Beneficia di Yehova Su Bondad Amoroso

“Ken ta sabi? Lag’e paga bon tino na e . . . misericordia [bondad amoroso, NW] di SEÑOR.”—SALMO 107:43.

1. Na ki ocasion e expresion “bondad amoroso” a ser uza pa prome bes den Bijbel, y cua ta e preguntanan relaciona cu e cualidad aki cu nos lo considera?

UN 4.000 aña pasa, Lot e subrino di Abraham a bisa di Yehova: “Bo a engrandece bo misericordia [bondad amoroso, NW].” (Genesis 19:19) Esaki ta e prome biaha cu e palabra Hebreo traduci como “bondad amoroso” ta aparece den Bijbel. Yacob, Noemi, David y otro sirbidonan di Dios tambe a papia tocante e cualidad aki di Yehova. (Genesis 32:10; Ruth 1:8; 2 Samuel 2:6) De echo, e expresion “bondad amoroso” ta aparece un 250 biaha den e Traduccion di Mundo Nobo di e Santo Scritura. Pero kico ta Yehova su bondad amoroso? Na ken El a mustr’e den pasado? Y con nos ta beneficia di dje awe?

2. Dicon e palabra Hebreo traduci como “bondad amoroso” ta asina dificil pa defini, y kico ta un traduccion alternativo y apropiado p’e?

² Den e Scritura, “bondad amoroso” ta traduccion di un palabra Hebreo cu ta asina rico na nificacion cu mayoria idioma no tin un solo palabra cu ta expresa tur su sentidonan exactamente. Pues, e palabranan manera “misericordia”, “cariño” y “fieldad”— cu Beibel Santu ta uza den e textonan menciona den e articulo aki y esun siguiente—y asta e palabra “amor” no ta defini completamente e alcanse di su nificacion. Sinembargo, e palabra “bondad amoroso” ta un traduccion mas completo cu ta yega mas cerca di e pleno nificacion di e palabra. Pesei e Traduccion di Mundo Nobo di e Santo Scritura apropiadamente ta duna “amor leal” como un traduccion alternativo di e palabra Hebreo traduci como “bondad amoroso.”—Exodo 15:13; Salmo 5:7; NW, nota na pia di pagina.

Distinto for di Amor y Lealtad

3. Con e palabra Hebreo traduci como bondad amoroso ta distinto for di amor?

³ Bondad amoroso, of amor leal, ta estrechamente conecta cu e cualidad di amor y lealtad. Pero toch, e ta distinto den maneranan importante. Considera con bondad amoroso ta distinto for di amor. Nos por mustra amor of stimacion na cos- y conceptonan. Bijbel ta papia di “stima placa” y “stima sabiduria.” (Eclesiastes 5:10; Proverbionan 29:3) Pero bo por mustra bondad amoroso na hende, no na conceptonan of cos sin bida. Por ehempel, Exodo 20:6 ta referi na hende ora e ta bisa cu Yehova ta “mustra misericordia [bondad amoroso, NW] na milnan.”

4. Con bondad amoroso ta distinto for di lealtad?

⁴ Tambe e palabra Hebreo traduci “bondad amoroso” tin un nificacion mas amplio cu e palabra “lealtad.” Den algun idioma, nan ta uza “lealtad” hopi bes pa indica e actitud cu un persona inferior mester mustra pa cu un superior. Pero manera un investigado a remarca, desde e punto di bista biblico, bondad amoroso “ta referi mayoria biaha na net lo contrario den e relacion: esun poderoso ta leal na esnan debil, inferior of den necesidad.” Pesei Rei David por a pidi Yehova: “Laga bo cara resplandece riba bo sirbido; salba mi den bo misericordia [bondad amoroso, NW].” (Salmo 31:16) David ta pidi Yehova (esun poderoso) pa demostra bondad amoroso,  of amor leal, na dje (esun den necesidad). Siendo cu esun den necesidad no tin autoridad riba esun poderoso, e bondad amoroso demostra den tal caso ta algo boluntario, no obliga.

5. (a) Ki caracteristicanan di Dios su bondad amoroso ta destaca den su Palabra? (b) Ki manifestacionnan di Yehova su bondad amoroso nos lo bai considera?

⁵ “Ken ta sabi?” e salmista a puntra. “Lag’e paga bon tino na e . . . misericordia [bondad amoroso, NW] di SEÑOR.” (Salmo 107:43) Yehova su bondad amoroso por resulta den liberacion y rescate. (Salmo 6:4; 119:88, 159) E ta un proteccion y un factor importante cu ta hiba na alivio di problema. (Salmo 31:16, 21; 40:11; 143:12) Debi na e cualidad aki ta posibel pa hende recupera di pica. (Salmo 25:7) Si nos repasa cierto relatonan biblico y tuma nota di otro textonan biblico, nos lo mira cu (1) Yehova ta expresa su bondad amoroso cu echonan spesifico y (2) su sirbidonan fiel ta experencia su bondad amoroso.

