Ta Ken Su Falta? Di Bo of di Genetica?

CIENTIFICONAN ta trahando duro pa purba haya sa ta cua di nos genenan ta causa alcoholismo, homosexualidad, bida promiscuo, violencia, otro comportacionnan abnormal, y asta morto mes. Lo no ta un alivio pa sa cu no ta nos ta responsabel pa nos actonan, ma cu nos ta djis victima di herencia genetico? Hende gusta tira falta riba otro hende of otro cos pa nan fayonan.

Cientificonan ta bisa cu si ta nos genenan tin falta, nan lo por cambia nan y asina elimina caracteristicanan indeseabel uzando manipulacion genetico. Awor cu resientemente nan a logra traha un mapa di henter e set di genenan di hende, e speransanan aki a cuminsa parce mas probabel.

Pero pa esei por ta posibel, ta nos herencia genetico mester ta esun responsabel pa tur nos pica- y fayonan. E recherchenan cientifico a haya suficiente evidencia pa mustra cu ta nos genenan tin falta? Ta claro cu e contesta lo tin un efecto profundo riba e punto di bista cu nos tin di nos mes y di nos futuro. Pero prome cu nos examina e evidencia, lo ta bon pa wak con humanidad a cuminsa.

Con Tur Cos A Cuminsa

Mayoria hende sea conoce of a yega di tende di e relato cu ta mustra con e prome pareha humano, Adam cu Eva, a cai den pica den hofi di Eden. Ta Dios a traha nan for di cuminsamento cu un fayo den nan genenan, un sorto di fayo den nan diseño, cu a obliga nan cai den pica y desobediencia?

Nan Creador tawata Yehova Dios, y tur su obranan ta perfecto. Y El a declara cu su creacion di mas halto riba tera tawata “masha bon.” (Genesis 1:31; Deuteronomio 32:4) Tin mas evidencia di cu E tawata satisfecho cu su trabou: El a duna e prome pareha humano su bendicion y a manda nan bira fructifero, yena tera cu hende y goberna su creacion riba tera. Un persona cu no ta mucho sigur di loke el a caba di traha lo no actua asina.—Genesis 1:28.

Relaciona cu creacion di e prome pareha humano, Bijbel ta conta nos: “Dios a crea hende segun su mes imagen; segun e imagen di Dios el a crea hende; homber y mohe el a crea nan.” (Genesis 1:27) Esei no kiermen cu Dios a traha hende pa nan parc’e den sentido fisico, pasobra “Dios ta [un] Spirito.” (Huan 4:24) Mas bien e kiermen cu Dios a dota hende cu e mesun cualidadnan cu e tin, un sentido di moralidad y un consenshi. (Romanonan 2:14, 15) Nan tawatin  boluntad liber tambe: nan tawata capas pa evalua un asunto y dicidi kico pa haci.

Pero Dios no a laga nos prome mayornan sin guia. Mas bien El a spierta nan kico lo ta e consecuencianan si nan haci malo. (Genesis 2:17) Pesei, evidencia ta mustra cu ora Adam a hay’e enfrenta cu un decision moral, ta scohe el a scohe pa haci loke tawata mas bentahoso den su bista na e momento ei. El a bai tras di su casa ora esaki a haci malo na luga di para pensa riba su relacion cu su Creador, of e efecto di largo alcanse cu su accion lo tin. Ademas, despues el a purba tira e falta riba Yehova bisando cu ta e casa cu Dios a dun’e a pon’e haci malo.—Genesis 3:6, 12; 1 Timoteo 2:14.

Nos por siña hopi for di e manera cu Dios a reacciona riba e pica di Adam cu Eva. E no a purba corigi ningun supuesto fayo den e diseño di nan genenan. Mas bien, El a cumpli cu loke El a bisa cu lo ta e consecuencia di nan accion, y finalmente esei a hiba na nan morto. (Genesis 3:17-19) E historia antiguo aki ta siña nos hopi tocante comportacion di hende. *

Evidencia Cu No Ta Genetica Ta e Problema

Cientificonan tin hopi tempo ta lucha cu e enorme tarea pa haya e causa- y solucionnan genetico pa enfermedad y comportacion di hende. Despues cu seis team di cientifico a traha dies aña largo, nan a logra identifica e gene cu tin di aber cu e enfermedad di Huntington, aunke ainda nan no tin ni e menor idea con e gene aki ta causa e enfermedad. Sinembargo, den un informe tocante e investigacion aki, Scientific American a cita Evan Balaban, biologo di Harvard, kende a bisa cu lo ta “hopi pero hopi mas dificil pa descubri genenan cu tin di aber cu desviacion den comportacion.”

