Ora Ta Sabi pa Hui

E MUNDO djawe hopi bes ta caracterisa pa un spirito di curashi y di busca confrontacion of di enfrenta tentacion. Generalmente nan ta considera un persona cu ta hui for di un situacion como un hende debil of cobarde. Nan por asta tent’e pesei.

Sinembargo, Bijbel ta mustra bon cla cu tin bes ta mas sabi y un muestra di curashi pa hui. Hesucristo a confirma e berdad biblico aki ora el a bisa su disipelnan prome cu el a manda nan den e ministerio: “Ora nan persigui boso den e stad aki, hui bai na e otro.” (Mateo 10:23) Si, Hesus su disipelnan mester a purba hui for di nan persiguidonan. Nan no mester a participa den ningun clase di guera religioso cu e intencion di obliga otro hende pa comberti. Nan tawatin un mensahe di pas. (Mateo 10:11-14; Echonan 10:34-37) Pues en bes di rabia, cristiannan mester a hui, bai leu for di e fuente di probocacion. Di e manera ei nan a mantene un bon consenshi y tambe nan relacion precioso cu Yehova.—2 Corintionan 4:1, 2.

Tin un ehempel net contrario den e buki biblico di Proverbionan. E ta conta di un hoben cu en bes di a hui ora el a hay’e cu tentacion, a bai tras di un prostituta “manera un buei ta bai pa wordo mata.” E resultado? Calamidad, pasobra el a sucumbi na un tentacion cu a envolve su bida mes.—Proverbionan 7:5-8, 21-23.

Kico abo lo haci si bo haya bo cu un tentacion pa comete inmoralidad sexual, of cu un otro posibel peliger? Segun e Palabra di Dios, podise e miho cos pa haci ta: hui, distancia bo mes for di e esena inmediatamente.—Proverbionan 4:14, 15; 1 Corintionan 6:18; 2 Timoteo 2:22.