Siguridad Awor—Siguridad pa Semper

DICON ta dificil pa haya siguridad, y asta ora hende hay’e mes, e no ta dura masha? Acaso nos sentido di siguridad ta basa riba imaginacion, esta, riba loke nos ta spera di logra y no riba loke ta alcansabel? Si ta asina, nos lo ta bibando den un mundo di fantasia.

Imaginacion ta permiti e mente bandona realidad di bida cu tur su insiguridadnan y drenta un mundo bunita y sigur, ignorando tur loke por daña e soño ei. Sinembargo, hopi bes e problemanan di e mundo real ta interumpi e soño aki diripiente y sin misericordia ta elimina e sintimento di bienestar, y ta lanta e persona for di soño pa e mira e realidad amargo.

Laga nos considera un caminda cu hende ta bai busca siguridad: un sitio geografico. Un stad grandi por ehempel por parce prometedor, y pone cu hende ta cuminsa soña cu einan tin placer, salario halto y luganan di biba di bon calidad. Si, un stad grandi por parce di ta ofrece e siguridad cu hende a spera hopi tempo riba dje. Pero e soño aki ta realistico?

E Sitio—Un Stad Grandi of Soñonan Grandi?

Na paisnan den desaroyo, tin propagandanan cu ta promove stad grandi, y esaki kisas ta pone hende su imaginacion cuminsa traha masha. E organisacionnan cu ta patrocina e propagandanan ei no necesariamente ta interesa den bo siguridad, mas bien nan ta interesa den nan benta. Nan ta uza esenanan di exito cu ta refleha siguridad, pa tapa e problemanan di e mundo real. Pues, nan ta enlasa siguridad cu e producto den e propaganda y tambe cu e stad grandi.

Wak e siguiente ehempel. Funcionarionan den un stad na West Africa a pone borchinan di propaganda cu di un manera bibo ta mustra cu eigenlijk, humamento ta mescos cu kima placa cu bo a traha duro p’e. Esei tawata parti di un campaña pa spierta su ciudadanonan contra humamento. Fabricante- y bendedonan di sigaria a contraresta e campaña aki door di pone borchinan cu plachi di hende cu ta huma den esenanan atractivo cu ta refleha felicidad y exito. Ademas, un compania di sigaria a laga algun di su empleadonan—bisti cu uniform bunita y pechi di baseball cu ta na moda—parti sigaria riba caya na hobennan y anima tur pa “purb’e.” Door cu hopi di e hobennan aki a bini di pueblonan chikito, nan no tawata conoce e trampanan astuto di propaganda, y nan a cai pa e invitacion aki. Nan  a bira adicto na sigaria. E hobennan di pueblo a bini stad grandi pa busca siguridad pa por mantene nan famianan of bai dilanti financieramente. En bes di esei, nan tawata kima mayoria di e placa cu nan por a uza pa algo miho.

No ta comerciantenan so ta haci propaganda cu ta describi un bida exitoso den stad grandi. Esaki por bin tambe di hende cu a muda bai stad grandi y cu awor tin berguensa di regresa nan pueblo natal. Pa no parce cu nan a fracasa, nan ta broma tocante nan supuesto rikesa- y logronan den e stad. Sinembargo, si bo analisa nan supuesto status bon, lo bo ripara cu nan estilo di bida actual no ta miho cu e bida cu nan tawatin den pueblo; nan ta lucha cu problemanan financiero mescos cu mayoria otro habitante di stad.

Anto specialmente den stadnan grandi sa sosode cu hende cu a caba di yega en busca di siguridad, ta bira victima di personanan sin escrupulo. Dicon? Generalmente, nan no a haya chens di cera bon amistadnan y nan ta hopi leu for di nan famia. Pues, nan no tin ningun consehero cu lo por yuda nan pa no cai den e trampanan di e bida materialista di stad.

