Laga e Principionan di Dios Guia Bo Pasonan
Laga e Principionan di Dios Guia Bo Pasonan
“[Yehova] ta siña bo, pa bo prospera.”—ISAIAS 48:17.
1. Con e Creador ta guia hende?
SEGUN cu cientificonan ta traha duro pa descubri e secretonan di universo, nan ta keda asombra cu e gran cantidad di energia cu tin acumula den espacio rond di nos. Nos solo—cu ta un streya mediano—ta produci mes tanto energia cu “100 mil miyon bom di hidrogeno explotando cada seconde.” Door di su poder sin limite e Creador por controla y dirigi e inmenso cuerponan celestial ei. (Job 38:32; Isaias 40:26) Kico di nos como hende cu tin boluntad liber, capasidad moral, logica y e capasidad pa comprende cosnan spiritual? Den ki manera Esun cu a traha nos a scohe pa duna nos guia? Di un manera amoroso E ta guia nos via su leinan perfecto y principionan eleva, hunto cu nos consenshi bon entrena.—2 Samuel 22:31; Romanonan 2:14, 15.
2, 3. Ki clase di obediencia ta agrada Dios?
2 Criaturanan inteligente cu ta scohe pa obedece Dios ta haci Dios contento. (Proverbionan 27:11) Yehova no a programa nos pa obedec’e ciegamente manera robot cu no por pensa, mas bien El a dota nos cu boluntad liber pa nos por tuma decisionnan bon informa y asina haci loke ta bon.—Hebreonan 5:14.
3 Hesus, kende a refleha e personalidad di su Tata perfectamente, a bisa su disipelnan: “Boso ta mi amigo, si boso haci loke mi ta ordena boso. Mi no ta yama boso esclabo mas.” (Huan 15:14, 15) Antes, un esclabo no por a haci nada otro sino obedece e ordonan di su doño. Di otro banda, bo ta cera amistad cu un persona door di desplega cualidadnan cu ta atrae su curason. Nos por bira amigo di Yehova. (Santiago 2:23) Door di amor mutuo e amistad aki ta bira mas fuerte. Hesus a relaciona obediencia na Dios cu amor ora el a bisa: “Si un hende ta stima mi, e lo warda mi palabra; y mi Tata lo stim’e.” (Huan 14:23) Pues, ta pasobra Yehova stima nos—y e kier guia nos na siguridad—e ta invita nos pa biba na harmonia cu su principionan.
E Principionan di Dios
4. Con lo bo describi un principio?
4 Kico ta un principio? Un principio ta ser defini como “un berdad general of fundamental: un lei, doctrina of suposicion amplio y fundamental riba cua otro lei- y doctrinanan ta basa of ta ser deriva for di dje.” (Webster’s Third New International Dictionary) Un estudio cuidadoso di Bijbel ta revela cu nos Tata celestial ta duna principionan basico cu ta cubri un variedad di situacion y aspecto di bida. E ta haci esaki cu nos beneficio eterno na bista. Esaki ta cuadra cu loke e Rei sabi Salomon a bisa: “Tende, mi yiu, y acepta mi palabranan, y e añanan di bo bida lo ta hopi. Mi a dirigi bo den e caminda di sabiduria; mi a guia bo den e bereanan di rectitud.” (Proverbionan 4:10, 11) E principionan basico cu Yehova ta duna tin influencia riba nos relacion cu ne y cu nos prohimo, nos adoracion y riba nos bida di tur dia. (Salmo 1:1) Laga nos considera algun di e principionan fundamental aki.
