Ken Dios Ta?

“DIOS ta e nomber comunmente duna na e fuente y poder mas grandi di universo y ta esun na ken hende ta dirigi debocion religioso”, segun The Encyclopedia Americana. E palabra “Dios” ta ser defini como e realidad supremo of di mas grandi. Kico ta e naturalesa di tal realidad impresionante?

Dios ta un forsa impersonal of un persona real? E tin nomber? E ta un dios cu ta consisti di tres persona, un Trinidad, manera hopi hende ta kere? Con nos por siña conoce Dios? Bijbel ta duna contestanan veridico y satisfactorio riba e preguntanan aki. De echo e ta anima nos pa busca Dios, bisando: “E no ta leu di cada un di nos.”—Echonan 17:27.

Un Forsa Impersonal of un Persona Real?

Hopi hende cu ta kere den Dios ta imagina nan cu E ta un forsa, no un persona. Por ehempel, den cierto culturanan hende ta asocia diosnan cu forsanan di naturalesa. Algun hende cu a analisa evidencia obteni via investigacion cientifico relaciona cu e structura di universo y e caracter fundamental di bida riba tera, a conclui cu mester tin un Prome Causa, es decir, algo cu a trece tur cos na existencia. Pero nan no ta mucho inclina na kere cu e Causa aki tin un personalidad.

Sinembargo, e echo cu creacion ta asina complica no ta indica cu e Prome Causa mester tawata hopi inteligente? Anto pa por tin inteligencia mester tin un mente. E gran mente responsabel pa tur creacion ta pertenece na e persona di Dios. Si, Dios tin un curpa, pero no un curpa fisico manera esun di nos, sino un curpa spiritual. Bijbel ta bisa: “Si tin un curpa natural, tin un curpa spiritual tambe.” (1 Corintionan 15:44) Splicando e naturalesa di Dios, Bijbel ta declara bon cla: “Dios ta Spirito.” (Huan 4:24) Un spirito tin un forma di bida cu ta hopi distinto for di esun di nos, y e ta invisibel pa bista di hende. (Huan 1:18) Tin tambe criaturanan spiritual invisibel. Nan ta angel, “e yiu hombernan di Dios.”—Job 1:6; 2:1.

Ya cu Dios ta un persona cu no a ser crea y e tin un curpa spiritual, ta logico cu E tin un luga di biba. Referiendo na e region caminda spirito ta biba, Bijbel ta bisa nos cu shelo ta Dios su “luga di biba.” (1 Reinan 8:43) Tambe,  e escritor di Bijbel Pablo ta declara: ‘Cristo a drenta den shelo mes pa aparece den e presencia di Dios pa nos.’—Hebreonan 9:24.

Bijbel ta uza e palabra “spirito” den un otro sentido tambe. E salmista a bisa Dios den oracion: “Bo ta manda bo spirito, nan ta wordo crea.” (Salmo 104:30) E spirito aki no ta Dios mes sino e forsa cu Dios ta manda, of uza, pa haci loke e ta desea. Mediante dje, Dios a crea e shelo literal, tera y tur otro cos bibo. (Genesis 1:2; Salmo 33:6) Su spirito ta ser yama spirito santo. Dios a uza su spirito santo pa inspira e hendenan cu a skirbi Bijbel. (2 Pedro 1:20, 21) Pues, spirito santo ta e forsa activo invisibel cu Dios ta uza pa cumpli cu su proposito.

Dios Tin un Nomber Unico

E escritor di Bijbel Agur a puntra: “Ken a recohe biento den su mokete? Ken a lora e awanan den su bisti? Ken a establece tur e finnan di tera? Con ta su nomber y nomber di su yiu?” (Proverbionan 30:4) Eigenlijk, Agur tawata puntra: ‘Bo conoce e nomber of famia di un persona cu a haci e cosnan aki?’ Ta Dios so tin e poder pa controla forsanan di naturalesa. Aunke creacion ta un prueba potente cu Dios ta existi, e no ta revela e nomber di Dios. De echo, nunca nos lo a sa e nomber di Dios a menos cu e mes a revel’e na nos. Y el a hacie. “Ami ta Yehova. Esei ta mi nomber”, e Creador a bisa.—Isaias 42:8, NW.