De echo, ainda nan no a logra establece e relacion entre genenan spesifico cu cierto formanan di comportacion. Por ehempel, un informe den Psychology Today tocante esfuersonan pa haya e causa genetico di depresion ta bisa: “Datonan disponibel tocante e enfermedadnan mental principal ta mustra bon cla cu no por mara e enfermedadnan aki simplemente na causanan genetico.” E informe ta duna un ehempel: “Apenas 1 porshento di Mericano cu a nace prome cu 1905 a sufri di depresion prome cu nan a pasa 75 aña. Pero 6 porshento di Mericano cu a nace mei siglo despues a sufri di depresion prome cu nan a pasa 24 aña di edad!” Pues, nos por conclui cu ta factornan externo of social so por ocasiona un cambio asina drastico den asina poco tempo.

 Kico e estudionan aki y hopi otro ta duna nos di comprende? Cu aunke nos genenan por ta hunga un papel importante den forma nos personalidad, claramente mester tin otro cos cu ta haci influencia. Un factor hopi importante ta nos ambiente, y esaki a cambia drasticamente ultimo temponan. Relaciona cu loke hobennan di awendia ta bini den contacto cu ne via dibirticion popular, e buki Boys Will Be Boys, ta remarca cu no ta facil pa mucha desaroya principionan moral sano si nan ta “crece mirando miles y miles di ora di programa na television y pelicula den cua nan ta wak con hende ta ataca otro, tira otro, hinca otro, saca mondongo di otro, kap otro na pida pida, soya otro of kap otro su man cu pia kita afo. Y mescos ta conta si mucha ta crece scuchando musica cu ta glorifica violacion, suicidio, droga, alcohol y descriminacion.”

Ta bisto cu Satanas, “e dios di e mundo aki”, a crea un ambiente cu ta stimula hende su deseonan di mas baho. Y cua di nos por nenga cu e ambiente aki ta eherce un influencia fuerte riba nos tur?—Huan 12:31; Efesionan 6:12; Revelacion 12:9, 12.

Raiz di e Problemanan di Humanidad

Manera nos a mira caba, hende su problemanan a cuminsa ora e prome pareha humano a comete pica. Kico tawata e resultado? Maske e generacionnan di desendiente di Adam no ta responsabel pa e pica cu Adam a comete, nan tur ta nace cu pica, imperfeccion y morto como nan herencia den bida. Bijbel ta splica: “Pesei, mescos cu door di un hende pica a drenta den mundo, y morto door di pica, y asina morto a pasa pa tur hende, pasobra tur a peca.”—Romanonan 5:12.

Definitivamente, nos estado imperfecto ta un handicap. Pero esei no kiermen cu nos no tin ningun responsabilidad moral. Bijbel ta bisa cu esnan cu pone fe den Yehova su percuracion pa bida y cu pone nan bida na harmonia cu Dios su normanan, lo haya su aprobacion. Den su bondad amoroso Yehova a haci un percuracion misericordioso pa cumpra humanidad bek, como si fuera recuperando loke Adam a perde. E percuracion cu El a haci ta e sacrificio di rescate di su Yiu perfecto Hesucristo, kende a bisa: “Dios a stima mundo asina tanto, cu El a duna su Yiu unigenito, pa ken cu kere den dje no bai perdi, ma tin bida eterno.”—Huan 3:16; 1 Corintionan 15:21, 22.

Apostel Pablo a expresa e aprecio profundo cu el a sinti pa e percuracion aki door di declara: “Hende miserabel cu mi ta! Ken lo libra mi di e curpa di morto aki? Mi ta duna gradicimento na Dios door di Hesucristo, nos Señor!” (Romanonan 7:24, 25) Pablo tawata sa cu si el a sucumbi na pica pa motibo di debilidad, e por a pidi Dios pordon a base di e sacrificio di rescate di Hesucristo. *

Mescos cu den prome siglo, awe tambe tin miyones di hende cu tawata hiba un bida hopi robes, of cu tawata den un situacion cu a parce sin speransa, pero cu a gana conocemento exacto di e berdad di Bijbel, a haci e cambionan necesario den nan bida, y awor ta den posicion pa ricibi e bendicion di Dios. E cambionan cu nan mester a haci no tawata facil, y hopi di nan ainda tin cu lucha contra mal inclinacion. Pero cu yudansa di Dios nan por mantene nan integridad y sirbie cu goso. (Filipencenan 4:13, NW) Wak djis un ehempel di un hende cu a haci cambionan drastico pa e por a agrada Dios.

