Cumpli cu Rekisitonan Dibino Ta Engrandece Yehova

“Lo mi engrandec’e cu gradicimento.”—SALMO 69:30.

1. (a) Dicon Yehova merece pa nos engrandec’e? (b) Con nos ta engrandec’e cu gradicimento?

YEHOVA ta e Dios todopoderoso, e Soberano di Universo y e Creador. Como tal, su nomber y su proposito merece pa nos engrandece nan. Engrandece Yehova kiermen admir’e profundamente, alab’e y elogi’e cu echo y cu palabra. Pa nos engrandec’e “cu gradicimento”, semper nos mester mustra gradicimento pa loke E ta haci pa nos awor, y loke e ta bai haci pa nos den futuro. Nos mester tin e mesun actitud cu e fiel criaturanan spiritual den shelo menciona na Revelacion 4:11 tawatin, kendenan a bisa: “Digno bo ta, nos Señor y nos Dios, pa ricibi gloria y honor y poder; pasobra abo a crea tur cos, y pa motibo di bo boluntad nan tawata existi, y a wordo crea.” Con nos por engrandece Yehova? Door di siña tocante dje y haci loke E ta spera di nos. Nos mester sinti mescos cu e salmista ora el a bisa: “Siña mi haci bo boluntad, pasobra Abo ta mi Dios.”—Salmo 143:10.

2. Con Yehova ta trata esnan cu ta engrandec’e y esnan cu no ta hacie?

² Yehova tin aprecio pa esnan cu ta engrandec’e. Ta pesei E ta “esun cu ta recompensa esnan cu ta busc’e.” (Hebreonan 11:6) Kico e recompensa lo ta? Den un oracion na su Tata celestial, Hesus a bisa: “Esaki ta bida eterno, cu nan por conoce Bo, e unico Dios berdadero, y Hesucristo, kende Bo a manda.” (Huan 17:3) Si, esnan cu ‘engrandece Yehova cu gradicimento’ lo “hereda e tera, y lo biba den dje pa semper.” (Salmo 37:29) Di otro banda, “lo no tin futuro pa e hende malbado.” (Proverbionan 24:20) Y den e ultimo dianan aki ta urgente pa nos engrandece Yehova, pasobra pronto E ta bai destrui hende malbado y scapa e hustonan. “Mundo ta pasa bai y su deseonan tambe, ma esun cu haci e boluntad di Dios ta permanece pa semper.”—1 Huan 2:17; Proverbionan 2:21, 22.

3. Dicon nos tin cu presta atencion na e buki di Malakias?

³ Den Bijbel nos ta haya sa e boluntad di Yehova, pasobra “tur Scritura ta inspira pa Dios.” (2 Timoteo 3:16) E Palabra di Dios ta contene hopi relato tocante con Yehova ta bendiciona esnan cu ta engrandec’e, y kico ta pasa cu esnan cu no ta hacie. Un di e relatonan ei tin di aber cu loke a tuma luga na Israel den tempo di profeta Malakias. Rond di aña 443 prome cu Era Comun, tempo cu Nehemias tawata gobernado di  Huda, Malakias a skirbi e buki di Bijbel cu ta carga su nomber. E buki emocionante y impactante aki tin informacion y profecia cu “a wordo skirbi como un spiertamento pa nos, riba kendenan e finnan di e siglonan a bin.” (1 Corintionan 10:11) Door di presta atencion na e palabranan di Malakias, nos por ta miho prepara pa “e dia grandi y teribel” di Yehova, ora E destrui e mal sistema di cosnan aki.—Malakias 4:5.

