Pregunta di Lector

Si un hende cu kier batisa tin un incapasidad grave of e ta asina malo cu ta dificil pa e bai bou di awa, toch e mester bai completamente bou di awa?

E palabra “batisa” ta bini for di e verbo Griego bá·pto cu ta nifica “dop den.” (Huan 13:26) Den Bijbel, “batisa” ta mescos cu “hinca bou di awa.” Relaciona cu e bautismo di e eunuco di Etiopia cu Felipe a efectua, The Emphasised Bible di Rotherham ta declara: “Tanto Felipe como e eunuco a baha den awa, y Felipe a hinc’e bou di awa.” (Echonan 8:38) Pues, un persona cu wordo batisa eigenlijk ta ser gedop of manda bou di awa.—Mateo 3:16; Marco 1:10.

Hesus a manda su disipelnan: “Pesei, bai y haci tur e nacionnan disipel di mi, y batisa nan.” (Mateo 28:19, 20) Na harmonia cu e mandamento ei, Testigonan di Yehova ta haci areglo pa batisa hende den pisina, lago, riu of otro sitionan caminda tin suficiente awa cu un persona por bai completamente bou di awa. Ya cu bautismo door di bai completamente bou di awa ta un rekisito biblico, ningun hende no tin autoridad pa haci un excepcion ora un otro persona kier batisa. Pues, mester batisa un persona asta si su condicion ta pone cu mester tuma medidanan excepcional. Por ehempel, hende di edad avansa of cu un salu hopi delicado a yega di batisa den badkuip of tobo grandi. Por keinta e awa den e badkuip, pone e candidato pa bautismo di un manera trankil y pocopoco den e awa y, una bes cu e curpa a adapta na e awa, e bautismo mes por tuma luga.

Asta hende cu tin incapasidad grave a yega di batisa. Por ehempel, hende cu tin un buraco permanente den nan garganta, of hende cu ta uza mashin pa hala rosea a yega di batisa. Claro cu lo mester haci bon preparacion pa tur e bautismonan ei por tuma luga. Lo ta sabi si por tin un verpleegster of docter presente. Sinembargo, na casi tur ocasion cu a tuma medidanan special, e bautismo por a tuma luga. Pesei, mester haci tur esfuerso rasonabel pa batisa un persona den awa si esei ta e deseo sinsero di e persona y si e kier acepta e riesgonan envolvi.