Storia di Bida

Nos A Implanta Amor pa Yehova den Curason di Nos Yiunan

SEGUN E RELATO DI WERNER MATZEN

Algun aña pasa mi yiu homber mayo, Hans Werner, a duna mi un Bijbel. Parti paden di e kaft, el skirbi: “Kerido Tata, mi deseo ta pa Yehova su Palabra sigui guia nos como un famia riba e caminda di bida. Bo yiu homber mayo cu ta masha agradecido.” Cualkier mayor lo por comprende cu cuanto gratitud y goso e palabranan aki a yena mi curason. Pero e tempo ei mi no tawata sa ainda ki clase di dificultadnan nos famia lo a hay’e ta enfrenta.

MI A nace na aña 1924 na Halstenbek, un 20 kilometer for di e haf di Alemania, Hamburg, y mi mama cu mi welo a cria mi. Door cu mi a traha como aprendis di trahado di instrumento, na 1942 nan a scohe mi pa bai den Wehrmacht, forsanan arma. Loke mi a experencia durante Segunda Guera Mundial ora mi tawata bringa na frontera Ruso ta asina horibel cu mi no por describie. Mi a haya e keintura di tyfus, pero despues cu mi a cura nan a bolbe manda mi na frontera. Na januari 1945 ora mi tawata na Lodz, Polonia, mi a keda seriamente herida y nan a manda mi un hospital militar. Mi tawata einan ainda ora guera a termina. Tempo mi tawata den hospital y tambe den e campo pa detenidonan na Neuengamme, mi a haya tempo pa medita. E preguntanan aki tawata molestia mi: Di berdad ta existi un Dios? Si E ta existi, dicon E ta permiti asina tanto crueldad?

Djis despues cu mi a sali for di campo pa detenidonan, na september 1947, mi a casa cu  Karla. Nos a crece den e mesun stad. Karla tawata catolico, ami si no a haya un educacion religioso. E pasto cu a casa nos a sugeri pa nos haci por lo menos e Oracion di Nos Tata hunto tur anochi. Nos a haci manera el a bisa, sin sa realmente ta kico nos tawata resa pidi p’e.

Un aña despues Hans Werner a nace. Durante e mesun tempo ei, un colega di trabou, Wilhelm Ahrens, a cera mi conoci cu Testigonan di Yehova. For di Bijbel el a mustra mi cu guera lo stop un dia. (Salmo 46:9) Durante herfst di aña 1950, mi a dedica mi bida na Yehova y a batisa. Mi tawata masha contento mes ora cu, un aña despues, mi kerida esposa tambe a batisa!

Lanta Yiunan den e Camindanan di Yehova

Mi a lesa den Bijbel cu ta Yehova a origina matrimonio. (Genesis 1:26-28; 2:22-24) E echo cu mi a presencia e nacemento di nos yiunan—Hans Werner, Karl-Heinz, Michael, Gabriele y Thomas—a fortalece mi determinacion pa ta un bon esposo y tata. Nacemento di cada un di nos yiunan a yena ami cu Karla cu hopi emocion.

E congreso na 1953 di Testigonan di Yehova na Nuremberg tawata un ocasion significativo pa nos famia. Riba diabierna atardi, durante e discurso “Lanta Yiunan den e Sociedad di Mundo Nobo”, e orado a bisa algo cu nunca mas nos a lubida: “E herencia mas grandi cu nos por duna nos yiunan ta e deseo di ta sirbido di Dios.” Ta net esei ami cu Karla kier a haci cu e yudansa di Yehova. Pero con?

Pa cuminsa, nos a tuma pa custumber pa haci oracion hunto como famia tur dia. Esaki a inculca den e muchanan e importancia di oracion. For di chikito tur nos yiunan a siña cu semper nos ta haci oracion prome cu come. Asta ora nan tawata baby, nan tawata baha nan cabes chikito y pone nan mannan delicado hunto ora nan mira e boter di lechi. Un biaha nos a haya invitacion pa un casamento di un famia di mi casa cu no ta Testigo. Despues di e ceremonia, mayornan di e bruid a invita e huespetnan na cas pa un cuminda leve. Tur hende kier a cuminsa come mesora. Pero nos yiu Karl-Heinz di cinco aña a haya cu esaki no ta bon. El a bisa: “Por fabor, haci oracion prome.” E bishitantenan a wak e, despues wak nos, y por ultimo nan a wak e anfitrion. Pa ningun hende no pasa berguensa mi a ofrece pa haci un oracion pa yama danki pa e cuminda, y e anfitrion a bai di acuerdo.