5. Duna ehempel di algun principio basico.
5 Hesus a declara tocante nos relacion cu Yehova: “Stima SEÑOR bo Dios cu henter bo curason, y cu henter bo alma, y cu henter bo mente.” (Mateo 22:37) Ademas, Dios ta duna principionan relaciona cu e manera cu nos mester trata cu nos prohimo. Un di nan ta e Regla di Oro: “Pesei, tur loke boso kier pa hende haci pa boso, haci mescos pa nan.” (Mateo 7:12; Galationan 6:10; Tito 3:2) Encuanto adoracion, nos ta ser instrui: “Laga nos considera con pa stimula otro pa stima y haci bon obra, y no laga di asisti na nos mes reunionnan.” (Hebreonan 10:24, 25) Pa loke ta e aspectonan di nos bida diario, apostel Pablo a bisa: “Sea cu boso ta come of bebe of kico cu boso ta haci, haci tur pa e gloria di Dios.” (1 Corintionan 10:31) E Palabra di Dios ta contene hopi principio mas.
6. Kico ta e diferencia entre principio y lei?
6 Principionan ta berdadnan practico y fundamental, y cristiannan sabi ta siña stima nan. Yehova a inspira Salomon pa skirbi: “Paga atencion na mi palabranan; inclina bo horea na loke mi ta bisa. No laga nan kita for di bo bista; warda nan den bo curason. Pasobra nan ta bida pa esnan cu haya nan, y salu pa henter nan curpa.” (Proverbionan 4:20-22) Kico ta distingui un principio for di un lei? Principio ta forma e base pa un lei. Regla, cu tin bes sa ta spesifico, podise ta valido pa un temporada of situacion spesifico, pero un principio no ta cambia nunca. (Salmo 119:111) Dios su principionan no ta bira bieu ni no ta bai for di moda. E palabranan di profeta Isaias ta berdad: “Yerba ta seca, flor ta marchita, ma e palabra di nos Dios ta permanece pa semper.”—Isaias 40:8.
Pensa y Actua a Base di Principio
7. Con e Palabra di Dios ta anima nos pa pensa y actua a base di principio?
7 Bes tras bes, “e palabra di nos Dios” ta anima nos pa pensa y actua a base di principio. Ora nan a pidi Hesus pa resumi e Lei, el a haci dos expresion breve y al caso: uno a enfatisa amor pa Yehova, y e otro a enfatisa amor pa prohimo. (Mateo 22:37-40) E palabranan ei di Hesus ta un cita parcial di un resumen breve di e principionan basico di e Lei di Moises cu ta para skirbi na Deuteronomio 6:4 y 5: “SEÑOR ta nos Dios, SEÑOR ta un! Y stima SEÑOR bo Dios cu henter bo curason, cu henter bo alma y cu tur bo forsa.” Aparentemente Hesus tawatin na mente tambe e instruccion di Dios cu tin na Levitico 19:18. Den e conclusion cla, breve y poderoso di e buki di Eclesiastes, e palabranan di Rei Salomon ta abarca un gran cantidad di lei dibino: “E conclusion di tur loke cu a wordo tendi, ta: teme Dios y warda su mandamentonan, pasobra esaki ta aplicabel na cada persona. Pasobra Dios lo trece tur echo na huicio, tur cos cu ta scondi, sea bon of malo.”—Eclesiastes 12:13, 14; Mikeas 6:8.
8. Dicon un bon comprendemento di e principionan biblico basico ta un proteccion?
8 Si nos tin un bon comprendemento di e principionan basico ei, esei por yuda nos comprende y aplica otro instruccionnan mas spesifico. Ademas, si nos no ta comprende y acepta e principionan basico completamente, kisas nos lo no por tuma decisionnan sabi, y nos fe por tambalia masha lihe. (Efesionan 4:14) Si nos fiha e principionan ei den nos mente y curason, nos lo ta cla pa uza nan ora di tuma decision. Ora nos aplica nan cu comprendemento, nan lo hiba na exito.—Hosue 1:8; Proverbionan 4:1-9.
