Informe di Proclamadonan di Reino

El A Haya e Berdad na un Luga Cu E No A Verwacht

E BOLUNTAD di Dios ta pa “tur hende wordo salba y yega na conocemento di e berdad.” (1 Timoteo 2:3, 4) Pa logra esei, Testigonan di Yehova a imprimi y distribui miyones di Bijbel y publicacion pa studia Bijbel. E publicacionnan aki a yega di yuda hende honesto siña e berdad na maneranan di mas straño cu tin. Relaciona cu esaki, e proclamadonan di Reino na Freetown, Siera Leone, ta conta e siguiente experencia.

Osman tawata e di dos yiu homber di un famia di nuebe yiu. El a lanta den un famia religioso, y semper e tawata bai misa hunto cu su tata. Sinembargo, loke su religion ta siña tocante fierno a precupa Osman masha. E no por a comprende con un Dios misericordioso por tortura hende malbado door di kima nan den candela. Ningun di e splicacionnan cu Osman a haya pa yud’e comprende e doctrina di fierno di candela no a dun’e pas mental.

Un dia, tempo cu Osman tawatin 20 aña di edad, el a mira un buki blou casi scondi entre tur e romel cu tawatin den un co’i shushi. Door cu e ta gusta lesa, el coh’e, limpi’e y a mira cu e titulo ta: E berdad cu ta hiba na bida eterna. *

Osman a puntra su mes: ‘Cua berdad esaki ta?’ Osman a bira curioso, el a bai cas cu e buki y a les’e den un lesa. El a keda masha contento ora el a haya sa cu Dios tin un nomber personal: Yehova! (Salmo 83:18, NW) Tambe Osman a haya sa cu e cualidad dominante di Dios ta amor y cu e idea so di tormenta hende den un luga di candela ta algo repugnante pa Yehova. (Yeremias 32:35; 1 Huan 4:8) Finalmente Osman a lesa cu pronto Yehova lo haci e tera un paradijs caminda hende lo por biba pa semper. (Salmo 37:29; Revelacion 21:3, 4) Esakinan tawata berdadnan maravioso for di un Dios misericordioso y amoroso! Cu un curason yen di gratitud, Osman a yama Yehova danki pa e echo cu el a permitie haya e berdad na un luga cu e no a verwacht.

Un par di dia despues, cu yudansa di algun amigo, Osman a localisa e Salon di Reino di Testigonan di Yehova y a asisti na un reunion pa prome bes. Einan, el a pidi un Testigo pa studia Bijbel cu ne. Maske Osman su famia tawata masha contra, el a sigui progresa spiritualmente y a batisa. (Mateo 10:36) Awe e ta sirbi como anciano den e congregacion. Ta asombroso cu tur esaki a cuminsa ora el a haya un publicacion basa riba Bijbel, den co’i shushi!

[Nota]