Storia di Bida

Mi Debocion na Dios A Ser Recompensa

SEGUN E RELATO DI WILLIAM AIHINORIA

Tawata meianochi y Tata su kehamento di custumber a lanta mi for di soño. E tawata troce riba flur cu su stoma teni. Ami, Mama, y mi ruman mohe mas grandi a sak abou cerca dje. Ora e dolo a manera baha un tiki el a sinta recht, keha y bisa: “Ta Testigonan di Yehova so tin pas riba e mundo aki.” E remarca ei tawata straño, pero el a haci hopi impresion riba mi pasobra nunca prome mi no a yega di tende di Testigonan di Yehova. Mi tawatin masha gana di sa ta kico Tata tawata kiermen.

EINCIDENTE ei a tuma luga na 1953 tempo cu mi tawatin seis aña di edad. Mi tawata parti di un famia poligamo na Ewossa, un pueblo cu ta biba di agricultura na e parti west meimei di Nigeria. Mi tawata e di dos yiu pero e prome yiu homber den un famia cu, despues di tempo a crece y a consisti di Tata su 3 casanan y 13 yiu. Nos tawata biba hunto den mi welo su cas di cuater camber traha di pal’i maishi y lodo. Tambe e famia a consisti di Wela y Tata su tres ruman hombernan y tambe nan famianan.

Na principio mi tawatin un bida miserabel. Loke specialmente a contribui na esaki tawata Tata su malesa. E tawatin un dolo di stoma cronico y esaki a dura te ora cu el a muri hopi aña despues. Su malesa desconoci no a reacciona riba ningun tratamento cu un famia Africano di cunucu por a afford: ni remedi di yerba ni esnan tradicional. Nos a pasa varios anochi ta yora hunto cu Tata ora e tawata troce di dolo riba suela te ora cu gai canta mainta anunciando e siguiente dia. En busca di cura pa su  malesa, hopi bes Tata a biaha cu Mama y nan a laga ami cu mi rumannan cerca Wela.

Nos famia a mantene cabes riba awa door di cultiva yams, yuca y noot di cola pa bende. Tambe nos tawata saca rubber for di palo pa yuda nos entrada scars. Nos cuminda principal tawata yams. Nos tawata come yams mainta, yams machica merdia y anochi atrobe, yams. De bes en cuando nos tawatin un tiki variacion ora nos come banana hasa.

Adoracion di antepasado a forma un parti importante di nos bida. E famia tawata ofrece cuminda na antepasado door di pone e cuminda dilanti palo cu cocolishi mara rond di dje. Tambe Tata tawata adora un imagen pa core cu mal spirito y hacido di bruha.

Ora mi tawatin cinco aña nos a muda temporalmente for di nos pueblo bai un cunucu cu tawata situa un 11 kilometer mas leu. Einan Tata a haya e malesa di bichi di guinea, loke a haci su malesa di stoma piyo. Durante dia e no por a traha y anochi su dolo di stoma tawata torment’e. Mi a haya un tipo di tifus cu un insecto manera ashibi ta causa. Esei a pone cu nos famia tawata biba di loke nos tawata haya cerca e otro miembronan di nos famia grandi. Pa nos no muri den pobresa extremo, nos a bai nos pueblo Ewossa bek. Tata tawata kier pa ami, su prome yiu homber, haya un trabou miho cu esun di un cunukero cu apenas ta logra mantene cabes riba awa. El a pensa cu un bon educacion lo yuda halsa e nivel di bida di e famia y permiti mi cria mi rumannan.

Contacto cu Diferente Religion

Ora mi a regresa nos pueblo mi por a cuminsa bai scol. Esaki a pone mi den contacto cu religionnan di cristiandad. Durante añanan ’50 di siglo 20 e sistema di educacion Occidental tawata un refleho di e religion di autoridadnan colonial. E echo cu mi a bai un scol basico catolico a nifica cu mi mester bira catolico.