Dios su nomber unico, Yehova, ta aparece casi 7.000 biaha den e texto original di e Scritura Hebreo so. Hesucristo a haci e nomber ei conoci na otro hende y a alab’e nan dilanti. (Huan 17:6, 26) Bo ta haya e nomber ei den e ultimo buki di Bijbel como parti di e expresion “Aleluya”, cu ta nifica “alaba Yah.” Y “Yah” ta e forma abrevia di “Yehova.” (Revelacion 19:1-6) Sinembargo, hopi Bijbel moderno casi no sa uza e nomber ei. Mayoria bes nan ta uza e palabra “SEÑOR” of “DIOS”, skirbi tur na letter capital pa distinguie for di e titulonan comun “Señor” y “Dios.” Tin experto ta bisa cu kisas antes nan tawata pronuncia e nomber di Dios como Yahweh.

Pakico tin puntonan di bista asina distinto for di otro tocante e nomber di e Personahe  mas grandi di universo? E problema a cuminsa siglonan pasa ora cu e Hudiunan pa motibo di supersticion a stop di pronuncia e nomber di Dios. Anto ki ora cu nan a topa e nomber dibino ora nan tawata lesa e Scritura, nan tawata bisa na su luga e palabra Hebreo pa “Señor Soberano.” Como cu nan tawata skirbi Hebreo biblico sin vocal (klinker), ta imposibel pa sa precis con Moises, David y otro personanan di antiguedad a pronuncia e letternan cu ta forma e nomber di Dios. Sinembargo, ya pa siglonan hende ta uza e pronunciacion Yehova, y su ekivalente den otro idiomanan ta ampliamente acepta awe.—Exodo 3:14, Beibel na papiamentu koriente, nota na pia di pagina; Exodo 6:3; Isaias 26:4, Reina-Valera, revision di 1960.

Aunke hende no ta completamente sigur con tawata pronuncia e nomber di Dios den antiguo Hebreo, su nificacion si no ta desconoci. Su nomber ta nifica “E Ta Causa pa Bira.” Yehova Dios ta identifica su mes asina como Esun cu semper ta pone su propositonan y promesanan bira un realidad. Ta e Dios berdadero so, cu tin e poder pa haci esaki, tin derecho di carga e nomber ei.—Isaias 55:11.

No tin duda cu e nomber Yehova ta sirbi pa distingui Dios Todopoderoso for di tur otro dios. Ta pesei e nomber ei ta aparece asina tanto biaha den Bijbel. Maske hopi traduccion no ta uza e nomber di Dios, Salmo 83:18 ta bisa bon cla: “Abo so, kende su nomber ta [Yehova, NW], ta e Haltisimo riba henter tera.” Durante su ministerio, Hesucristo a siña su siguidonan: “Pues, haci oracion anto asin’aki: ‘Nos Tata cu ta den shelo, bo nomber sea santifica.’” (Mateo 6:9) Kiermen anto cu nos mester uza e nomber di Dios ora nos ta haci oracion, ta papia di dje y ta alab’e dilanti otro hende.

Hesus Ta Dios?

Yehova Dios mes ta indica bon cla ken su Yiu ta. E Evangelio di Mateo ta conta cu despues cu Hesus a batisa, tawatin “un bos for di e shelonan, bisando: ‘Esaki ta mi Yiu stima, den kende Mi tin goso.’” (Mateo 3:16, 17) Hesucristo ta e Yiu di Dios.

