Kico Abo Ta Pensa Cu Morto Ta?

MASKE con rico of salu nos por ta, morto ta manera un sombra scur cu ta colga riba nos cabes segun cu nos ta haci nos cosnan di tur dia. Nos por topa cu ne e siguiente bes cu nos crusa caya, of e siguiente bes cu nos subi cama. Desasternan manera e atake terorista di 11 di september 2001 na New York y Washington, D.C. ta pone nos cara cara cu e echo cu “e delaster enemigo”, morto, ta cosecha victima den tur area di bida y di tur edad, y tin biaha un cantidad di miles den cuestion di un par di minuut.—1 Corintionan 15:26.

Toch ta parce cu hende ta fasina cu morto. No tin nada cu ta pone hende cumpra corant of wak television mas tanto cu noticia di morto, y piyo ainda si ta hopi hende a muri na un manera horibel. Ta manera cos cu hende no ta cansa di noticia di morto, sea cu ta morto door di guera, desaster natural, crimen of enfermedad. Ora un hende conoci of un celebridad muri, publico ta expresa nan emocionnan di lamento cu asta mas intensidad. Esaki ta un di e manifestacionnan di mas straño di e obsesion cu hende tin cu morto.

Tur e reaccionnan aki ta bon conoci. Hende ta fasina cu morto, esta, morto di otro hende. Nan propio morto si no ta un tema cu nan ta gusta pensa ariba. Loke mayoria di nos tin menos gana di medita ariba ta nos propio fin.

Morto Tin Nos Confundi?

Semper hende a sinti fastioso ora di pensa cu nan mester muri un dia, y semper lo e keda un cos fastioso tambe. Dicon? Door cu Dios a hinca un deseo fuerte den nos pa biba pa semper. Eclesiastes 3:11 ta bisa cu ‘el a pone eternidad den nos curason.’ Pesei, e echo cu nos no por scapa di morto a crea den hende un conflicto interno cu no kier kita. Pa nan por calma e conflicto interno aki y satisface nan deseo natural pa sigui biba, hende a inventa tur sorto di creencia cu ta varia entre inmortalidad di alma te reencarnacion.

Di tur manera, morto ta y ta keda un cos mahos, un cos spantoso, y miedo di muri ta un cos cu tur pueblo tin en comun. Pesei, no ta nada straño cu morto ta pone mayoria hende sinti miedo di futuro. Por ehempel, morto ta laga hende realisa cu di berdad no tin sentido pa dedica bo bida na core tras di rikesa y poder.

Morto Ta Isola Nos?

Antes tawata asina cu un hende malo pa muri, of cu un herida mortal, por a muri na cas, den e ambiente cu el a custumbra cu ne, y caminda e ta sintie bon. Den tempo biblico  hopi bes tawata asina, y ainda ta asina den algun cultura. (Genesis 49:1, 2, 33) Den e casonan ei, e famia ta bini hunto y muchanan tambe ta participa den e combersacion. Door di esei ningun miembro di famia no ta sinti cu nan ta so den nan pena. Ta un consuelo cu nan por comparti e responsabilidadnan y e tristesa.

E situacion ta completamente otro den sociedadnan caminda ta tabu pa papia riba morto, caminda hende ta haya cu morto ta un tema fastioso, y mucha no por tin nada di aber cu ne pasobra hende ta pensa cu esei lo ta “mucho duro” pa nan. Muri awendia ta diferente for di antes den varios sentido. Entre otro, hopi bes e ta un experencia mas solitario. Mayoria hende lo tin gana di muri na cas, trankil y cu e cuido amoroso di nan famia. Pero pa hopi hende, e realidad tristo ta cu nan mester muri den un hospital, hopi bes nan so y yen di dolo, pega na yen di aparato sofistica. Pero tin miyones di otronan tambe cu tin cu muri sin cu hende ta na haltura mes, como victima sin nomber di exterminacion racial, hamber, AIDS, guera civil of simplemente pobresa extremo.

Un Cos pa Pensa Ariba

Bijbel no ta descurasha nos di pensa riba morto. E mes ta bisa nos na Eclesiastes 7:2: “Ta miho bai na un cas di rou cu bai na un cas di fiesta, pasobra morto ta e fin di tur hende.” Door di confronta e realidad di morto, esei por pone nos stop di pensa un rato riba nos precupacionnan y actividadnan di tur dia, y para keto na e echo cu bida ta cortico. Esei por yuda nos hiba un bida cu mas nificacion, na luga di djis biba pa biba, of tira nos añanan afo.

Kico abo ta pensa di morto? Bo a yega di examina loke bo ta sinti, kere, spera y teme tocante e fin di bo bida?

Morto, mescos cu bida mes tambe, ta bai mas aya di loke hende por splica y comprende. E unico persona cu por papia riba e tema aki cu autoridad confiabel ta nos Creador. Cerca dje “e fuente di bida ta”, y cerca dje “tin scapatorio for di morto.” (Salmo 36:9; 68:20) Pa straño cu por parce, nos por haya consuelo y animacion si nos examina un par di creencia popular tocante morto a base di loke e Palabra di Dios ta bisa. Nos lo haya sa cu morto no mester ta fin di tur cos.

[Comentario na pagina 4]

E echo cu nos por muri ta yuda nos hiba un bida cu mas nificacion