Purifica Como un Pueblo pa Haci Bon Obra

“Laga nos purifica nos mes di tur impuresa di carni y spirito, y asina perfecciona nos santidad den e temor di Dios.”—2 CORINTIONAN 7:1.

1. Kico Yehova ta rekeri di esnan cu ta ador’e?

“KEN por subi bai den e sero di SEÑOR? Y ken por para den su luga santo?” Rei David di Israel di antiguedad a lansa e preguntanan interesante ei tocante ki sorto di adoracion Yehova ta acepta. Despues e mes a duna e contesta: “Esun cu tin man limpi y curason puro, cu no a halsa su alma na banidad, y cu no a hura cu engaño.” (Salmo 24:3, 4) Yehova ta e personificacion di santidad, y pa E acepta nos, nos mester ta limpi y santo. Mas prome cu esei Yehova a yega di recorda e congregacion di Israel esaki: “Consacra boso mes anto y sea santo, pasobra ami ta santo.”—Levitico 11:44, 45; 19:2.

2. Con Pablo y Santiago a enfatisa e importancia di limpiesa den adoracion berdadero?

² Varios siglo despues, apostel Pablo a skirbi su compañeronan cristian den e stad inmoral di Corinto: “Como cu awor nos tin e promesanan aki, stimanan, laga nos purifica nos mes di tur impuresa di carni y spirito, y asina perfecciona nos santidad den e temor di Dios.” (2 Corintionan 7:1) Esaki ta bolbe mustra cu si nos kier tin un relacion cu Dios y ricibi e bendicionnan cu El a priminti, nos mester ta limpi y liber di sushedad fisico y spiritual. Disipel Santiago tambe a haci un declaracion similar ora el a skirbi tocante e tipo di adoracion cu ta aceptabel pa Dios: “Esaki ta e  religion puro y sin mancha den bista di nos Dios y Tata: bishita huerfano y biuda den nan afliccion, y conserva bo mes liber di mancha di mundo.”—Santiago 1:27.

3. Si nos kier pa Dios haya nos adoracion aceptabel, den kico nos mester ta masha interesa?

³ Ya cu ta asina importante pa adorado di Dios ta limpi, santo y sin mancha, ken cu kier haya su aprobacion mester ta masha interesa pa cumpli cu e rekisitonan aki. Pero door cu awendia hende tin hopi diferente norma y concepto di limpiesa, nos tin cu comprende ta kico Yehova ta considera limpi y aceptabel, y biba di acuerdo cu esei. Nos tin cu haya sa kico Dios ta spera di su adoradonan pa loke ta limpiesa, y kico El a haci pa yuda nan bira y keda limpi y aceptabel den su bista.—Salmo 119:9; Daniel 12:10.

Limpi pa Adoracion Berdadero

4. Splica e concepto biblico di limpiesa.

⁴ Mayoria hende ta pensa cu una bes nan curpa no ta sushi, esei kiermen cu ya nan ta limpi. Sinembargo, den Bijbel tin varios palabra Hebreo y Griego cu ta mustra kico kiermen ser limpi no djis den sentido fisico, sino mas tanto biaha den sentido moral y spiritual. Pesei, un enciclopedia di Bijbel ta declara: “Masha poco biaha e palabranan ‘limpi’ y ‘impuro’ ta relaciona cu solamente asuntonan di higiena. Nan ta principalmente conceptonan religioso. Como tal, e principio di ‘limpiesa’ tin di aber cu casi tur aspecto di bida.”

5. Con leu e Lei di Moises relaciona cu limpiesa a bai den bida di e Israelitanan?

⁵ En berdad, e Lei di Moises tawatin regla riba practicamente tur aspecto di bida di e Israelitanan, bisando spesificamente kico tawata limpi y aceptabel y kico no. Por ehempel, den Levitico capitulo 11 pa 15 nos ta haya instruccion detaya relaciona cu limpiesa y impuresa. Algun animal tawata impuro y e Israelitanan no tawatin mag di come nan. Un mohe cu a caba di duna lus lo tawata impuro pa un cierto tempo. Algun malesa di cuero, principalmente lepra, y derame of fluho di e organonan genital di un homber of mohe tambe lo a haci un persona impuro. Ademas, e Lei a bisa spesificamente kico un persona mester a haci den situacionnan cu tawatin di aber cu impuresa. Por ehempel na Numbernan 5:2 nos ta lesa: “Ordena e yiunan di Israel pa saca tur leproso y tur esnan cu tin un derame y tur esnan cu ta impuro pa motibo di un morto, for di e campamento.”

