Integridad Ta Guia Hende Recto

BIJBEL ta bisa: “Hende cu a nace di mohe ta biba poco dia y ta yen di problema.” (Job 14:1) Ta parce cu dolo y sufrimento ta cosnan comun di existencia humano. Si, asta un dia comun y coriente por ta yen di ansiedad y problema! Kico por logra guia nos den e sircunstancianan dificil aki y yuda nos mantene un posicion husto dilanti Dios?

Considera e ehempel di un homber rico cu yama Job y cu a biba rond di 3.500 aña pasa caminda awe ta Arabia. Esta un calamidad Satanas a trece riba e homber temeroso di Dios aki! El a perde tur su bestianan y su yiunan stima tambe a muri. Djis despues di esei, Satanas a dal Job cu blufein maligno for di cabes te pia. (Job, capitulo 1 y 2) Job no tawata sa dicon e cosnan malo aki tawata sosode cu ne. Toch “Job no a peca cu su lipnan.” (Job 2:10) El a bisa: “Te na mi morto lo mi no bandona mi integridad.” (Job 27:5) Si, Job su integridad a gui’e atrabes di su pruebanan.

Integridad ta ser defini como puresa moral, algo completo y cu ta encera ser sin mancha y falta den bista di Dios. Sinembargo, e no ta nifica cu e persona mester ta perfecto den su manera di papia of actua ya cu hende imperfecto no por cumpli completamente cu Dios su normanan. Mas bien, integridad cu hende por manifesta ta encera un debocion di curason y completo na Yehova y na su boluntad y proposito. Tal debocion na Dios ta guia hende recto bou di tur sircunstancia y tur ora. E prome parti di capitulo 11 di e buki biblico di Proverbionan ta mustra con nos integridad por guia nos den varios area di bida y ta sigura nos cu tin recompensa pa integridad. Pesei anto, laga nos presta bon atencion na loke tin skirbi den e versiculonan aki.

Integridad Ta Promove Honestidad Ora di Haci Negoshi

Rei Salomon di antiguo Israel no a uza terminonan legal, sino palabranan poetico pa enfatisa e principio di honestidad: “Un balansa engañoso ta abominacion pa SEÑOR, ma un peso husto ta su delicia.” (Proverbionan 11:1) Esaki ta e prome di e cuater biahanan cu e buki di Proverbionan ta uza balansa y peso pa indica cu Yehova ta desea pa su adoradonan ta hende honesto ora nan ta haci negoshi.—Proverbionan 16:11; 20:10, 23.

Rikesa di hende cu ta uza balansa engañoso—of deshonestidad—por ta un tentacion. Pero realmente nos lo kier bandona Dios su normanan di bon y malo door di participa  den practicanan corupto di negoshi? Esei lo no ta e caso si integridad ta guia nos. Nos ta evita di ser deshonesto pasobra Yehova tin goso den un piedra-pa-pisa completo, un peso exacto, cu ta nifica honestidad.

“Sabiduria Ta Cerca e Humildenan”

Rei Salomon ta sigui: “Ora cu orguyo [arogancia, NW] bin, deshonor tambe ta bin, ma sabiduria ta cerca e humildenan.” (Proverbionan 11:2) Sea cu arogancia ta manifesta su mes den forma di orguyo, desobediencia of envidia, e ta trece deshonor. Di otro banda, ta sabi pa nos humildemente reconoce nos limitacionnan. Tin ehempelnan biblico cu ta ilustra e berdad di e proverbio aki masha bon mes!

Un Levita envidioso cu yama Core a bira lider di un multitud rebelde cu tawata contra e autoridad di Yehova su sirbidonan nombra, Moises y Aron. Kico tawata e resultado di e acto arogante aki? ‘Tera a habri su boca y traga’ algun di e rebeldenan, mientras cu candela a caba cu otronan manera Core. (Numbernan 16:1-3, 16-35; 26:10; Deuteronomio 11:6) Esta un humiliacion! Corda tambe riba Uzah, kende a tribi di saca su man y wanta e arca di pacto pa evita cu esaki lo a cai. Mesora el a perde su bida. (2 Samuel 6:3-8) Ta masha importante pa nos evita arogancia!

Ni ora un persona humilde y modesto comete un eror, e no ta ser deshonra. Aunke Job tawata ehemplar den varios manera, e tawata imperfecto. Su pruebanan a revela un fayo serio den su manera di pensa. Ora Job tawata defende su mes contra esnan cu tawata acus’e, el a bira un poco desbalansa. Asta el a indica cu e tawata mas husto cu Dios. (Job 35:2, 3) Con Yehova a corigi Job su manera di pensa?