Josué no a cai den e trampa di humamento. Ademas, el a realisa cu e bida di stad ta exigi mucho mas di loke e por a trata cu ne exitosamente. Den su caso, asta bou di e miho sircunstancia, e unico cos cu e stad por a echt ofrec’e tawata soñonan grandi cu lo no a ser realisa. El a reconoce cu e no a haya berdadero siguridad den stad; hewon e no ta pertenece einan. E tawata sinti su mes bashi y inferior, un fracaso. Cu tempo el a guli su orguyo y a regresa su pueblito.

E tawatin miedo cu hende lo a tene mofa di dje. Pero en bes di esei, su famia y berdadero amigonan a yam’e bon bini cu brasa habri. Debi na e cariño di su famia, e ambiente conoci di e pueblito, y e amor di su amigonan den e congregacion cristian, no a dura masha cu e tawata sintie hopi mas sigur cu den e stad grandi, caminda tur su soñonan a bira pesadiya. Pa su sorpresa, traha duro den cunucu hunto cu su tata eigenlijk a duna e y su famia un entrada mas halto cu su salario netto lo tawata den stad.

Placa—Kico Ta e Berdadero Problema?

Placa lo duna bo un sintimento di siguridad? Liz di Canada ta declara: “Como hoben mi a kere cu placa lo kita precupacion.” El a namora di un homber cu tawata bon para financieramente. Djis despues nan a casa. El a sintie sigur? Liz ta sigui conta: “Ora mi a casa, nos tawatin un cas bunita, dos auto, y nos situacion financiero a permiti nos disfruta di casi tur cos material, biahamento y recreo. Pa straño cu por parce, ainda mi tawata precupa cu placa.” E ta splica dicon: “Nos tawatin masha hopi di perde. Ta parce cu mas bo tin, menos sigur bo ta sinti bo. Placa no a libra mi di precupacion ni ansiedad.”

Si bo ta haya cu bo no tin suficiente placa pa sinti bo sigur, puntra bo mes: ‘Kico ta e berdadero problema? Ta echt falta di placa, of ta mi no sa con pa maneha cen bon?’ Reflexionando riba su pasado, Liz ta bisa: “Awor mi ta realisa cu ta mal maneho di placa a causa problema den mi famia ora mi tawata chikito. Nos tawata cumpra na credito, y pesei semper nos tawatin debe. Esei a trece ansiedad.”

Sinembargo, awe Liz cu su casa ta sinti nan hopi mas sigur maske nan tin menos placa. Ora nan a siña e berdad di e Palabra di Dios, nan a stop di scucha propagandanan tocante placa y a cuminsa scucha na e sabiduria di Dios. Esei a inclui e  palabranan aki: “Ma esun cu scucha mi lo biba confiadamente, y lo biba trankil, sin miedo di maldad.” (Proverbionan 1:33) Nan tawata desea pa nan bida haya mas nificacion cu loke un cuenta di banco por a duna. Awor, como misionero den un pais hopi leu, Liz cu su casa ta siña hende rico y pober cu pronto Yehova lo trece berdadero siguridad riba henter e tera. E actividad aki ta duna nan profundo satisfaccion y stabilidad cu no ta bini di ganashi financiero, sino door cu nan tin un proposito superior y balornan sin igual.

Corda e berdad basico aki: Ser rico pa cu Dios ta di hopi mas balor cu posee rikesa material. Henter e Scritura Sagrado ta enfatisa, no e pocesion di rikesa material, sino un bon relacion cu Yehova, un relacion cu nos por mantene door di continuamente haci e boluntad di Dios cu fe. Cristo Hesus a anima nos pa “ta rico pa cu Dios” y warda “tesoro den shelo.”—Lucas 12:21, 33.

Status—Unda Bo Ta Bayendo?

Si bo sa pensa cu pa bo haya siguridad bo tin cu haya un posicion mas halto den comunidad,  puntra bo mes: ‘Ken cu tin un posicion mas halto a echt logra berdadero siguridad? Cuanto mas mi tin cu subi pa logra esei?’ Un carera exitoso por duna bo un sentido falso di siguridad cu ta hiba na decepcion of piyo ainda, na un caida desastroso.

