Haya Placer den Yehova Su Husticia

“Esun cu aspira na husticia y lealtad ta haya bida, husticia y honor.”—PROVERBIONAN 21:21.

1. Ki comportacion di hende djawe a hiba na resultadonan desastroso?

“TIN un caminda cu ta parce bon den bista di hende, ma su fin ta e caminda di morto.” (Proverbionan 16:25) E proverbio di Bijbel aki ta un hopi bon descripcion di e manera cu hopi hende ta comporta nan mes awe. Mayoria hende ta interesa pa haci solamente loke ta bon den nan propio bista, y nan ta ignora asta e necesidadnan di mas basico di otro hende. (Proverbionan 21:2) Ta cu boca so nan ta honra lei- y normanan di nan pais. Ki ora cu nan haya un chens nan ta purba evadi nan. Pesei sociedad humano ta dividi, confundi y sin por mira un salida.—2 Timoteo 3:1-5.

2. Kico humanidad tin necesidad urgente di dje pa su mes bon?

² Pa nos mes bon, y pa henter e famia humano por tin pas y siguridad, ta urgente pa nos tin un lei of un norma husto cu tur hende ta dispuesto pa acepta y obedece. Claramente no tin un hende cu por bini cu un lei of norma pa yena e necesidad ei, ni maske con sabi of sinsero e hende ei ta. (Yeremias 10:23; Romanonan 3:10, 23) Si ta existi un norma asina, unda nos por hay’e, y ki sorto di norma e ta? Y kisas esaki ta un pregunta asta mas importante: Si e norma ei ta existi, lo bo acept’e y haya placer den dje?

Con pa Haya e Norma Husto

3. Ken ta esun mas capas pa duna nos un norma aceptabel y beneficioso pa tur hende, y dicon?

³ Pa nos por haya un norma cu ta aceptabel y beneficioso pa tur hende, nos lo tin cu acudi na un persona cu no ta mara na rasa, cultura ni division politico, y cu no ta ser limita door di debilidad y falta di vision di hende. Sin duda, e unico persona cu ta cualifica ta e Creador todopoderoso Yehova Dios, kende ta declara: “Mescos cu e shelonan ta mas halto  cu tera, asina mi camindanan ta mas halto cu boso camindanan, y mi pensamentonan mas halto cu boso pensamentonan.” (Isaias 55:9) Ademas, Bijbel ta describi Yehova como “un Dios di fieldad y sin inhusticia. Husto y recto E ta.” (Deuteronomio 32:4) Den henter Bijbel nos ta topa e expresion: “SEÑOR [Yehova, NW] ta husto.” (Exodo 9:27; 2 Cronicanan 12:6; Salmo 11:7; 129:4; Lamentacionnan 1:18; Revelacion 19:2 [NW, nota na pia di pagina]) Si, nos por acudi na Yehova pa haya e norma perfecto, ya cu E ta fiel, husto y recto.

4. Kico e palabra “husto” ta nifica?

⁴ E palabra “husto” no ta mucho popular awendia. De echo, e ta zona negativo y asta insultante den horea di mayoria hende, door cu pa nan e ta zona mescos cu bisa cu bo ta mas santo cu tur hende, of cu bo ta deboto na un manera hipocrita. Pero ora Bijbel ta papia di ser husto, e ta nifica simplemente ser recto, cu birtud, sin culpa, sin pica, na harmonia cu loke lei di Dios of normanan moral ta prescribi; actua na forma recto of husto. Abo lo no tin placer den un lei of un norma cu ta cuadra cu caracteristicanan asina excelente?

5. Describi e cualidad di husticia, manera e ta ser uza den Bijbel.

⁵ Encuanto e cualidad “husticia” Encyclopaedia Judaica ta comenta lo siguiente: “Husticia no ta un idea abstracto. Mas bien e ta consisti di haci loke ta husto y recto den tur bo tratonan.” Por ehempel, e husticia di Dios no ta djis un caracteristica personal interno di dje, manera su santidad y su puresa. Mas bien e ta consisti di e maneranan husto y recto cu E ta actua di acuerdo cu su personalidad. Lo bo por bisa cu, debi cu Yehova ta santo y puro, tur loke E haci y tur loke origina cu ne ta husto. Manera Bijbel ta bisa, Yehova “ta husto den tur su camindanan, y misericordioso den tur su obranan.”—Salmo 145:17.

