Ken Lo Sobrevivi e Dia di Yehova?

“E dia ta bin; e lo kima manera forno.”—MALAKIAS 4:1.

1. Con Malakias ta describi e fin di e mundo malbado aki?

DIOS a inspira profeta Malakias pa skirbi profecia tocante sucesonan impresionante cu lo tuma luga den futuro cercano. E sucesonan aki lo afecta delaster un hende riba tera. Malakias 4:1 ta profetisa: “‘Mira, e dia ta bin; e lo kima manera forno; y tur e hendenan arogante y cada hacido di maldad lo ta bagas; y e dia cu ta bin lo sende nan na candela’, e SEÑOR di ehersitonan ta bisa, ‘asina cu ni nan raiz ni nan rama lo no keda.’” Con total e destruccion di e mundo malbado aki lo ta? Lo ta manera ora un palo su raiznan kima di manera cu e no por bolbe crece nunca mas.

2. Con algun pasashi di Bijbel ta describi e dia di Yehova?

² Kisas lo bo puntra: ‘Di cua “dia” profeta Malakias ta profetisando?’ Ta e mesun dia cu Isaias 13:9 ta papia di dje. E ta bisa: “Mira, e dia di SEÑOR ta bin, cruel, cu furia y cu rabia ardiente, pa haci e tera un desolacion; y e lo caba cu e pecadonan cu tin den dje.” Sofonias 1:15 ta describie asin’aki: “E dia ei ta un dia di furia, un dia di problema y angustia, un dia di destruccion y desolacion, un dia di scuridad y tiniebla, un dia di nubia y scuridad profundo.”

“E Gran Tribulacion”

3. Kico ‘e dia di Yehova’ ta?

³ Den e cumplimento mayor di e profecia di Malakias, ‘e dia di Yehova’ lo ta un tempo di “gran tribulacion.” Hesus a profetisa: “E ora ei lo tin un gran tribulacion, manera nunca tawatin for di principio di mundo te aworaki, y cu lo no tin nunca mas tampoco.” (Mateo 24:21) Pensa cuanto afliccion mundo a yega di conoce caba, specialmente for di  aña 1914 padilanti. (Mateo 24:7-12) Imagina bo: Segunda Guera Mundial so a caba cu 50 miyon bida! Toch, e cosnan ei no ta nada na comparacion cu e calamidadnan cu e “gran tribulacion” lo trece cu ne. E suceso ei, cu ta ser yama tambe e dia di Yehova, lo termina na Armagedon, y trece un fin na e ultimo dianan di e sistema mundial malbado aki.—2 Timoteo 3:1-5, 13; Revelacion 7:14; 16:14, 16.

4. Ora e dia di Yehova termina, kico lo a tuma luga?

⁴ Ora e dia di Yehova ei termina, Satanas su mundo y esnan cu ta apoy’e lo a ser destrui completamente. Religion falso ta e prome cu lo disparce. Despues Yehova lo ehecuta su decision hudicial contra Satanas su sistemanan economico y politico. (Revelacion 17:12-14; 19:17, 18) Ezekiel ta profetisa: “Nan lo tira nan plata riba caya, y nan oro lo bira un cos di horor. Nan plata y nan oro lo no por libra nan den e dia di e furia di SEÑOR.” (Ezekiel 7:19) Tocante e dia ei Sofonias 1:14 ta bisa: “E gran dia di SEÑOR ta cerca; e ta cerca y e ta bin masha lihe mes.” En bista di loke Bijbel ta bisa tocante e dia di Yehova, nos mester keda determina pa actua na harmonia cu Dios su rekisitonan husto.

5. Kico esnan cu ta teme Yehova su nomber lo experimenta?

⁵ Despues di profetisa kico e dia di Yehova lo haci cu e mundo di Satanas, Malakias 4:2 ta registra e siguiente declaracion di Yehova: “Pa boso cu ta teme mi nomber e solo di husticia lo sali cu curamento den su halanan; y boso lo sali y bula rond manera bishenan for di stal.” “E solo di husticia” ta Hesucristo. E ta e “lus di mundo” den sentido spiritual. (Huan 8:12) Hesus ta ilumina nos cu curacion. Prome tin curacion spiritual, cu nos ta experimenta awe caba. Despues, den e mundo nobo, curacion fisico completo lo tuma luga. Manera Yehova ta bisa, esnan cura lo “sali y bula rond manera bishenan for di stal”, felis cu nan a sali liber.