Sinembargo, algun hende religioso ta bisa cu Hesus ta Dios. Otronan ta bisa cu Dios ta un Trinidad. Segun e siñansa ei, “e Tata ta Dios, e Yiu ta Dios y e Spirito Santo ta Dios, sinembargo nan no ta tres Dios sino un solo Dios.” Supuestamente nan tres “ta mesun eterno y mesun igual.” (The Catholic Encyclopedia) E puntonan di bista ei ta corecto?

E Scritura inspira ta bisa di Yehova: “For di eternidad te na eternidad, abo ta Dios.” (Salmo 90:2) E ta “e Rei eterno”, sin principio sin final. (1 Timoteo 1:17) Di otro banda, Hesus ta “e primogenito di henter creacion”, “e principio di e creacion di Dios.” (Colosencenan 1:13-15; Revelacion 3:14) Referiendo na Dios como su Tata, Hesus a bisa: “E Tata ta mas cu mi.” (Huan 14:28) Tambe Hesus a splica cu tawatin algun cos cu ni e ni e angelnan no sa sino Dios so. (Marco 13:32) Ademas, Hesus a resa na su Tata, bisando: “[Laga] no mi boluntad, ma di bo sosode.” (Lucas 22:42) Na ken e tawata resa, si no tawata na un Personahe superior cu ne? Y ta Dios a resucita Hesus for di morto, no ta Hesus a resucita su mes.—Echonan 2:32.

Pues anto, segun Bijbel Yehova ta Dios Todopoderoso, y Hesus ta su Yiu. Nan dos no tawata pareu di otro prome cu Hesus a bini na tera ni durante Hesus su bida riba tera; ni Hesus no a bira pareu di su Tata despues cu el a ser resucita pa biba den shelo. (1 Corintionan 11:3; 15:28) Manera nos a mira caba, e asina yama tercer persona di e Trinidad—e spirito santo—no ta un persona. Mas bien, e ta e forsa cu Dios ta uza pa haci loke E ta desea. Pues Trinidad no ta un siñansa biblico. * Bijbel ta bisa: “SEÑOR ta nos Dios, SEÑOR ta un!”—Deuteronomio 6:4.

 Siña Conoce Dios Miho

Pa nos por stima Dios y dun’e e debocion exclusivo cu E merece, nos tin cu conoc’e manera E ta. Con nos por siña conoce Dios miho? Bijbel ta bisa: “Desde creacion di mundo su atributonan invisibel, su poder eterno y naturalesa dibino, a wordo mira claramente, siendo comprendi door di loke a wordo traha.” (Romanonan 1:20) Un manera pa siña conoce Dios miho ta door di observa loke El a crea y medita riba esei cu aprecio.

Pero creacion no ta conta nos tur loke nos tin cu sa tocante Dios. Por ehempel, pa compronde cu E ta un Persona real spiritual cu un nomber unico, nos tin cu wak den Bijbel. De echo, e miho manera pa siña conoce Dios miho ta door di studia Bijbel. Den e Scritura, Yehova ta conta nos hopi mas tocante e clase di Dios cu e ta. Tambe e ta revela su propositonan na nos y E ta educa nos den su camindanan. (Amos 3:7; 2 Timoteo 3:16, 17) Esta contento nos por ta cu Dios kier pa nos “yega na conocemento di e berdad”, ya asina nos por beneficia di su percuracionnan amoroso! (1 Timoteo 2:4) Pesei laga nos haci tur esfuerso pa siña tur loke nos por tocante Yehova.

[Nota]

[Plachi na pagina 5]

Dios a uza su spirito santo pa crea e tera y pa inspira hende pa skirbi Bijbel

[Plachi na pagina 5]

Un bos for di shelo a bisa: “Esaki ta mi Yiu”

[Plachi na pagina 7]

Hesus a resa na Dios, e Personahe cu ta superior na dje

[Plachi na pagina 7]

Hesus a haci Dios su nomber conoci na otro hende

[Plachi na pagina 7]

Nos por siña conoce Dios miho