4. Na cua seis punto Malakias capitulo 1 ta hala nos atencion?

⁴ Con e buki di Malakias, cu a ser skirbi mas cu 2.400 aña pasa, por yuda nos cu ta biba den siglo 21 prepara nos mes pa e dia grandi y teribel di Yehova? E prome capitulo ta hala nos atencion na por lo menos seis punto cu ta crucial si nos kier engrandece Yehova cu gradicimento pa gana su aprobacion y bida eterno: (1) Yehova ta stima su pueblo. (2) Nos mester mustra aprecio pa cos sagrado. (3) Yehova ta spera cu nos ta dun’e lo miho di nos. (4) Ta amor inegoista ta motiva adoracion berdadero, y no golosidad. (5) Sirbi Dios na un manera aceptabel no ta djis un formalidad ni un peso pa nos. (6) Nos tur tin cu rindi cuenta na Dios. Pues, den e prome articulo aki den un serie di tres tocante e buki di Malakias, laga nos examina cada un di e puntonan aki segun cu nos ta wak Malakias capitulo 1 mas djacerca.

Yehova Ta Stima Su Pueblo

5, 6. (a) Dicon Yehova a stima Yacob? (b) Si nos ta fiel manera Yacob, kico nos por spera como resultado?

⁵ Yehova su amor ta bisto den e prome versiculonan di Malakias. E buki ta cuminsa cu e palabranan: “Un declaracion formal: E palabra di Yehova tocante Israel.” [NW] Despues Dios ta bisa: “Mi a stima boso.” Den e mesun versiculo Yehova ta duna un ehempel door di bisa: “Mi a stima Yacob.” Yacob tawata un homber cu tawatin fe den Yehova. Cu tempo Yehova a cambia Yacob su nomber pa Israel, y el a bira un di e antepasadonan di e nacion di Israel. Ta pasobra Yacob tawata un homber di fe Yehova a stim’e. Y e Israelitanan cu a mustra e mesun actitud ei, tambe Dios a stima.—Malakias 1:1, 2.

⁶ Si nos ta stima Yehova y ta pega lealmente na su pueblo, nos por haya consuelo den e declaracion na 1 Samuel 12:22: “SEÑOR lo no bandona su pueblo pa motibo di Su gran nomber.” Yehova ta stima su pueblo, y E ta recompensa nan, finalmente asta cu bida eterno. Pesei Bijbel ta bisa: “Confia den SEÑOR y haci loke ta bon; biba den e tera y alimenta bo mes cu su fieldad. Deleita bo mes den SEÑOR, y E lo duna bo e deseonan di bo curason.” (Salmo 37:3, 4) Amor pa Yehova tin di aber cu e di dos punto cu Malakias capitulo 1 ta hala nos atencion na dje.

Mustra Aprecio pa Cos Sagrado

7. Dicon Yehova a odia Esau?

⁷ Manera nos por lesa na Malakias 1:2 y 3, despues cu Yehova bisa “Mi a stima Yacob”, e ta bisa “Esau mi a odia.” Dicon e diferencia aki? Yacob a engrandece Yehova, pero su ruman morocho Esau no. Un otro nomber pa Esau ta Edom. Malakias 1:4 ta yama e tera di Edom e teritorio di maldad, y su habitantenan ta ser condena. Esau a ricibi e nomber Edom (cu kiermen  “Cora”) despues cu el a bende su precioso derecho di primogenito cu Yacob pa un poco stoba cora. “Esau a desprecia su derecho di primogenitura”, segun Genesis 25:34. Apostel Pablo a spierta otro creyentenan masha pa nan tene cuidou “pa no tin ningun hende inmoral of sin Dios manera Esau, kende a bende su mes derecho di nacemento pa un solo cuminda.”—Hebreonan 12:14-16.