6. Ki celebracion di victoria Yehova su sirbidonan lo disfruta di dje?

⁶ Kico di esnan cu ignora Yehova su rekisitonan? Malakias 4:3 ta declara: “‘Boso [sirbidonan di Dios] lo trapa riba e malbadonan, pasobra nan lo ta shinishi bou di boso plant’i pia riba e dia cu mi ta prepara’, e SEÑOR di ehersitonan ta bisa.” Dios su adoradonan humano lo no yuda destrui e mundo di Satanas. Mas bien nan lo “trapa riba e malbadonan” den e sentido cu nan lo participa den e celebracion di victoria cu lo tuma luga despues di e dia di Yehova. Despues cu Dios a destrui e ehersito di Farao den Lama Cora, tawatin un celebracion grandi. (Exodo 15:1-21) Despues cu Satanas y su mundo disparce den e tribulacion grandi tambe lo tin un celebracion di victoria. Sobrevivientenan fiel di e dia di Yehova lo sclama: “Laga nos regosiha y sea contento den su salbacion.” (Isaias 25:9) Esta un gran goso lo tin ora Yehova vindica su soberania, esta, mustra cu ta E tin derecho di goberna, y haci mundo limpi pa hende por biba na pas riba dje!

Cristiandad Ta Imita Israel

7, 8. Describi e condicion spiritual di Israel den tempo di Malakias.

⁷ Esnan cu sirbi Yehova lo haya su fabor, pero esnan cu no sirbie no. Tempo cu Malakias a skirbi su buki tawata mescos. Na aña 537 prome cu Era Comun un resto di Israel a ser restaura despues di 70 aña di cautiverio na Babilonia. Sinembargo, durante e shen añanan cu a sigui, e nacion restaura ei a cuminsa drif bai den apostasia y maldad. Mayoria di nan tawata deshonra e nomber di Yehova, ignora su leinan husto, contamina su tempel door di trece bestia ciego, lam y enfermo como sacrificio, y diborcia nan esposa di hubentud.

⁸ Pa e motibo ei Yehova a bisa nan: “Lo mi hala cerca boso pa huicio; y lo mi ta lihe pa testifica contra e hacidonan di bruha, contra  e kibradonan di matrimonio, contra esnan cu ta hura falso y contra esnan cu ta defrauda e trahado den su sueldo, cu ta oprimi biuda y huerfano, y contra esnan cu ta nenga yudansa na stranhero, y cu no tin temor di mi, . . . pasobra ami, SEÑOR, no ta cambia.” (Malakias 3:5, 6) Toch Yehova a extende e invitacion aki na tur hende cu ta dispuesto di hala for di nan mal caminda: “Bolbe cerca Mi, y lo Mi bolbe cerca boso.”—Malakias 3:7.

9. Con e profecianan di Malakias a haya nan prome cumplimento?

⁹ E palabranan ei a cumpli tambe den prome siglo di nos Era Comun. Un resto di e Hudiunan a sirbi Yehova y a bira un “nacion” nobo di cristian ungi cu spirito, y cu tempo hende cu no ta Hudiu tambe a bin forma parti di e grupo aki. Sinembargo, gran mayoria di Israel carnal a rechasa Hesus. Pesei Hesus a bisa e nacion di Israel: “Mira, boso cas ta keda desola pa boso!” (Mateo 23:38; 1 Corintionan 16:22) Na aña 70 Era Comun un ‘dia cu a kima manera forno’ a bini riba Israel carnal, net manera Malakias 4:1 a profetisa. Herusalem y su tempel a ser destrui, y segun informenan, mas cu un miyon hende a muri di hamber, den luchanan pa poder, y door di atakenan di e ehersitonan Romano. Pero esnan cu a sirbi Yehova si a scapa e tribulacion ei.—Marco 13:14-20.

10. Den ki sentido e pueblo en general y e miembronan di clero ta imita Israel di prome siglo?

¹⁰ Humanidad, y principalmente cristiandad, ta imita e manera cu e nacion di Israel a actua den prome siglo. Lidernan di cristiandad y e pueblo en general ta prefera nan propio credonan religioso na luga di e berdadnan di Dios cu Hesus a siña hende. E miembronan di clero ta esnan cu tin mas falta. Nan ta nenga di uza e nomber di Yehova, y ta asta sac’e for di nan versionnan di Bijbel. Nan ta deshonra Yehova cu siñansanan cu no ta cuadra cu Bijbel, manera e doctrinanan pagano di fierno di candela, ‘santisima’ Trinidad, inmortalidad di alma y evolucion. Asina nan ta horta Yehova di e alabansa cu e merece, mescos cu e sacerdotenan den tempo di Malakias a haci.

