Pregunta di Lector

Ta bon pa acerca Dios den oracion sin uza e expresion “den nomber di Hesus”?

Bijbel ta mustra cu cristiannan cu kier acerca Yehova den oracion mester haci esei den nomber di Hesus. Hesus a bisa su disipelnan: “Ni un hende no ta bin cerca e Tata, sino pa medio di mi.” El a agrega: “Tur loke boso pidi den mi nomber, esei lo mi haci, pa e Tata wordo glorifica den e Yiu. Si boso pidi algo den mi nomber, lo mi hacie.”—Huan 14:6, 13, 14.

Referiendo na Hesus su posicion unico, e Cyclopedia of Biblical, Theological, and Ecclesiastical Literature ta bisa: “Oracion mester ta dirigi na Dios so, via Hesucristo como e Mediado. Pesei, tur suplica cu hende haci na santo of angel no ta solamente en vano sino tambe un blasfemia. Maske con glorioso e creacion cu hende ta adora ta, tur adoracion na cosnan crea ta idolatria, y e lei sagrado di Dios ta prohibi esei strictamente.”

Pero kico si un persona cu a caba di experencia algo agradabel, bisa “danki Yehova” y e no agrega “den nomber di Hesus”? Esei lo ta robes? No necesariamente. Supone cu un cristian ta hay’e diripiente den un peliger y e grita: “Yehova, yuda mi!” Dios sigur lo no keda sin yuda su sirbido pasobra e no a bisa “den nomber di Hesus.”

Sinembargo, mester remarca si cu djis papia na bos halto, asta ora ta cu Dios, riba su mes no ta nifica cu bo ta haciendo oracion. Por ehempel, despues cu Yehova a condena Cain pasobra el a mata su ruman Abel, Cain a bisa: “Mi castigo ta mucho grandi pa mi soporta! Mira, awe Bo a core cu mi for di superficie di tera; y lo mi ta scondi pa Bo cara; y lo mi ta un fugitivo y un bagamundo riba tera, y lo sosode cu ken cu haya mi, lo mata mi.” (Genesis 4:13, 14) Aunke Cain a dirigi su comentarionan na Yehova, su expresion emocional tawata un keho tocante e fruta amargo di pica.

Bijbel ta bisa nos: “Dios ta resisti e orguyosonan, ma ta duna gracia na e humildenan.” Dirigi bo mes di un manera informal na e Haltisimo como si fuera ta trata di un simpel hende, definitivamente ta mustra un falta di humildad. (Santiago 4:6; Salmo 47:2; Revelacion 14:7) Tambe lo ta un falta di respet si nos sa kico e Palabra di Dios ta bisa tocante e papel di Hesus, y toch intencionalmente nos ta haci oracion sin duna credito na Hesucristo.—Lucas 1:32, 33.

Esaki no kiermen cu Yehova ta spera cu nos ta sigui un estilo particular of un metodo prescribi ora nos ta haci oracion. Un factor clave ta e persona su condicion di curason. (1 Samuel 16:7) Den prome siglo Era Comun, un oficial di ehersito Romano cu yama Cornelio “tawata haci oracion na Dios continuamente.” Cornelio, un pagano incircuncida, no tawata dedica na Yehova. Maske no ta masha probabel cu el a haci su oracionnan den nomber di Hesus, nan ‘a subi bai dilanti di Dios y El a recorda nan.’ Dicon? Pasobra ‘esun cu ta sondea curason’, a mira cu Cornelio tawata “un homber deboto cu tawata teme Dios.” (Echonan 10:2, 4; Proverbionan 17:3) Despues cu Cornelio a gana conocemento di “Hesus di Nazaret”, el a ricibi spirito santo y a bira un disipel batisa di Hesus.—Echonan 10:30-48.

Finalmente, no ta keda na hende pa dicidi cua oracion Dios ta tende. Si na un ocasion un ruman a expresa su mes na Dios y a keda sin uza e expresion “den nomber di Hesus”, no tin motibo pa e sintie culpabel. Yehova ta bon conciente di nos limitacionnan y E kier yuda nos. (Salmo 103:12-14) Nos por ta sigur cu si nos eherce fe den “e Yiu di Dios . . . , si nos pidi cualkier cos conforme su boluntad, E ta tende nos.” (1 Huan 5:13, 14) Sinembargo, specialmente ora cristiannan berdadero ta representa otronan den un oracion publico, nan ta reconoce e papel cu Hesus ta hunga den Yehova su proposito, segun Bijbel. Y obedientemente nan ta haci esfuerso pa honra Hesus door di dirigi nan oracionnan na Dios via dje.