Na 1966, e aña cu mi a haci 19 aña, nan a acepta mi na e Scol Secundario pa Peregrino Bautista den e stad di Ewohinmi, situa un 8 kilometer for di Ewossa. Einan mi educacion religioso a cambia. Door cu mi tawata bai un scol protestant awor, pastonan catolico no a permiti mi ricibi durante e misa di diadomingo.

Ta durante e tempo cu mi tawata bai e scol bautista mi a haya mi pa prome bes den contacto cu Bijbel. Maske mi a sigui bai misa catolico, mi a sigui lesa Bijbel riba mi mes tur diadomingo despues di e sacrificio di misa catolico. Hesucristo su siñansanan a fasina mi, y nan a lanta den mi e deseo pa hiba un bida cu un proposito, un bida deboto na Dios. Mas mi a lesa Bijbel, mas desgusta mi a keda cu e hipocresia di algun lider religioso y cu e bida inmoral cu hopi laico tawata hiba. Loke mi a mira entre e personanan aki cu ta bisa cu nan ta cristian ta hopi diferente for di loke Hesus y su disipelnan a haci y siña hende.

Tawatin cierto incidentenan en particular cu a shock mi. Na un ocasion ora mi a bai e tienda cu ta bende articulonan religioso pa cumpra un rosario, mi a mira un amulet djudju cu hendenan di West Africa ta uza, colga na e kozijn di porta di e tienda. Na un otro ocasion e director di e scol bautista a purba abusa di mi sexualmente. Despues mi a haya sa cu e ta homosexual y cu el a abusa di otronan. Mi a pensa riba e cosnan aki y a puntra mi mes: ‘Acaso Dios ta aproba religionnan cu no ta pidi  cuenta di nan miembronan ni di nan lidernan cu ta comete picanan serio?’

Un Cambio di Religion

Sinembargo, mi a gusta masha loke mi a lesa den Bijbel y mi a dicidi di sigui les’e. E tempo ei mi a cuminsa pensa bek riba Tata su remarca di un 15 aña prome: “Ta Testigonan di Yehova so tin pas riba e mundo aki.” Pero mi tawatin mi dudanan pasobra na mi scol nan tawata tenta e muchanan Testigo y tin bes nan tawata haya straf pasobra nan no a participa den nos ceremonianan religioso di mainta. Y algun di nan creencianan a parce mi straño. Por ehempel tawata dificil pa mi kere cu ta 144.000 hende so ta bai shelo. (Revelacion 14:3) Door cu mi tawatin deseo di bai shelo, mi a puntra mi mes si e cantidad di 144.000 tawata completa caba prome cu mi a nace.

Tawata bisto si cu e conducta y actitud di e Testigonan tawata diferente. Nan no tawata envolvi den e actividadnan inmoral y violento di e otro hobennan na scol. Mi a ripara cu nan tawata realmente separa di mundo, manera mi a lesa den Bijbel cu mester ta e caso cu hende cu ta practica e religion berdadero.—Huan 17:14-16; Santiago 1:27.

Mi a dicidi di investiga mas aleu. Na september 1969 mi a haya e buki E berdad cu ta hiba na bida eterna. E siguiente luna, un pionero, manera nan ta yama un predicado di tempo completo di Testigonan di Yehova, a cuminsa studia Bijbel cu mi. Anima door di mi prome studio, mi a cuminsa lesa e buki Berdad riba un diasabra anochi y a cab’e e siguiente atardi. Mesora mi a cuminsa conta mi compañeronan di scol e cosnan maravioso cu mi a lesa. E studiante- y maestronan a pensa cu mi fe nobo a haci mi loco. Pero mi tawata sa cu no ta loco mi a bira.—Echonan 26:24.

Hende a bai conta mi mayornan cu mi tawata predica un religion nobo. Nan a manda yama mi mesora pa nan por a saca afo kico ta mi problema. Mi no por a tuma conseho cerca ningun hende pasobra net tur e Testigonan a bai nan congreso di districto na e stad Ilesha. Ora mi a yega cas, mi mama y otro famianan a bombardia mi cu pregunta y critica. Mi a  haci mi best pa defende loke mi tawata siña for di Bijbel.—1 Pedro 3:15.