Rescate—Un Manifestacion di Bondad Amoroso

6, 7. (a) Con Yehova a engrandece su bondad amoroso den caso di Lot? (b) Na ki ocasion Lot a menciona Yehova su bondad amoroso?

⁶ Kisas e miho manera pa determina te con leu Yehova su bondad amoroso ta bai, ta door di analisa relatonan biblico cu tin di aber cu e cualidad aki. Na Genesis 14:1-16, nos ta lesa cu ehersitonan enemigo a captura Lot, subrino di Abraham. Pero Abraham a rescata  Lot. Lot su bida tawata na peliger atrobe ora Yehova a dicidi di destrui e stad malbado di Sodoma, caminda Lot cu su famia tawata biba.—Genesis 18:20-22; 19:12, 13.

⁷ Djis prome cu destruccion di Sodoma, e angelnan di Yehova a saca Lot cu su famia for di e stad. Na e ocasion ei, Lot a bisa: “Bo sirbido a haya gracia den bo bista y Bo a engrandece bo misericordia [bondad amoroso, NW] cu Bo a mustra na mi door di salba mi bida.” (Genesis 19:16, 19) Cu e palabranan aki Lot ta reconoce cu Yehova a mustra bondad amoroso excepcional door di rescat’e. Den e caso aki Dios a manifesta su bondad amoroso door di libra Lot y su famia y proteha nan bida.—2 Pedro 2:7.

Yehova Su Bondad Amoroso y Su Guia

8, 9. (a) Ki encargo e sirbido di Abraham a haya? (b) Dicon e sirbido a pidi Dios pa su bondad amoroso, y kico a sosode mientras e tawata haci oracion?

⁸ Na Genesis capitulo 24 nos ta lesa di un otro manifestacion dibino di bondad amoroso, of amor leal. E relato ta conta nos con Abraham a encarga su sirbido pa bai na e pais di Abraham su famianan pa busca un esposa pa su yiu homber Isaak. (Versiculo 2-4) E mision tawata dificil, pero el a sigura e sirbido cu e angel di Yehova lo gui’e. (Versiculo 7) Finalmente e sirbido a yega na un pos pafo di “e stad di Nacor” (cu ta sea Haran of un luga den bicindario) net ora cu e hende mohenan tawata bini pa saca awa. (Versiculo 10, 11) Ora el a mira e mohenan yega cerca, e tawata sa cu esaki tawata e momento crucial di su mision. Pero con lo e por a scohe e mohe corecto?

⁹ Conciente cu e tin mester di yudansa dibino, e sirbido di Abraham a resa: “O SEÑOR, e Dios di mi shon Abraham, pa fabor, duna mi exito awe, y mustra misericordia [bondad amoroso, NW] na mi shon Abraham.” (Versiculo 12) Con Yehova lo a manifesta su bondad amoroso? E sirbido a pidi Dios un señal spesifico pa e por a identifica e mucha mohe cu Dios a scohe. (Versiculo 13, 14) Un mucha mohe a haci precis manera el a pidi Yehova. Si, tawata como si fuera e mucha mohe a scucha e sirbido su oracion! (Versiculo 15-20) Babuca, e sirbido a “keda wak e sin bisa nada.” Pero ainda e mester a determina algun punto importante. E mohe bunita aki tawata famia di Abraham? Y e tawata soltero ainda? Pesei e sirbido a keda keto “pa sa si SEÑOR a haci su biahe exitoso si of no.”—Versiculo 16, 21.

10. Dicon Abraham su sirbido a conclui cu Yehova a manifesta bondad amoroso na su shon?

¹⁰ Djis despues e mucha mohe ta bisa cu e ta “yiu mohe di Betuel, yiu homber di Milca, cu el a haya pa Nacor [ruman homber di Abraham].” (Genesis 11:26; 24:24) E ora ei e sirbido a realisa cu Yehova a contesta su oracion. Su hemut a yena y el a buig abou y a bisa: “Bendiciona sea SEÑOR, e Dios di mi shon Abraham, kende no a kita su misericordia [bondad amoroso, NW] y su berdad for di mi shon; pa loke t’ami, ta SEÑOR a guia mi riba e caminda pa cas di mi shon su rumannan.” (Versiculo 27) Door di percura guia, Dios a mustra bondad amoroso na Abraham, shon di e sirbido.

Dios Su Bondad Amoroso Ta Trece Alivio y Proteccion

11, 12. (a) Durante ki pruebanan Yosef a experencia Yehova su bondad amoroso? (b) Con Yehova a manifesta bondad amoroso den e caso di Yosef?