9. Dicon no ta semper facil pa discerni y aplica principionan biblico?
9 Discerni y aplica principio biblico no ta mes facil cu sigui un set di lei. Como hende imperfecto kisas nos ta evita e esfuerso cu rasona a base di principio ta exigi. Kisas nos ta prefera di tin un lei spesifico cu nos por sigui ora nos haya nos cu un decision of den un dilema. Podise nos ta bai busca guia cerca un cristian maduro—kisas un anciano di e congregacion—cu e speransa cu e ta duna nos un regla spesifico cu ta aplica den nos situacion. Sinembargo, por sosode cu ni Bijbel ni publicacionnan basa riba Bijbel no ta duna un regla spesifico, y si nan ta dun’e mes, kisas e no ta aplicabel den tur caso. Podise bo ta corda cu un cierto homber a puntra Hesus: “Maestro, bisa mi ruman homber pa parti e herencia cu mi.” En bes di bula duna e dos rumannan un regla cu lo a resolve e disputa entre nan, Hesus a duna nan un principio mas general: “Tene cuidou, y warda boso di tur golosidad.” Pues Hesus a duna un principio cu tawata util tanto pa e tempo ei como pa awe.—Lucas 12:13-15.
10. Di ki manera nos comportacion na harmonia cu principio ta revela kico ta motiva nos curason?
10 Probablemente bo a yega di mira hende cu ta obedece lei di mala gana, djis pa nan no haya castigo. Un hende cu ta respeta principio, lo no tin un actitud asina. E esencia mes di principio ta motiva un hende cu ta laga principio dirigi su bida, pa obedece lei di curason. De echo, den caso di mayoria principio hende no ta haya castigo mesora ora nan no cumpli cu nan. Esaki ta duna nos e oportunidad pa revela pakico nos ta obedece Yehova, kico ta motiva nos curason. Un ehempel di esaki ta e caso di Yosef, kende a rechasa e avancenan inmoral di e casa di Potifar. Aunke e tempo ei ainda Yehova no a duna un lei skirbi contra adulterio y no tawatin ningun castigo di Dios prescribi pa un persona cu tin relacion cu casa di un otro homber, Yosef tawata conciente di e principionan cu Dios a decreta tocante fieldad den matrimonio. (Genesis 2:24; 12:18-20) Na Yosef su reaccion nos por mira cu e principionan ei tawatin un influencia poderoso riba dje. El a bisa: “Con anto mi por haci e maldad grandi aki y peca contra Dios?”—Genesis 39:9.
11. Den cua areanan cristiannan kier laga e principionan di Yehova guia nan?
11 Awe cristiannan kier laga e principionan di Yehova guia nan ora ta trata di asuntonan personal, manera scohemento di amistad, dibirticion, musica y literatura. (1 Corintionan 15:33; Filipencenan 4:8) Segun cu nos ta haya mas conocemento, comprendemento y aprecio pa Yehova y su normanan, nos consenshi y nos sentido moral lo yuda nos aplica principionan di Dios den tur situacion cu nos haya nos, asta den asuntonan hopi priva. Si nos ta laga e principionan biblico guia nos, nos lo no busca buraco den Dios su leinan pa scapa di nan; ni nos lo no imita hende cu ta purba wak te con leu nan por bai sin echt kibra un cierto lei. Nos ta conciente cu e manera di pensa ei ta contraproducente y ta perhudica nos mes.—Santiago 1:22-25.
12. Kico ta un punto clave pa laga principionan di Dios guia nos?
12 Cristiannan maduro ta reconoce cu e clave pa sigui principionan di Dios ta e deseo pa sa kico Yehova ta pensa di un asunto. E salmista a urgi: “Boso cu ta stima SEÑOR, odia maldad.” (Salmo 97:10) Mencionando cosnan cu Dios ta considera maldad, Proverbionan 6:16-19 ta bisa: “Tin seis cos cu SEÑOR ta odia, si, shete cos cu ta un abominacion p’e: wowonan altanero, un lenga mentiroso, y mannan cu ta drama sanger inocente, un curason cu ta plania maldad, pianan cu ta lihe pa core haci maldad, un testigo falso cu ta papia mentira, y esun cu ta sembra desunion entre rumannan.” Ora cu loke ta domina nos bida ta un deseo pa refleha e mesun sintimento cu Yehova tin pa e cosnan basico ei, biba di acuerdo cu principio ta bira un custumber.—Yeremias 22:16.