Yehova a dirigi atencion di Job na tera, lama, shelo yen di streya, algun animal y otro maraviyanan di creacion, pa E siñ’e cu hende no ta nada na comparacion cu e grandesa di Dios. (Job, capitulo 38-41) Ningun caminda cu Yehova a papia cu Job, E no a bis’e dicon e tawata sufriendo. E no tawatin nodi. Job tawata un homber modesto. Humildemente el a reconoce e diferencia grandi entre e cu Dios, entre su propio imperfeccion y debilidad cu Yehova su husticia y poder. El a bisa: “Mi ta hala mi palabranan atras, y ta repenti den stof y shinishi.” (Job 42:6) Door di Job su integridad, el a acepta e reprendemento mesora. Kico di nos? Nos integridad ta pone nos acepta reprendemento of coreccion di biaha ora esaki ta necesario?

Moises tambe tawata un homber humilde y modesto. Ora e tawata cansa su curpa pa resolve problema di otro hende, su suegro Yetro, a dun’e un solucion practico: delega cierto responsabilidadnan na otro hombernan cualifica. Moises a reconoce su propio limitacionnan, y como un persona sabi el a acepta e sugerencia. (Exodo 18:17-26; Numbernan 12:3) Un homber modesto no ta basila pa delega autoridad na otro hende, ni e no ta teme cu di un manera of otro lo e perde su autoridad si e comparti cierto responsabilidad cu otro hombernan cualifica. (Numbernan 11:16, 17, 26-29) En bes di esei, e ta ansioso pa  yuda nan progresa spiritualmente. (1 Timoteo 4:15) Esaki no mester ta e caso cu nos tambe?

‘E Caminda di Hende sin Culpa Ta Stret’

Reconociendo cu no ta semper integridad ta proteha hende recto for di peliger of calamidad, Salomon ta declara: “Integridad di e rectonan lo guia nan, ma perversidad di e traidonan lo destrui nan.” (Proverbionan 11:3) Integridad en berdad ta guia hende recto pa haci loke ta bon den bista di Dios, asta bou di sircunstancia dificil, y cu tempo e ta duna beneficio. Job a nenga di bandona su integridad, y Yehova a “bendiciona e ultimo dianan di Job mas cu e promenan.” (Job 42:12) Hende traicionero kisas ta pensa cu nan ta bai dilanti riba custia di otro hende y asta por parce cu nan ta prospera pa algun tempo. Pero tardi of tempran, nan propio engaño lo destrui nan.

Segun e rei sabi: “Rikesa no ta di probecho den e dia di rabia, ma husticia ta libra for di morto.” (Proverbionan 11:4) Ta un bobedad pa traha hopi duro pa logra haya cosnan material sin traha luga pa studio personal, oracion, asistencia na reunion y sirbishi di veld, net e actividadnan cu ta profundisa nos amor pa Dios y fortalece nos debocion na dje! No tin rikesa cu lo por scapa hende di e gran tribulacion cu ta na caminda. (Mateo 24:21) Ta hende recto so lo scapa debi na nan husticia. (Revelacion 7:9, 14) Pesei si nos ta sabi, nos ta tuma na pecho e apelacion cu Sofonias a haci: “Prome cu e dia di e rabia di SEÑOR bin riba boso. Busca SEÑOR, boso tur humildenan di tera cu a cumpli cu Su ordenansanan; busca husticia; busca humildad.” (Sofonias 2:2, 3) Mientras tanto, laga nos haci esfuerso pa ‘honra Yehova cu nos rikesa.’—Proverbionan 3:9.

Pa pone mas enfasis riba e balor di sigui tras di husticia, Salomon a mustra e contraste entre e resultado pa un hende sin culpa y e resultado pa e malbado, bisando: “Husticia di e hende perfecto [sin culpa, NW] lo dirigi su caminda, ma e malbado lo cai pa medio di su mes maldad. Husticia di e hendenan recto lo libra nan, ma e traidonan lo wordo atrapa den nan mes golosidad. Ora cu un hende malbado muri, su expectativa lo perece, y e speransa di hende inhusto ta perece. E husto ta wordo libra for di tribulacion, ma e malbado ta tuma su luga.” (Proverbionan 11:5-8) Un persona sin culpa nunca ta cai den su mes camindanan ni e no ta keda atrapa den su mes maneranan di anda. Su caminda ta stret. Finalmente, ta hende recto ta ser libra di afliccion. Aunke hende malbado por parce poderoso, nan no tin speransa di ser libera di afliccion.

“E Stad Ta Regosiha”

Tanto e integridad di hende recto como e maldad di e malbado tin influencia riba otro hende. E rei di Israel ta bisa: “Un hipocrita ta destrui su prohimo cu su boca, ma pa medio di sabiduria e husto lo wordo libra.” (Proverbionan 11:9) Ken por nenga cu calumnia, redo perhudicial, abla indecente y papiamento di co’i loco ta haci daño na otro hende? Di otro banda, e abla di un persona husto ta puro, bon pensa y cu consideracion. E ta ser salba door di conocemento pasobra su integridad ta duna e pruebanan necesario pa mustra cu esnan cu ta acus’e ta saca mentira.

