Algo Mas Balioso Cu e Tesoronan di Egipto

MOISES ta un di e gran personahenan historico. Cuater buki di Bijbel, for di Exodo te Deuteronomio, ta conta casi exclusivamente con Dios a trata cu Israel bou di e liderato di Moises. Moises a dirigi nan exodo for di Egipto, a sirbi como intermediario di e pacto di Lei y a guia Israel te na frontera di e Tera Priminti. Moises a lanta den e cas di famia di Farao, pero a bira e comandante oficial di e pueblo di Dios, y tambe profeta, hues y escritor inspira pa Dios. Toch e tawata “masha humilde, mas cu tur homber.”—Numbernan 12:3.

Mayoria detaye cu Bijbel ta duna tocante Moises tin di aber cu e ultimo 40 añanan di su bida, e periodo cu ta core for di e tempo cu Israel a ser libra for di sclabitud te na su morto cu 120 aña di edad. Di 40 pa 80 aña di edad, e tawata wardado di bestia na Madian. Pero segun un fuente, “talbes e parti mas interesante di su bida y toch esun menos conoci”, ta e prome 40 añanan, for di ora cu el a nace te ora el a hui for di Egipto. Kico exactamente nos sa di e periodo aki? Con e sircunstancianan bou di cua Moises a ser lanta por a afecta e tipo di hende cu el a bira? Kico ta e cosnan cu lo por a influencia su bida? Kico ta e dificultadnan cu lo e tawatin cu enfrenta? Y kico tur esaki por siña nos?

Sclabitud den Egipto

E buki di Exodo ta conta cu como cu e Israelitanan cu a bin establece nan mes den Egipto a aumenta rapidamente, un di e faraonan a cuminsa haya miedo di nan. Keriendo cu e tawata actua ‘sabi’, el a purba reduci nan cantidad door di forsa nan traha como catibo bou di supervision di capatas cu tawata cla pa suta nan. Nan mester a carga cos, traha cement di klei y produci un cantidad minimo di bloki pa dia.—Exodo 1:8-14; 5:6-18.

E descripcion aki di e Egipto cu Moises a nace aden ta cuadra perfectamente cu historia. Papironan di antiguedad y e pinturanan den por lo menos un kelder ta describi con e catibonan tawata traha bloki di lodo den e di dos milenio prome cu Era Comun of mas prome. E oficialnan responsabel pa percura e blokinan tawata  organisa centenares di catibo den gruponan di 6 pa 18 persona bou di un forman of ploegleider. Esakinan mester a coba saca klei y hiba yerba seco pa e cura di traha bloki. Obreronan di diferente nacionalidad tawata saca awa, y cu chapi nan tawata mescla esaki cu klei y yerba seco. For di malchi vierkant nan tawata produci hopi careda di bloki. E blokinan tawata seca den solo pa despues otro obreronan carga nan cu yugo hiba pa e sitio di construccion. Tin bes nan tawata uza un baan pa baha e blokinan. E hefenan Egipcio, arma cu bara, tawata sinta of cana controla e trabou.

Un papel antiguo riba cua tawata registra detayenan di produccion ta referi na 39.118 bloki cu 602 obrero a traha, loke ta nifica un promedio di 65 bloki pa persona pa cada warda. Y un documento di siglo 13 prome cu Era Comun ta bisa: “E hombernan ta trahando . . . nan cantidad minimo di bloki pa dia.” Tur esaki ta pone nos corda e trabou forsa cu e Israelitanan mester a haci manera e buki di Exodo ta describi.

Opresion no a logra reduci e poblacion Hebreo. Al contrario, “mas [e Egipcionan] tawata aflihi nan, mas nan tawata multiplica . . . , asina cu e Egipcionan tawata teme e yiunan di Israel.” (Exodo 1:10, 12) Pesei, Farao a manda prome pa e parteranan Hebreo y despues henter su pueblo mata tur yiu homber Israelita cu caba di nace. Ta den e sircunstancianan horibel aki, Jocabed y Amram a haya un bunita yiu homber, Moises.—Exodo 1:15-22; 6:20; Echonan 7:20.

Scondi, Haya y Adopta

Moises su mayornan no a obedece e ordo di Farao pa mata nan yiu chikito; mas bien nan a scond’e. Nan a haci esei apesar di e echo cu spion- y inspectornan tawata cana haci nan chekeonan pa busca criaturanan resien naci? Nos no sa sigur. Sea cual sea e caso, despues di tres luna Moises su mayornan no por a scond’e mas. Pesei su mama desespera a traha un macutu di papiro, a fur’e cu breu pa awa no drent’e y a pone su yiuchi den dje. Den un sentido Jocabed a obedece, no e spirito, pero si e letter di e ordo di Farao pa tira tur yiu homber resien naci di e Hebreonan den Nilo. Anto Miriam, ruman mohe mayo di Moises, a bai para den banda pa tira bista.—Exodo 1:22–2:4.