11. Con religionnan di mundo a mustra ta ken nan ta sirbi di berdad?

¹¹ Na aña 1914, ora cu e ultimo dianan a cuminsa, e religionnan di e mundo aki a mustra bon cla ta ken nan ta sirbi di berdad, y den esaki, e religionnan cu ta pretende di ta  cristian tawata na cabes. Durante tur dos guera mundial nan a anima nan miembronan pa bai guera pa bringa pleitonan nacional, asta si nan mester a mata hende di nan mes religion. E Palabra di Dios ta mustra bon cla ta ken ta obedece Yehova y ken no: “Na esaki e yiunan di Dios y e yiunan di Diabel ta conoci: Esun cu no ta practica husticia no ta di Dios, ni esun cu no ta stima su ruman. Pasobra esaki ta e mensahe cu boso a tende for di principio, cu nos mester stima otro; no manera Cain, kende tawata di e malbado, y a mata su ruman.”—1 Huan 3:10-12.

Cumpli cu Profecia

12, 13. Cua profecianan a cumpli riba e sirbidonan di Dios den nos tempo?

¹² Ora Prome Guera Mundial a caba na 1918, Yehova su sirbidonan por a comprende cu Dios a condena cristiandad y tur sobra religion falso. For di e tempo ei padilanti a cuminsa proclama e siguiente yamada pa tur hende cu tin e actitud corecto: “Sali for di dje, mi pueblo, pa bo no participa den su picanan y pa bo no ricibi di su plaganan; pasobra su picanan a montona yega te na shelo, y Dios a corda su inikidadnan.” (Revelacion 18:4, 5) Esnan cu tawatin deseo di sirbi Yehova a cuminsa ser limpia di rastronan di religion falso, y nan a cuminsa predica e bon nobo di e Reino estableci rond mundo. Mester termina e obra aki prome cu e fin di e sistema di cosnan malbado aki yega.—Mateo 24:14.

¹³ Esaki mester a sosode pa cumpli cu e profecia na Malakias 4:5, caminda Yehova a declara: “Mira, mi ta bai manda profeta Elias cerca boso prome cu binida di e dia grandi y teribel di SEÑOR.” E profecia ei a cumpli pa di prome bes den e obra di Huan Bautista, kende Elias a prefigura. Huan a haci un trabou similar na esun di Elias ora el a batisa Hudiu cu a repenti di nan picanan contra e pacto di Lei. Mas importante ainda, Huan a sirbi pa anuncia yegada di e Mesias. Pero e obra di Huan tawata djis un prome cumplimento di e profecia di Malakias. Hesus a identifica Huan como e di dos Elias, pero el a indica cu ainda tawatin otro trabou di “Elias” cu mester a tuma luga den futuro.—Mateo 17:11, 12.

14. Ki trabou vital mester tuma luga prome cu e sistema aki caba?

¹⁴ Malakias a mustra cu e gran trabou di Elias aki lo ser haci prome cu “e dia grandi y teribel di SEÑOR.” E dia ei ta termina den e guera di e gran dia di Dios Todopoderoso na Armagedon, cu ta hopi cerca. Pues, prome cu e fin di e mundo malbado aki yega y e Reinado di Mil Aña di Dios su Reino celestial cuminsa, cu Hesucristo como Rei, un obra paresido na esun di Elias lo ser efectua. Manera e profecia ei ta bisa, prome cu Yehova destrui e sistema malbado aki, e grupo manera Elias den tempo moderno yen di entusiasmo ta haci e trabou di restaura adoracion berdadero, engrandece e nomber di Yehova, y siña hende manera carne e berdadnan di Bijbel. Nan ta haci esaki cu apoyo di miyones di otro cristian cu tin speransa di keda biba riba tera.

Yehova Ta Bendiciona Su Sirbidonan

15. Con Yehova ta corda riba su sirbidonan?

¹⁵ Yehova ta bendiciona esnan cu ta sirbie. Malakias 3:16 ta bisa: “E ora ei esnan cu a teme SEÑOR a papia cu otro, y SEÑOR a presta atencion y a tende esaki, y un buki di memoria a wordo skirbi su dilanti pa esnan cu ta teme SEÑOR y cu ta honra su nomber.” Cuminsando cu Abel, Dios ta skirbiendo den un buki, na moda di papia, nomber di esnan cu lo E corda ariba pa bida eterno. Yehova ta bisa nan: “Trece henter e diesmo den mangasina, pa por tin cuminda den mi cas, y pone mi na prueba awor den esaki”, e SEÑOR di ehersitonan ta bisa, “si Mi lo no habri pa boso e bentananan di shelo, y basha asina tanto bendicion, cu boso lo no tin suficiente luga pa conten’e.”—Malakias 3:10.

16, 17. Con Yehova a bendiciona su pueblo y e obra cu nan ta efectua?

