Algun Mito Tocante Morto Examina Mas Djacerca

PLAY

Algun Mito Tocante Morto Examina Mas Djacerca

DURANTE henter historia, hende a contempla morto yen di duda y miedo. Piyo ainda, hende a haya asta mas miedo di muri debi na creencia religioso falso, tradicion di pueblo y creencia personal profundo hancra. E problema di miedo di muri ta cu e por stroba bo di gosa di bida, y e por pone bo duda cu bida tin nificacion.

Religionnan grandi tin hopi falta den esaki, pasobra nan a promove yen di creencia di pueblo tocante morto. Examina un par di nan door di considera e berdad di Bijbel y wak si bo por haya mas claridad tocante bo manera di mira morto.

Mito 1: Ta normal pa bida caba den morto.

Segun e buki Death—The Final Stage of Growth (Morto: E Fase Final di Desaroyo), “morto . . . ta un parti integral di nos bida.” E tipo di comentarionan aki ta carga e idea di cu morto ta un cos normal, e manera natural pa tur cos bibo caba. E creencia aki a pone hopi hende adopta un filosofia nihilistico, esta, nan ta pensa cu bida no tin ningun sentido. Tambe, hopi hende ta purba haya loke nan kier sin precupa con nan ta afecta otro hende.

Pero di berdad ta normal pa bida caba den morto? No ta tur investigado cientifico ta pensa asina. Calvin Harley, por ehempel, ta un biologo cu ta studia con hende ta bira bieu, y den un entrevista el a bisa cu e no ta kere cu hende ta “programa pa muri.” William Clark, cu ta studia hende su sistema di inmunidad, a remarca lo siguiente: “Morto no ta un parti indespensabel di bida.” Y Seymour Benzer, di e Instituto Tecnologico di California ta pensa cu “morto no ta manera un holoshi sino mas bien un situacion cu nos por spera di cambia.”

Ora cientificonan studia con curpa di hende ta hinca den otro, nan ta keda babuca. Nan ta descubri cu nos a ricibi hopi mas tanto capasidad fisico y mental cu loke nos tin mester den nos 70 pa 80 añanan di bida. Por ehempel, cientificonan a descubri cu celebro humano tin un capasidad inmenso pa warda informacion. Un investigado a calcula cu nos celebro por warda informacion cu “lo yena rond di binti miyon buki, mes tanto cu e bibliotecanan di mas grandi na mundo.” Algun neurologo ta pensa cu un hende comun ta uza den su bida apenas 1/100 parti di un porshento (.0001) di loke su celebro por carga. Ta na su luga anto pa nos puntra: ‘Dicon nos tin un celebro cu asina tanto capasidad, si ta un pida chikito di dje so nos ta uza durante un bida di largura promedio?’

Ademas, ripara cuanto dificultad hende tin pa enfrenta morto! Pa mayoria hende, morto di nan casa of yiu por ta e experencia mas traumatico di nan bida. Hopi bes nan emocionnan ta keda completamente altera pa hopi tempo despues di morto di un ser keri. Asta hende cu ta pretende cu ta normal pa hende muri tin problema pa acepta cu ora nan mes muri tur cos a caba. E revista British Medical Journal ta bisa cu “mayoria experto ta sali for di e punto di bista cu tur hende kier biba mas tanto posibel.”

Ora nos tuma na cuenta e manera cu mayoria hende ta reacciona riba morto, e potencial asombroso cu nos tin pa siña y corda, y e anhelo interno cu nos tin pa biba pa semper, no ta bisto cu hende ta traha pa biba? Y ta asina mes. Dios a traha hende cu e posibilidad di sigui biba pa semper, y no pa morto bira e manera normal cu nan mester caba. Wak ki sorto di futuro Dios a ofrece e prome pareha humano: “Sea fructifero y multiplica, y yena e tera y haci esaki somete na bo; y goberna riba e piscanan di lama y riba e parhanan di shelo, y riba tur ser bibo cu ta move riba tera.” (Genesis 1:28) Si, un futuro maravioso y eterno!

Mito 2: Hende ta muri pa Dios tuma nan cerca dje.

Un mama di 27 aña cu tawata bai muri, lagando tres yiu atras, a bisa un soeur catolico: “No bin bisa mi cu ta Dios su boluntad. . . . Mi tin masha rabia ora hende bisa mi asina.” Toch, esei ta loke hopi religion ta siña hende tocante morto, esta, cu ta Dios ta tuma hende pa nan ta cerca dje.