Nos no sa si e intencion di Jocabed tawata pa laga net e yiu mohe di Farao haya Moises ora e bin baña den e riu, pero ta esei ta loke a pasa si. E princes a realisa cu esaki tawata un yiu di e Hebreonan. Kico el a haci? El a sigui ordo di su tata y laga mat’e? No, el a reacciona manera mayoria hende mohe lo haci di naturalesa. El a mustra compasion.

Mesora Miriam a bin banda di dje. ‘Bo kier mi bai yama un mama di lechi pa cria e yiu na  pecho pa bo?’ el a puntra. Algun hende ta haya e pasashi aki colmo di ironia. E ruman mohe di Moises a haci net contrario cu Farao, kende hunto cu su conseheronan a traha un complot pa trata na un manera ‘sabi’ cu e Hebreonan. Claro cu ta ora e princes a bai di acuerdo cu e plan di Moises su ruman mohe, e bienestar di Moises por a ser garantisa. “Si, bai!” e yiu mohe di Farao a responde, y mesora Miriam a manda yama su mama. Pues, como resultado di un negociacion extraordinario, Jocabed a ser contrata pa lanta su propio yiu cu proteccion real.—Exodo 2:5-9.

E compasion di e princes sigur a forma un contraste cu e crueldad di su tata. E yiu mohe no tawata ignorante ni e no a ser engaña tocante e mucha. Duele di curason a motiv’e pa adopta e mucha, y e echo cu el a bai di acuerdo cu e idea di un mama di lechi Hebreo ta mustra cu e no tawatin e mesun prehuicio cu su tata.

Criansa y Educacion

Jocabed “a tuma e mucha y a cri’e. Y e mucha a crece bira grandi, y el a hib’e pa yiu mohe di Farao y el a bira su yiu.” (Exodo 2:9, 10) Bijbel no ta bisa cuanto tempo Moises a biba serca su mes mayornan. Algun hende ta pensa cu esei mester tawata por lo menos te ora el a stop di bebe pecho—dos pa tres aña—pero por tawata mas tanto. Exodo ta bisa simplemente cu el “a crece bira grandi” serca su mayornan, ma esei no ta duna ningun indicacion di edad. Un cos ta sigur, sin duda Amram y Jocabed a probecha di e tempo pa haci nan yiu conciente cu ta Hebreo e ta y pa siñ’e tocante Yehova. Tempo a demostra con bon nan a logra inculca fe y amor pa husticia den curason di Moises.

Ora nan a entrega Moises bek den man di e yiu mohe di Farao, el a ser educa “den tur e siñansa di e Egipcionan.” (Echonan 7:22) Esei lo a nifica preparacion pa e por a ocupa cargonan den gobierno. E siñansa amplio di e Egipcionan a inclui matematica, geometria, arkitectura, construccion y otro arte y ciencia. Probablemente e famia real lo tawata kier pa e ricibi instruccion den e religion egipcio tambe.

Kisas Moises a ricibi su educacion privilegia hunto cu otro yiunan di rei. “Yiunan di gobernantenan stranhero cu a ser manda of tuma como rehen na Egipto pa ser ‘civilisa’ y despues manda bek pa goberna como rei subordina fiel na Farao” tambe a beneficia di e educacion elitario ei. (The Reign of Thutmose IV, di Betsy M. Bryan) Parce cu crèchenan conecta cu palacionan real tawata prepara hobennan pa sirbi como oficial di corte. * Inscripcionnan cu ta data for di e periodonan di e Reino Mediano y Reino Nobo di Egipto ta revela cu asta como adulto varios asistent di personal di Farao y oficialnan halto di gobierno a keda cu e titulo honorabel di “Mucha di Crèche.”

Bida den e corte lo tawata un prueba pa Moises. Esei a ofrece rikesa, luho y poder. Tambe el a presenta peligernan moral. Con Moises lo a reacciona? Na ken lo e tawata leal? E tawata un adorado di Yehova di fondo di su curason, ruman di e Hebreonan oprimi, of el a prefera tur loke Egipto pagano por a ofrece?

