Dios Su Leinan Ta pa Nos Beneficio

“O cuanto mi ta stima Bo lei!”—SALMO 119:97.

1. Kico ta e actitud comun cu hende tin pa cu obediencia na Dios su leinan?

AWENDIA obedece lei di Dios no ta algo popular. Hopi hende ta haya cu no tin sentido pa somete bo mes na un autoridad superior cu ta invisibel. Nos ta biba den un era di relativismo moral (caminda normanan no ta fiho, sino ta cambia dependiendo di e hende of gruponan cu ta atene nan mes na nan), un era cu no tin distincion cla entre loke ta bon y loke ta malo. (Proverbionan 17:15; Isaias 5:20) Segun un encuesta, “mayoria Mericano kier dicidi pa nan mes loke ta corecto, bon y importante.” Y esei ta refleha un manera di pensa cu ta comun awe den hopi sociedad. E encuesta a agrega cu nan ta prefera un “Dios cu no ta streng. Nan no kier leinan streng. Nan no kier superiornan cu conviccionnan moral ni ningun otro conviccion tampoco.” Un sociologo a remarca cu awendia “ta spera di hende cu nan ta determina pa nan mes kico ta nifica hiba un bida corecto y moralmente limpi.” El a sigui bisa: “Cualkier forma di autoridad superior mester adapta su mandamentonan na e necesidadnan di hende real.”

2. Den ki manera e prome mencion di lei den Bijbel ta estrechamente liga cu Dios su bendicion y aprobacion?

² Door cu asina tanto hende ta cuestiona e balor di Yehova su leinan, nos mester fortifica nos conviccion cu e normanan di Dios ta pa nos beneficio. Ta interesante pa considera e relato caminda Bijbel ta menciona “lei” pa prome bes. Na Genesis 26:5 nos ta lesa e palabranan di Dios: “Abraham . . . a cumpli cu mi ordo, mi mandamentonan, mi statuutnan y mi leinan.” Yehova a expresa e palabranan aki siglonan prome cu el a duna e desendientenan di Abraham un codigo di lei detaya. Con Dios a recompensa Abraham pa e echo cu el a obedece Dios y Su leinan? Yehova Dios a primintie: “Den bo desendientenan tur e nacionnan di e tera lo ta bendiciona.” (Genesis 22:18) Pues, obediencia na lei dibino ta estrechamente liga cu Dios su bendicion y aprobacion.

3. (a) Ki sintimento un salmista a expresa encuanto e leinan di Yehova? (b) Cua preguntanan merece nos atencion?

³ Un di e salmistanan—probablemente un prins y futuro rei di Huda—a expresa un sintimento cu normalmente no ta ser asocia cu lei. El a declara na Dios: “O cuanto mi ta stima bo lei!” (Salmo 119:97) Esaki no tawata djis un reaccion emocional. E tawata un expresion di amor pa e boluntad di Dios, describi den su lei. Hesucristo, e Yiu perfecto di Dios, a sinti mescos. Un profecia cu ta describi Hesus a bisa: “Pa haci bo boluntad, o mi Dios, ta un delicia pa mi; bo lei ta den mi curason.”  (Salmo 40:8; Hebreonan 10:9) Kico di nos? Nos tin goso den haci e boluntad di Dios? Nos ta combenci cu e leinan di Yehova ta util y beneficioso? Ki luga obediencia na Dios su leinan ta ocupa den nos adoracion, den nos bida diario, den nos relacion cu otro hende y ora di tuma decision? Pa nos por stima Dios su lei, ta bon pa nos comprende dicon Dios tin derecho di traha lei y impone nan.

Yehova—E Dunado di Lei Legitimo

4. Dicon Yehova ta e Dunado di Lei legitimo y supremo?

⁴ Como e Creador, Yehova ta e Dunado di Lei legitimo y supremo di universo. (Revelacion 4:11) Profeta Isaias a declara: “SEÑOR ta nos Dunado di Lei.” (Isaias 33:22) El a pone leinan fisico pa goberna tur loke el a crea, cosnan cu bida y cosnan sin bida. (Job 38:4-38; 39:1-12; Salmo 104:5-19) Como un creacion di Dios, hende ta someti na e leinan fisico di Yehova. Y aunke hende tin boluntad liber y por rasona, ta solamente ora e somete su mes na Dios su leinan moral y spiritual e ta felis.—Romanonan 12:1; 1 Corintionan 2:14-16.

