“Bini Cerca Mi, . . . y Lo Mi Refresca Boso”

Aumento Fenomenal Ta Rekeri Expansion Rapido

“BINI cerca mi, . . . y lo mi refresca boso”, Hesucristo a bisa. (Mateo 11:28, NW) Ki un invitacion conmovedor e Cabes di e congregacion cristian ta extende! (Efesionan 5:23) Ora nos reflexiona riba e palabranan ei, nos no por keda sin aprecia un fuente importante di refrescamento: asociacion cu nos rumannan spiritual na reunionnan cristian. Siguramente nos ta di acuerdo cu e salmista cu a canta: “Mira, ki bon y ki dushi ta pa rumannan biba hunto den harmonia!”—Salmo 133:1.

Si, e personanan cu nos ta topa na e reunionnan pa adoracion ta e miho asociacion cu nos por tin, y e ambiente spiritual ta agradabel y sin riesgo. Cu bon motibo anto un hoben cristian a bisa: “Mi ta bai scol henter dia, y esei ta caba cu mi. Pero e reunionnan ta manera un oasis den desierto, caminda mi ta ser refresca pa por logra pasa e siguiente dia na scol.” Un hoben di Nigeria a bisa: “Mi a ripara cu asociacion cera cu otronan cu ta stima Yehova ta yuda mi keda cerca di Yehova.”

E Salon di Reino local di Testigonan di Yehova ta sirbi eficasmente como e centro pa adoracion berdadero den comunidad. Na mayoria parti ta tene e reunionnan na Salon di Reino por lo menos dos bes pa siman, y e personanan cu ta studia Bijbel cu e Testigonan ta ser anima pa cuminsa asisti mas pronto posibel ya asina nan por beneficia di e asociacion refrescante cu tin einan.—Hebreonan 10:24, 25.

 Un Necesidad Urgente

Sinembargo nos mester menciona cu no ta tur Testigo di Yehova ta disfruta di un Salon di Reino apropiado. Aumento fenomenal den e cantidad di proclamado di Reino rond mundo a crea un necesidad urgente. Ainda tin mester di miles di Salon di Reino, specialmente den paisnan den desaroyo.—Isaias 54:2; 60:22.

Un ehempel: Tawatin solamente dies Salon di Reino pa 290 congregacion den e capital di e Republica Democratico di Congo. E pais ei tin mester di hopi Salon di Reino urgentemente. Na Angola mayoria congregacion ta reuni hewon den aire liber pasobra nan tin un cantidad limita di Salon di Reino. Y den hopi pais mas tin mesun necesidad.

Pesei for di 1999 e rumannan a haci un esfuerso organisa pa yuda cu construccion di Salon di Reino den paisnan caminda tin poco recurso. Pa yuda cu e proyectonan di construccion den e paisnan ei, Testigonan experencia a ofrece nan servicionan boluntariamente. Ora combina e esfuerso aki cu e actitud dispuesto di e boluntarionan local cu ta haci nan mes disponibel, e resultadonan ta hopi animante. E Testigonan local na nan turno ta beneficia di e entrenamento cu nan ta haya. Tur esaki ta yuda cumpli cu e necesidad di construccion di Salon di Reino den nan respectivo paisnan.

Di e manera ei e estilo flexibel di construi Salon di Reino, cu ta haci uzo di metodonan y materialnan local, ta ricibi yudansa practico. E meta no ta pa solamente cumpli cu e tremendo necesidad cu tin pa Salon di Reino, sino tambe pa desaroya un programa di mantencion cu ta pas cu sircunstancianan local.—2 Corintionan 8:14, 15.

Desaroyonan Animante

Kico ta e resultado di e esfuersonan aki pa percura luganan di adoracion? Na principio di aña 2001, un raport for di Malawi a declara: “Loke a ser logra den e pais aki ta realmente impresionante. Den e siguiente dos lunanan, nos lo completa mas Salon di Reino.” (Potret 1 cu 2) Na Togo boluntarionan a logra construi varios Salon di Reino simpel den ultimo lunanan. (Potret 3) E excelente trabou di boluntarionan dispuesto tambe ta yuda percura Salonnan di Reino apropiado na Mexico, Brasil y otro pais.

Congregacionnan ta ripara cu ora construi un Salon di Reino, e hendenan local ta realisa cu Testigonan di Yehova t’ei pa keda. Hopi hende aparentemente no kier a asocia cu e Testigonan, sino te ora cu nan a haya un luga apropiado pa adoracion. Congregacion Nafisi na Malawi ta informa:  “Awor cu nos tin un Salon di Reino apropiado, e ta resultando den un bon testimonio. Pesei ta facil pa cuminsa studionan di Bijbel.”

