴ Kico lo yuda bo mantene un curason firme y asina cumpli cu bo dedicacion na Dios? Pa bo por gana e  conocemento aumentante di e Palabra di Dios, lesa Bijbel tur dia. Esaki ta algo cu “e esclabo fiel y prudente” ta urgi nos pa haci constantemente. Nos a haya e conseho ei pasobra pa cumpli cu nos dedicacion nos tin cu sigui cana den e berdad di Dios. Si e organisacion di Yehova ta respalda siñansa falso concientemente, hamas lo el a conseha Testigonan di Yehova y esnan na ken nan ta predica pa lesa Bijbel.

15. (a) Kico mester considera ora di tuma decision? (b) Pakico nos por bisa cu trabou ta e vocacion secundario di un Cristian?

¹⁵ Ora di tuma decision, semper wak ki efecto eseinan por tin riba bo dedicacion na Yehova. Esaki por tin di aber cu bo trabou. Bo ta haci esfuerso pa bo trabou por ta un yudansa pa bo den promove adoracion berdadero? Por lo general doñonan di trabou ta haya cu Cristiannan dedica ta hende confiabel y eficiente. Tambe nan ta ripara cu Testigonan di Yehova no ta mucho ambicioso pa bai dilanti den mundo ni no ta competi cu otro hende pa e posicionnan di mas lucrativo. Esaki ta asina pasobra e meta di e Testigonan no ta pa alcansa rikesa, fama, prestigio ni poder. Pa esnan cu ta cumpli cu nan dedicacion na Dios, e cos di mas importante ta haci e boluntad dibino. Un trabou cu ta permiti nan haya e necesidadnan basico di bida ta un vocacion di importancia secundario. Mescos cu apostel Pablo, nan vocacion, of trabou principal, ta e ministerio Cristian. (Echonan 18:3, 4; 2 Tesalonicencenan 3:7, 8; 1 Timoteo 5:8) Abo ta mantene interesnan di Reino na prome luga den bo bida?—Mateo 6:25-33.

16. Kico nos por haci si ansiedad innecesario ta stroba nos di cumpli cu nos dedicacion na Dios?

¹⁶ Algun hende lo por a haya nan cu varios ansiedad prome cu nan a conoce e berdad. Pero nan curason a hincha di goso, gratitud y amor pa Dios ora nan a brasa e speransa di Reino! Door di reflexiona riba e bendicionnan cu nan a disfruta di dje desde e tempo ei, esaki lo por yuda nan cumpli miho cu nan dedicacion na Yehova. Di otro banda, kico bo por haci awor si ansiedad innecesario cu e problemanan comun di bida den e sistema aki ta causa, ta menasa di hoga “e palabra di Dios”, mescos cu sumpiña ta stroba un mata chikito di bira grandi y duna fruta? (Lucas 8:7, 11, 14; Mateo 13:22; Marco 4:18, 19) Si bo sinti cu esaki a cuminsa sosode cu abo of bo famia, tira bo ansiedad riba Yehova y pidie den oracion pa E yuda bo crece den amor y aprecio. Si bo tira bo carga riba Dje, lo E sostene bo y duna bo e forsa pa sigui sirbie felismente cu un curason firme.—Salmo 55:22; Filipencenan 4:6, 7; Revelacion 2:4.

17. Con ta posibel pa enfrenta prueba severo?

¹⁷ Sigui resa na Yehova Dios regularmente, mescos cu bo a haci oracion ora bo a dedica bo mes na Dje. (Salmo 65:2) Ora bo ser tenta pa haci malo of ora bo ta enfrenta un prueba severo, busca e guia di Dios y su yudansa pa siguie. Corda cu bo mester tin fe, pasobra disipel Santiago a skirbi: “Ma si cualkier di boso falta sabiduria [pa enfrenta un prueba], lag’e pidi Dios, kende ta duna na tur hende generosamente y sin reproche, y esaki lo wordo duna na dje. Ma lag’e pidi den fe sin ningun duda, pasobra esun cu duda ta manera un ola di lama cu ta wordo lastra y tira door di biento. Pasobra no laga e hende ei spera cu e lo ricibi algo di Señor, siendo un hende di curason dobel, inconstante den tur su camindanan.” (Santiago 1:5-8) Si un prueba ta parce aplastante, nos por ta sigur di esaki: “Ningun tentacion, fuera di loke tur hende ta pasa aden, no a bin riba boso; y Dios ta fiel, kende lo no permiti pa boso wordo tenta mas cu boso por soporta, ma hunto cu e tentacion E lo provee salida tambe, pa boso por soporta.”—1 Corintionan 10:13.