Un Experencia Animante

“Tempo mi tawata un mucha homber hoben na un internat, mi a cai den practicanan homosexual, maske nunca mi no a considera  mi mes un homosexual. Mi mayornan a diborcia, y mi tawata anhela e cariño di mayor cu nunca mi a ricibi. Ora mi a caba scol mi a bai den servicio militar obligatorio. Tawatin un grupo di homosexual den e baraknan net banda di esun di mi. Door cu mi a envidia nan estilo di bida, mi a cuminsa asocia cu nan. Despues di asocia cu nan pa rond di un aña mi a cuminsa considera mi mes un homosexual. Mi tawata rasona cu ‘ta asina mi ta, y mi no por haci nada pa cambia.’

Mi a cuminsa siña papia manera nan y bai club di homosexual, caminda tawatin droga y alcohol na abundancia. Maske e bida ei a parce hopi excitante y atractivo, en realidad e ta un cos repugnante. Den mi mes mi tawata sinti cu e tipo di relacionnan ei ta innatural, y cu nan no tawata hiba mi ningun caminda.

Den un pueblo chikito mi a topa un Salon di Reino di Testigonan di Yehova net ora tawatin un reunion. Mi a drenta scucha e discurso cu a papia di e Paradijs den futuro. Despues mi a topa un par di Testigo, y nan a invita mi pa bai un asamblea. Mi a bai, y mi a keda sorprendi di mira famianan felis ta adora hunto. Mi a cuminsa studia Bijbel cu Testigonan di Yehova.

Apesar cu tawata un lucha, mi a cuminsa pone na practica e cosnan cu mi tawata siña for di Bijbel. Mi a logra libra di tur mi practicanan sushi. Despues di studia 14 luna, mi a dedica mi bida na Yehova y batisa. Pa di prome bes den mi bida mi tawatin amigo di berdad. Mi por a yuda otro hende siña e berdad di Bijbel, y awor mi ta sirbi como sirbido ministerial den e congregacion cristian. Yehova a bendiciona mi di berdad.”

Nos Ta Responsabel

Purba tira tur e falta pa nos mal comportacion riba nos herencia genetico simplemente no ta e solucion. Na luga di yuda nos resolve of vence nos problemanan, segun e revista Psychology Today, esei “por pone nos sinti cu no tin nada cu nos por haci, y ta net e sintimento ei ta e raiz di hopi di nos problemanan. En bes di pone cu nos ta cai menos den e problemanan aki, ta parce cu e pensamento ei ta haci nan bira piyo.”

Ta berdad cu tin influencianan fuerte ta bringa nos, entre otro nos propio tendencia pa haci pica, y Satanas su esfuersonan pa kita nos di sirbi Dios. (1 Pedro 5:8) Tambe ta berdad cu nos genenan por influencia nos di un manera of otro. Pero di ningun manera nos no ta sin yudansa. Cristiannan berdadero tin aliadonan poderoso: Yehova, Hesucristo, Dios su spirito santo, su Palabra Bijbel y e congregacion cristian.—1 Timoteo 6:11, 12; 1 Huan 2:1.

Prome cu e nacion di Israel a drenta e Tera Priminti, Moises a recorda e pueblo cu nan tawatin un responsabilidad dilanti Dios. El a bisa nan: “Mi a pone bida y morto boso dilanti, e bendicion y e maldicion. Pesei, scohe bida pa bo biba, abo y bo desendientenan, door di stima SEÑOR bo Dios, door di obedece su bos y door di tene duro na dje.” (Deuteronomio 30:19, 20) Awe tambe, ta cada ken tin cu dicidi personalmente si lo e sirbi Dios y cumpli cu su rekisitonan. E decision ta den bo man.—Galationan 6:7, 8.

[Nota]

[Plachi na pagina 9]

Ta un defecto genetico a obliga Adam cu Eva cai den pica?

[Plachi na pagina 10]

Ta cada ken mester para responsabel pa e decisionnan cu e tuma?

[Reconocemento]

Uzado di droga: Godo-Foto

[Plachi na pagina 11]

Esfuersonan pa haya genenan cu ta determina comportacion di hende no a duna fruta

[Plachi na pagina 12]

Pone loke Bijbel ta bisa na practica por yuda hende sinsero cambia