Unda Abo Ta Busca Siguridad?

Den un pueblito na West Africa, e hoben Josué ta yama su famia y amigonan ayo. * E ta muda pa e stad grandi en busca di siguridad financiero. Pero poco despues cu e yega den stad e ta perde speransa, ora e bin realisa cu e stad no ta un luga caminda bo por bira rico lihe.

SEGUN cu Josué ta lucha pa ahusta su mes na e bida di stad, e ta keda hopi desapunta. E stad grandi ta completamente otro for di loke el a imagina. Mientras tanto den su curason, e ta sinti hopi gana di bai bek cerca su famia y amigonan den e pueblito humilde cu el a laga atras. Pero e tin miedo cu hende den e pueblito lo haci mofa di dje. E ta precupa, pensando: ‘Nan lo yama mi un fracaso pasobra mi no tawatin exito den stad.’

Loke ta precup’e mas ainda ta e decepcion cu lo e por causa su mayornan. Nan ta sten riba dje pa yudansa financiero. Mientras Josué ta luchando cu e carga emocional aki, e ta traha tur dia te laat na un trabou cu no ta masha respeta, y cu ta pag’e solamente un fraccion di loke el a soña. E ta completamente agota di demasiado trabou. Actividadnan cristian ta masha importante p’e, pero segun cu e simannan ta pasa ta resta cada bes menos tempo pa esei. Ademas, door cu e ta asina leu for di e cariño di su famia y amigonan bieu, e ta sintie su so y tristo. E ta realisa cu e stad no a dun’e e siguridad cu el a desea asina tanto.

Maske nomber y luga por varia, e storia tristo di Josué no ta algo nobo, y bes tras bes e ta ripiti su mes. Josué su deseo di muda no tawata motiva pa egoismo. E unico cos cu e tawata busca ta siguridad. El a kere sinceramente cu den stad lo e tawatin mas oportunidad cu den su pueblito. Ta berdad cu tin bes un persona por logra mehora su posicion material, pero esei no ta nifica cu el a logra berdadero siguridad. Specialmente den e caso di Josué esei no a sosode. Y tin hopi chens cu lo e no sosode tampoco den caso di mayoria otro hende cu ta purba haci e mesun cos. Esaki ta haci nos puntra: ‘Kico ta siguridad?’

Cada hende ta mira siguridad na un manera diferente. Segun un diccionario, siguridad ta libertad for di peliger of libertad for di miedo of ansiedad. Mayoria hende ta conciente cu libertad completo for di peliger no ta existi awe. Tanten cu nan por sinti nan sigur, nan ta satisfecho, maske tin situacionnan peligroso rond di nan.

Kico di abo? Unda abo ta busca siguridad? Bo ta kere cu bo ta hay’e den stad y no den un pueblito, manera Josué a pensa? Of bo ta hay’e den placa, sin importa di unda of con bo hay’e? Kisas bo ta aspira di haya un posicion social mas halto? Sea cual sea e manera cu bo ta pensa cu bo por haya siguridad, cuanto tempo abo y bo famia lo disfruta di e siguridad ei?

Laga nos considera tres manera cu hopi hende ta busca siguridad: na sitio geografico, den placa y den posicion of status. Despues nos lo analisa unda nos por haya berdadero siguridad.

[Nota]