Pregunta di Lector

Si un persona comete suicidio, un minister cristian lo por duna un discurso di entiero?

Ta keda na cada minister cristian si su consenshi ta permitie duna un discurso di entiero pa un persona cu aparentemente a comete suicidio. Ora e ta tuma su decision, e mester puntra su mes lo siguiente: Con Yehova ta mira suicidio? Ta e persona mes a mata curpa? Ta un trastorno mental of emocional a hiba na e suicidio? Con e comunidad local ta mira suicidio?

Como cristian, nos ta interesa den Yehova su punto di bista di suicidio. Pa Yehova bida humano ta algo precioso y sagrado. (Genesis 9:5; Salmo 36:9) Un persona cu ta mata curpa intencionalmente ta comete homicidio, y pesei e ta desagrada Dios. (Exodo 20:13; 1 Huan 3:15) Esei ta nifica cu no por duna un discurso di entiero pa esun cu a comete suicidio?

Tuma por ehempel e caso di Rei Saul di Israel. Ora el a realisa cu lo e no sobrevivi su bataya final contra e Filisteonan, en bes di sufri un morto humiliante na man di su enemigonan, “Saul a cohe su spada y a tira su curpa riba dje.” Ora e Filisteonan a haya su cadaver, nan a peg’e riba e muraya di e stad di Bet-san. Ora e habitantenan di Jabes-galad a haya sa kico e Filisteonan a haci, nan a kita e cadaver y kim’e. Anto nan a cohe su wesonan y dera esakinan. Asta nan a yuna shete dia, locual tawata un rito tradicional di e Israelitanan pa lamenta morto di un ser keri. (1 Samuel 31:4, 8-13; Genesis 50:10) Ora David, e ungi di Yehova, a haya sa loke e habitantenan di Jabes-galad a haci, el a bisa nan: “Cu SEÑOR bendiciona boso, pasobra boso a mustra e cariño aki na Saul, boso señor, y a der’e. Y awor, cu SEÑOR mustra cariño y berdad na boso.” (2 Samuel 2:5, 6) E Scritura no ta duna ningun indicacion cu Dios a condena e habitantenan di Jabes-galad pasobra nan a haci loke por ser considera un ceremonia di entiero pa Rei Saul. Compara esei cu e caso di esnan cu no a haya un entiero pa motibo di nan malechonan. (Yeremias 25:32, 33) Un minister cristian lo por pensa riba e relato di Saul ora e ta dicidi si e por duna un discurso di entiero pa un persona cu a comete suicidio.

Tambe e minister lo kier considera e proposito di un discurso di entiero. Distinto di hende cu ta kere den inmortalidad di alma, Testigonan di Yehova no ta dera nan defunto cu e idea eroneo cu esaki a pasa pa un miho mundo. E proposito principal di e discurso di entiero ta pa consola esnan cu a keda atras y pa duna un testimonio tocante e condicion di e mortonan na esnan cu ta asisti. E discurso no ta yuda e defunto mes cu net nada. (Eclesiastes 9:5, 10; 2 Corintionan 1:3-5) Un otro motibo importante pa tene un discurso di entiero ta pa yuda tur persona cu asisti reflexiona riba con cortico bida ta. (Eclesiastes 7:2) E discurso di entiero pa e persona cu a comete suicidio lo cumpli cu e propositonan aki?

Algun hende por sinti cu ta e persona mes a kita su bida intencionalmente, completamente conciente cu el a peca contra Yehova. Pero ta posibel semper pa proba un sintimento asina? Kisas e tawata un acto descabeya? Algun hende cu ta purba comete suicidio ta cambia di pensamento y no ta sigui cu nan intencion. Despues di morto un persona no por repenti pa loke el a haci.

Un otro factor importante ta e trastorno mental y emocional envolvi den hopi suicidio. E hendenan aki ta berdaderamente victima di suicidio. Segun estadistica, 90 porshento di esnan cu ta comete suicidio tin un of otro problema mental,  emocional of di adiccion. Yehova lo pordona hende cu ta mata curpa den un condicion mental asina? Nos no ta den un posicion pa husga si e defunto a comete un pica impordonabel den bista di Yehova. Un minister cristian por tuma e sircunstancianan y historia medico di e defunto na consideracion ora e ta puntra su mes si e por duna un discurso di entiero pa e persona cu a comete suicidio.

Tin un aspecto mas pa considera: Con hende den e comunidad ta mira e suicidio y e morto di e persona? Esaki ta specialmente un punto di precupacion pa e ancianonan cu ta interesa den e reputacion di e congregacion local di Testigo di Yehova. Dependiendo di e comunidad su punto di bista relaciona cu suicidio, y particularmente relaciona cu e caso en cuestion, e ancianonan lo por prefera pa no duna nan respaldo publicamente na un entiero asina of pa ten’e den Salon di Reino.

No obstante, si e famianan pidi un minister cristian duna un discurso, kisas e ta sinti cu e por haci esei, pero no como representante di congregacion. Si e dicidi di dal bai, e mester ta discreto y no menciona nada spesifico den direccion di un posibel resureccion pa e persona cu a comete suicidio. Cualkier futuro speransa pa e defunto ta keda den man di Yehova, y ningun hende ta den posicion pa bisa si e defunto lo haya un resureccion of no. E minister por consentra riba e berdadnan biblico tocante morto y ofrece consuelo pa esnan cu a keda na pena.