Con Incapasidad Lo Caba

IMAGINA bo cu wowo di hende ciego ta mira, horea di hende sordo ta tende tur zonido, lenga di hende mudo ta canta cu goso y hende lam ta cana rond cu pasonan firme! No ta di avance den ciencia medico nos ta papiando, sino di loke lo pasa ora Dios mes interveni na fabor di humanidad. Bijbel ta profetisa: “E ora ei wowo di e ciegonan lo mira, y horea di e sordonan lo tende. Anto e cohonan lo bula manera bina, y lenga di e mudo lo grita di alegria.” (Isaias 35:5, 6) Pero con nos por sa sigur cu e profecia asombroso aki lo bira realidad?

Pa cuminsa, tempo cu Hesucristo tawata riba tera, el a cura hende di tur sorto di enfermedad y incapasidad. Ademas, mayoria di su milagernan a tuma luga dilanti hopi testigo, asta dilanti su enemigonan. De echo, por lo menos un di e biahanan ei, su opositornan skeptico a investiga e asunto a fondo pa purba desacredita Hesus. Pero nan lo mester a cunsumi hopi, pasobra tur loke nan a logra ta di confirma cu ta un milager a sosode. (Huan 9:1, 5-34) Ora Hesus a bolbe haci un otro milager innegabel, nan a bisa tur frustra: “Kico nos ta haci? Pasobra e homber aki ta haci hopi milager.” (Huan 11:47) Pero e pueblo comun si no tawata asina indeferente, pasobra hopi di nan a cuminsa pone fe den Hesus.—Huan 2:23; 10:41, 42; 12:9-11.

E Milagernan di Hesus—Muestra di e Curacion Mundial na Caminda

E milagernan di Hesus a proba cu e ta e Mesias y e Yiu di Dios. Pero nan a logra mas. Nan ta forma un base pa nos tin fe den e promesanan di Bijbel cu ta bisa cu hende obediente lo ser cura den futuro. Un di e promesanan aki ta na Isaias capitulo 35. Nos a mencion’e caba den e prome paragraf. Esaki ta loke Isaias 33:24 ta bisa tocante e futuro estado di salu di hende cu ta teme Dios: “Ningun habitante lo no bisa: ‘Mi ta malo.’” Revelacion 21:4 tambe ta priminti: “[Dios] lo seca tur lagrima kita for di nan wowo; y lo no tin morto mas; lo no tin lamento mas, ni yoramento, ni dolo; e prome cosnan [e dificultadnan y sufrimento di awendia] a pasa.”

Regularmente hende ta resa pidi pa e profecianan aki cumpli ora nan haci e Oracion di Nos Tata. Entre otro e oracion ei ta bisa: “Cu bo reino bin. Cu bo boluntad sosode na tera  mescos cu den shelo.” (Mateo 6:10) Si, planeta tera y humanidad ta parti di Dios su boluntad. Aunke Dios a permiti enfermedad y incapasidad cu un motibo, pronto nan lo pasa pa historia. Nan lo no keda mancha e ‘banki di Dios su pia’ pa semper.—Isaias 66:1. *

Curacion sin Dolo y sin Gasto

Hesus a cura tur enfermedad cu hende a sufri, sin dolo, sin tarda y sin cu nan mester a paga nada. Di mes, e noticia aki a plama manera un candela den yerba seco, y den poco tempo “multitudnan grandi a bin cerca dje, y a trece hunto cu nan esnan cu tawata lam, mancaron, ciego, mudo, y hopi otronan, y nan tawata pone nan na su pia; y e tawata cura nan.” Con e pueblo a reacciona? Mateo, cu a mira personalmente loke a sosode, ta sigui bisa den su relato: “E multitud a keda admira ora nan a mira e mudonan ta papia, e mancaronnan bon di salu, e lamnan ta cana y e ciegonan ta mira; y nan a glorifica e Dios di Israel.”—Mateo 15:30, 31.

Paga tino cu Hesus no a scohe un par di hende spesifico for di den e multitud pa e cura nan, manera algun supuesto charlatan sa haci pa gaña hende. Mas bien, e multitud di famia y amigo tawata ‘casi tira nan na Hesus su pia, y el a cura nan.’ [NW] Laga nos ban repasa un par di ehempel concreto di Hesus su habilidad di cura hende.