E Creador ta asina sin heful cu E ta laga nos muri, sabiendo cuanto tristesa esei ta causa nos? No, e Dios cu Bijbel ta papia di dje no ta asina. Segun 1 Huan 4:8, “Dios ta amor.” Paga tino cu e no ta bisa cu Dios tin amor, ni cu Dios ta amoroso, sino cu Dios ta amor. E amor di Dios ta asina fuerte, asina puro, asina perfecto, y e ta un caracteristica asina dominante di su personalidad, cu ta na su luga pa bisa cu Dios ta e personificacion mes di amor. E Dios aki no ta laga hende muri pa nan ta cerca dje.

Religion falso a confundi hopi hende tocante e paradero y e situacion di hende morto. Nan ta papia di shelo, fierno, purgatorio, limbo, y yen di otro destinacion mas. Algun di nan ta dificil pa comprende. Otronan no ta haci nada menos cu yena bo cu teror. Bijbel, di otro banda, ta siña nos cu hende morto ta inconciente, den un situacion casi mescos cu ora un hende ta na soño. (Eclesiastes 9:5, 10; Huan 11:11-14) Pesei, nos no tin nodi precupa tocante kico ta pasa cu nos despues cu nos muri, mescos cu nos no ta precupa ora nos mira un hende den un soño profundo. Hesus a bisa cu lo yega un dia cu “tur cu ta den graf” lo “sali” pa biba di nobo den un paradijs riba tera.—Huan 5:28, 29; Lucas 23:43.

Mito 3: Dios ta tuma mucha chikito pa nan bira angel.

Elisabeth Kübler-Ross, kende a investiga casonan di hende malo pa muri, a menciona un otro idea cu hopi hende religioso tin. Papiando di un suceso real, el a bisa cu “no ta sabi pa bisa un mucha chikito cu a perde su ruman, cu ta Dios ta stima mucha chikito asina tanto cu el a tuma Johnny bai shelo cu ne.” Declaracionnan asina ta pone Dios den un lus negativo, y nan no ta refleha su personalidad ni su manera di actua. Dr. Kübler-Ross a sigui bisa: “E mucha mohe aki a crece sin cu nunca el a deshaci di e rabia cu el a sinti contra Dios, y esaki a hiba na depresion y trastorno emocional severo ora el a perde su propio yiu tres decada despues.”

Pakico Dios lo mester ranca un mucha bai cu ne pa E por tin un angel mas, como si fuera Dios tin mas mester di e mucha cu e mayornan mes? Si ta di berdad Dios ta bai cu mucha, esei lo no ta nifica cu E ta un Creador egoista y sin amor? Al contrario, Bijbel ta bisa: “Amor ta bin di Dios.” (1 Huan 4:7) Un Dios di amor lo pone un hende sufri un perdida na un manera cu ni sikiera un hende un tiki drechi lo acepta?

Wel, pakico mucha ta muri anto? Na Eclesiastes 9:11 nos ta haya parti di e contesta cu Bijbel ta duna: “Tempo y suerte [suceso inespera, NW] ta alcansa nan tur.” Y Salmo 51:5 ta bisa nos cu nos tur ta imperfecto, pecado, for di tempo cu nos a ser consebi. E resultado di esei pa tur hende awe ta morto, di un of otro forma. Tin bes cu morto ta ataca for di prome cu un criatura nace, loke ta bira un miskraam. Otro muchanan ta muri den sircunstancia tragico of debi na accidente. No ta Dios ta responsabel ora cos asina pasa.

Mito 4: Tin hende ta ser tormenta despues cu nan muri.

Hopi religion ta siña cu hende malbado ta bai den fierno di candela pa sufri tormento pa semper. E siñansa aki ta logico? E ta cuadra cu Bijbel? Hende su bida ta dura rond di 70 pa 80 aña. Asta si un hende ta culpabel di maldadnan serio durante henter su bida, tormento eterno por ta un castigo husto? No. Lo ta sumamente inhusto pa tormenta un hende pa semper pa e picanan cu el a comete durante su bida cortico.

