Bo Ta Corda?

Bo a disfruta di e edicionnan resien di E Toren di Vigilancia? Awel, wak si bo por contesta e siguiente preguntanan:

• Ki programa personal cu tin di aber cu e Sermon Riba Sero bo por sigui pa alivia stress?

Tur dia bo por lesa un siñansa basico di Hesus den e sermon ei of otro caminda den e Evangelionan. Door di medita riba e siñansa ei y wak con bo por aplic’e personalmente, probablemente lo bo ripara cu bo felicidad ta aumenta y bo stress ta mengua.—15/12, pagina 12-14.

• Cua tres bon motibo tin pa ancianonan di congregacion entrena sirbidonan ministerial pa carga mas responsabilidad?

Door cu e cantidad di Testigonan di Yehova ta aumenta, tin mester di mas homber responsabel pa yuda personanan cu a caba di batisa pa nan progresa. Edad of problema cu salu tambe ta un strobansa pa algun cu tin hopi aña como anciano. Y algun anciano capas tin otro responsabilidadnan fuera di esnan di nan congregacion pa cumpli cu ne. Door di esei, nan lo no por haci mes tanto cu nan tawata haci antes den nan congregacion.—1/1, pagina 29.

• Den ki manera hende ta confia den diosnan cu no ta real?

Hopi hende ta adora e diosnan di nan religion, pero e diosnan aki ta simplemente diosnan morto. Y mescos cu Baal no por a percura salbacion den tempo di Elias, nan tampoco no por percura salbacion. (1 Reinan 18:26, 29; Salmo 135:15-17) Otronan ta adora personahenan di farandula of deportistanan cu no por duna nan ningun speransa berdadero pa futuro. Na contraste, Yehova si ta existi di berdad y E ta cumpli cu su proposito.—15/1, pagina 3-5.

• Kico nos por siña for di e manera cu Cain a reacciona riba Dios su spiertamento?

Dios a duna nos boluntad liber, y nos por scohe pa haci loke ta bon en bes di haci malo manera Cain a haci. E relato biblico ta mustra tambe cu Yehova ta condena esnan cu no repenti.—15/1, pagina 22-3.

• Dicon limpiesa ta importante specialmente den e tempo aki?

Bida di hende a cambia asina tanto cu hopi no ta sobra tempo pa limpia nan cas manera nan tawata haci antes. Hende cu no ta tene cuenta cu higiena ora di trata cu cuminda y awa ta pone salu di otronan na peliger. Ademas di limpiesa fisico, Bijbel ta pone enfasis tambe riba limpiesa spiritual, moral y mental.—1/2, pagina 3-6.

• Relaciona cu testigonan precristian Pablo a bisa cu nan lo “no wordo haci perfecto sin nos.” Con asina? (Hebreonan 11:40)

Den e benidero Milenio cu Bijbel ta papia di dje, ora Cristo y su rumannan ungi den shelo ta sirbi como rei y sacerdote nan lo trece e beneficionan di e rescate pa hende cu resucita. Ta e fielnan ei manera esnan cu Hebreonan capitulo 11 ta menciona, lo “wordo haci perfecto” den e sentido ei.—1/2, pagina 23.

• Kico Pablo tawata kiermen ora el a bisa e Hebreonan: “Boso no a resisti ainda te na e punto di drama sanger”? (Hebreonan 12:4)

E tawata kiermen resisti te na morto. Tin ehempelnan historico di hende cu a keda fiel te na morto. Aunke e Hebreonan na ken Pablo a skirbi no a haya nan cu prueba di e extremo ei, nan mester a progresa na madures, edificando nan fe pa wanta tur loke por a bini riba nan.—15/2, pagina 29.

• Dicon ta miho pa evita di bisa cu Yehova ta modera su husticia cu misericordia?

Den algun idioma, “modera” por nifica suavisa of restringi. Yehova ta un Dios di tanto husticia como misericordia, y E ta desplega e dos cualidadnan aki na harmonia cu otro. (Exodo 34:6, 7; Deuteronomio 32:4; Salmo 116:5; 145:9) Yehova no tin nodi suavisa ni modera su husticia cu misericordia.—1/3, pagina 30.

• Ta apropiado pa un cristian laga balsama curpa di un ser keri cu a muri?

E proceso di balsama ta un medio pa conserva un cadaver. Algun hende di antes a sigui e custumber aki pa motibonan religioso. Cristiannan berdadero si lo no hacie pa e motibonan ei. (Eclesiastes 9:5; Echonan 24:15) E proceso di balsama morto solamente ta pospone loke ta inevitabel, esta, cu e curpa ta bolbe na stof. (Genesis 3:19) Pero no tin nodi precupa si lei ta manda pa balsama e morto, si miembronan di famia ta desea esei, of si e ta necesario pasobra algun di nan tin cu biaha distancia largo pa asisti na e entiero.—15/3, pagina 29-31.

• Cua ehempelnan biblico ta siña nos cu Dios ta acepta hende di tur nacion?

Yehova a manda profeta Yonas bai spierta e Ninivitanan, y Dios a urgi Yonas pa acepta nan repentimento. Cu palabra y ehempel, Hesus a anima Hudiunan pa mustra amor na e Samaritanonan. Tanto apostel Pedro como apostel Pablo a yuda hiba e bon nobo na hende cu no tawata Hudiu. E ehempelnan ei ta laga nos comprende cu nos mester purba yuda hende di tur antecedente.—1/4, pagina 21-4.