Hende ciego: Na Herusalem Hesus a yega di duna bista na un homber cu tawata “ciego for di su nacemento.” E homber aki tawata bon conoci den e stad como un limosnero ciego. Pesei, bo mes por imagina bo con asombra y excita e hendenan a keda ora nan a mir’e ta cana rond cu su bista restaura! Sinembargo, no ta tur hende a keda contento. Algun di e Farizeonan, un secta Hudiu prominente y cu influencia, tawata rabia debi cu algun tempo prome Hesus a expone con malbado nan tawata. Awor nan tawata desespera pa haya evidencia pa mustra cu Hesus tawata gaña hende. (Huan 8:13, 42-44; 9:1, 6-31) Pesei, prome nan a interoga e homber cu Hesus a cura, despues su mayornan, y despues e homber mes atrobe. Pero e unico cos cu e investigacion di e Farizeonan a logra ta di confirma e milager di Hesus, y nan a cunsumi. Asombra di mira con malbado e hipocritanan religioso aki tawata, e homber cu Hesus a cura mes a bisa: “For di principio di tempo nunca hende no a tende cu un hende a habri wowo di un persona cu a nace ciego. Si e homber aki no tawata di Dios, e lo no por a haci nada.” (Huan 9:32, 33) Maske e homber aki a expresa su fe na un manera franco y logico, e Farizeonan a “sac’e afo”, loke ta duna di comprende cu nan a expulsa e homber for di sinagoga.—Huan 9:22, 34.

Hende sordo: Ora Hesus tawata na Decapolis, un region oost di Riu Yordan, “nan a trece cerca dje un hende cu tawata sordo y cu tawatin lenga pega.” (Marco 7:31, 32) Ademas di cura e homber aki, Hesus a mustra tambe cu el a comprende sintimento di hende sordo hopi bon, ya cu algun di nan ta sinti berguensa ora nan ta den un multitud. Bijbel ta conta nos cu Hesus a hala e homber sordo un banda, “aparta for di e multitud”, y a cur’e. Na e ocasion aki tambe, esnan cu a mira kico a pasa “a keda masha asombra mes”, bisando: “El a haci tur cos asina bon; e ta haci sordo tende y mudo papia.”—Marco 7:33-37.

Hende lam: Ora Hesus tawata na Capernaum, hende a bini cerca dje cu un homber lam drumi riba un cama. (Mateo 9:2) Versiculo 6 pa 8 ta conta kico a pasa. “[Hesus] a bisa e paralitico: ‘Lanta, cohe bo cama y bai cas.’ Anto el a lanta y a bai cas. Ma ora cu e multitudnan a mira esaki, nan a keda yen di temor y a glorifica Dios, kende a duna tal autoridad na hende.” E milager aki tambe a tuma luga den bista di tanto Hesus su disipelnan como su enemigonan. Nota cu su disipelnan, cu no tawata ciega pa odio y prehuicio, “a glorifica Dios” pa loke nan a caba di mira.

 Enfermedad: “Y un leproso a bin cerca [Hesus], y a rog’e y a cai na rudia su dilanti, y a bis’e: ‘Si bo kier, bo por haci mi bira limpi.’ Y yen di compasion el a saca su man, y a mishi cu ne y a bis’e: ‘Mi kier, sea limpi.’ Y mesora e lepra a kita for di dje y el a keda limpi.” (Marco 1:40-42) Nota cu Hesus no a cura e hende aki di mala gana, sino cu compasion genuino. Imagina bo cu ta abo tawata e leproso. Con lo bo a sinti si bo a cura den un instante y sin dolo di un malesa teribel cu pocopoco a desfigura bo curpa y obliga bo biba aparta for di sociedad? Sin duda bo por comprende dicon un otro leproso cu Hesus a cura milagrosamente a “tira su curpa abou cu su cara te na suela na pia di Hesus, y a duna gradicimento na dje.”—Lucas 17:12-16.

Herida: E ultimo milager cu Hesus a haci prome cu nan a arest’e y clab’e na staca tawata un curacion. Actuando sin pensa contra esnan cu kier a bai cu Hesus preso, apostel Pedro “kende tawatin un spada, a sac’e y a dal e sumosacerdote su esclabo kap su horea drechi kita afo.” (Huan 18:3-5, 10) Lucas, cu tambe ta relata e mesun sosodemento, ta conta nos cu Hesus a “mishi cu su horea y a cur’e.” (Lucas 22:50, 51) E gesto di bondad aki tambe a tuma luga dilanti tanto amigo como enemigo di Hesus; den e caso aki, esnan cu a bin pa coh’e preso.