Despues cu mi omo no a logra combence mi cu Testigonan ta maestronan falso, el a purba un otro tactica. El a suplica mi: “Corda cu bo a bai scol pa bo siña algo. Si bo bandona bo estudio y bai predica, nunca lo bo completa bo educacion. Pesei, dicon bo no ta caba bo scol prome cu bo join e religion nobo aki?” E tempo ei, e argumento ei a parce mi rasonabel, pues mi a stop di studia cu e Testigonan.

Na december 1970, asina cu mi a caba scol, mi a bai stret Salon di Reino y desde e dia ei mi a sigui bai e reunionnan di Testigonan di Yehova. Dia 30 di augustus 1971 mi a batisa como simbolo di mi dedicacion na Dios. Esaki a molestia no mi mayornan so, sino henter e comunidad. Nan a laga sa cu mi a desapunta nan pasobra mi tawata e prome persona di Ewossa y bicindario cu a ricibi un beca di gobierno. Y nan tur a spera hopi di mi. Nan a spera cu lo mi a uza mi educacion pa drecha mi comunidad.

E Consecuencianan di Mi Cambio

Mi famia y e hombernan di edad di e comunidad a manda un delegacion pa purba combence mi pa renuncia mi fe. Nan esfuersonan tawata mescla cu maldicion. Nan a bisa: “Si bo no bandona e religion ei, bo futuro lo ta fatal. Lo bo no haya trabou. Lo bo no traha bo propio cas. Lo bo no por casa ni cria un famia.”

Contrario na e cosnan desastroso cu nan a pronostica, dies luna despues cu mi a caba scol mi a haya trabou como maestro di scol. Na october 1972, mi a casa cu mi esposa stima Veronica. Despues, gobierno a manda mi un curso y a encarga mi como e persona di contacto pa organisa cunukeronan den cooperativa y yuda nan tene y controla buki. Mi a cumpra mi prome auto y a cuminsa traha nos cas. Dia 5 di november 1973, nos prome yiu mohe, Victory, a nace, y durante e añanan cu a sigui nos a haya Lydia, Wilfred y Joan. Na 1986 nos ultimo yiu Micah a nace. Nan tur tawata dushi mucha, un herencia for di Yehova.—Salmo 127:3.

Ora mi mira bek, mi por bisa cu tur e mal deseonan di e comunidad a bira bendicion. Pesei mi a yama mi prome yiu mohe Victory (Victoria). Resientemente e comunidad a skirbi mi y nan a bisa: “Por fabor, nos kier pa bo bini cas y yuda den desaroyo di nos comunidad, pasobra bo tin Dios su bendicion.”

Criando Yiu den e Caminda di Dios

Ami cu mi casa tawata sa cu nos no por a cumpli cu e responsabilidad cu Dios a duna nos di cria yiu y na mes momento sigui tras di rikesa material. Pesei, nos a siña keda contento cu un bida simpel. Nos ta prefera e estilo di bida aki y no enfrenta e posibel consecuencianan cu un otro estilo lo trece cu ne.

Den e parti di mundo aki cu nos ta biba ta normal pa comparti cas cu otro famianan door di uza e mesun baño, cushina, etcetera. Nos ta contento cu na tur e stadnan cu nan a manda mi como trahado di gobierno nos por a huur luganan cu nos no tawatin nodi comparti cu otro hende. Ta berdad cu e sitionan aki tawata mas caro, pero door di esei nos a limita e chens cu nos yiunan por a haya nan cu influencianan insaludabel. Mi ta gradici Yehova cu atrabes di añanan nos por a lanta nos yiunan den un ambiente spiritualmente sano.

Ademas, mi casa a keda cas pa e ta hunto cu e muchanan y percura pa nan. Despues cu mi sali trabou, nos ta purba haci cosnan hunto como famia. Hunto como famia nos ta studia, prepara pa e reunionnan di congregacion y asisti na nan, sali den e ministerio cristian y tambe participa na actividadnan social.

