Dos Pastor Cu A Aprecia Loke Russell A Skirbi

NA 1891, Charles Taze Russell, kende a haci un trabou excelente entre e berdadero adoradonan cristian di Yehova, a bishita Europa pa prome bes. Segun algun informe, durante un estadia di transito na Pinerolo, Italia, Russell a topa cu Profesor Daniele Rivoire, un expastor di un grupo religioso cu tawata yama waldense. * Aunke Rivoire a keda cu contacto estrecho cu e waldensenan despues cu el a bandona e sacerdocio, el a keda cu un mente habri y a lesa hopi publicacion cu C. T. Russell a skirbi.

Na 1903, Rivoire a traduci e buki di Russell, E Plan Dibino di Epocanan na Italiano y e mes a paga e gastonan di imprenta. Esaki tawata hopi tempo prome cu nan a publica un edicion oficial na Italiano. Den e introduccion di e buki, Rivoire a skirbi: “Nos ta pone e prome edicion Italiano aki bou di proteccion di Señor. Lag’e bendicion’e di tal forma cu apesar di [e buki] su imperfeccionnan, e por contribui na engrandece Señor su nomber santisimo y anima su yiunan di abla Italiano pa bira mas deboto. Ohala curason di tur esnan cu lesa e buki aki aprecia e profundidad di rikesa, sabiduria y e conocemento di Dios su plan y amor, y nan gradici Dios mes. Ta cu su aprobacion, publicacion di e buki aki a bira posibel.”

Tambe Rivoire a cuminsa traduci Zion’s Watchtower and Herald of Christ’s Presence na Italiano. Nan tawata publica e revista aki, un forma anterior di E Toren di Vigilancia, cada tres luna na 1903. Maske nunca Profesor Rivoire a bira un Studiante di Bijbel, manera nan tawata yama Testigonan di Yehova e tempo ei, el a mustra hopi interes den plama e mensahe di Bijbel cu e publicacionnan di Studiantenan di Bijbel tawata splica.

“Ta Como Si Fuera Scama A Cai for di Mi Wowo”

Un otro pastor waldense cu a aprecia Russell su publicacionnan tawata Giuseppe Banchetti. Su tata, kende tawata un excatolico cu a comberti, a cri’e como waldense. Na 1894, Giuseppe a bira pastor y a sirbi varios comunidad waldense na Apulia y Abruzzi y riba e islanan Elba y Sicilia.

E edicion Italiano autorisa di Russell su Plan Dibino di Epocanan a ser publica na 1905. Banchetti a skirbi un analisis interesante tocante e buki. El a aparece den e revista protestant La Rivista Cristiana. Banchetti a skirbi: “Pa nos, Russell su buki ta e guia mas ilumina y sigur cu cualkier cristian por haya pa cuminsa un studio beneficioso y recompensador di e Scritura Santo . . . Asina cu mi a les’e tawata como si fuera scama a cai for di mi wowo, y cu e caminda di Dios tawata mas  stret y mas facil. Mayoria di e aparente contradiccionnan asta a disparce. Doctrinanan cu na un tempo tawata dificil pa comprende a parce simpel y perfectamente aceptabel. Cosnan cu anteriormente tawata incomprendibel a bira cla. E plan admirabel pa salba mundo mediante Cristo a parce mi asina simpel y asombroso cu esei a impulsa mi pa sclama manera e apostel: ‘O profundidad di e rikesanan, tanto di e sabiduria como di e conocemento di Dios!’”—Romanonan 11:33.

Manera Remigio Cuminetti a remarca na 1925, Banchetti tawata “masha di acuerdo” cu e obra di e Studiantenan di Bijbel y e tawata “plenamente combenci” di e doctrinanan cu nan a splica. Na su manera, Banchetti tambe a haci esfuerso pa e doctrinanan ei bira conoci.

For di loke Banchetti a skirbi ta bisto cu, mescos cu Testigonan di Yehova, e tambe a kere cu lo tin un resureccion terenal manera e Scritura ta siña. Tambe e tawata di acuerdo cu e Studiantenan di Bijbel ora el a splica cu e aña cu Hesus a muri a ser predetermina y cu Dios a revela esaki den e profecia di 70 siman di Daniel. (Daniel 9:24-27) Mas cu un bes, y bayendo abiertamente contra e siñansanan di su iglesia, el a mustra cu e Memorial di e morto di Hesucristo mester ser tene solamente un bes pa aña, “precis riba e dia cu e fecha ta cai.” (Lucas 22:19, 20) El a rechasa e teoria di evolucion di Darwin, y el a afirma cu cristiannan berdadero no mester participa den guera.—Isaias 2:4.

Un biaha, Banchetti tawata combersa cu un homber cu yama J. Campbell Wall tocante loke Russell a skirbi. Contestando Wall su critica, Banchetti a bisa: “Mi ta sigur cu si bo lesa e seis volumennan di Russell, lo bo experencia un goso profundo y vigoroso. Y yen di emocion lo bo gradici mi. Mi no ta broma cu doctrina; pero diesun aña pasa mi a lesa e bukinan ei, y tur dia mi ta gradici Dios pa a pone e lus y consuelo ei mi dilanti mediante un obra cu ta completamente y firmemente basa riba e Scritura Santo.”

“Scucha, Scucha, Scucha”

Ta remarcabel cu e dos pastornan waldense aki—Daniele Rivoire y Giuseppe Banchetti—a expresa nan aprecio pa e manera cu Russell a splica Bijbel. Banchetti a skirbi: “Mi ta bisa cu nos ningun como hende no sa tur cos. Nos ningun cu ta evangelico, ni sikiera nos pastornan of profesornan den teologia. Nos tin hopi, hopi mas cos di siña. . . . [Nos mester] . . . para keto y scucha, sin pensa cu nos sa tur cos, y no rechasa loke nos haya pa investiga. Mas bien, scucha, scucha, scucha.”

Tur aña miles di hende ta scucha e mensahe di Reino cu Testigonan di Yehova ta trece na nan cas. Tur caminda hende cu mente habri y cu tin hamber pa e berdad di Bijbel ta responde na Hesus su invitacion: “Bin, sigui mi.”—Marco 10:17-21; Revelacion 22:17.

[Nota]

[Plachi na pagina 28]

Profesor Daniele Rivoire

[Plachi na pagina 29]

Giuseppe Banchetti

[Reconocemento]

Banchetti: La Luce, 14 di april 1926