6. Pa ki proposito Yehova a duna e leinan relaciona cu limpiesa?

⁶ Sin duda, e leinan aki y otro reglanan di parti di Yehova a contene conceptonan medico y di bon salu cu tawata hopi adelanta pa nan tempo, y e pueblo a saca beneficio ora nan a sigui nan. No obstante, Yehova no a duna e leinan aki djis como un codigo di salu of pa sirbi solamente como instruccion medico. Nan tawata parti di adoracion berdadero. E echo cu e leinan aki a toca cosnan di bida di tur dia—manera come, duna lus, relacion matrimonial, etcetera—a simplemente enfatisa e punto cu como nan Dios, Yehova tawatin e derecho pa determina pa su pueblo loke tawata corecto y loke no tawata corecto den tur aspecto di nan bida, un bida cu tawata exclusivamente dedica na Yehova.—Deuteronomio 7:6; Salmo 135:4.

7. Ki bendicion e nacion di Israel lo a ricibi door di warda e Lei?

⁷ Tambe e pacto di Lei a proteha e Israelitanan for di e custumbernan degrada di e nacionnan rond di nan. Door di cumpli fielmente cu e Lei, y tambe cu tur e rekisitonan pa keda limpi den bista di Yehova, e Israelitanan lo tawata apto pa sirbi nan Dios y pa ricibi su bendicion. Relaciona cu esaki, Yehova a bisa e nacion: “Si di berdad boso kier obedece mi bos y warda mi aliansa, e ora ei boso lo ta un tesoro peculiar riba tur pueblo, pasobra henter tera ta di mi; y boso lo ta pa mi un  reino di sacerdotenan y un nacion santo.”—Exodo 19:5, 6; Deuteronomio 26:19.

8. Pakico cristiannan djawe mester presta atencion na loke e Lei di Moises ta bisa tocante limpiesa?

⁸ E echo cu Yehova a agrega e detayenan ei den e Lei pa instrui e Israelitanan con nan por a bira limpi y santo y haya su aprobacion, lo no mester pone cristiannan djawe tambe pensa seriamente riba con nan ta cumpli cu e rekisitonan aki? Maske cristiannan no ta bou di e Lei di Moises, nan mester tene na mente cu, manera Pablo a splica, tur loke tin den e Lei ‘ta sombra di loke mester bin; ma e realidad ta pertenece na Cristo.’ (Colosencenan 2:17; Hebreonan 10:1) Si Yehova Dios—cu ta bisa ‘mi no ta cambia’—a mira un bida limpi sin contaminacion como un factor asina importante den adoracion berdadero e tempo ei, nos tin cu tuma e asunto di ser limpi den sentido fisico, moral y spiritual masha na serio awe, si nos kier haya su aprobacion y bendicion.—Malakias 3:6; Romanonan 15:4; 1 Corintionan 10:11, 31.

Limpiesa Fisico Ta Recomenda Nos

9, 10. (a) Pakico limpiesa fisico ta importante pa un cristian? (b) Ki comentario hende sa duna hopi bes di e congresonan di Testigonan di Yehova?

⁹ Ainda limpiesa fisico ta un aspecto importante di adoracion berdadero? Aunke no ta limpiesa fisico so ta haci un persona un adorado berdadero di Dios, sigur ta masha apropiado pa un adorado berdadero ta fisicamente limpi te asina leu cu su sircunstancianan ta permiti. Specialmente den nos tempo, masha poco hende ta presta atencion na tene nan curpa, nan paña y nan cas limpi. Pero, bista di otro hende ta cai riba esnan cu si ta duna importancia na e cosnan ei. Esaki por hiba na resultadonan positivo, net manera Pablo a bisa e cristiannan Corintio: “Nos no ta duna motibo di ofensa den nada, pa e ministerio no wordo desacredita, ma den tur cos nos ta recomenda nos mes como sirbidonan di Dios.”—2 Corintionan 6:3, 4.

¹⁰ Na varios ocasion funcionarionan publico a elogia Testigonan di Yehova pa nan comportacion y custumbernan limpi, ordena y respetuoso principalmente na nan congresonan grandi. Por ehempel, relaciona cu un congreso cu nan a tene den e provincia di Savona, Italia, e corant La Stampa a comenta: “Ora bo cana den e luga, loke ta resalta mesora ta con limpi y ordena e hendenan eiden ta.” Despues cu e Testigonan a tene un congreso den un stadion na São Paulo, Brasil, un funcionario di e stadion a bisa su gerente di e team di mantencion: “Di awor padilanti nos kier pa boso limpia e stadion manera e Testigonan di Yehova ta hacie.” Un otro funcionario di e mesun stadion a bisa: “Ora e Testigonan di Yehova kier huur e stadion, ta cu e fechanan so nos ta precupa. Nos no ta worry cu nada otro.”

11, 12. (a) Ki principio di Bijbel nos mester tene na mente ora ta trata di limpiesa personal? (b) Ki preguntanan nos por haci tocante nos custumbernan personal y nos manera di biba?