E episodio ei a laga mi corda e palabranan di Hesus: “For di boca di mucha chikito y di yiunan na pecho bo a prepara alabansa.” (Mateo  21:16) Nos tin sigur cu nos oracionnan regular y sincero a yuda nos yiunan mira Yehova como nan amoroso Tata celestial.

Nos Responsabilidad Dilanti Yehova

Pa siña yiunan stima Dios tambe mester lesa y studia su Palabra cu nan regularmente. Cu esaki na mente nos tawatin studio di famia tur siman, casi tur bes riba dialuna anochi. Door cu mi yiu homber mayo ta nuebe aña mas grandi cu esun mas chikito, e necesidadnan di e muchanan tawata varia, pues no ta tur bes nos por a trata e mesun informacion cu nan tur.

Por ehempel, pa e muchanan cu no tawata bai scol ainda nos tawata tene e sesionnan di instruccion simpel. Karla tawata trata djis un texto di Bijbel cu nan, of e tawata uza e plachinan den e publicacionnan basa riba Bijbel. Ainda mi tin grato recuerdonan di e manera cu e muchanan mas chikito tawata spierta nos mainta tempran ora nan tawata subi riba nos cama pa mustra nos nan plachinan faborito den e buki E Mundo Nobo. *

Karla a desaroya un don pa siña e muchanan cu pasenshi e varios motibonan cu nos tur tin pa stima Yehova. Esaki por zona simpel y facil. Pero en realidad, fisicamente y tambe emocionalmente, e trabou di instrui nos yiunan tawata un trabou full-time pa ami cu Karla. Toch, nos no a entrega. Nos kier a forma nan curason tierno prome cu otro hende cu no conoce Yehova cuminsa influencia nan. Ta pesei, asina cu nos yiunan por a sinta, nos tawata insisti pa nan ta presente na e studio di famia.

Como mayornan, ami cu Karla a reconoce cu ta importante pa nos pone e ehempel corecto pa nos yiunan den asunto di adoracion. Y sea cu nos tawata come, traha den hofi of keiro, nos a purba fortalece e relacion cu cada yiu tawatin cu Yehova. (Deuteronomio 6:6, 7) Nos a haci sigur pa for di chikito cada yiu tawatin su propio Bijbel. Ademas, cada bes cu nos a ricibi e revistanan, mi tawata skirbi nomber di cada miembro di famia riba nan ehemplar personal. Asina e muchanan a siña identifica nan propio literatura. Nos a bin riba e idea di asigna e muchanan cierto articulonan di Spierta! pa nan lesa. Despues di nos cuminda di diadomingo merdia, nan tawata splica kico nan a comprende for di e informacion.

Nos A Duna e Muchanan e Atencion Cu Nan Tawatin Mester

Ta claro cu cos no a bai facil tur ora. Segun cu e muchanan a crece, nos a descubri cu pa nos implanta amor den nan curason, nos mester a saca afo kico tawatin den nan curason caba. Esaki a nifica scucha nan. Tawatin bes cu nos yiunan a sinti cu nan mester a reclama cierto cosnan, pues ami cu Karla a sinta papia tocante e asuntonan aki cu nan. Pa esei nos a introduci un mei ora special na fin di e studio di famia. Tur miembro di famia por a expresa francamente loke e tawata sinti.

