Pregunta di Lector

Ta consehabel pa un cristian berdadero asisti na un entiero of casamento den misa?

Yehova no ta keda contento si nos participa den un of otro ceremonia di religion falso, pesei nos tin cu evita esei. (2 Corintionan 6:14-17; Revelacion 18:4) Un misa pa entiero ta un sirbishi religioso durante cua probablemente lo tin un predicashi cu ta promove ideanan antibiblico manera inmortalidad di alma y cu tur bon hende ta bai shelo. Esei por inclui tambe hacimento di crus y uni den oracion cu e pasto. Kisas durante un ceremonia religioso di casamento den misa of otro caminda, bo ta haya tambe oracion y otro actonan religioso cu no ta cuadra cu siñansa biblico. Podise ta bira dificil pa un cristian resisti e presion pa participa den un acto di religion falso ora e ta den un grupo caminda tur otro hende si ta participa. Ta ki un bobedad pa expone bo mes na un presion asina!

Kico si un cristian sintie obliga pa asisti na un ceremonia di entiero of casamento den misa? Por ehempel, un casa cu no ta creyente por haci un apelacion na su esposa cristian pa compañ’e bai un evento asina. E esposa por bai cu ne como djis un observado? E esposa por dicidi di cumpli cu deseo di su esposo y bai cu ne, cu e determinacion pa no participa den ningun ceremonia religioso. Di otro banda, e por dicidi di no bai, pensando cu e presion emocional cu e sircunstancia ta trece cu ne lo por ta demasiado p’e ya cu esaki por pon’e bai contra Dios su principionan. Ta e esposa tin cu dicidi. Definitivamente e tin cu dicidi di curason, manteniendo un consenshi limpi.—1 Timoteo 1:19.

En todo caso, lo cumbini e esposa si e splica su esposo cu su consenshi no ta permitie participa den ningun ceremonia religioso, ni canta, baha cabes ni participa di ningun manera ora nan ta haci oracion. E splicacion aki por pone e esposo conclui cu presencia di su casa lo por hinc’e den un situacion cu lo ta incomodo pa e esposo. Podise debi na su amor pa su esposa, respet pa su creencianan of pa e evita cualkier situacion bergonsoso, e ta dicidi di bai su so. Pero si e esposo insisti pa e esposa bai, kisas e por bai djis como un observado.

Tambe nos mester pensa ki efecto e echo cu nos ta asisti na un ceremonia den un edificio religioso lo por tin riba nos compañeronan creyente. Esaki lo por ofende consenshi di algun di nan? Esei lo por debilita nan determinacion pa no participa den idolatria? Apostel Pablo a spierta: “Ma tene cuidou pa e libertad aki di boso, di un manera of otro, no bira un piedra di trompica pa esnan cu ta debil.”—1 Corintionan 8:9-13.

Si ta trata di un evento relaciona cu un famia pega, lo por tin mas presion di parti di famianan. Den tur caso, un cristian mester evalua tur factor envolvi cuidadosamente. Bou di cierto sircunstancia lo e por conclui cu lo no tin ningun problema si e asisti na un ceremonia pa un entiero of casamento den misa como observado. Sinembargo, e sircunstancia por ta di tal indole cu ora e asisti, e daño cu lo e haci na su mes consenshi of na esun di otro hende ta mas grandi cu e posibel beneficionan cu e ta saca door di ta presente. Sea cual sea e situacion, e cristian tin cu haci sigur cu su decision no ta strob’e di tin un bon consenshi dilanti Dios y hende.