Rumannan di Congregacion Krake na Benin a soporta hopi cherche den pasado pasobra e Salon di Reino cu nan tawatin prome tawata hopi primitivo compara cu algun iglesia. (Potret 4) Awor e congregacion tin un bunita Salon di Reino nobo cu ta representa adoracion berdadero na un manera simpel pero digno. (Potret 5) E congregacion aki tawatin 34 publicado di Reino cu un promedio di 73 persona presente na reunion riba diadomingo. Pero 651 persona a asisti na e dedicacion di e Salon di Reino. Mayoria di nan tawata hende di e stad cu a  haya un bon impresion ora nan a mira cu e Testigonan por a traha un salon den un tempo asina cortico. Reflexionando riba desaroyonan den pasado relaciona cu esaki, e sucursal di Zimbabwe a skirbi: “Denter di un luna cu traha un Salon di Reino nobo, asistencia por lo general ta bira dobel.”—Potret 6 y 7.

Sin duda, e hopi Salonnan di Reino nobo ta yuda percura luga caminda tanto cristiannan dedica como hende interesa por haya refrescamento spiritual. Un Testigo na Ucrania a bisa despues cu nan congregacion a cuminsa uza e Salon di Reino nobo: “Nos ta sinti un gran goso. Nos a mira cu nos propio wowo con Yehova ta yuda su pueblo.”

[Cuadro/Plachi na paginana 10, 11]

Sosten Generoso Ta Ser Aprecia

Testigonan di Yehova ta masha emociona pa mira e progreso rapido cu a ser haci pa cumpli cu e necesidad urgente cu tin rond mundo pa Salonnan di Reino. E aumento constante cu tin di e cantidad di adorado di Yehova den varios pais ta pone cu mester bai traha hopi Salon di Reino mas den futuro. Figura bo cu como promedio durante e aña di sirbishi 2001, tawata forma 32 congregacion nobo tur siman! E congregacionnan ei mester di luga pa reuni y adora.

Pero por surgi e pregunta: ‘Con nos ta financia proyectonan manera construccion di Salonnan di Reino nobo, specialmente den paisnan caminda e rumannan tin poco recurso financiero?’ E contesta ta: mediante sosten di Dios y tambe generosidad humano.

Yehova, di acuerdo cu su promesa, ta drama su spirito santo riba su sirbidonan, loke ta capacita nan ‘pa haci bon, pa ta rico den bon obra, pa ta generoso y dispuesto pa comparti.’ (1 Timoteo 6:18) Dios su spirito ta motiva Testigonan di Yehova pa sostene e trabou di predica e Reino den tur manera: dedicando nan tempo, energia, labor personal y otro recursonan na actividadnan cristian.

Un actitud di duna libremente ta loke ta motiva e Testigonan y otro hende cu ta yuda cu e expansion y cu ta contribui financieramente cu e trabou di construccion. Fuera di yuda cubri e gastonan regular di e congregacion local, nan ta duna contribucion pa e trabou di construccion den otro partinan di mundo.

Den cada congregacion tin cahanan cu etiket cu ta indica bon cla: “Contribucion pa e Obra Mundial—Mateo 24:14.” Eiden hende por depocita donacionnan boluntario si nan ta desea. (2 Reinan 12:9) Ta aprecia tur donacion, grandi y chikito. (Marco 12:42-44) Ta uza e fondonan aki den varios manera segun e necesidad, entre otro, pa construccion di Salonnan di Reino. No ta uza e placanan ei pa paga salario di administradonan, pasobra Testigonan di Yehova no tin esei.

E contribucionnan financiero na e obra mundial ta cumpli cu nan proposito? Sigur cu si. E sucursal na Liberia—un pais destrosa pa guera civil—ta informa cu mayoria Testigo local ta confronta desempleo y problemanan financiero serio. Con e pueblo di Yehova den e pais aki lo por haya luganan apropiado pa adoracion? E sucursal ta bisa: “Lo uza e contribucion generoso di e rumannan di otro pais pa financia e trabou. Ki un areglo sabi y amoroso!”

E rumannan local tambe ta contribui, apesar di nan recursonan limita. E pais Africano Sierra Leone ta informa: “E rumannan local ta sostene e esfuerso y gustosamente ta contribui cu nan labor y cu loke nan por financieramente pa sostene e construccion di Salonnan di Reino.”

Na final di cuenta, e trabou di construccion aki ta trece alabansa na Yehova. E rumannan na Liberia ta bisa yen di entusiasmo: “Construccion di luganan apropiado pa adoracion rond e pais lo mustra e hendenan cu adoracion berdadero t’ei pa keda y lo dorna y duna dignidad na e gran nomber di nos Dios.”