6. Kico Pablo a bisa tocante cierto Hudiunan den su tempo cu no tawata creyente, y dicon?

⁶ Apostel Pablo a pone hopi enfasis riba e punto aki den su carta na e cristiannan na Roma. El a skirbi lo siguiente tocante cierto Hudiunan cu no tawata creyente: “Pasobra sin conoce e husticia di Dios, y buscando pa establece nan mes husticia, nan no a somete nan mes na e husticia di Dios.” (Romanonan 10:3) Pakico Pablo a bisa cu nan no “conoce e husticia di Dios”? Nan no a siña e Lei, e normanan husto di Dios? Si, nan a siñ’e. Pero mayoria di nan a mira husticia simplemente como un birtud personal cu nan por a obtene door di cumpli strictamente y diligentemente cu reglanan religioso, na luga di mir’e como un norma pa guia nan den e manera cu nan ta trata cu hende. Mescos cu e lidernan religioso den tempo di Hesus, nan a keda sin capta e berdadero nificacion di husticia y rectitud.—Mateo 23:23-28.

7. Con Yehova ta expresa su husticia?

⁷ Yehova su husticia ta totalmente diferente. E ta bini dilanti y ta claramente bisto den tur loke E ta haci. Maske cu door di su husticia E no por djis ignora pica cu hende a comete deliberadamente, toch E no ta un Dios friu y exigente cu hende mester tin miedo di dje of evita di acerca. Al contrario, den su husticia el a percura pa un medio pa asina humanidad por acerc’e y scapa for di e consecuencianan tristo di pica. Pesei, ta totalmente apropiado pa Yehova ser yama “un Dios husto y un Salbador.”—Isaias 45:21.

Husticia y Salbacion

8, 9. Den ki maneranan e Lei a expresa e husticia di Dios?

⁸ Pa nos por comprende bon ki relacion tin entre e husticia di Dios y su amoroso acto di salbacion, nos mester examina e Lei cu El a duna e nacion di Israel pa medio di Moises. E Lei tawata husto sin duda. Den Moises su palabranan di despedida el a recorda e Israelitanan di lo siguiente: “Ki gran nacion tin, cu  tin statuutnan y huicionan asina husto, manera henter e lei aki cu mi ta pone boso dilanti awe?” (Deuteronomio 4:8) Varios siglo despues, Rei David di Israel a declara: “E huicionan di SEÑOR ta berdadero, nan tur ta completamente husto.”—Salmo 19:9.

⁹ Pa medio di e Lei, Yehova a revela bon cla su normanan perfecto tocante kico ta bon y kico ta malo. E Lei a splica cu luho di detaye con e Israelitanan mester a comporta nan mes, y no den asuntonan religioso so, sino tambe den transaccionnan di negoshi, relacion matrimonial, custumber di come y di limpiesa, y di mes, den asuntonan hudicial. Tambe e Lei a indica castigo stricto pa esnan cu keda sin cumpli cu ne. Den algun caso, asta nan por a ricibi pena di morto. * Pero, e rekisitonan husto di Dios cu a bini padilanti den e Lei tawata un carga pisa y dificil pa e pueblo? El a kita nan libertad y goso, manera hopi hende djawe ta pretende?

10. Kico hende cu a stima Yehova a pensa tocante su leinan?

¹⁰ Esnan cu a stima Yehova tawatin hopi placer den su lei- y decretonan husto. Por ehempel, Rei David no solamente a reconoce cu Yehova su decisionnan hudicial ta husto y berdadero, manera nos a mira, pero tambe el a sinti un cariño y aprecio di curason pa nan. Esaki el a skirbi tocante e leinan y decisionnan hudicial di Yehova: “Nan ta mas deseabel cu oro, si, mas cu hopi oro fini; tambe mas dushi cu miel y gotanan di panal di miel. Ademas, pa medio di nan bo sirbido ta keda spierta; y obediencia na nan ta trece gran recompensa cu ne.”—Salmo 19:7, 10, 11.

11. Den ki sentido e Lei tawata un ‘tutor pa guia na Cristo’?

¹¹ Varios siglo despues, Pablo a mustra con e Lei tin un balor asta mas halto. Den su carta pa e cristiannan galadio el a skirbi: “Lei a bira nos tutor pa guia nos na Cristo, pa nos por wordo hustifica pa medio di fe.” (Galationan 3:24) Den tempo di Pablo, un tutor [yaya pa cuida mucha, Beibel na papiamentu koriente] tawata un sirbido of esclabo den un famia grandi. Su trabou tawata di proteha e muchanan y hiba nan scol. Mescos, e Lei a proteha e Israelitanan contra e custumbernan moral y religioso baho di e nacionnan rond di nan. (Deuteronomio 18:9-13; Galationan 3:23) Ademas e Lei a haci e Israelitanan conciente di nan estado di pica y di nan necesidad di pordon y salbacion. (Galationan 3:19) E areglo di sacrificio a mustra cu tawatin mester di un sacrificio di rescate, y el a pone un patronchi profetico via cua nan por a identifica e Mesias. (Hebreonan 10:1, 11, 12) Pues, maske Yehova a expresa su husticia pa medio di e Lei, El a hacie cu bienestar y salbacion eterno di e pueblo na mente.