8. Dicon Pablo a relaciona Esau cu inmoralidad sexual?

⁸ Dicon Pablo a conecta loke Esau a haci cu inmoralidad sexual? Pasobra un mentalidad manera di Esau por pone un hende keda sin aprecia cos sagrado. Na su turno, esaki por hiba na pica serio, manera inmoralidad sexual. Pesei, cada un di nos lo por puntra su mes: ‘Tin bes cu mi ta sinti mi tenta pa troca mi herencia cristian—bida eterno—pa algo mes pasahero cu un conchi di bonchi stoba? Mi por ta despreciando cos sagrado, kisas sin realisa?’ Esau tawatin un deseo impaciente pa haci algo cu su curpa a anhela. El a bisa Yacob: “Lihe, por fabor, duna mi un boca di e cos cora.” (Genesis 25:30, NW) Lamentablemente, tin algun sirbido di Dios cu den un sentido a bisa: “Lihe! Pakico warda te ora nos ta casa, manera mester ta?” Un deseo pa satisfaccion sexual cueste loke cueste a bira nan conchi di bonchi stoba.

9. Con nos por keda cu un temor respetuoso pa Yehova?

⁹ Laga nos no desprecia cos sagrado nunca door di desprecia decencia, integridad y nos herencia spiritual. Na luga di ta manera Esau, laga nos ta fiel manera Yacob, y keda cu un temor respetuoso di Dios door di mustra aprecio profundo pa cos sagrado. Con nos por haci esaki? Door di paga bon tino pa cumpli cu Yehova su rekisitonan. Di mes esaki ta hiba nos na e di tres punto cu Malakias capitulo 1 ta trece padilanti. Kico e ta?

Duna Yehova Lo Miho di Nos

10. Den ki manera e sacerdotenan a desprecia e mesa di Yehova?

¹⁰ E sacerdotenan di Huda cu tawata sirbi Yehova na e tempel na Herusalem den tempo di Malakias no tawata ofrece Yehova e miho sacrificionan posibel. Malakias 1:6-8 [NW] ta bisa: “‘Un yiu, di su parti, ta honra un tata; y un sirbido, su gran doño. Pues, si mi ta un tata, unda e honor pa mi ta? Y si mi ta un gran doño, unda e temor di mi ta?’ Yehova di ehersitonan a bisa boso, o sacerdotenan cu ta desprecia mi nomber.” E sacerdotenan a puntra: “Di ki manera nos a desprecia bo nomber?” Yehova a contesta nan: “Ora boso a presenta pan contamina riba mi altar.” E sacerdotenan a puntra: “Di ki manera nos a contamina Bo?” Pues, Yehova a contesta nan: “Ora boso ta bisa: ‘E mesa di Yehova ta algo pa ser desprecia.’” Cada bes cu e sacerdotenan ei a presenta un sacrificio mancaron y bisa cu “esei no ta nada malo”, nan a mustra cu nan a desprecia Yehova su mesa.

11. (a) Kico Yehova a bisa tocante sacrificio inaceptabel? (b) Dicon e pueblo en general tawatin falta?

¹¹ E ora ei Yehova a rasona cu nan tocante e sacrificionan inaceptabel ei: “Pakico bo no ta ofrece bo gobernado esei? E lo keda contento cu bo? Of e lo ricibi bo cu cariño?” No,  nan gobernado lo no keda contento cu un regalo asina. Wel, e Soberano di Universo mucho menos lo acepta ofrenda mancaron! Anto no ta e sacerdotenan so tawata fout. En berdad nan a mustra desprecio pa Yehova door di efectua e sacrificionan. Pero e pueblo en general awor? Nan tawata inocente? Absolutamente cu no! Ta nan a scohe e bestianan ciego, lam y enfermo y a trece nan pa e sacerdotenan sacrifica. Esei si ta un actitud pecaminoso!

12. Con nos ta ser yuda pa duna Yehova lo miho di nos?

¹² E manera pa mustra cu nos ta stima Yehova di berdad ta door di dun’e lo miho cu nos por. (Mateo 22:37, 38) Yehova su organisacion djawe no ta manera e sacerdotenan malo den tempo di Malakias. E ta duna hopi guia biblico excelente cu ta yuda nos engrandece Yehova cu gradicimento door di cumpli cu su rekisitonan. Relaciona cu esaki tin un di cuater punto importante cu nos por saca for di Malakias capitulo 1.