Por ehempel, Thomas cu Gabriele, nos dos yiunan mas chikito a haya cu como mayornan nos tawata faborece nan ruman homber mayo. Durante un sesion nan a expresa nan mes y a bisa: “Tata, nos ta haya cu Abo cu Mama semper ta laga Hans Werner haci loke e ke.” Na prome instante casi mi no por a kere mi horeanan. Sinembargo, despues cu nos a considera e asunto di un manera obhetivo, ami cu Karla mester a admiti cu e muchanan tawatin rason. Pesei, nos a bai haci mas esfuerso pa trata tur nos yiunan mescos.

A yega di sosode cu mi a castiga nos yiunan mucho lihe of inhustamente. Na e ocasionnan ei nos como mayor mester a siña pidi despensa. Despues di esei, nos tawata acerca Yehova den oracion. Tawata importante pa nos yiunan mira cu nan tata ta cla pa pidi Yehova y nan tambe despensa. Esaki a pone cu nos tawatin un relacion caloroso y amigabel cu nan. Hopi bes nan tawata bisa: “Boso ta nos miho amigonan.” Esaki a haci nos hopi contento.

 Traha hunto como famia ta promove unidad. Pesei, tur hende tawatin nan trabou di cas pa haci regularmente. Un bes pa siman Hans Werner tawatin e tarea di haci compras. Esaki ta nifica cu nos tawata dun’e un lista di loke e mester a cumpra y e placa. Tawatin un siman cu nos no a dun’e ni e lista ni cen. El a puntra su mama dicon, y Karla a bis’e cu ainda nos no tin ningun cen. Wel, e muchanan a cuminsa fluister nan cu nan, despues nan cada un a bai cohe nan sparpot y a basha e cennan riba mesa. Nan tur a grita: “Mama awor si nos por bai cumpra cos!” Si, e muchanan a siña duna un man durante emergencia, y esei a hala e famia asta mas cerca di otro.

Ora e mucha hombernan a bira mas grandi, nan a cuminsa interesa den mucha mohe. Thomas, por ehempel, tawata masha interesa den un compañera Testigo di 16 aña di edad. Mi a splic’e cu si ta intencion serio e tin cu e mucha mohe ei, e tin cu prepara su mes pa casa cu ne y acepta e responsabilidad cu un casa y yiu ta trece cu ne. Thomas a realisa cu e no ta cla pa casa, ya cu ta 18 aña so e tawatin.

Haciendo Progreso Como Famia

Tempo cu nos muchanan tawata hopi chikito ainda, un tras di otro nan a inscribi den e Scol di Ministerio Teocratico. Cu atencion nos tawata scucha nan partinan, y esakinan tawata anima nos pasobra nos tawata mira e gran amor cu e muchanan tawatin pa Dios. Superintendentenan di sircuito y di districto cu de bes en cuando tawata keda cerca nos, tawata conta nan experencianan personal of lesa for di Bijbel pa nos. E ruman hombernan aki y nan casa a yuda cultiva un amor pa e sirbishi full-time den curason di nos famia.

Nos tawata anhela pa bai nos congresonan. Nan tawata un factor clave den nos esfuersonan pa implanta e deseo pa ta sirbido di Dios den nos yiunan. Pa e muchanan, e ora pa pega nan badge prome cu nan bai e sitio di congreso tawata un momento special. Nos tawata masha emociona ora cu Hans Werner a batisa cu dies aña di edad. Varios hende a pensa cu e tawata mucho jong pa dedica su mes na Yehova, pero na edad di 50 aña el a bisa mi cu e ta masha gradicido cu e tin 40 aña ta sirbi Yehova.

Nos a mustra nos yiunan cu un relacion personal cu Yehova ta importante, pero nos no a pusha nan pa nan dedica nan mes. Sinembargo, nos a keda contento ora cu e otronan tambe a progresa y batisa ora nan a sinti cu nan tawata cla.

Nos A Siña Tira Nos Carga Riba Yehova

Nos a keda masha contento mes ora cu na 1971, Hans Werner a gradua como miembro di e di 51 klas di e Scol Biblico di Galad di Watchtower y a ser asigna pa sirbi como misionero na Spaña. Un pa un nos otro yiunan tambe a dedica algo di nan tempo como sirbidonan di tempo completo. Esaki a haci nos como mayor  masha felis. Ta rond di e tempo ei, Hans Werner a duna mi e Bijbel cu mi a menciona na principio di e articulo aki. A parce cu e felicidad di nos famia tawata completo.