Si, mas nos examina e milagernan di Hesus, mas evidencia nos ta mira di cu nan ta autentico. (2 Timoteo 3:16) Y manera nos a menciona caba, door di studia e relatonan ei nos ta haya mas fe den Dios su promesa di cura hende obediente. Bijbel ta defini fe cristian como “e siguransa di cosnan cu hende ta spera, e conviccion di cosnan cu hende no ta mira.” (Hebreonan 11:1) Claramente, Dios no ta anima nos pa tin un fe ciego ni un speransa sin base, sino un fe firme basa riba evidencia. (1 Huan 4:1) Segun cu nos desaroya un fe asina, nos lo mira cu nos ta bira mas fuerte, salu y felis den sentido spiritual.—Mateo 5:3; Romanonan 10:17.

Curacion Spiritual Mester Bini Prome!

Hopi hende ta fisicamente salu pero infelis. Tin hende asta ta purba comete suicidio debi cu nan no tin speransa pa futuro, of debi cu nan ta sinti nan hoga cu problema. Lo bo por bisa cu nan ta incapasita den sentido spiritual. Den Dios su bista e situacion aki ta hopi mas grave cu incapasidad fisico. (Huan 9:41) Di otro banda, hopi hende cu tin un incapasidad fisico, manera Christian y Junior cu nos a menciona den e articulo anterior, ta biba felis y cu un sentido di satisfaccion. Dicon? Door cu nan ta spiritualmente sano, y yen di animo debi na e speransa sigur cu nan tin basa riba Bijbel.

Papiando di nos necesidad unico como hende, Hesus a bisa: “Hende lo no biba di pan so, ma di tur palabra cu ta sali for di boca di Dios.” (Mateo 4:4) Si, hende tin mester di mas cu djis cuminda fisico; nos no ta manera bestia. Nos ta crea segun e “imagen” di Dios, y nos tin mester di alimento spiritual, esta, conocemento tocante Dios, tocante ki papel nos ta hunga den su proposito, y tocante con nos por cumpli cu su boluntad. (Genesis 1:27; Huan 4:34) Conocemento di Dios ta duna nos bida nificacion y e ta duna nos animo pa sirbi Dios. Ademas e ta duna nos chens di por biba pa semper den paradijs riba tera. Hesus a bisa: “Esaki ta bida eterno, cu nan por conoce bo, e unico Dios berdadero, y Hesucristo, kende bo a manda.”—Huan 17:3.

Ta interesante pa nota cu e hendenan cu a biba den tempo di Hesus no a yam’e “Curandero” sino “Maestro.” (Lucas 3:12; 7:40) Dicon? Door cu Hesus a siña hende kico ta e solucion permanente pa tur problema di humanidad: e Reino di Dios. (Lucas 4:43; Huan 6:26, 27) E gobierno celestial aki den man di Hesucristo lo goberna henter mundo y cumpli cu tur e promesanan di Bijbel cu ta bisa cu hende husto y tera, cu ta nan cas, lo ser restaura completamente y pa semper. (Revelacion 11:15) Ta pesei den e Oracion di Nos Tata, Hesus a mustra cu e binida di e Reino di Dios tin di aber  cu cumplimento di Dios su boluntad riba tera.—Mateo 6:10.

E speransa animante aki a pone e lagrimanan di tristesa di hopi hende incapasita cambia bira lagrima di goso. (Lucas 6:21) De echo, Dios ta bai haci mas cu elimina enfermedad y incapasidad. E ta bai caba completamente cu e causa mes di sufrimento humano, esta, pica. Si, Isaias 33:24 y Mateo 9:2-7, cu nos a cita caba, ta mustra cu enfermedad tin di aber cu nos estado di pica. (Romanonan 5:12) Pesei, una bes cu pica ser venci, por fin humanidad lo disfruta di “e libertad glorioso di e yiunan di Dios”, un libertad cu entre otro ta nifica perfeccion di mente y curpa.—Romanonan 8:21.

Si un hende ta gosa di basta bon salu, ta facil pa e keda sin para keto y pensa con importante un bon salu ta. Pero hende aflihi cu incapasidad si conoce su balor. Nan sa bon con precioso bida y salu ta, y con bo situacion por cambia diripiente y sin cu bo a spera. (Eclesiastes 9:11) Pesei, nos ta spera cu nos lesadonan cu ta incapasita por presta atencion special na Dios su maravioso promesanan skirbi den Bijbel. Hesus a duna su bida pa e por garantisa cu nan lo cumpli. Ki miho garantia nos por kier?—Mateo 8:16, 17; Huan 3:16.

[Nota]