Bo Ta Calcula e Gastonan?

HESUCRISTO a ofrece su disipelnan e speransa di bida eterno, pero tambe el a urgi nan pa calcula e gastonan di ser un cristian. El a ilustra e punto aki door di puntra: “Cual di boso, ora cu e kier traha un toren, no ta sinta calcula e gastonan prome, pa mira si e tin suficiente pa cab’e?” (Lucas 14:28) Cua gastonan Hesus tawata kiermen?

Tur cristian ta haya nan cu prueba, y algun di nan ta pruebanan severo. (Salmo 34:19; Mateo 10:36) Pesei, nos mester ta mentalmente y spiritualmente prepara pa nos no keda sorprendi ora nos haya nos confronta cu oposicion of otro problema. Prome cu esei sosode, ya caba nos mester a calcula cu ser un disipel di Cristo ta encera cu nos por haya nos cu e dificultadnan ei. Pero tambe nos ta conciente cu e recompensa—salbacion for di pica y morto—ta bal hopi mas cu cualkier cos cu e mundo actual por ofrece nos. Si, si nos sigui sirbi Dios, nada cu E permiti—ni sikiera morto—no por perhudica nos pa semper.—2 Corintionan 4:16-18; Filipencenan 3:8.

Con nos por haya un fe fuerte asina? Nos fe ta bira mas fuerte cada bes cu nos tuma un decision corecto, para firme pa principionan cristian of haci algo cu ta na harmonia cu Dios su boluntad, specialmente ora nos ta bou di presion pa haci net contrario. Ora nos experencia Yehova su bendicion personalmente door cu nos a keda fiel, nos fe ta bira mas fuerte y mas profundo. Di e manera ei nos ta sigui e ehempel di Hesus, su prome disipelnan y tur homber y mohe di fe cu atrabes di siglonan corectamente a “calcula e gastonan” cu sirbi Dios ta encera.—Marco 1:16-20; Hebreonan 11:4, 7, 17, 24, 25, 32-38.