Nos Mester Haya Sa Ken Dios Ta

UN SHELO yen di streya riba un anochi sin nubia no ta yena bo cu emocion? E fragancia di flornan colorido no ta algo hopi dushi? Bo no ta gusta scucha parha canta y tende e zonido di blachinan cu ta move door di un biento suave? Y esta fasinante bayena poderoso y otro criaturanan cu ta biba den lama ta! Anto no papia mes di hende. Nan tin facultad di consenshi y un celebro asombrosamente complica. Con bo ta splica e existencia di tur e cosnan maravioso cu tin rond di nos?

Tin hende ta kere cu tur esaki a bini na existencia pa puro casualidad. Pero si ta asina, dicon hende ta kere den Dios? Con bini un combinacion accidental di varios kimico a produci criaturanan cu un necesidad spiritual?

“Religion ta profundamente hancra den naturalesa humano y hende na tur nivel di status economico y di educacion ta practic’e.” E declaracion aki a resumi e investigacion cu Profeser Alister Hardy a presenta den su buki The Spiritual Nature of Man (E Naturalesa Spiritual di Hende). Experimentonan resien cu cientificonan di nervio a haci riba celebro ta duna nan e idea cu hende lo por ta geneticamente “programa” cu e capasidad pa practica religion. E buki titula Is God the Only Reality? (Dios Ta e Unico Realidad?) ta remarca: “E buskeda di proposito via religion . . . ta e experencia comun den tur cultura y tur epoca desde cu humanidad a aparece.”

Considera loke un homber educa a conclui un 2.000 aña pasa. El a skirbi: “Tur cas ta wordo traha door di un hende, ma esun cu a traha tur cos ta Dios.” (Hebreonan 3:4) De echo, e prome versiculo di Bijbel ta declara: “Na principio Dios a crea e shelonan y tera.”—Genesis 1:1.

Pero, ken Dios ta? Hende tin contestanan contradictorio riba e pregunta aki. Ora a puntra un teenager Hapones cu yama Yoshi ken Dios ta, el a contesta: “Mi no sa sigur. Mi ta un budista, y pa mi no tawata importante pa sa ken Dios ta.” Pero Yoshi ta admiti cu hopi hende ta considera Buda mes como un dios. Nick, un comerciante di 60 y pico aña, ta kere den Dios y e ta pensa cu Dios ta un forsa todopoderoso. Ora a pidi Nick splica loke e sa di Dios, el a contesta despues di un pausa largo: “Esei ta un pregunta masha dificil, mi amigo. Tur loke mi por bisa ta cu tin un Dios. E ta existi.”

 Tin hende ta “adora y sirbi loke ta crea na luga di e Creador.” (Romanonan 1:25, Beibel na papiamentu koriente) Miyones di hende ta adora antepasadonan morto, keriendo cu Dios ta mucho leu pa nan yega cerca dje. Den religion Hindu, tin hopi dios y diosa. Den tempo di e apostelnan di Hesucristo hende a adora varios dios, manera por ehempel Yupiter y Mercurio. (Echonan 14:11, 12) Hopi iglesia di cristiandad ta siña cu Dios ta un Trinidad, cu e ta consisti di Dios Tata, Dios Yiu y Dios Spirito Santo.

Pues ta manera Bijbel ta bisa, “tin hopi dios y hopi shon.” Sinembargo e ta agrega: “Toch pa nos tin un Dios so, e Tata, for di kende tur cos ta bin.” (1 Corintionan 8:5, 6) Si, tin un solo Dios berdadero. Pero ken e ta? Con e ta? Ta importante pa nos sa e contesta riba e preguntanan aki. Hesus mes a bisa den oracion na e Dios aki: “Esaki ta bida eterno, cu nan por conoce bo, e unico Dios berdadero, y Hesucristo, kende bo a manda.” (Huan 17:3) Tin base pa kere cu nos bienestar eterno ta depende di si nos conoce e berdad tocante Dios.

[Plachi na pagina 3]

Kico ta splica nan existencia?

[Reconocemento]

Bayena: Cortesia di Tourism Queensland

[Reconocemento pa Potret na pagina 2]

PORTADA: Index Stock Photography © 2002