 Un Decision Crucial

Tempo cu Moises tawatin 40 aña, e edad cu lo a permitie bira un Egipcio natural, ‘el a sali bai serca su rumannan pa mira nan trabou pisa.’ Loke el a haci despues a demostra cu esaki no tawata djis pa curiosidad; el a anhela pa yuda nan. Ora el a mira un Egipcio bati un Hebreo, el a interveni, matando e opresor. E acto ei a mustra cu e curason di Moises tawata cu su rumannan. Probablemente e homber cu Moises a mata tawata un oficial cu tawata cumpliendo cu su tarea. Den bista di e Egipcionan, Moises tawatin tur motibo pa ta leal na Farao. Toch, loke a motiva Moises tawata amor pa husticia, un calidad cu a ser manifesta mas aleu ora e siguiente dia el a lanta contra un Hebreo cu tawata maltrata su compañero inhustamente. Moises a desea di libra e Hebreonan for di sclabitud severo, pero ora Farao a haya sa di Moises su deslealtad y a purba mat’e, Moises a hay’e obliga di hui bai Madian.—Exodo 2:11-15; Echonan 7:23-29. *

E momento cu Moises kier a libra e pueblo di Dios no a cuadra cu e tempo di Yehova. No obstante, su accionnan a revela cu e tawatin fe. Hebreonan 11:24-26 ta bisa: “Pa medio di fe Moises, ora cu el a crece bira grandi, a nenga di wordo yama yiu di Farao su yiu mohe, scohiendo pa mas bien sufri maltrato hunto cu e pueblo di Dios, cu gosa di e placernan pasahero di pica.” Pakico? Pasobra el a ‘considera e reproche di Cristo rikesanan mas grandi cu e tesoronan di Egipto, pasobra e tawatin su bista riba e recompensa.’ E uzo excepcional aki di e expresion “Cristo” cu ta nifica “esun ungi”, ta cuadra cu Moises den e sentido cu mas despues el a ricibi un tarea special directamente for di Yehova.

Djis imagina bo! Moises a haya un criansa cu ta solamente un aristocrat Egipcio por a ricibi. Door di su posicion lo e por a sigui un carera briyante y haya tur placer di mundo. Toch el a rechasa tur esei. El a mira cu e no por a stima Yehova y Su husticia anto keda biba den e corte di Farao, e opresor. E tawata sa di e promesanan cu Dios a duna su antepasadonan Abraham, Isaac y Yacob y a medita riba nan, pesei el a prefera e aprobacion di Dios. Como resultado, Yehova por a duna Moises un tarea masha importante pa cumpli cu Su proposito.

Nos tur ta haya nos ta tuma decision riba loke ta mas importante den bida. Mescos cu Moises, tal bes bo ta para dilanti un decision dificil. Bo tin cu bandona cierto custumbernan of supuesto bentahanan, sin importa e sacrificio? Si bo ta para dilanti un decision asina, corda cu Moises a considera amistad cu Yehova mas balioso cu tur e tesoronan di Egipto y e no a lamenta esei.

[Nota]

[Cuadro na pagina 11]

Contract pa Duna Yiu Pecho

Normalmente ta un mama mes ta duna su yiu pecho. Sinembargo, segun e analista di Bijbel, Brevard Childs den Journal of Biblical Literature, “den algun caso famianan aristocrat [di Medio Oriente] tawata contrata un mama di lechi. E custumber aki tawata comun tambe ora e mama no por a alimenta su yiu of caminda e mama tawata desconoci. E mama di lechi a asumi e responsabilidad di lanta e mucha y dun’e pecho durante e tempo stipula.” A haya varios papiro bieu cu contract di mama di lechi den e regionnan di Medio Oriente. E documentonan aki ta confirma loke tawata un custumber comun for di e periodo sumirio te den e periodo di cultura Griego den Egipto. Rasgonan comun di e documentonan aki ta declaracion di e individuonan envolvi, e tempo cu e contract ta cubri, condicionnan di trabou, spesificacionnan relaciona cu alimentacion, but pa kibramento di contract, cuanto e pago lo ta y con lo paga. Childs ta splica cu normalmente “e periodo pa duna pecho tawata dura dos pa tres aña. E mama di lechi tawata lanta e mucha na cas di e mama di lechi mes, pero sa sosode cu nan mester a debolbe e mucha na su mayor pa esaki control’e.”

[Plachi na pagina 9]

Manera un pintura di antiguedad ta mustra, trahamento di bloki na Egipto no a cambia masha for di tempo di Moises

[Reconocemento]

Ariba: Pictorial Archive (Near Eastern History) Est.; abou: Erich Lessing/Art Resource, NY