E rei ta sigui: “Ora ta bai bon cu e husto, e stad ta regosiha; y ora cu e malbado perece tin grito di alegria.” (Proverbionan 11:10) Por lo general hende ta stima hende husto, y nan ta  haci nan prohimo regosiha, felis y gososo. Ningun hende no gusta hende “malbado.” Ora un malbado muri, por lo general hende no sa lamenta su morto. Y ora Yehova ‘corta e malbadonan kita for di tera, y ranca traidonan for di dje cu raiz cu tur’, sigur lo no tin tristesa. (Proverbionan 2:21, 22) Mas bien lo tin goso, pasobra nan no ta existi mas. Pero kico di nos? Ta bon pa nos pensa y wak si nos conducta ta contribui na goso di otro hende.

“E Stad Ta Wordo Halsa”

Mas aleu den su contraste entre e influencia cu e persona recto y e malbado tin riba un comunidad, Salomon ta declara: “Pa medio di e bendicion di e hendenan recto e stad ta wordo halsa, ma pa medio di boca di e malbado e ta keda trastorna.”—Proverbionan 11:11.

Hende den un stad cu ta sigui un proceder recto ta promove pas y bienestar y ta edifica otro hende den e comunidad. Asina e stad ta wordo halsa, y e ta prospera. Hende cu ta calumnia, papia cosnan dañino y robes, ta causa intrankilidad, infelicidad, desunion y problema. Esaki ta e caso specialmente si e personanan aki ta hendenan prominente. Un stad asina ta hay’e cu desorden, corupcion y deterioro moral y kisas economico.

E principio declara na Proverbionan 11:11 ta conta tambe pa e pueblo di Yehova cu ta asocia cu otro den congregacionnan manera stad. Un congregacion influencia pa hende spiritual—hende recto cu ta ser guia door di integridad—ta un grupo di hende felis, activo y coperativo cu ta duna honor na Dios. Yehova ta bendiciona e congregacion, y e ta prospera spiritualmente. Aki y aya bo por haya algun hende malcontento y insatisfecho, cu ta critica y cu ta indigna pa e manera cu cosnan ta bai. Nan ta manera “raiz di amargura” cu por plama y venena otronan cu inicialmente no tawata afecta. (Hebreonan 12:15) Hende asina hopi bes kier mas autoridad y prominencia. Nan ta plama rumor cu den e congregacion tin inhusticia, prehuicio etnico of cosnan por estilo, of cu e ancianonan ta manifesta e cualidadnan aki. Si, nan boca por causa division den e congregacion. Nos no mester nenga di scucha loke nan ta papia y haci esfuerso pa ta personanan spiritual cu ta contribui na pas y unidad den e congregacion?

Salomon ta sigui bisa: “Esun cu desprecia su prohimo ta falta huicio, ma un hende cu comprendemento ta keda keto. Esun cu ta cana haci redo ta saca secreto, ma esun cu ta di confia ta tapa e asunto.”—Proverbionan 11:12, 13.

Un persona cu no tin sano “huicio” por causa hopi daño! E ta sigui papia pa loco te ora e cuminsa gaña of difama otro hende. Ancianonan nombra mester ta lihe pa pone un fin na un influencia insaludabel asina. Distinto di un persona cu “ta falta huicio”, un persona cu discernimento sa ki ora pa keda keto. En bes di traiciona confiansa, e ta tene un asunto secreto. Sabiendo cu un lenga sin frena por causa hopi daño, un persona cu discernimento “ta di confia.” E ta leal na su compañeronan creyente y no ta divulga asuntonan confidencial cu lo por hinca nan den peliger. Esta un bendicion e wardadonan di integridad ei ta pa e congregacion!

Pa yuda nos cana den e caminda di hende recto, Yehova ta percura un abundancia di alimento spiritual prepara bou di direccion di  “e esclabo fiel y prudente.” (Mateo 24:45) Tambe nos ta ricibi hopi yudansa personal via ancianonan cristian den nos congregacionnan manera stad. (Efesionan 4:11-13) Nos ta hopi gradicido pa e esakinan, pasobra “caminda no tin guiansa, e pueblo ta cai, ma caminda tin hopi consehero tin victoria.” (Proverbionan 11:14) Sin importa loke por sosode, laga nos ta firmemente determina pa ‘cana den nos integridad.’—Salmo 26:1.

[Comentario na pagina 26]

Ta un bobedad pa traha duro pa alcansa cosnan material, pero neglisha actividadnan teocratico!

[Comentario na pagina 26]

Job su integridad a gui’e y Yehova a bendicion’e

[Plachi na pagina 25]

Uzah a muri pa motibo di su arogancia