5. Den ki sentido e principio na Galationan 6:7 ta cierto den caso di Dios su leinan?

⁵ Manera nos sa, Yehova su leinan fisico ta inkebrantabel. (Yeremias 33:20, 21) Si un persona bai contra e leinan aki, manera por ehempel e lei di gravedad, e ta hay’e cu e consecuencianan. Asina tambe e leinan moral di Dios ta irevocabel, y hende no por pasa nan por halto of kibra nan sin haya castigo. Nan ta ser implementa mescos cu su leinan natural, aunke kisas bo no ta mira nan resultado mesora. “Dios no ta laga haci bofon di dje; pasobra loke un hende sembra, esaki tambe e lo cosecha.”—Galationan 6:7; 1 Timoteo 5:24.

E Alcanse di Yehova Su Lei

6. Te con leu e leinan di Dios ta bai?

⁶ Un manera sobresaliente cu Dios a expresa su lei ta via e Lei di Moises. (Romanonan 7:12) Cu tempo Yehova Dios a remplasa e Lei di Moises cu “e lei di Cristo.” * (Galationan 6:2; 1 Corintionan 9:21) Como cristian bou di “e lei perfecto, e lei di libertad”, nos ta comprende cu no ta solamente pa cierto aspectonan di nos bida—tal como nos creencianan of ritonan ceremonial—Dios ta duna instruccion. Su normanan ta cubri tur aspecto di bida, incluso asuntonan di famia, tratonan di negoshi, conducta pa cu hende di e sexo opuesto, actitud pa cu compañeronan cristian y participacion den adoracion berdadero.—Santiago 1:25, 27.

7. Duna ehempel di algun lei importante di Dios.

⁷ Por ehempel, Bijbel ta bisa: “Ni fornicado, ni adorado di dios falso, ni adultero, ni sodomita, ni homosexual, ni ladron, ni esnan golos pa placa, ni burache, ni blasfemado, ni estafado lo no hereda e reino di Dios.” (1 Corintionan 6:9, 10) Si, adulterio y fornicacion no ta djis un “relacion amoroso.” Actonan homosexual no ta simplemente un “estilo di bida alternativo.” Nan ta violacion di e lei di Yehova. Esei ta e caso tambe cu actonan manera hortamento, gañamento y calumnia. (Salmo 101:5; Colosencenan 3:9; 1 Pedro 4:15) Santiago a condena bromamento y Pablo a conseha nos pa evita papiamento di co’i loco y chansanan vulgar. (Efesionan 5:4; Santiago 4:16) Pa cristiannan, tur e reglanan aki di conducta ta parti di e lei perfecto di Dios.—Salmo 19:7.

8. (a) Kico ta caracterisa Yehova su lei? (b) Kico ta e nificacion basico di e palabra Hebreo pa “lei”?

⁸ E reglanan basico ei den e Palabra di Yehova ta mustra cu su lei ta hopi mas cu un simpel lista di statuutnan legal impersonal. E ta forma e base pa un bida balansa y productivo, y e ta beneficia tur aspecto di nos conducta. Dios su lei ta constructivo, etico y instructivo. (Salmo 119:72) E palabra “lei” cu e salmista a uza ta traduci for di e palabra Hebreo toh·ráh. Un experto di Bijbel a bisa: ‘E palabra aki ta bini di  un verbo cu ta nifica dirigi, guia, mik, pusha padilanti. Pesei anto su nificacion lo ta un regla di conducta.’ Pa e salmista e lei tawata un regalo di Dios. Nos tambe no mester tin tal aprecio pa Dios su lei y permiti esaki influencia nos estilo di bida?

9, 10. (a) Dicon nos tin mester di guia confiabel? (b) Cua ta e unico manera cu nos por logra un bida placentero y exitoso?

⁹ Tur criatura tin mester di instruccion y guia confiabel. Esaki ta conta pa Hesus y e otro angelnan tambe, kendenan ta superior na hende. (Salmo 8:5; Huan 5:30; 6:38; Hebreonan 2:7; Revelacion 22:8, 9) Si e criaturanan perfecto aki mes por saca beneficio for di guia dibino, anto hende imperfecto lo saca mucho mas beneficio! Historia humano y nos experencia personal a duna prueba cu loke profeta Yeremias a bisa ta berdad: “O SEÑOR, mi sa cu e caminda di hende no ta di dje mes; tampoco no ta keda na hende pa dirigi su pasonan.”—Yeremias 10:23.

¹⁰ Si nos kier tin un bida placentero y exitoso, nos tin cu acudi na Dios pa haya guia. Rei Salomon a reconoce e peliger di biba segun normanan personal, independiente di e guia di Dios. El a bisa: “Tin un caminda cu ta parce bon den bista di hende, ma su fin ta e caminda di morto.”—Proverbionan 14:12.

