E Contradiccion di Tertuliano

‘UN CRISTIAN y un filosofo tin algo en comun? Tin similaridad entre un persona cu ta corumpi e berdad y esun cu ta restaura e berdad y siñ’e na otro hende? Ki acuerdo tin entre Scol cu Plato a funda y Iglesia?’ Tertuliano, un escritor di siglo 2 y 3 Era Comun, a tribi di lansa e preguntanan ei. El a bira famoso como “un di e personanan cu tawata sa hopi di e historia di Iglesia y di e doctrinanan cu iglesia tawata siña hende den su tempo.” Practicamente, no tawatin ningun aspecto di e bida religioso cu e no tawata sa di dje.

Kisas Tertuliano tawata mas conoci pa su declaracionnan cu tawatin un toke contradictorio, tal como: “Dios ta particularmente grandi, na e momento cu E ta chikito.” “Di tur manera hende mester kere den [e morto di e Yiu di Dios] pasobra e ta un cos absurdo.” “Cu nan a dera [Hesus] y lant’e atrobe ta un echo sigur, pasobra e ta imposibel.”

No ta Tertuliano su declaracionnan so ta parce contradictorio. Aunke e intencion di su scrituranan tawata pa defende e berdad y apoya integridad di e doctrinanan di iglesia, eigenlijk, loke el a haci ta corumpi siñansanan berdadero. Su aporte principal na cristiandad tawata un teoria riba cua escritornan despues di dje a basa e doctrina di Trinidad. Pa nos por comprende con esaki a tuma luga, laga nos tira un bista riba Tertuliano mes como persona.

“E No Sa Ta Laf”

Hende sa masha poco di Tertuliano su bida. Mayoria historiado ta di acuerdo cu el a nace rond di aña 160 Era Comun na Carthage, Nort Africa. Aparentemente e tawata un persona bon educa cu a conoce a fondo e scolnan principal di filosofia cu a existi den su tempo. Ta parce cu loke a atra’e na cristianismo ta e echo cu esnan cu a bisa cu nan ta cristian tawata dispuesto pa muri pa nan fe. Relaciona cu martirio cristian, el a puntra: “Ken ta mira esei sin sinti su mes impulsa pa puntra kico ta motiva hende pa comberti nan mes den martir? y ken, despues cu e caba di haci investigacion, no ta acepta nos doctrinanan?”

Despues cu Tertuliano a bira cristian pa nomber, el a bira un escritor creativo cu un don pa expresionnan cortico y skerpi. E buki The Fathers of the Church (Tatanan di Iglesia) ta remarca: “[E] tawatin un habilidad excepcional entre teologonan. E no sa ta laf.” Un erudito a bisa: “Tertuliano [tawatin] un don pa palabra y no pa frase. Su remarcanan skerpi ta mucho mas facil pa comprende cu su argumentonan. Kisas ta pesei, aunke hende ta cit’e hopi bes, masha poco nan ta uza su frasenan completo.”

Na Defensa di Cristianismo

E obra mas famoso di Tertuliano ta Apology (Defensa), un di e obranan di literatura mas eficas cu ta sali na defensa di cristianismo pa nomber. El a skirbie durante un periodo cu cristiannan tawata victima constante di multitudnan supersticioso. Tertuliano a sali na defensa di e cristiannan aki y a protesta contra e manera irasonabel cu nan tawata ser trata. El a  bisa: “[Oponentenan] ta considera cristiannan responsabel pa tur calamidad publico y tur mala suerte cu e pueblo hay’e cu ne. . . . Si Riu Nilo no crece subi tera y muha nan cunucunan, si e weer no cambia, si tin un temblor, un hamber of un plaga, mesora nan ta grita duro: ‘Tira e cristiannan pa leon!’”

Aunke hopi bes hende a acusa cristiannan di ta desleal na gobierno, Tertuliano a haci esfuerso pa mustra cu en realidad nan tawata e ciudadanonan mas confiabel den e region. Despues cu Tertuliano a hala atencion na varios intento pa tumba gobierno, el a recorda su opositornan cu e conspiradonan ta bini for di e cuna di paganonan y no for di e cristiannan. Tertuliano a indica cu ora nan a ehecuta e cristiannan, ta estado mes ta esun cu a sufri perdida.

Den otro obranan Tertuliano a papia di e bida cristian. Por ehempel, den su relato di On the Shows, Tertuliano a conseha pa no asisti na cierto luganan di entretenimento, deportenan pagano y eventonan teatral. Aparentemente, tawatin algun persona resien comberti cu no a haya cu ta un problema pa nan bini reunion pa ricibi instruccion di Bijbel y despues asisti na deportenan pagano. Pa stimula nan habilidad di pensa, Tertuliano a skirbi: “Sali for di iglesia di Dios y bai iglesia di Diabel ta algo horibel, ta como si fuera sali for di shelo bai den un chike di porco.” El a bisa: “Loke boso rechasa cu echo, no acepta cu palabra.”