Experencianan di bida real ta mustra cu un bon nomber cerca Dios ta duna hopi mas siguridad cu fama cerca hende. Ta Yehova so por duna hende e don di bida eterno. Esaki ta nifica cu nos nomber ta ser skirbi no den un registro social, pero den e buki di bida di Dios.—Exodo 32:32; Revelacion 3:5.

Poniendo speransa irealistico un banda, con lo bo evalua bo situacion actual, y kico bo por spera honestamente di futuro? Ningun hende no tin tur cos. Un cristian sabi a describie asin’aki: “Mi mester a siña cu nunca bida no ta esaki Y esaya pero esaki OF esaya.” Stop un rato y lesa e cuadro “Un Cuenta di Benin.”

Awor contesta e preguntanan aki: Kico ta un meta importante den mi bida? Cua ta e ruta mas directo pa logr’e? Por ta mi a desvia bai riba un ruta largo y insigur? Y kisas loke realmente mi ta desea y loke ta realisticamente posibel por ser logra via un ruta menos complica?

Despues cu Hesus a caba di duna conseho riba e balor relativo cu cosnan material tin na comparacion cu e balor di cosnan spiritual, el a bisa pa mantene un wowo “simpel”, of “enfoca.” (Mateo 6:22, NW; nota na pia di pagina) El a mustra bon cla cu e cosnan mas importante den bida ta meta- y balornan spiritual cu ta enfoca riba Dios su nomber y su Reino. (Mateo 6:9, 10) Otro cosnan ta di menos importancia of, na moda di papia, nan no ta den focus.

Awe hopi camara ta focus automaticamente riba tanto cosnan cu ta leu como esnan cu ta cerca. Abo tin tendencia di haci esei? Ta riba tur cos cu bo mira bo ta “enfoca”? Tur ta importante, atractivo y, cu un poco fantasia, alcansabel? Asta si pa un parti esei ta e caso, ta masha facil pa bo perde for di bista e obhetivo principal di cristiannan, esta, e Reino. E por bruha den otro imagennan cu ta bringa pa capta bo atencion. Hesus a urgi: “Ma busca prome e reino di Dios y su husticia, y tur e cosnan aki lo wordo añadi na boso.”—Mateo 6:33.

Siguridad Awor y pa Semper

Nos tur podise ta soña cu miho cosnan pa nos mes y pa nos sernan keri. Sinembargo, e echo cu nos ta imperfecto, ta biba den un mundo imperfecto y tin un bida cortico, ta obliga nos di limita e cosnan cu nos por spera di logra realisticamente. Un escritor di Bijbel a splica miles di aña pasa: “Atrobe mi a mira bou di solo: cu e careda no ta pa esun mas lihe, y e bataya no ta pa e guereronan, ni pan no ta pa e sabinan, ni rikesa pa esnan cu tin discernimento, ni fabor pa e hendenan cu habilidad; pasobra tempo y suerte [suceso imprevisto, NW] ta alcansa nan tur.”—Eclesiastes 9:11.

Tin bes nos ta asina absorba den e rutina monotono di bida diario cu nos ta lubida di wak e asunto mas importante, esta, ken nos  ta y kico realmente nos tin mester pa nos sinti nos berdaderamente sigur. Considera e antiguo palabranan di sabiduria aki: “Esun cu ta stima placa lo no keda satisfecho cu placa, ni esun cu ta stima abundancia, cu su entrada. Esaki tambe ta banidad. Soño di e homber trahado ta dushi, sea cu e ta come poco of hopi. Ma bariga yen di e homber rico no ta lag’e drumi.” (Eclesiastes 5:10, 12) Si, unda abo ta busca siguridad?

Si bo situacion ta parce e soño irealistico di Josué, bo por cambia bo plannan? Hendenan cu di berdad ta stima bo, lo apoya bo mescos cu Josué su famia y amigonan den e congregacion cristian a haci. Den un ambiente humilde hunto cu esnan cu ta stima bo, lo bo por haya mas siguridad cu den un stad caminda hende lo purba probecha di bo.

