Pregunta di Lector

Den cua parti di e tempel di Yehova e “multitud grandi” tawata ora Huan a mira nan ta rindi sirbishi sagrado den e tempel?—Revelacion 7:9-15.

Ta logico pa bisa cu e multitud grandi ta adora Yehova den un di e patio- of plenchinan terenal di su gran tempel spiritual. Pa ta spesifico, e plenchi cu ta coresponde cu esun parti pafo di e tempel di Salomon.

Anteriormente tawata reina e idea cu e multitud grandi ta den un tipo di plenchi spiritual cu e Plenchi pa Pagano cu a existi den tempo di Hesus a representa. Sinembargo, investigacionnan mas aleu a revela por lo menos cinco motibo pakico esei no ta e caso. Pa di prome, no ta tur e partinan di e tempel di Herodes a representa algo den Yehova su gran tempel spiritual. Por ehempel den e tempel di Herodes tawatin un Plenchi di Hende Mohe y un Plenchi di Israel. Tanto homber como mohe por a drenta e Plenchi di Hende Mohe, pero ta hende homber so por a drenta e Plenchi di Israel. Den e plenchinan terenal di Yehova su gran tempel spiritual, no tin separacion entre homber y mohe; tur ta adora Dios hunto. (Galationan 3:28, 29) Pues den e tempel spiritual no tin nada paresido na e Plenchi di Hende Mohe ni di e Plenchi di Israel.

Na di dos luga, ni e plannan arkitectonico cu Dios a percura pa e tempel di Salomon ni e tempel cu Ezekiel a mira den vision, no tawatin un Plenchi pa Pagano; esei no tawata e caso tampoco cu e tempel cu Zorobabel a reconstrui. Pesei, no tin ningun motibo pa conclui cu den e areglo di adoracion di Yehova su gran tempel spiritual mester tin un ekivalente pa e Plenchi pa Pagano. Specialmente si nos tene cuenta cu e siguiente punto, nos lo no pensa asina.

Di tres, e Edomita Rei Herodes a construi e Plenchi pa Pagano pa halsa su mes y pa e gana aprobacion di Roma. Herodes a cuminsa renoba e tempel di Zorobabel kisas na aña 18 of 17 prome cu Era Comun. The Anchor Bible Dictionary ta splica: “E antohonan clasico di poder imperial na West [Roma] . . . a exigi un tempel mas grandi na comparacion cu esnan den stadnan oriental.” Sinembargo, e midinan di e tempel mes tawata estableci caba. E diccionario ta splica: “Maske e Tempel mes lo mester a haya e mesun midinan cu esnan cu a existi prome cu ne [esun di Salomon y esun di Zorobabel], no tawatin restriccion pa e tamaño di e Sero di Tempel.” Pesei Herodes a expande e area di e tempel door di agrega loke den tempo moderno hende a yama e Plenchi pa Pagano. Un construccion cu tal antecedente lo tin cu representa algo den Yehova su areglo di tempel spiritual?

Di cuater, casi tur hende—hende ciego, lam y pagano incircuncida—por a drenta e Plenchi pa Pagano. (Mateo 21:14, 15) Ta berdad cu riba e plenchi ei hopi pagano incircuncida cu a desea esei por a haci ofrenda na Dios. Y tawata einan cu Hesus a yega di papia cu multitud di hende y dos bes el a saca e cambiadonan di placa y negoshantenan for di einan, bisando cu nan a deshonra e cas di su Tata. (Mateo 21:12, 13; Huan 2:14-16) No obstante, The Jewish Encyclopedia ta bisa: “Pa ta exacto, e plenchi parti pafo aki no tawata parti di e Tempel. Su flur no tawata sagrado, y ken cu ta por a drent’e.”

Di cinco, e palabra Griego (hi·e·rón) traduci como “tempel” cu ta ser uza pa referi na e Plenchi pa Pagano, “ta referi na henter e compleho di edificio y no spesificamente na e edificio  di e Tempel riba su mes”, segun A Handbook on the Gospel of Matthew, di Barclay M. Newman y Philip C. Stine. Na contraste cu hi·e·rón, e palabra Griego (na·ós) traduci como “tempel” den e vision cu Huan a mira di e multitud grandi ta mas spesifico. Den e contexto cu e tempel di Herusalem ta aparece, hopi bes e ta referi na e Santo di Santonan, e edificio di e tempel of e area caminda e tempel ta situa. Tin bes e ta ser traduci como “santuario.”—Mateo 27:5, 51; Lucas 1:9, 21; Huan 2:20.

Miembronan di e multitud grandi ta eherce fe den Hesus su sacrificio di rescate. Nan ta spiritualmente limpi door cu “nan a laba nan pañanan y a haci nan blanco den e sanger di e Lamchi.” Pesei nan ta ser declara husto cu e prospecto di bira amigo di Dios y sobrevivi e gran tribulacion. (Santiago 2:23, 25) Den varios sentido nan ta manera e proselitonan cu a somete nan mes na e pacto di Lei y a adora Dios hunto cu e Israelitanan.

Ta claro cu e proselitonan aki no a sirbi den e plenchi interior, caminda e sacerdotenan tawata cumpli cu nan responsabilidadnan. Y e miembronan di e multitud grandi no ta den e plenchi parti paden di Yehova su gran tempel spiritual. E plenchi aki di e tempel ta representa e condicion perfecto di yiunan husto cu e miembronan di e “sacerdocio santo” di Yehova ta disfruta di dje mientras nan ta riba tera. (1 Pedro 2:5) Pero, manera e anciano celestial a bisa Huan, e multitud grandi ta echt den e tempel y no pafo di e area di e tempel den un tipo di Plenchi Pagano. Esta un privilegio esaki ta! Y e privilegio aki ta enfatisa cu cada miembro di e multitud grandi mester keda spiritualmente y moralmente puro na tur momento!

[Diagram/Plachi na pagina 31]

(Pa texto den su formato completo, wak publicacion)

Tempel di Salomon

1. Edificio di e Tempel

2. Plenchi Paden

3. Plenchi Pafo

4. Trapi cu ta hiba na Plenchi di Tempel