Bon Motivacion Ta Necesario
13. Ki manera di pensa Hesus a enfatisa den su Sermon Riba Sero?
13 E echo cu nos sa y ta aplica e principionan tambe ta proteha nos for di e trampa di adoracion bashi y haci pa formalidad. Tin un diferencia entre sigui principio y obedece regla strictamente. Hesus a mustra esaki bon cla den e Sermon Riba Sero. (Mateo 5:17-48) Corda cu e oyentenan di Hesus tawata Hudiu, pues ta e Lei di Moises mester a dirigi nan comportacion. Pero den practica, nan tawatin un punto di bista troci di e Lei. Nan a cuminsa pone enfasis riba e sentido literal di loke e Lei a bisa, y no riba su berdadero nificacion. Y nan a pone enfasis riba nan tradicionnan, dunando nan mas importancia cu e siñansa di Dios. (Mateo 12:9-12; 15:1-9) Esei a pone cu hende en general no a siña pensa a base di principio.
14. Con Hesus a yuda su oyentenan pensa a base di principio?
14 Contrario cu esei, Hesus a inclui den su Sermon Riba Sero principio cu ta toca cinco area di moralidad: rabia, matrimonio y diborcio, promesa, vengansa, y amor y odio. Den cada caso Hesus a mustra e beneficio di sigui un principio. Asina Hesus a eleva e norma moral di su siguidonan. Por ehempel, pa loke ta e asunto di adulterio, el a duna nos un principio cu ta proteha no solamente nos echonan, sino tambe nos pensamento y deseonan: “Ken cu wak un mohe pa dese’e, ya caba el a comete adulterio cu ne den su curason.”—Mateo 5:28.
15. Con nos por evita cualkier tendencia di ta demasiado stricto pega na lei?
15 E ehempel aki ta mustra cu nunca nos no mester perde for di bista e intencion y nificacion di Yehova su principionan. Y sigur nos no mester purba gana Dios su aprobacion door di desplega simplemente un aparencia moral. Hesus a saca na cla cu e actitud ei ta robes door di hala atencion na Dios su misericordia y amor. (Mateo 12:7; Lucas 6:1-11) Door di sigui principionan di Bijbel, nos ta evita di purba hiba un bida (of exigi pa otronan hiba un bida) cu ta consisti di un lista largo y stricto di haci esaki y no haci esaya cu ta bai mas leu cu e siñansanan di Bijbel. Nos lo ta mas interesa pa sigui e principionan di stima Dios y obedec’e, cu precupa cu loke hende ta mira di nos adoracion.—Lucas 11:42.
Resultadonan Felis
16. Duna ehempel di principionan cu tin tras di algun instruccion den Bijbel.
16 Segun cu nos ta haci esfuerso pa obedece Yehova, ta importante pa nos comprende cu su leinan ta basa riba principionan fundamental. Por ehempel, cristiannan mester evita idolatria, inmoralidad sexual y mal uzo di sanger. (Echonan 15:28, 29) Kico tin tras di e posicion cristian den e casonan aki? Dios merece nos debocion exclusivo; nos mester ta fiel na nos casa; y Yehova ta e Dunado di Bida. (Genesis 2:24; Exodo 20:5; Salmo 36:9) Si nos ta comprende e principionan basico aki, ta bira mas facil pa nos acepta y sigui e leinan cu tin di aber cu nan.