¹¹ Awor, laga nos considera Genesis capitulo 39. E ta enfoca riba Yosef, bisanieto di Abraham cu nan a bende como catibo na Egipto. Apesar di esei, Yehova “tawata cu  Yosef.” (Versiculo 1, 2) Asta Yosef su doño Egipcio, Potifar, a conclui cu Yehova tawata cu Yosef. (Versiculo 3) Sinembargo, Yosef a hay’e cu un prueba severo. E esposa di Potifar a gaña cu Yosef a purba viol’e y Yosef a ser encarsela. (Versiculo 7-20) Den prizon nan “a lastima su pianan cu bui, y su nek nan a cera den hero.”—Genesis 40:15; Salmo 105:18.

¹² Kico a pasa durante e experencia sumamente dificil ei? “SEÑOR tawata cu Yosef y a mustr’e misericordia [bondad amoroso, NW].” (Versiculo 21a) Un echo spesifico di bondad amoroso a start un serie di suceso cu despues a laga Yosef haya alivio di e dificultadnan cu e tawata pasando aden. Yehova a laga Yosef haya “gracia den bista di e hefe di prizon.” (Versiculo 21b) Como resultado, e hefe a duna Yosef un puesto di responsabilidad. (Versiculo 22) Caba Yosef a topa un homber cu despues di tempo a papia cu Farao, e gobernante di Egipto, tocante Yosef. (Genesis 40:1-4, 9-15; 41:9-14) E rei na su turno a promove Yosef na e posicion di segundo gobernante di Egipto, loke a pone cu e por a haci un obra cu a salba bida di hende ora hamber a asota e tera di Egipto. (Genesis 41:37-55) Yosef su sufrimento a cuminsa ora e tawatin 17 aña di edad y a dura pa mas cu 12 aña! (Genesis 37:2, 4; 41:46) Pero atrabes di tur e añanan ei di angustia y sufrimento,  Yehova Dios a manifesta su bondad amoroso na Yosef door di proteh’e di calamidad extremo y door di spar su bida pa e desempeña un papel privilegia den e realisacion di Dios su proposito.

Dios Su Bondad Amoroso No Ta Faya Nunca

13. (a) Ki ehempelnan di Yehova su bondad amoroso nos ta haya na Salmo 136? (b) Kico bondad amoroso ta en realidad?

¹³ Bes tras bes Yehova a expresa su bondad amoroso na e Israelitanan como pueblo. Salmo 136 ta conta cu den su bondad amoroso El a libra nan (Versiculo 10-15), guia nan (Versiculo 16) y proteha nan. (Versiculo 17-20) Tambe Dios a manifesta su bondad amoroso na personanan individual. Un persona cu ta mustra bondad amoroso na su prohimo ta haci esei cu obranan boluntario cu tin e proposito di satisface un necesidad crucial. Un obra di referencia biblico ta bisa relaciona cu bondad amoroso: “Esei ta un obra cu ta proteha of contribui na e prosperidad di bida. Esei ta ora interveni na fabor di un persona cu ta sufriendo calamidad of angustia.” Un erudito ta describie como “amor traduci den echo.”

14, 15. Dicon nos por tin sigur cu Lot tawata un sirbido cu Dios a aproba?

¹⁴ E relatonan di Genesis cu nos a analisa ta mustra nos cu Yehova nunca ta keda sin mustra bondad amoroso na hende cu stim’e. Lot, Abraham y Yosef a biba bou di sircunstancianan distinto y a enfrenta pruebanan distinto. Nan tawata hende imperfecto, pero nan tawata sirbido cu Yehova a aproba, y nan tawatin mester di Dios su yudansa. Ta un consuelo pa sa cu nos amoroso Tata celestial ta mustra bondad amoroso na personanan asina.

¹⁵ Lot a tuma algun decision imprudente cu a hiba na sufrimento. (Genesis 13:12, 13; 14:11, 12) Pero tambe el a demostra cualidadnan digno di elogio. Ora dos angel di Dios a yega Sodoma, Lot a mustra hospitalidad na nan. (Genesis 19:1-3) Cu fe el a spierta su suegronan di e benidero destruccion di Sodoma. (Genesis 19:14) Na 2 Pedro 2:7-9 nos ta haya Dios su punto di bista di Lot. Nos ta lesa einan: “[Yehova] a rescata Lot, e homber husto, oprimi pa motibo di e conducta sensual di hombernan malbado, (pasobra pa motibo di loke el a mira y tende, e homber husto ei, bibando meimei di nan, a sinti su alma husto tormenta dia aden dia afo cu nan echonan malbado), anto Señor sa tambe con pa rescata e santonan for di tentacion.” Si, Lot tawata un homber husto, y e palabranan di e texto aki ta implica cu e tawata un persona deboto na Dios. Mescos cu Lot, nos ta disfruta di Dios su bondad amoroso ora nos ta participa den “conducta santo y deboto.”—2 Pedro 3:11, 12.