Motibonan pa Considera Yehova Su Lei Como un Tesoro

11. Pakico nos mester tin e deseo pa comprende Dios su lei?

¹¹ Ta bon pa nos cultiva un deseo profundo pa comprende Yehova su lei. E salmista a expresa e anhelo ei ora el a bisa: “Habri mi wowo, pa mi por contempla cosnan maravioso for di bo lei.” (Salmo 119:18) Mas nos siña conoce Dios y su camindanan, mas miho nos lo comprende e berdad di e palabranan di Isaias: “Ami ta SEÑOR bo Dios, kende ta siña bo, pa bo prospera, kende ta guia bo den e caminda cu bo mester cana. Mara bo a pone atencion na mi mandamentonan!” (Isaias 48:17, 18) Yehova ta desea sinceramente pa su pueblo evita calamidad y disfruta di bida door di presta atencion na su mandamentonan. Laga nos analisa algun motibo principal pakico nos mester considera Dios su lei como un tesoro.

12. Den ki manera e echo cu Yehova conoce nos ta hacie e miho Dunado di Lei?

¹² Lei dibino ta bini di Esun cu conoce nos miho. Como cu Yehova ta nos Creador, ta logico cu E conoce nos door en door. (Salmo 139:1, 2; Echonan 17:24-28) Ni amigonan intimo, ni famia, ni nos mayornan no por conoce nos  bon manera Yehova. Si, Dios conoce nos asta miho cu nos mes! Esun cu a traha nos tin un comprendemento incomparabel di nos necesidadnan spiritual, emocional, mental y fisico. Ora E ta dirigi su atencion na nos, E ta desplega un comprendemento profundo di nos composicion, deseonan y aspiracionnan. Yehova ta comprende cu nos tin limitacion, pero tambe E sa cuanto cos di balor nos por logra. E salmista a bisa: “E sa di kico nos ta traha; E ta corda cu ta stof nos ta.” (Salmo 103:14) Pues, nos por sinti un siguridad spiritual si nos haci esfuerso pa cana na harmonia cu su lei, y somete nos mes boluntariamente na su guia.—Proverbionan 3:19-26.

13. Dicon nos por ta sigur cu Yehova tin nos miho interes na pecho?

¹³ Lei dibino ta bini di Esun cu ta stima nos. Dios ta masha interesa den nos bienestar eterno. El a haci un sacrificio grandi, dunando su Yiu como “prijs di rescate pa hopi.” (Mateo 20:28) Yehova a priminti cu lo E no laga nos ser ‘tenta mas cu nos por soporta.’ (1 Corintionan 10:13) Bijbel ta sigura nos cu Dios ‘ta percura pa nos.’ (1 Pedro 5:7) Yehova su interes den nos ta motiva pa amor. No tin ningun otro persona cu ta mas interesa cu ne pa suministra guia beneficioso pa e creacion humano. E sa kico ta bon pa nos y tambe e liña entre loke ta trece felicidad y loke ta trece sufrimento pa nos. Aunke nos ta hende imperfecto y ta comete eror, si nos sigui tras di husticia, lo E demostra su amor pa nos di tal forma cu esaki lo resulta den bida y bendicion.—Ezekiel 33:11.

14. Den ki manera importante Dios su lei ta distinto for di ideanan di hende?

¹⁴ Nos por confia cu Dios su lei lo no cambia. Den e tempo turbulento cu nos ta bibando, Yehova ta un baranca di stabilidad cu a existi di eternidad te na eternidad. (Salmo 90:2) El a bisa di su mes: “Ami, SEÑOR, no ta cambia.” (Malakias 3:6) Dios su normanan cu ta para skirbi den Bijbel ta plenamente confiabel—distinto di ideanan humano cu ta cambia constantemente. (Santiago 1:17) Por ehempel, hopi aña largo psicologonan a promove e idea di cria mucha na un manera hopi liberal, pero despues algun di nan a cambia di opinion y a admiti cu nan conseho tawata robes. Mundo su normanan y guia tocante e asunto aki ta cambia constantemente, como si fuera supla p’aki y p’aya door di biento. Sinembargo, Yehova su Palabra ta firme y constante. Siglonan pasa Bijbel a duna conseho encuanto con pa cria yiu cu amor. Apostel Pablo a skirbi: “Tatanan, no proboca boso yiunan na rabia, ma lanta nan den e disiplina y instruccion di Señor.” (Efesionan 6:4) Ta un consuelo pa sa cu nos por depende riba Yehova su normanan; nan lo no cambia!

Bendicionnan pa Hende Cu Ta Obedece Dios Su Lei

15, 16. (a) Kico lo ta e resultado si nos aplica e normanan di Yehova? (b) Den ki manera Dios su leinan por resulta di ta un guia sano pa matrimonio?

¹⁵ Mediante profeta Isaias, Dios a bisa: ‘Mi palabra cu ta sali for di mi boca lo alcansa su proposito.’ (Isaias 55:11) Nos tambe lo tin exito sigur, logrando cosnan di balor y felicidad, basta nos haci esfuerso sincero pa sigui e normanan cu tin den su Palabra.

