Incapasidad No Conoce Frontera

CHRISTIAN ta biba na un pais Africano. Soldanan a secuestr’e y a purba oblig’e drenta nan ehersito, pero el a nenga door cu esei ta bai contra su consenshi basa riba Bijbel. E soldanan a bai cu ne na un campo militar caminda nan a batie pa cuater dia largo, y despues un di nan a tir’e den un di su pianan. Christian a logra yega hospital, pero nan mester a amputa su pia bou di su rudia. Den un otro pais Africano, rebeldenan arma tawata kap man cu pia kita afo asta di mucha chikito. Y di Cambodia te na e region di Balkan, di Afganistan te Angola, mina di tera ta sigui manca hoben y bieu, sin haci distincion.

Accidente y enfermedad manera diabetes tambe ta causa incapasidad pa nan victimanan. Asta substancianan venenoso den medio ambiente por causa incapasidad. Por ehempel, den algun bario banda di otro na un ciudad na Oost Europa, varios mucha a nace cu un di nan brasanan incompleto. Tur loke nan tin ta un stompi bou di nan elleboog. Tin indicacion cu e muchanan aki a sufri daño genetico debi na contaminacion kimico. Y masha hopi otro hende cu si tin man cu pia, no por uza nan debi cu nan ta lam, of debi na otro tipo di incapasidad. Berdad, incapasidad no conoce frontera.

Sea cual sea e causa, un incapasidad por ta algo devastador. Junior a perde parti di su pia robes, di su rudia bai abou, tempo cu e tawatin 20 aña. Despues e ta conta: “Mi tawatin hopi problema emocional. Mi tawata yora cu lo mi no tin mi pia nunca mas. Mi no tawata sa kico pa haci. Mi tawata confundi.” Pero cu tempo Junior su actitud a cambia notablemente. El a cuminsa studia Bijbel, y a siña cos cu a yud’e enfrenta su situacion. Pero ademas nan a dun’e un speransa maravioso di un futuro felis aki riba tera mes. Si bo ta incapasita, abo tambe no kier tin e mesun speransa ei?

Si ta asina, sea asina bon di lesa e siguiente articulo. Nos ta recomenda bo pa busca e referencianan biblico den bo mes Bijbel pa bo por mira pa bo mes kico e Creador ta bai haci den futuro pa esnan cu siña tocante su proposito y pone nan bida na harmonia cu ne.