16. Cu ki palabranan di elogio Bijbel ta papia di Abraham y Yosef?

 ¹⁶ E relato na Genesis capitulo 24 ta demostra bon cla e bon relacion cu Abraham tawatin cu Yehova. E prome versiculo ta bisa cu Yehova “a bendiciona Abraham den tur cos. ” Abraham su sirbido a yama Yehova “e Dios di mi shon Abraham.” (Versiculo 12, 27) Y disipel Santiago ta bisa cu Abraham a ser “hustifica”, es decir declara husto, y “el a wordo yama e amigo di Dios.” (Santiago 2:21-23) Mescos ta conta pa Yosef. Genesis capitulo 39 ta enfatisa e relacion estrecho cu tawatin entre Yehova y Yosef. (Versiculo 2, 3, 21, 23) Ademas, disipel Esteban a bisa di Yosef: “Dios tawata cu ne.”—Echonan 7:9.

17. Kico nos por siña for di e ehempel di Lot, Abraham y Yosef?

¹⁷ E personanan cu nos a caba di considera y cu a experencia Dios su bondad amoroso, tawatin un bon relacion cu Yehova Dios y a sirbi su proposito den varios manera. Nan a enfrenta obstaculonan cu nan no por a supera riba nan mes. Loke tawata den wega tawata e bida di Lot, e continuacion di Abraham su desendencia y proteccion di e papel cu Yosef lo a hunga. Ta Yehova so por a satisface e necesidadnan di e hombernan deboto aki, y ta net esei El a haci door di interveni cu echonan di bondad amoroso. Pa nos experencia Yehova Dios su bondad amoroso pa semper, nos tambe mester tin un relacion personal estrecho cu ne, y nos tin cu sigui haci su boluntad.—Esdras 7:28; Salmo 18:50.

Dios Su Sirbidonan Ta Privilegia

18. Kico varios texto biblico ta indica tocante Yehova su bondad amoroso?

¹⁸ Yehova su bondad amoroso ‘a yena e tera’, y nos ta masha gradicido pa e cualidad aki di Dios! (Salmo 119:64) Di henter alma nos ta responde na e refrein di e salmista: “Laga nan duna gradicimento na SEÑOR pa su misericordia [bondad amoroso, NW], y pa su maraviyanan na e yiunan di hende!” (Salmo 107:8, 15, 21, 31) Nos ta contento cu Yehova ta mustra bondad amoroso na su sirbidonan cu E ta aproba, sea individualmente of como grupo. Den oracion, profeta Daniel a dirigi su mes na Yehova como “e Dios grandi y temibel, kende ta warda su aliansa y misericordia [bondad amoroso, NW] pa cu esnan cu ta stim’e y ta warda su mandamentonan.” (Daniel 9:4) Rei David a resa: “Laga bo misericordia [bondad amoroso, NW] continua pa esnan cu conoce Bo.” (Salmo 36:10) Esta gradicido nos ta cu Yehova ta manifesta bondad amoroso na su sirbidonan!—1 Reinan 8:23; 1 Cronicanan 17:13.

19. Cua ta e preguntanan cu nos lo trata den e siguiente articulo?

¹⁹ Di berdad nos ta privilegia como e pueblo di Yehova! Fuera di ta beneficia di e amor cu Dios a mustra na humanidad en general, nos ta disfruta di bendicionnan special cu ta resulta di nos Tata celestial su bondad amoroso of amor leal. (Huan 3:16) Specialmente den tempo di necesidad nos ta beneficia di e precioso cualidad aki di Yehova. (Salmo 36:7) Pero con nos por imita Yehova su bondad amoroso? Nos ta desplega e cualidad aki individualmente? Den e siguiente articulo nos lo trata e preguntanan aki y otro mas.

Bo Ta Corda?

• Kico ta un traduccion biblico alternativo pa “bondad amoroso”?

• Con bondad amoroso ta distinto for di amor y lealtad?

• Den ki maneranan Yehova a mustra bondad amoroso na Lot, Abraham, y Yosef?

• Ki siguransa e manifestacionnan di Yehova su bondad amoroso den pasado ta duna nos?

[Preguntanan di Estudio]

[Plachi na pagina 13]

Bo sa con Dios a mustra bondad amoroso na Lot?

[Plachi na pagina 15]

Yehova, den su bondad amoroso, a guia e sirbido di Abraham

[Plachi na pagina 16]

Yehova a mustra bondad amoroso door di proteha Yosef