Con un Yiu A Yuda Su Tata

JAMES, di Inglatera, tin trinta y pico aña. E ta sufri di incapasidad mental serio, y autismo leve. Toch e tin hopi aña ta asisti na reunionnan di Testigonan di Yehova cu su mama y su ruman mohe. Su tata si nunca no a mustra mucho interes den nan creencianan. Un anochi, despues di un reunion den cua tawatin un demostracion tocante con pa invita un hende conoci pa asisti na e Conmemoracion di e morto di Cristo, James a bai mesora den su camber. Su mama a core bai su tras nervioso, y el a haya James ta busca ansha den su edicionnan bieu di E Toren di Vigilancia y Spierta! El a scohe uno cu tawatin un invitacion di Memorial imprimi riba e ultimo pagina, anto bai mesora cerca su tata. El a mustra dede riba e invitacion y despues riba su tata, anto el a bisa: “Abo!” Su mama y su tata a wak otro sorprendi ora nan a realisa cu James tawata invitando su tata pa Memorial. Su tata di cu lo e bai kisas.

Riba e anochi di Memorial, James a bai den cashi di su tata y a scohe un carson. El a hib’e pa su tata y a dun’e di comprende cu e mester bistie. E tata a bis’e cu e no ta bai e reunion. Pues, James cu su mama a sali bai Salon di Reino nan so.

Pero despues, James a cuminsa haci cada bes mas dificil ora su mama a purba prepar’e pa bai reunion di congregacion. E tawata prefera di keda cas cerca su tata. Riba un diadomingo mainta, James a bolbe nenga di copera ora su mama a purba prepar’e pa bai reunion. Pa e mama su gran sorpresa, e tata di James a bira bis’e: “James, si mi bai reunion awe, bo tambe ta bai?” James su cara a yena cu alegria. El a bula brasa su tata y bisa: “Si!” y nan tur tres a bai Salon di Reino.

For di e dia ei, James su tata a keda asisti na tur reunion di diadomingo, y den poco tempo el a bisa cu si e kier haci progreso lo e mester asisti na e otro reunionnan tambe. (Hebreonan 10:24, 25) El a haci esei tambe, y dos luna despues el a cuminsa studia Bijbel regularmente. El a progresa lihe, y e no a tarda pa haci e cambionan necesario den su bida. Den poco tempo el a cuminsa participa den e trabou di predica e Reino. Un aña despues cu el a cuminsa studia Bijbel el a dedica su bida na Yehova y a simbolisa esaki cu bautismo bou di awa. Actualmente e ta sirbi como sirbido ministerial den su congregacion. Awor, henter e famia ta sirbi Yehova uni.