¹⁶ Wak con Dios su lei ta sirbi como un guia sano pa un matrimonio exitoso. “Laga matrimonio wordo honra pa tur hende”, Pablo a skirbi, “y laga e cama matrimonial ta sin mancha; pasobra Dios lo husga fornicadonan y adulteronan.” (Hebreonan 13:4) Parehanan casa mester mustra respet y amor pa otro:  “Laga cada un di boso tambe stima su esposa manera su mes; y e esposa percura pa e respeta su esposo.” (Efesionan 5:33) Prome Corintionan 13:4-8 ta describi e clase di amor cu nan mester tin pa otro. E ta bisa: “Amor tin pasenshi, amor ta cariñoso y no ta yalurs; amor no ta gaba, y no ta arogante, e no ta comporta su mes indecente; e no ta busca su propio interes, e no ta wordo proboca, e no ta warda rencor, e no ta regosiha den inhusticia, ma ta regosiha den e berdad; tur cos e ta tapa, tur cos e ta kere, tur cos e ta spera, tur cos e ta soporta. Amor nunca no ta faya.” Un matrimonio den cua e clase di amor aki ta reina, lo no kibra.

17. Ki beneficio nos por saca door di aplica Yehova su norma encuanto uzo di alcohol?

¹⁷ Un otro evidencia cu Yehova su normanan ta beneficioso, ta e echo cu E ta condena buracheria. Asta E ta taha pa hende “ta bicia na hopi biña.” (1 Timoteo 3:3, 8; Romanonan 13:13) Hopi hende cu ta ignora Dios su norma den e asunto aki ta sufri di malesa cu bebemento di mas ta sea causa of empeora. Door cu algun hende a ignora Bijbel su conseho pa bebe na midi, nan a cai den e mal custumber di bebe di mas djis pa “yuda nan relaha.” Bebemento di mas por trece hopi problema, entre otro, perdemento di respet, relacionnan di famia tenso of famia kibra, malgastamento di placa y perdemento di empleo. (Proverbionan 23:19-21, 29-35) Pues, Yehova su norma encuanto uzo di alcohol no ta un proteccion?

18. Dios su leinan ta util den asuntonan financiero? Splica.

¹⁸ E normanan di Dios a resulta util tambe den asuntonan financiero. Bijbel ta urgi  cristiannan pa ta honesto y diligente. (Lucas 16:10; Efesionan 4:28; Colosencenan 3:23) Pa motibo cu cristiannan ta sigui e conseho aki, hopi di nan a haya promocion of a keda cu nan trabou mientras cu otro hende a perde trabou. Tambe un persona por beneficia financieramente ora e evita custumber- y adiccionnan cu Bijbel ta condena, manera wega di placa, humamento y droga. Sin duda bo por pensa riba otro ehempelnan cu ta mustra cu e normanan di Dios ta util riba tereno economico.

19, 20. Dicon ta sabi pa acepta Dios su leinan y cumpli cu nan?

¹⁹ Ta facil pa hende imperfecto desvia for di Dios su norma- y leinan. Corda e Israelitanan na Sero Sinai. Dios a bisa nan: “Si di berdad boso kier obedece mi bos y warda mi aliansa, e ora ei boso lo ta un tesoro peculiar riba tur pueblo.” Nan a contesta: “Tur loke SEÑOR a bisa, nos lo haci!” Sinembargo, nan a sigui un estilo di bida completamente contrario na Dios su normanan! (Exodo 19:5, 8; Salmo 106:12-43) Na contraste cu nan, laga nos si acepta Dios su normanan y cumpli cu nan.

²⁰ Nos lo demostra sabiduria y logra felicidad si nos pega estrechamente na e leinan incomparabel cu Yehova a duna pa yuda guia nos bida. (Salmo 19:7-11) Pa nos por tin exito den esaki, nos mester comprende y tambe aprecia e balor di e principionan di Dios. Esaki ta e tema di e siguiente articulo.

[Nota]

Bo Ta Corda?

• Dicon nos por tin confiansa cu Dios su lei ta pa nos beneficio?

• Ki motibonan nos tin pa considera Yehova su lei como un tesoro?

• Den ki maneranan Dios su leinan ta beneficia nos?

[Preguntanan di Estudio]

[Plachi na pagina 13]

Abraham a haya hopi bendicion pasobra el a obedece Yehova su lei

[Plachinan na pagina 15]

Ansiedadnan di e bida druk djawe ta kita hopi hende su tino for di Dios su lei

[Plachi na pagina 17]

Mescos cu un faro riba un baranca, Dios su lei ta stabil y incambiabel