Ta Amor Ta Motiva Adoracion Berdadero, No Golosidad

13. Kico e sacerdotenan tawata haci cu a mustra cu ta golosidad a motiva nan?

¹³ E sacerdotenan den tempo di Malakias tawata egoista, sin amor y golos pa placa. Con nos por sa? Malakias 1:10 [NW] ta bisa: “‘Ken tambe tin den boso cu lo cera e portanan? Y boso lo no sende mi altar—pornada. Mi no tin ningun deleite den boso’, Yehova di ehersitonan a bisa, ‘y mi no tin placer den e ofrenda di regalo di boso man.’” Si, e sacerdotenan golos pa placa ei a exigi pa hende paga nan pa cumpli cu e sirbishinan di tempel di mas simpel. Nan tawata kier cen pa cera porta y pa sende candela di altar! Nada straño cu Yehova no tawatin deleite den e ofrendanan di nan man!

14. Dicon nos por bisa cu ta amor ta motiva Testigonan di Yehova?

¹⁴ E golosidad y egoismo di e sacerdotenan pecado di Herusalem di antiguedad lo por haci nos corda cu, segun e Palabra di Dios, hende golos lo no hereda e Reino di Dios. (1 Corintionan 6:9, 10) Door di reflexiona riba e sistema egoista di e sacerdotenan ei, nos por haya mas aprecio pa e obra di predicacion mundial cu Testigonan di Yehova ta efectua. E ta un trabou boluntario. Nunca nos no ta cobra pa ningun parti di nos ministerio. No, nos no ta “cana haci negoshi cu e palabra di Dios.” (2 Corintionan 2:17) Mescos cu Pablo, cada un di nos por bisa cu tur frankesa: “Cu mucho gusto mi a declara e bon nobo di Dios na boso sin costo.” (2 Corintionan 11:7, NW) Tuma nota cu ta “cu mucho gusto [Pablo] a declara e bon nobo.” Esei ta mustra nos riba un di cinco punto cu Malakias capitulo 1 ta hala nos atencion na dje.

Sirbi Dios No Ta un Formalidad Ni un Peso

15, 16. (a) Ki actitud e sacerdotenan tawatin tocante ofrece sacrificio? (b) Con Testigonan di Yehova ta ofrece sacrificio?

¹⁵ E sacerdotenan sin fe den Herusalem di antiguedad a considera ofrecemento di sacrificio un formalidad fastioso. E tawata un peso pa nan. Manera Malakias 1:13 ta mustra, Dios a bisa nan: “Boso ta bisa: ‘Ai, esta un cansancio!’  Y boso ta trek cara cu desprecio.” Si, e sacerdotenan tawata desprecia e cosnan sagrado di Dios. Laga nos resa pidi pa nunca nos no bira manera nan. Mas bien, laga nos semper desplega e actitud cu ta bini padilanti den e palabranan na 1 Huan 5:3: “Esaki ta e amor di Dios, cu nos ta warda su mandamentonan; y su mandamentonan no ta pisa.”

¹⁶ Laga nos tin deleite den ofrece sacrificio spiritual na Dios, sin nunca mira nan como un peso of un cansancio. Laga nos haci manera e palabranan profetico aki ta bisa: “Bisa [Yehova]: ‘Pordona eror; y acepta loke ta bon, y nos lo ofrece en cambio e toronan hoben di nos lipnan.’” (Oseas 14:2, NW) E expresion “toronan hoben di nos lipnan” ta nifica sacrificio spiritual, e palabranan cu nos ta papia pa alaba Yehova y su proposito. Hebreonan 13:15 [NW] ta declara: “Mediante [Hesucristo], laga nos semper ofrece na Dios un sacrificio di alabansa, esta, e fruta di lipnan cu ta haci declaracion publico di su nomber.” Esta felis nos ta di sa cu nos sacrificionan spiritual no ta un simpel formalidad, sino muestranan sincero di nos amor pa Dios! Esaki ta hiba nos na e di seis punto cu nos por siña for di Malakias capitulo 1.