 ¹⁶ Di berdad Yehova a bendiciona esnan cu ta sirbie. Den ki manera? Un manera ta cu el a laga nan comprende su proposito miho. (Proverbionan 4:18; Daniel 12:10) Un otro manera ta door di duna nan resultadonan impresionante den nan trabou di predica. Hopi hende sincero a uni cu nan den adoracion berdadero, y hunto nan tur ta forma e “multitud grandi . . . di tur nacion y tur tribu y pueblo y lenga” cu ta grita na bos halto: “Salbacion ta di nos Dios, kende ta sinta riba e trono, y di e Lamchi.” (Revelacion 7:9, 10) E profecia di e multitud grandi aki a cumpli na un manera grandioso, y awor tin mas cu seis miyon hende ta sirbi Yehova activamente den mas cu 93.000 congregacion rond mundo!

¹⁷ Tambe nos por mira Yehova su bendicion den e echo cu Testigonan di Yehova ta publica e literatura biblico mas plama di historia. Actualmente, 90 miyon ehemplar di E Toren di Vigilancia y Spierta! ta ser produci tur luna; E Toren di Vigilancia den 144 idioma, y Spierta! den 87. A distribui un total di 107 miyon ehemplar di e buki di estudio titula E berdad cu ta hiba na bida eterna, publica na 1968 den 117 idioma. A distribui mas cu 81 miyon ehemplar di Bo por biba pa semper den Paradijs riba tera, publica na 1982, den 131 idioma. Te cu awor, e buki Conocimentu cu Ta Hiba na Bida Eterno, publica na 1995, a alcansa 85 miyon ehemplar den 154 idioma. Ya caba a distribui 150 miyon ehemplar di e foyeto Kico Dios Ta Rekerí di Nos?, publica na 1996 den 244 idioma.

18. Dicon nos ta gosa di prosperidad spiritual apesar di e oposicion cu nos ta enfrenta?

¹⁸ E prosperidad spiritual aki ta existi apesar cu nos ta enfrentando oposicion di e mundo di Satanas den un forma mas severo y  mas largo cu nunca prome. Esei ta mustra cu loke Isaias 54:17 ta bisa ta berdad: “‘Ningun arma cu wordo forma contra bo lo no prospera; y tur lenga cu lanta contra bo den husgamento lo bo condena. Esaki ta e herencia di e sirbidonan di SEÑOR, y nan hustificacion ta bin for di Mi”, SEÑOR ta declara.” Yehova su sirbidonan tin e gran consuelo di sa cu e cumplimento mayor di Malakias 3:17 [NW] ta aplica na nan: “‘Sigur nan lo bira di Mi’, Yehova di ehersitonan a bisa, ‘riba e dia cu mi produci un propiedad special.’”

Sirbiendo Yehova cu Goso

19. Den ki sentido esnan cu ta sirbi Yehova ta claramente diferente for di esnan cu no ta sirbie?

¹⁹ E diferencia skerpi cu tin entre sirbidonan fiel di Yehova y hende den mundo di Satanas ta birando cada bes mas bisto segun cu tempo pasa. Malakias 3:18 a profetisa: “Boso lo distingui atrobe entre e husto y e malbado, entre un cu ta sirbi Dios y un cu no ta sirbie.” Un di e hopi diferencianan cu tin ta cu Yehova su sirbidonan ta sirbie yen di goso. Un motibo di nan goso ta e speransa maravioso cu nan tin. Nan tin tur confiansa den e palabranan aki di Yehova: “Mira, Mi ta crea shelonan nobo y un tera nobo; y e cosnan di antes lo no wordo recorda mas ni bin na memoria. Ma sea contento y regosiha pa semper den loke mi ta crea.”—Isaias 65:17, 18; Salmo 37:10, 11, 29; Revelacion 21:4, 5.

20. Dicon nos ta un pueblo gososo?

²⁰ Nos ta kere Yehova su promesa, cu su pueblo fiel lo sobrevivi su gran dia y drenta den un mundo nobo. (Sofonias 2:3; Revelacion 7:13, 14) Y maske kisas algun di nos por muri prome cu esei door di edad avansa, malesa of accidente, Yehova ta duna su palabra cu lo E resucita hende asina pa bida eterno. (Huan 5:28, 29; Tito 1:2) Pues, maske nos tur tin nos problemanan y retonan den bida, segun cu e dia di Yehova aki ta acercando, nos tin tur motibo pa ta e hendenan di mas gososo na mundo.

Con Lo Bo Contesta?

• Kico ta e dia di Yehova?

• Con religionnan di mundo ta imita Israel di antiguedad?

• Cua profecianan ta cumpli riba Yehova su sirbidonan?

• Con Yehova a bendiciona su pueblo?

[Preguntanan di Estudio]

[Plachi na pagina 21]

Herusalem di prome siglo a “kima manera forno”

[Plachi na pagina 23]

Yehova ta percura pa esnan cu ta sirbie

[Plachi na pagina 24]

Door cu Yehova su sirbidonan tin un speransa maravioso, nan ta hende berdaderamente gososo