Bo Ta Capta Kico Ta Dios Su Amor?

E HOMBER Job a yega di describi e condicion di hende imperfecto cu e palabranan aki: “Hende cu a nace di mohe ta biba poco dia y ta yen di problema. Manera un flor e ta habri y ta marchita. Manera un sombra e ta hui bai y no ta permanece.” (Job 14:1, 2) Pa Job, e tempo ei bida tawata yen di angustia y sufrimento. Bo a yega di sinti bo asina?

Sinembargo, apesar di tur e dificultad y problemanan cu nos por haya nos confronta cu ne, nos tin un speransa solido cu ta basa riba Dios su compasion y amor. Pa cuminsa, nos misericordioso Tata celestial a percura e sacrificio di rescate pa salba humanidad for di nan condicion degrada y pecaminoso. Di acuerdo cu Huan 3:16 y 17, Hesucristo a declara: “Dios a stima mundo [di humanidad] asina tanto, cu el a duna su Yiu unigenito, pa ken cu kere den dje no bai perdi, ma tin bida eterno. Pasobra Dios no a manda e Yiu [Hesus] den mundo pa condena mundo, ma pa mundo wordo salba door di dje.”

Considera tambe Dios su actitud pa cu hende imperfecto. Apostel Pablo a declara: “Y for di un sanger [hende, NW] El a traha tur nacion di hende pa biba riba henter mundo, y El a fiha nan temponan stipula y e limitenan di nan luganan di biba, pa nan busca Dios, si di algun manera, fulando, nan por hay’e, maske E no ta leu di cada un di nos.” (Echonan 17:26, 27) Imagina bo! Maske nos ta hende imperfecto, toch nos por disfruta di un relacion personal cu nos amoroso Creador, Yehova Dios.

Pues, nos por enfrenta futuro cu confiansa, ya cu nos sa cu Dios ta interesa den nos y cu el a haci percuracion amoroso pa nos beneficio eterno. (1 Pedro 5:7; 2 Pedro 3:13) Pesei definitivamente, nos tin tur motibo pa siña mas tocante nos Dios amoroso via un studio di su Palabra, e Bijbel.