Si ya caba bo tin abundancia, mescos cu Liz cu su casa, lo bo por ahusta bo estilo di bida pa bo uza mas tempo y energia na yuda hende sea cu nan ta rico of pober, siña tocante e Reino, e medio pa logra berdadero siguridad?

Si bo ta tratando di haya un posicion mas halto den comunidad of na trabou, kisas lo ta bon pa bo medita seriamente riba bo motivacion. Claro cu cierto comodidadnan lo por haci bida mas dushi. Sinembargo, lo bo por sigui enfoca riba e Reino, e berdadero medio pa logra siguridad permanente? Corda e palabranan di Hesus: “Ta mas bendiciona pa duna cu pa ricibi.” (Echonan 20:35) Si bo participa den e varios actividadnan di e congregacion cristian, lo bo sinti un siguridad cu ta duna bo gran satisfaccion.

Hende cu tin pleno confiansa den Yehova y su Reino ta disfruta di un siguridad alentador awor y nan ta mira padilanti na un siguridad completo den futuro. E salmista a bisa: “Mi a pone SEÑOR semper mi dilanti; pasobra e ta na mi man drechi, lo mi no wordo movi. Pesei mi curason ta contento, y mi alma ta regosiha; mi carni tambe lo biba den siguridad.”—Salmo 16:8, 9.

[Cuadro/Plachi na pagina 6]

Un Cuenta di Benin

Hende a conta e cuenta aki miles di biaha y na diferente manera. Resientemente, un habitante di edad di un pueblo na Benin, West Africa, a conta algun hoben e siguiente version.

Un piscado ta bolbe cas den su canoa y ta topa cu un stranhero experto den hacimento di negoshi cu ta sirbi den e pais den desaroyo aki. E experto ta puntra e piscado dicon el a bolbe bek asina tempran. E piscado ta contesta cu e por a keda mas tanto, pero ya el a cohe suficiente pa percura pa su famia.

E experto ta puntr’e: “Awor kico bo ta bai haci cu tur bo tempo?”

E piscado ta contesta: “Wel, mi ta pisca un tiki. Hunga cu mi yiunan. Ora bira calor, nos tur ta bai sosega un rato. Anochi nos ta sinta come hunto. Despues ami cu mi amigonan ta sinta scucha poco musica, etcetera.”

E experto ta interumpie: “Tende, mi a caba universidad y mi a studia e materia aki. Mi kier yuda bo. Bo mester keda riba lama pa pisca mas tanto tempo. Lo bo gana mas tanto cen y pronto lo bo por cumpra un boto mas grandi cu e canoa aki. Cu un boto mas grandi lo bo por gana mas placa ainda y lo no dura masha cu bo por tin un flota di barco di reda.”

“Y despues?” e piscado ta puntra.

“E ora ei, en bes di bende pisca via un otro persona, bo mes por negosha directamente cu e fabrica of asta cuminsa cu bo mes planta di procesa pisca. Lo bo por sali for di bo pueblo y bai biba na Cotonou of Paris of New York, y for di einan bo ta maneha bo negoshi. Bo por asta considera e posibilidad di pone bo negoshi riba bolsa di balor y gana miyones di florin.”

E piscado ta puntr’e: “Cuanto tempo lo tuma prome cu tur e cosnan ei sosode?”

E experto ta contesta: “Kisas 15 pa 20 aña.”

“Y despues?” e piscado ta bolbe puntra.

“Ta e ora ei bida ta bira interesante”, e experto ta splica. “Lo bo por stop di traha. Lo bo por bai laga tur e actividadnan druk di stad y bai biba den un pueblo aisla.”

“Y despues?” e piscado ta puntra.

“E ora ei bo tin tempo pa pisca un tiki, hunga cu bo yiunan, bai sosega ora bira calor, come cu bo famia y scucha musica hunto cu bo amigonan.”

[Plachi na pagina 7]

Promocion ta trece siguridad?

[Plachi na pagina 8]

Bo compañeronan cristian ta echt interesa den bo siguridad