¹¹ Si orden y limpiesa den nos luga di adoracion por ta un fuente di alabansa na e Dios cu nos ta adora, ta importante tambe pa nos manifesta e cualidadnan aki den nos bida personal. Sinembargo, na nos cas nos por pensa cu ningun hende no tin nada di bisa nos y cu nos por haci kico cu nos kier. Pa loke ta nos manera di bisti y drecha nos curpa, berdad nos tin e libertad pa scohe loke nos ta haya atractivo y confortabel. Toch, hopi bes tur esaki ta masha relativo. Corda cu ora Pablo a papia tocante kico hende ta prefera di come, el a spierta su compañeronan cristian: “Tene cuidou pa e libertad aki di boso, di un manera of otro, no bira un piedra di trompica pa esnan cu ta debil.” Anto el a declara un principio balioso: “Tur cos ta permiti, ma no ta tur cos ta cumbini. Tur cos ta permiti, ma no ta tur cos ta edifica.” (1 Corintionan 8:9; 10:23) Con e conseho di Pablo ta aplica na nos den e asunto di limpiesa?

 ¹² Ta logico pa hende spera cu un sirbido di Dios ta hiba un bida limpi y ordena. Pesei, nos tin cu percura pa e aparencia di nos cas y rond di nos cas no rebaha loke nos ta bisa cu nos ta, esta, sirbido di e Palabra di Dios. Ki clase di testimonio nos cas ta duna tocante nos y nos creencianan? E ta mustra cu nos ta echt anhela pa biba den un mundo nobo di orden y husticia, cu nos ta recomenda otronan asina tanto? (2 Pedro 3:13) Mescos tambe, nos aparencia personal—sea den nos tempo liber of den sirbishi—por haci e mensahe cu nos ta predica sea mas of menos atractivo. Por ehempel, tuma nota di loke reportero di un corant na Mexico a bisa: “Mayoria miembro di Testigonan di Yehova ta hende jong, y loke ta resalta ta nan manera di pela, di bisti y nan limpiesa.” Ta un goso pa por tin hobennan asina den nos seno!

13. Kico nos por haci pa garantisa cu tur aspecto di nos bida diario ta limpi y ordena?

¹³ Naturalmente, ta facil pa bisa cu nos mester percura pa nos curpa, nos cosnan y nos cas ta limpi y ordena. Pa hacie ta otro cos. Loke nos mester no ta aparatonan sofistica ni costoso, sino bon planificacion y esfuerso consistente. Nos tin cu saca tempo pa limpia nos curpa, nos pañanan, nos cas, nos auto, etcetera. E echo cu nos ta druk cu sirbishi, cu baimento di reunion y cu studio personal—hunto cu otro obligacion di bida diario—no ta despensa nos di e necesidad pa keda limpi y aproba den bista di Dios y di hende. E principio conoci cu “tin un tempo stipula pa tur cos” ta aplica tambe na e parti aki di nos bida.—Eclesiastes 3:1.

Un Curason Puro

14. Pakico nos por bisa cu limpiesa moral y spiritual ta asta mas importante cu limpiesa fisico?

¹⁴ Si ta importante pa duna atencion na limpiesa fisico, nos mester ta asta mas interesa ainda den limpiesa moral y spiritual. Nos ta yega na e conclusion aki ora nos corda cu Yehova a rechasa e nacion di Israel, no pasobra nan curpa no tawata limpi, sino pasobra nan a bira sushi den sentido moral y spiritual. Mediante profeta Isaias, Yehova a bisa  nan cu door cu nan ta un “nacion pecaminoso, pueblo carga cu inikidad”, nan sacrificionan, nan wardamento di luna nobo y sabat, si, asta nan oracionnan a bira un carga p’e. Kico nan mester a haci pa bolbe haya Dios su aprobacion? Yehova a bisa nan: “Laba boso mes, haci boso mes limpi; kita e maldad di boso echonan for di mi bista. Stop di haci maldad.”—Isaias 1:4, 11-16.

15, 16. Kico segun Hesus ta contamina hende, y con nos por beneficia di e palabranan di Hesus?

¹⁵ Pa comprende miho e importancia di limpiesa moral y spiritual, wak kico Hesus a bisa e farizeo- y escribanan ora esakinan a laga sa cu su disipelnan no tawata limpi pasobra nan no a laba man prome cu come. Hesus a corigi nan door di bisa: “No ta loke ta bai den boca ta contamina hende, ma loke ta sali for di boca, ta esei ta contamina hende.” Anto Hesus a splica: “E cosnan cu ta sali for di boca ta bin for di curason, y ta esei ta contamina hende. Pasobra for di curason ta sali pensamento malo, matamento, adulterio, fornicacion, ladronicia, testimonio falso, calumnia. Esakinan ta e cosnan cu ta contamina hende; ma come sin laba man no ta contamina hende.”—Mateo 15:11, 18-20.