Esnan Cu Dios Ta Considera Husto

12. Kico e Israelitanan por a ricibi si nan a paga bon tino pa cumpli cu e Lei?

¹² Ya cu e Lei cu Yehova a duna tawata  husto den tur sentido, door di obedec’e e Israelitanan lo por a haya un posicion husto den Dios su bista. Moises a recorda e Israelitanan esaki ora nan tawata cla pa drenta e Tera Priminti: “Lo ta husticia pa nos si nos percura di cumpli cu henter e mandamento aki dilanti di SEÑOR nos Dios, manera El a ordena nos.” (Deuteronomio 6:25) Ademas Yehova a priminti: “Warda mi statuutnan y mi ordenansanan, pa medio di cual un hende lo biba si e haci nan; ami ta SEÑOR.”—Levitico 18:5; Romanonan 10:5.

13. Tawata inhusto di parti di Yehova pa rekeri pa su pueblo tene nan mes na e Lei husto? Splica.

¹³ Lamentablemente, Israel como nacion a keda sin “cumpli cu henter e mandamento aki dilanti di SEÑOR”, y pesei nan a perde e bendicionnan priminti. Nan a keda sin cumpli cu tur Dios su mandamentonan debi cu e Lei di Dios ta perfecto, pero nan si no. Esei kiermen cu Dios ta inhusto? Sigur cu no. Pablo a skirbi: “Kico nos lo bisa anto? Acaso tin inhusticia cerca Dios? Di ningun manera!” (Romanonan 9:14) Echo ta cu tanto prome como despues cu e Lei a ser duna, Dios a considera cierto hendenan como husto maske nan tawata imperfecto y pecado. Den e lista ei di hendenan cu temor di Dios tin entre otro Noe, Abraham, Job, Rahab y Daniel. (Genesis 7:1; 15:6; Job 1:1; Ezekiel 14:14; Santiago 2:25) E pregunta cu ta lanta ta: A base di kico Dios a considera e personanan aki husto?

14. Kico Bijbel kiermen ora e bisa cu un hende ta “husto”?

¹⁴ Ora Bijbel bisa cu un hende ta “husto”, e no kiermen cu e ta sin pica ni cu e ta perfecto. Mas bien e kiermen cu e persona ta cumpli cu su obligacionnan cu Dios y cu hende. Noe, por ehempel, a ser yama “un homber husto” y “perfecto den su generacionnan” door cu ‘conforme tur loke Dios a orden’e, asina el a haci.’ (Genesis 6:9, 22; Malakias 3:18) Zacarias cu Elisabet, e mayornan di Huan Bautista, “tawata husto den bista di Dios” pasobra nan “tawata cana ireprochabel den tur e mandamentonan y ordenansanan di Señor.” (Lucas 1:6) Y Cornelio, un oficial di ehersito Italiano cu no tawata un Israelita, a ser yama “un homber husto cu ta teme Dios.”—Echonan 10:22.

15. Kico husticia tin hopi di aber cu ne?

¹⁵ Ademas, cu un hende ta husto of no tin hopi di aber cu loke tin den su curason—e fe, e aprecio y e amor cu e tin pa Yehova y pa su promesanan—y no djis cu e ta haci loke Dios ta bisa. Bijbel ta bisa cu Abraham “a kere den  SEÑOR, y el a conta esaki como husticia p’e.” (Genesis 15:6) No ta den Dios su existencia so Abraham tawatin fe, sino tambe den su promesa tocante e “simiña.” (Genesis 3:15; 12:2; 15:5; 22:18) A base di e fe ei, y di obranan cu ta na harmonia cu fe, Yehova por tawatin trato cu Abraham y a bendiciona e y otro hendenan fiel apesar cu nan tawata imperfecto.—Salmo 36:10; Romanonan 4:20-22.