Cada Ken Tin Cu Rindi Cuenta

17, 18. (a) Dicon Yehova a maldiciona “esun cu ta actua cu astucia”? (b) Kico esnan cu a actua cu astucia no a tene cuenta cu ne?

¹⁷ Cada ken den tempo di Malakias tawata personalmente responsabel pa nan accionnan, y cu nos ta mescos. (Romanonan 14:12; Galationan 6:5) Pesei Malakias 1:14 ta bisa: “Maldiciona sea e ladron cu tin un chubato [sin defecto] den su tou di bestia chikito, y ta priminti esaki, ma ta sacrifica un bestia cu defecto na Señor.” Un tou no ta consisti di un bestia so, por ehempel un solo carne. Pesei, un hende cu tawatin un tou di bestia por a scohe cua bestia e ta sacrifica. E no tawatin nodi scohe uno ciego, lam of enfermo. Si el a scohe un bestia mancaron asina toch, esei lo a mustra cu el a desprecia Yehova su areglo di haci sacrificio, pasobra un homber cu tin un tou di bestia mester por a haya uno sin defecto!

¹⁸ Pesei, Yehova tawatin bon motibo pa E maldiciona un ladron [‘hende cu actua cu astucia’, NW] asina, cu tawatin un bestia drechi, ma a trece—of kisas asta lastra trece—un bestia ciego, lam of enfermo pa e sacerdote sacrifica. Y sinembargo, no tin ningun indicacion di cu sikiera un di e sacerdotenan a cita e lei di Dios pa mustra cu bestia mancaron no tawata aceptabel. (Levitico 22:17-20) Cualke hende rasonabel por a sa cu lo bai e malo si e purba pusha su gobernado cu un regalo asina. Pero ta cu Yehova mes nan tawata trata, cu e Soberano di Universo. E ta hopi, hopi mas halto cu cualkier gobernado humano. Malakias 1:14 ta expres’e asin’aki: “‘Ami ta un gran Rei’, e SEÑOR di ehersitonan ta bisa, ‘y e nacionnan tin temor di mi nomber.’”

19. Kico nos ta anhela, y kico nos lo mester ta haciendo?

¹⁹ Como sirbidonan leal di Dios, nos ta anhela e dia ora henter humanidad lo respeta Yehova, e Gran Rei. E ora ei “tera lo ta yen di e conocemento di SEÑOR, manera awa ta tapa lama.” (Isaias 11:9) Entre tanto, laga nos haci nos best pa cumpli cu Yehova su rekisitonan door di imita e salmista cu a bisa: “Lo mi engrandec’e cu gradicimento.” (Salmo 69:30) Cu esei na mente, Malakias tin mas conseho cu por yuda nos hopi. Pesei, laga nos presta bon atencion na e otro partinan di e buki di Malakias den e siguiente dos articulonan.

Bo Ta Corda?

• Pakico nos mester engrandece Yehova?

• Dicon e sacrificionan di e sacerdotenan den tempo di Malakias tawata inaceptabel pa Yehova?

• Con nos por ofrece un sacrificio di alabansa na Yehova?

• Kico mester ta e motivacion di adoracion berdadero?

[Preguntanan di Estudio]

[Plachi na pagina 9]

E profecia di Malakias a mustra riba nos tempo

[Plachi na pagina 10]

Esau no tawatin aprecio pa cos sagrado

[Plachi na pagina 11]

E sacerdotenan y e pueblo a ofrece sacrificionan inaceptabel

[Plachi na pagina 12]

Rond mundo, Testigonan di Yehova ta ofrece sacrificio di alabansa sin cobra nada