Nos a purba sigui e conseho di Deuteronomio 6:6 y 7 cu ta urgi mayornan pa siña nan yiunan no solamente na cas sino na tur oportunidad cu presenta. Esaki a pone cu e muchanan a busca amistad den e circulo di amigonan Testigo, y no pafo di esaki. Door cu ami cu  Veronica no ta pasa demasiado tempo den compania di hende cu no tin mes creencia cu nos, nos ehempel a siña nos yiunan con pa scohe nan amistadnan.—Proverbionan 13:20; 1 Corintionan 15:33.

Claro cu no ta nos guia y siñansa so tawatin un influencia positivo riba bida di nos yiunan. Semper nos cas tawata y ainda ta habri pa cristiannan celoso kendenan, den nan mayoria, ta ministernan biahero di Testigonan di Yehova. Durante e tempo cu e cristiannan maduro aki a pasa hunto cu nos famia, nos yiunan a haya oportunidad pa observa y siña for di nan bida di sacrificio propio. Esaki a duna mas forsa na nos siñansa, y e muchanan a combence nan mes di e berdad.

Debocion na Dios Ta Ser Recompensa

Awe ami cu mi casa, hunto cu cuater di nos yiunan ta den e ministerio di tempo completo. Mi a cuminsa traha pionero pa prome bes na 1973. Atrabes di e añanan mi mester a interumpi mi ministerio di tempo completo pa motibo di sircunstancianan economico. Tambe na algun ocasion mi tawatin e privilegio di sirbi como instructor na e Scol di Ministerio di Reino cu ta entrena superintendentenan cristian di Testigonan di Yehova. Actualmente mi tin e privilegio di sirbi den un Comite di Contacto cu Hospital y como superintendente di ciudad di Uhonmora.

Mi prome dos yiu mohenan, Victory y Lydia, ta felismente casa cu dos excelente anciano cristian. Hunto cu nan casa nan ta sirbi como miembro di e oficina di sucursal di Testigonan di Yehova na Igieduma, Nigeria. Nos yiu homber mayo ta sirbi como sirbido ministerial y esun mas chikito, Micah, ta traha e trabou di pionero ausiliar de bes en cuando. Na 1997 Joan a caba su scol secundario y a cuminsa traha den e sirbishi di pionero regular.

Un di e experencianan di mas recompensador den mi bida ta e echo cu mi por a yuda hende sirbi Yehova Dios. Algun di e hendenan aki ta miembronan di mi famia grandi. Mi tata a haci esfuerso pa sirbi Yehova pero e echo cu e tawatin diferente casa na mesun tempo a strob’e di sigui. Desde mi hubentud mi tawata stima hende. Ora mi mira hende sufri, mi ta sinti como si fuera mi problemanan ta menos importante. Mi ta supone cu nan ta mira cu mi tin deseo sinsero pa yuda nan, y esaki ta pone cu ta bira mas facil pa nan papia cu mi.

Un di e personanan cu mi a yuda conoce Dios su proposito ta un yoncuman cu ta drumi na cama. E tawata traha pa un compania di electricidad, y coriente a dal e na trabou y el a bira lam di su pecho bini abou. El a acepta un studio di Bijbel y pocopoco a reacciona faborabel riba loke el a siña. Ora el a batisa dia 14 di october 1995 den un riu banda di nos cas, tawata e prome bes den 15 aña cu el a baha for di su cama. El a bisa cu esaki tawata e dia mas felis di su bida. Awor e ta un sirbido ministerial den e congregacion.

Mi tin cu bisa cu no ta duel mi cu un 30 aña pasa mi a scohe pa sirbi Yehova hunto cu su pueblo uni y dedica. Den nan mi a mira berdadero amor na accion. Asta si Yehova no tawatin e speransa di bida eterno como un recompensa pa su sirbidonan fiel, toch lo mi a desea di hiba un bida deboto na Dios. (1 Timoteo 6:6; Hebreonan 11:6) Debocion na Dios a dirigi e curso di mi bida y a dun’e stabilidad. Tambe el a trece goso, satisfaccion y felicidad pa mi y pa mi famia.

[Plachi na pagina 25]

Hunto cu mi casa y yiunan na 1990

[Plachi na pagina 26]

Hunto cu mi casa y yiunan y dos suegro