¹⁶ Kico nos por siña for di Hesus su palabranan? Hesus a mustra cu mal inclinacion di curason y mal deseo ta hiba na loke ta malo, inmoral y impuro. Manera disipel Santiago a declara, “cada un ta wordo tenta ora cu e wordo atrae y seduci door di su mes pasion.” (Santiago 1:14, 15) Pues, si nos no kier cai den e picanan grave cu Hesus a describi, nos tin cu elimina cualkier tendencia cu nos curason por tin di haci e cosnan ei, y tene nan afo. Esei ta nifica cu nos mester tene cuidou cu loke nos ta lesa, mira y scucha. Awe, bou di e capa di libertad di expresion y imaginacion artistico, e industria di entretenimento y di publicidad ta produciendo un fluho interminabel di musica y imagen cu ta diseña pa satisface loke e carni pecaminoso ta antoha. Nos mester ta determina pa no laga ningun idea asina saca raiz den nos curason. E punto clave ta cu pa nos agrada Dios y haya aprobacion  den su bista, nos tin cu vigila constantemente pa por mantene un curason limpi sin contaminacion.—Proverbionan 4:23.

Purifica pa Bon Obra

17. Pakico Yehova a reuni su pueblo den un condicion limpi?

¹⁷ E echo cu Yehova mes ta yuda nos pa nos por tin un posicion limpi su dilanti, sigur ta un bendicion y un proteccion. (2 Corintionan 6:14-18) Pero nos ta comprende tambe cu Yehova a reuni su pueblo den un condicion limpi pa un proposito spesifico. Pablo a bisa Tito cu Cristo Hesus “a duna su mes pa nos, pa e por redimi nos di tur inikidad y purifica pa su mes un pueblo peculiar, cu celo den hacimento di bon obra.” (Tito 2:14) Como un pueblo purifica, ki obra nos lo haci cu celo, es decir, cu un deseo ferviente?

18. Con nos por mustra cu nos tin un celo pa haci bon obra?

¹⁸ Na prome luga, nos tin cu haci esfuerso pa declara publicamente e bon nobo di e Reino di Dios. (Mateo 24:14) Door di haci esei, nos ta presenta na tur hende e speransa di biba pa semper riba un tera cu lo ta liber di tur clase di contaminacion. (2 Pedro 3:13) Bon obra ta encera tambe manifesta e fruta di e spirito di Dios den nos bida di tur dia, y asina glorifica nos Tata celestial. (Galationan 5:22, 23; 1 Pedro 2:12) Y nos no ta lubida esnan cu no ta den e berdad y cu ta ser asota pa desaster natural of tragedia humano. Nos ta corda riba e conseho di Pablo: “Asina anto, mientras nos tin oportunidad, laga nos haci bon na tur hende, y specialmente na esnan cu ta di e famia di fe.” (Galationan 6:10) Tur e tipo di sirbishinan ei cu nos ta rindi cu un curason limpi y motivacion puro ta agrada Dios masha.—1 Timoteo 1:5.

19. Ki bon cosnan ta spera nos si nos sigui pega na un norma halto di limpiesa fisico, moral y spiritual?

¹⁹ Como sirbido di e Dios Haltisimo, nos ta tuma na pecho e palabranan di Pablo: “Mi ta roga boso, rumannan, pa medio di e misericordianan di Dios, pa presenta boso curpanan como sacrificionan bibo y santo, aceptabel pa Dios, cual ta boso sirbishi spiritual di adoracion.” (Romanonan 12:1) Pa nos, ta un privilegio cu Yehova a haci nos limpi. Wel laga nos aprecia esei y haci nos maximo esfuerso pa mantene un norma halto di limpiesa fisico, moral y spiritual. Si nos haci esei, nos lo haya no solamente respet propio y satisfaccion awor, sino tambe e speransa di mira e mundo malbado y contamina djawe—“e prome cosnan”—pasa bai ora Dios “haci tur cos nobo.”—Revelacion 21:4, 5.

Bo Ta Corda?

• Pakico Dios a duna e Israelitanan hopi lei relaciona cu limpiesa?

• Con limpiesa fisico ta haci e mensahe cu nos ta predica mas atractivo?

• Dicon limpiesa moral y spiritual ta asta mas importante cu limpiesa fisico?

• Con nos por mustra cu nos ta un pueblo ‘cu tin celo pa haci bon obra’?

[Preguntanan di Estudio]

[Plachi na pagina 21]

Limpiesa fisico ta haci e mensahe cu nos ta predica mas atractivo

[Plachi na pagina 22]

Hesus a spierta cu mal pensamento ta hiba na malecho

[Plachi na pagina 23]

Como un pueblo purifica, Testigonan di Yehova tin un celo pa haci bon obra