“Nan A Sink”

“E abismonan ta tapa nan; nan a sink bai den e profundidadnan manera piedra.”

MOISES y e Israelitanan a canta e palabranan aki pa celebra nan liberacion via Lama Cora y e likidacion di nan enemigonan Egipcio cu tawata persigui nan: Farao y su forsa militar.—Exodo 15:4, 5.

Tur hende cu a mira e suceso espectacular aki cu nan propio wowo, a saca un bon les. Ningun persona por bai contra Yehova su autoridad of resistie y keda na bida. Sinembargo, djis algun luna despues, Israelitanan cu posicionnan prominente—manera, Core, Datan, Abiram y 250 persona cu a apoya nan—a bai contra e autoridad cu Dios a duna Moises y Aron.—Numbernan 16:1-3.

Bou di direccion di Yehova, Moises a urgi e Israelitanan pa hala kita for di tent di e rebeldenan. Pero Datan y Abiran, hunto cu nan famianan di cas a nenga di cambia nan actitud. Anto Moises a anuncia cu Yehova lo tin Su manera pa laga e pueblo mira cu e hombernan aki “a desprecia” Yehova. Na e momento ei Yehova a habri tera bou di nan pia. “Asina nan, y tur loke nan tawatin, a baha bibo bai den Seol; y tera a tapa nan.” Kico a sosode cu Core y e otro rebeldenan? “A bin candela for di SEÑOR y a caba cu dos shent’i cincuenta homber cu tawata ofrece sencia.”—Numbernan 16:23-35; 26:10.

Farao y su ehersitonan, y tambe e rebeldenan den desierto a muri pasobra nan no a reconoce Yehova su autoridad ni cu e ta interesa den asuntonan di su pueblo. Pesei anto, ta urgente pa tur hende cu kier haya proteccion di Yehova durante e dianan critico aki siña tocante Yehova y obedec’e como “e Haltisimo” y “e Todopoderoso.” Ora nan haci esei, nan por tin tur confiansa den e palabranan di Yehova: “Mil por cai band’i bo, y dies mil na bo man drechi, ma cerca bo e lo no yega. Solamente cu bo wowo lo bo observa, y mira e recompensa di e malbadonan. Pasobra bo a haci [Yehova, NW], kende ta mi refugio, e Haltisimo, bo luga di biba.”—Salmo 91:1, 7-9.