Despues nos a ripara cu nos mester pega mas duro cu nunca na Yehova. Dicon? Pasobra nos a mira con algun di nos yiunan grandi caba a haya nan cu problemanan cu a pone nan fe na prueba severo. Por ehempel, nos yiu mohe stima Gabriele, a hay’e cu tribulacion. Na 1976 el a casa cu Lothar. Djis despues di casamento Lothar a bira malo. Segun cu e tawata bira mas y mas debil, Gabriele a cuid’e te dia cu el a muri. Mira un miembro di famia salu bira malo y muri a laga nos realisa cuanto nos mester di Yehova su man amoroso.—Isaias 33:2.

Privilegionan den e Organisacion di Yehova

Ora mi a ser nombra como sirbido di congregacion (awe superintendente presidente) na 1955, mi no a sinti cu mi tawata cla pa cumpli cu e responsabilidad ei. Tawatin asina hopi cos di haci cu e unico manera pa mi cumpli cu nan tur tawata door di lanta algun dia for di cuat’or di marduga. Mi casa y yiunan a copera bon cu mi, y nan a haci sigur pa nada no stroba mi e anochinan cu ainda mi tawatin trabou pa haci.

Apesar di esei, nos a pasa mas tanto tempo liber posibel hunto como famia. Tawatin bes cu mi doño di trabou a fia mi su auto pa mi por a sali cu mi famia. E muchanan tawata gusta ora nos studia E Toren di Vigilancia den cunucu. Tambe nos tawata cana keiro hunto, y tin bes segun cu nos tawata cana pasa den mondi, e famia ta canta y ami ta compaña nan cu mi sonfonia di boca.

Na 1978, mi a ser nombra como superintendente di sircuito (sirbido biahero) substituto. Mi a sinti cu esaki tawata demasiado pa mi y mi a resa: “Yehova, mi no ta sinti cu mi ta capas pa haci e trabou ei. Pero si abo kier pa mi purba, lo mi haci mi best.” Dos aña despues, na edad di 54 aña, mi a pasa mi negoshi chikito over pa Thomas, nos yiu homber mas chikito.

Door cu tur nos yiunan tawata grandi caba, ami cu Karla a haya oportunidad pa haci mas pa Yehova. E mesun aña ei mi a ser nombra como superintendente di sircuito, y nan a asigna mi na un parti di Hamburg y henter Schleswig-Holstein. Door di nos experencia den lanta famia, nos por a mustra comprendemento special pa mayornan y nan yiunan. Hopi ruman tawata yama nos nan mayornan di sircuito.

Despues cu Karla a compaña mi dies aña largo den e trabou di sircuito, e mester a haci un operacion. Y den e mesun aña ei, docternan a descubri cu mi tawatin un temor celebral. Pesei, mi a stop cu e trabou di superintendente di sircuito y a bai opera. A dura tres aña prome cu mi por a fungi atrobe como superintendente di sircuito substituto. Awor ami cu Karla ta den nos 70 y pico aña, y nos no ta den e trabou biahero mas. Yehova a yuda nos comprende cu no tawatin sentido pa sigui cu un privilegio cu mi no ta capas mas pa cumpli cu ne.

Mirando bek, ami cu Karla ta masha gradicido na Yehova cu El a yuda nos implanta amor pa e berdad den curason di nos yiunan. (Proverbionan 22:6) Atrabes di añanan, Yehova a guia nos, entrena nos y yuda nos cumpli cu nos responsabilidadnan. Aunke awor nos mes ta bieu y debil, nos amor pa Yehova si ta mes jong y bibo cu semper.—Romanonan 12:10, 11.

[Nota]

[Plachi na pagina 26]

Nos famia, canando na oriya di Riu Elbe, Hamburg, 1965

[Plachi na pagina 28]

Algun miembro di famia na e congreso internacional na Berlin na 1998

[Plachi na pagina 29]

Hunto cu Karla mi casa