Den Su Defensa di e Berdad E Ta Corumpie

Tertuliano ta cuminsa su tesis titula Against Praxeas, bisando: “Diabel a opone y resisti e berdad den varios manera. Tin bes el a haci esfuerso pa destrui e berdad door di defend’e.” No ta conoci ken precis ta e homber Praxeas, contra ken e tesis aki ta dirigi, pero Tertuliano a cuestiona su siñansanan relaciona cu Dios y Cristo. El a considera Praxeas como un marioneta di Satanas cu sutilmente ta purba corumpi cristianismo.

E tempo ei, e relacion entre Dios y Cristo tawata un cuestion crucial bou di e cristiannan pa nomber. Pa algun di nan, specialmente esnan cu antecedente Griego, tawata dificil pa acepta e idea di un Dios cu na mes momento ta hunga e papel di Hesus como Salbador y Redentor. Praxeas a purba soluciona nan problema door di siña nan cu Hesus tawata djis un manifestacion diferente di e Tata y cu no tawatin ningun diferencia entre e Tata y e Yiu. E teoria aki (conoci na otro idioma como modalismo) ta bisa cu Dios a revela su mes “como e Tata durante Creacion y ora di duna e Lei, como e Yiu den Hesucristo, y como e Spirito Santo despues cu Cristo a subi na shelo.”

Tertuliano a mustra cu e Scrituranan a haci un distincion cla entre e Tata y e Yiu. Despues cu el a cita 1 Corintionan 15:27, 28, el a rasona: “Esun cu a somete (tur cos) y Esun na ken nan a ser somete, mester ta dos Persona distinto.” Tertuliano a hala atencion na Hesus su propio  palabranan: “E Tata ta mas [grandi] cu mi.” (Huan 14:28) El a uza porcionnan for di e Scritura Hebreo manera Salmo 8:5 pa indica cu Bijbel ta mustra cu e Yiu ta “inferior.” Tertuliano a conclui: “Pues, door cu e Tata ta mas grandi cu e Yiu, e Tata y e Yiu ta dos persona distinto. Siendo cu Esun cu engendra ta un persona, y Esun cu ser engendra ta un otro; Esun cu ta manda tambe ta un persona, y Esun cu ser manda ta un otro; y un bes mas, Esun cu ta crea ta un persona, y Esun mediante ken e cos ta ser traha ta un otro persona.”

Tertuliano a considera e Yiu como inferior na e Tata. Sinembargo, den su afan pa contradeci modalismo, el a bai ‘mas aya di loke ta skirbi.’ (1 Corintionan 4:6) Segun cu Tertuliano eroneamente tawata purba proba cu Hesus ta un dios mediante un otro teoria, el a inventa e formula di “tres persona den un.” Uzando e concepto aki el a purba mustra cu Dios, e Yiu y e spirito santo tawata tres persona distinto cu ta existi den un ser dibino. Asina Tertuliano a bira e prome persona cu a aplica e version Latin pa e palabra “trinidad” na e Tata, e Yiu y spirito santo.

Tene Cuidou cu Filosofia Mundano

Con bin Tertuliano por a inventa e teoria di “tres persona den un”? E contesta ta sinta den un otro contradiccion tocante e persona aki: su punto di bista di filosofia. Tertuliano a yama filosofia “‘e doctrina’ di hende y ‘di demoño.’” Di un manera abierto el a critica uzo di filosofia pa apoya berdadnan cristian. El a declara: “Evita tur intento pa produci un mescla corumpi di cristianismo, stoicismo, platonismo y tecnicanan di Socrates.” Toch, Tertuliano mes a haci uzo amplio di filosofia mundano ora esaki tawata na harmonia cu su propio ideanan.—Colosencenan 2:8.

Un obra di referencia ta declara: “Pa desaroyo y expresion di e teologia di Trinidad, tawatin mester di e yudansa di concepto- y categorianan helenistico.” Y e buki The Theology of Tertullian (E Teoria di Tertuliano) ta remarca: “[E tawata] un mescla interesante di idea- y terminonan huridico y filosofico cu a permiti Tertuliano presenta e doctrina di Trinidad den un formula cu, apesar di su limitacion- y imperfeccionnan, a percura e base pa presenta e doctrina despues na e Consilio di Nicea.” Pesei e formula di Tertuliano—tres persona den un ser dibino—a hunga un papel importante den plama eror religioso den henter cristiandad.

Tertuliano a acusa otro hende cu nan ta destrui e berdad den nan intento pa defend’e. Sinembargo, ta un ironia cu e mes a cai den e trampa ei door di a mescla e berdad di Bijbel inspira pa Dios cu filosofia humano. Pesei, laga nos haci caso di e spiertamento di Bijbel pa no “paga atencion na spiritonan engañoso y doctrinanan di demoñonan.”—1 Timoteo 4:1.

[Plachi na paginanan 29, 30]

Tertuliano a critica filosofia pero a uz’e pa promove su propio ideanan

[Reconocemento]

Pagina 29 y 30: © Cliché Bibliothèque nationale de France, Paris

[Plachi na pagina 31]

Cristiannan berdadero ta evita di mescla berdad di Bijbel cu filosofia humano