17. Ki bon resultadonan nos por haya door di discerni y aplica principionan di Bijbel?
17 Segun cu nos ta discerni e principionan basico y ta aplica nan, nos ta realisa cu nan ta pa nos mes bon. E bendicionnan spiritual cu e pueblo di Dios ta disfruta di dje hopi bes ta bai compaña cu beneficionan palpabel. Por ehempel, hende cu no ta huma, cu ta hiba un bida moralmente limpi y cu ta respeta e santidad di sanger, ta evita cu nan ta haya cierto malesa. Asina tambe, door di biba na harmonia cu principionan di Bijbel nos por saca beneficio den sentido economico, social of den nos famia. Tur e beneficionan palpabel ei ta mustra e balor di e normanan di Yehova, si, cu nan ta realmente util. Pero e bentahanan practico ei, riba nan mes, no ta e motibo principal pakico nos ta aplica e principionan di Dios. Cristiannan berdadero ta obedece Yehova pasobra nan stim’e, pasobra E merece nan adoracion y pasobra esei ta e cos corecto pa haci.—Revelacion 4:11.
18. Kico mester guia nos bida si nos kier ta un cristian exitoso?
18 Si nos laga principionan di Bijbel guia nos bida, esei ta hiba na un manera di biba mas eleva, cu riba su mes ta atrae otro hende na e caminda di Dios. Loke ta mas importante, nos estilo di bida ta duna honor na Yehova. Nos ta realisa cu Yehova ta realmente un Dios amoroso cu kier lo miho pa nos. Ora nos tuma decisionnan na harmonia cu e principionan di Bijbel y ta mira con Yehova ta bendiciona nos, nos ta cuminsa sinti cu nos relacion cu ne ta bira mas pega. Si, ademas nos ta cultiva un relacion basa riba amor cu nos Tata celestial.
Bo Ta Corda?
• Kico ta un principio?
• Kico ta distingui un principio for di un lei?
• Dicon ta bon pa nos pensa y actua a base di principio?
[Preguntanan di Estudio]
[Cuadro na pagina 20]
Wilson, un cristian na Ghana, a ser notifica cu denter di un par di dia nan lo kit’e for di trabou. Riba Wilson su ultimo dia di trabou, nan a mand’e laba e auto priva di e director di e compania. Ora Wilson a haya un suma di placa den e auto, su supervisor a bis’e cu ta Dios a manda e placa pa Wilson pasobra e dia ei nan tawata bai kit’e for di trabou. Sinembargo, aplicando e principio biblico di honestidad, Wilson a debolbe e placa na e director. Sorprendi y impresiona, e director no solamente a ofrece Wilson trabou permanente mesora, sino tambe a promov’e na un rango halto den staf di e compania.—Efesionan 4:28.
[Cuadro na pagina 21]
Rukia ta un señora Albanes di 60 y pico aña. Debi na un problema familiar, e tawatin 17 aña sin papia cu su ruman homber. El a cuminsa studia Bijbel cu Testigonan di Yehova y el a haya sa cu cristiannan berdadero mester ta na pas cu otro hende y cu nan no ta warda rencor. Despues cu el a haci oracion henter anochi, el a cana bai cas di su ruman homber. Su curason tawata bati sin fin. Su subrina a habri porta. Sorprendi el a puntra Rukia: “Ken a muri? Kico bo a bin haci?” Rukia a pidie pa e papia cu su ruman homber. Di un manera trankil el a splica nan cu door cu el a siña tocante Yehova y e principionan di Bijbel, el a ser motiva pa haci pas cu su ruman homber. Despues cu nan a yora y brasa otro, nan a celebra e reencuentro special aki!—Romanonan 12:17, 18.
[Plachi na pagina 23]
[Plachi na pagina 23]
[Plachi na pagina 23]
[Plachi na pagina 23]
“Ora Hesus a mira e multitudnan, el a subi bai riba sero; y ora cu el a cai sinta, su disipelnan a bin cerca dje. Y el a habri su boca y a cuminsa siña nan.”—MATEO 5:1, 2