Ta Dios so por revela kico ta pasa cu hende despues cu nan muri, y den su Palabra skirbi, Bijbel, el a revel’e tambe. Esaki ta loke Bijbel ta bisa: “Manera esun ta muri, e otro tambe ta muri; di berdad, nan tur tin e mesun rosea . . . Tur ta bai na e mesun luga. Tur a bin di stof y tur ta bolbe na stof.” (Eclesiastes 3:19, 20) Aki e no ta bisa nada di un fierno di candela. Ora hende muri, nan ta bai bek na stof. Nan ta stop di existi.

Un hende mester ta na tino pa e por sufri tormento. Hende morto ta na tino? Atrobe, Bijbel ta duna e contesta: “E bibonan sa cu nan lo muri, ma e mortonan no sa nada, ni nan no tin recompensa mas, pasobra ningun hende no ta corda mas riba nan.” (Eclesiastes 9:5) Hende morto no por sufri agonia ningun caminda. Ta simplemente imposibel, pasobra nan “no sa nada.”

Mito 5: Morto ta e fin permanente di nos existencia.

Ora nos muri nos ta stop di existi, pero esei no kiermen cu no por tin nada mas pa nos den futuro. Job e homber fiel tawata sa cu lo e bai den graf, na Hebreo Seol, ora e muri. Pero wak kico el a pidi Dios den oracion: “O cu bo lo a sconde mi den Seol, cu bo lo a sconde mi te ora bo furia pasa, cu bo lo a pone un limite pa mi y corda riba mi! Si un hende muri, lo e bolbe biba? . . . Abo lo yama, y ami lo contesta bo; lo bo anhela na e obra di bo mannan.”—Job 14:13-15.

Job tawata sa cu si e keda fiel te na morto, Dios lo corda riba dje un dia y resucit’e. Tur sirbido di Dios di antiguedad tawata kere esei. Hesus mes a confirma e speransa aki y a mustra cu Dios lo uza e mes pa lanta hende morto. Nos tin Hesus su propio palabranan como garantia: “E ora lo yega den cual tur cu ta den graf lo tende [Hesus] su bos, y lo sali; esnan cu a haci bon, pa un resureccion di bida, esnan cu a comete maldad, pa un resureccion di huicio.”—Huan 5:28, 29.

Pronto Dios ta bai kita tur maldad for di riba tera y establece un mundo nobo cu lo ser goberna for di shelo. (Salmo 37:10, 11; Daniel 2:44; Revelacion 16:14, 16) Como resultado di esei, henter mundo lo bira un paradijs, y ta hende cu ta sirbi Dios lo biba riba dje. Bijbel ta bisa: “Mi a tende un bos duro for di e trono, bisando: ‘Mira, e tabernakel di Dios ta meimei di hende, y e lo biba meimei di nan, y nan lo ta su pueblo, y Dios mes lo ta meimei di nan, y e lo seca tur lagrima kita for di nan wowo; y lo no tin morto mas; lo no tin lamento mas, ni yoramento, ni dolo; e prome cosnan a pasa.’”—Revelacion 21:3, 4.

Libertad for di Miedo

Ora nos conoce e speransa di resureccion, y tambe Esun cu ta haci resureccion posibel, esei por ta un consuelo. Hesus a priminti: “Boso lo conoce e berdad, y e berdad lo haci boso liber.” (Huan 8:32) Un di e cosnan cu nos ta libra di dje ta miedo di morto. Ta Yehova so por cambia e proceso di bira bieu y muri, pa duna nos bida eterno. Bo por confia den loke Dios priminti? Bo por, pasobra semper e Palabra di Dios ta cumpli. (Isaias 55:11) Nos ta anima bo masha pa bo siña mas tocante e proposito di Dios pa humanidad. Testigonan di Yehova lo keda hopi contento di yuda bo.

[Comentario na pagina 6]

E problema di miedo di muri ta cu e por stroba bo di gosa di bida

[Tabel na pagina 7]

ALGUN MITO COMUN TOCANTE MORTO KICO BIJBEL TA BISA?

● Ta normal pa bida caba Genesis 1:28; 2:17; Romanonan 5:12

den morto

● Hende ta muri pa Dios tuma Job 34:15; Salmo 37:11, 29; 115:16

nan cerca dje

● Dios ta tuma mucha chikito Salmo 51:5; 104:1, 4;

pa nan bira angel Hebreonan 1:7, 14

● Tin hende ta ser tormenta Salmo 146:4; Eclesiastes 9:5, 10;

despues cu nan muri Romanonan 6:23