18. Kico nos por haci si un pica serio scondi ta debilitando nos determinacion pa cumpli cu nos dedicacion na Yehova?

¹⁸ Kico bo por haci si un pica serio scondi  ta molestiando bo consenshi y debilitando bo determinacion pa cumpli cu bo dedicacion na Dios? Si bo ta repenti, bo por haya consuelo den e echo cu bo sa cu Yehova ‘lo no desprecia un curason repenti y kibra.’ (Salmo 51:17) Busca yudansa di ancianonan Cristian amoroso, sabiendo cu nan, mescos cu Yehova, lo no minimisa bo deseo di recupera un bon relacion cu bo Tata celestial. (Salmo 103:10-14; Santiago 5:13-15) Anto cu forsa spiritual renoba y un curason firme, lo bo por traha bereanan stret pa bo pianan y ripara cu ta posibel pa cumpli cu bo dedicacion na Dios.—Hebreonan 12:12, 13.

Sigui Sirbi cu un Curason Firme

19, 20. Pakico ta vital pa nos sigui cumpli cu nos dedicacion?

¹⁹ Den e tempo critico aki, nos tin cu traha duro pa cumpli cu nos dedicacion y sigui sirbi Dios cu un curason firme. Hesus a bisa: “Esun cu persevera te na fin, esei lo ta salba.” (Mateo 24:13) Nos ta biba den “e ultimo dianan”, y e fin por bini cualkier momento. (2 Timoteo 3:1) Ademas, ningun di nos ta sigur cu mañan nos ta na bida. (Santiago 4:13, 14) Pesei ta masha vital pa nos sigui cumpli cu nos dedicacion awe!

²⁰ Apostel Pedro ta enfatisa esaki den su di dos carta. El a mustra cu mescos cu e malbadonan a perece den e Dilubio, asina e tera simbolico, of sociedad humano malbado, lo ser destrui durante “e dia di Señor.” Pesei Pedro a sclama: “Ki sorto di hende boso mester ta den un conducta santo y deboto”! Tambe el a urgi nan: “Boso . . . , stimanan, sabiendo esaki di antemano, tene cuidou, pa boso no wordo lastra hiba [dor di maestro falso y homber malbado] y boso cai for di boso mes firmesa.” (2 Pedro 3:5-17) Lo ta masha lamentabel pa un persona batisa desvia y yega na fin di su bida pa motibo cu e no a mantene un curason firme!

21, 22. Con e palabranan di Salmo 57:7 a resulta di ta cierto den e caso di David y di Cristiannan berdadero?

²¹ Si bo tene na mente e dia felis di bo bautismo y busca e yudansa di Dios pa asina bo palabra- y echonan alegra su curason, bo determinacion pa cumpli cu bo dedicacion na Dios lo por bira mas fuerte. (Proverbionan 27:11) Yehova nunca ta faya cu su pueblo, y siguramente nos mester ta fiel na Dje. (Salmo 94:14) El a mustra misericordia y compasion ora El a frustra e plannan di enemigonan y a salba David. Gradicido pa esaki, David a declara e firmesa, e constancia, di su amor pa su Salbador. Cu sintimento profundo, el a canta: “Mi curason ta para firme, o Dios, mi curason ta para firme; lo mi canta, si, lo mi canta alabansa!”—Salmo 57:7.

²² Mescos cu David, Cristiannan berdadero no ta basila den nan dedicacion na Dios. Cu curason firme, nan ta duna credito na Yehova como esun cu a libra nan y conserva nan na bida, y na Dje nan ta canta alabansa gososamente. Si bo curason ta firme, lo e depende riba Dios, y cu su yudansa lo bo por cumpli cu bo dedicacion. Si, bo por ta manera “e husto”, di kende e salmista a canta: “E lo no tin miedo di mal noticia; su curason ta trankil, confiando den SEÑOR.” (Salmo 112:6, 7) Cu fe den Dios y confiansa completo den Dje, bo por cumpli cu bo dedicacion y sigui sirbi Yehova cu un curason firme.

Bo Ta Corda?

• Pakico nos mester sigui gana conocemento exacto di Bijbel?

• Pakico nos tin cu sigui tene nos repentimento y combertimento na mente?

• Ora nos ta corda riba nos dedicacion y bautismo, con esei ta beneficia nos?

• Kico lo yuda nos sigui sirbi Yehova cu un curason firme?

[Preguntanan di Estudio]

[Plachi na pagina 18]

Abo ta mantene bo mes spiritualmente salu door di studia e Palabra di Dios tur dia?

[Plachi na pagina 18]

Door di haci e ministerio Cristian nos trabou principal, esaki ta yuda nos sigui sirbi Yehova cu un curason firme