16. Kico fe den e rescate a trece cu ne?

¹⁶ Por ultimo, pa un hende ta husto e mester tin fe den e sacrificio di rescate di Hesucristo. Pablo a skirbi lo siguiente tocante cristiannan di prome siglo: “Como un don gratis nan ta ser declara husto door di [Dios] su bondad inmereci mediante e liberacion di e rescate cu Cristo Hesus a paga.” (Romanonan 3:24, NW) Aki Pablo tawata papia di esnan scohi pa bira heredero hunto cu Cristo den e Reino celestial. Pero tambe e sacrificio di rescate di Hesus a habri oportunidad pa miyones di otro hende haya un posicion husto den Dios su bista. Den un vision apostel Huan a mira “un multitud grandi cu ningun hende no por a conta . . . para dilanti di e trono y dilanti di e Lamchi, bisti na paña blanco.” E pañanan blanco ta simbolisa cu nan ta limpi y husto den Dios su bista door cu “nan a laba nan pañanan y a haci nan blanco den e sanger di e Lamchi.”—Revelacion 7:9, 14.

Haña Placer den Yehova Su Husticia

17. Ki pasonan nos mester dal pa nos por haya un posicion husto?

¹⁷ Maske den su amor Yehova a duna su Yiu Hesucristo como e medio pa hende por haya un posicion husto den su bista, di ningun manera esaki no ta sosode automaticamente. Prome nos tin cu eherce fe den e sacrificio, pone nos bida na harmonia cu e boluntad di Dios, dedica nos mes na Yehova y simbolisa e dedicacion aki door di batisa den awa. Despues nos tin cu sigui busca husticia, y tambe otro cualidadnan spiritual. Maske Timoteo tawata un cristian batisa cu a ricibi e yamada pa shelo, Pablo a urgie pa “busca husticia, santidad, fe, amor, perseverancia y mansedumbre.” (1 Timoteo 6:11; 2 Timoteo 2:22) Hesus tambe a enfatisa cu ta necesario pa nos sigui haci esfuerso. El a bisa: “Ma [sigui, NW] busca prome e reino di Dios y Su husticia.” Kisas nos ta traha hopi duro pa nos haya e bendicionnan di e Reino di Dios, pero nos ta traha mes duro pa nos actua cu husticia tambe, mescos cu Yehova?—Mateo 6:33.

18. (a) Dicon no ta facil pa busca husticia? (b) Kico nos por siña di e ehempel di Lot?

¹⁸ Claro cu busca husticia no ta facil. Esei ta asina door cu nos ta imperfecto, y nos tin un inclinacion natural pa inhusticia. (Isaias 64:6) Pa colmo nos ta rondona door di hende cu no tin mucho aprecio pa Yehova su husticia. Nos ta den un situacion hopi similar na esun di Lot, kende a biba na Sodoma, un stad conoci pa su maldad. Apostel Pedro a splica dicon Yehova a dicidi di libra Lot for di e destruccion cu tawata na caminda. Pedro a bisa: “E homber husto ei, bibando meimei di nan, a sinti su alma husto tormenta dia aden dia afo cu nan echonan malbado.” (2 Pedro 2:7, 8) Pesei, ta bon pa cada un di nos puntra nos mes: ‘Mi ta aproba e practicanan inmoral cu nos ta mira rond di nos, keto keto den mi curason? Ta djis gusta mi no ta gusta dibirticion of deporte violento? Of mi ta sinti mi tormenta door di nan, manera husto Lot?’

19. Ki bendicionnan nos por ricibi si nos tin placer den e husticia di Dios?

 ¹⁹ Den e tempo peligroso y insigur aki, haya placer den Yehova su husticia ta un fuente di siguridad y proteccion. David a puntra: “O SEÑOR, ken por biba den bo tabernakel? Ken por biba riba bo sero santo?” E mes a contesta: “Esun cu ta cana den rectitud y ta haci husticia.” (Salmo 15:1, 2) Door di busca Dios su husticia y haya placer den dje, nos por keda cu un bon relacion cu ne y gosa di su fabor y su bendicion. Asina nos ta haya satisfaccion den bida, respet propio y pas mental. “Esun cu aspira na husticia y lealtad ta haya bida, husticia y honor”, ta loke e Palabra di Dios ta bisa. (Proverbionan 21:21) Ademas, si nos ta haci nos best pa ta semper husto y recto den tur loke nos haci, nos lo gosa di bon relacionnan personal y un miho calidad di bida, tanto den sentido fisico como spiritual. E salmista a declara: “Bendiciona ta esnan cu ta mantene huicio, kendenan ta practica husticia tur ora.”—Salmo 106:3.

[Nota]

Bo Por Splica?

• Kico ta husticia?

• Kico e husticia di Dios tin di aber cu salbacion?

• A base di kico Dios ta considera hende husto?

• Con nos por haya placer den Yehova su husticia?

[Preguntanan di Estudio]

[Plachi na pagina 15]

Rei David a expresa cariño sinsero pa e leinan di Dios

[Plachi na pagina 16]

Bo sa dicon Dios a considera Noe, Abraham, Zacarias cu Elisabet y Cornelio como hende husto?